Timothea Hnêna Lehkhathawn Pakhatna
3 Tu pawhin kohhran upa* nih tuma ṭan a lâk chuan hnathawh ṭha a duh a ni, tih thu hi a rin tlâk a ni. 2 Upa chu sawisêl bo, nupui pakhat nei, kawng engkima inthunun thei, mi rilru fîm,* fel taka thil ti ṭhîn, khual chhâwn thiam, mi dangte zirtîr tûra tling, 3 zu ruih hmang lo, tharum thawh chîng lo, a âwm tâwk hre mi, mi hnial hrât lo, sum ngaina lo, 4 a chhûngkua ṭha taka enkawl thiam mi a ni tûr a ni a, a fate pawh thuâwih tak leh nungchang ṭha tak an ni bawk tûr a ni. 5 (Miin ama chhûngkua ngei pawh enkawl dân a thiam si loh chuan, engtin nge Pathian kohhran a enkawl theih ang?) 6 Ringtu thar a ni tûr a ni lo; chuti lo chuan, a lo chapo vang a, Diabola chunga rorêlna ang kha a tawng ve palh ang e. 7 Chu bâkah, mite sawichhiata* a awm loh nân leh Diabola thanga a awh lohna tûrin, pâwn lam mite lakah pawh hming ṭha a nei bawk tûr a ni.
8 Chutiang bawkin, kohhranho rawngbâwltute chu mi zahawm, kam tam lo,* uain heh lo, duhâm taka mahni hlâwkna tûr zawng lo, 9 chhia leh ṭha hriatna thiang tak nêna rinna thurûk thianghlim vawng tlat mi an ni tûr a ni.
10 Tin, chûng mite chu an tlin leh tlin loh fiah hmasak phawt ni sela, chumi hnuah sawisêl bo an nih chuan rawngbâwltu hna thawk rawh se.
11 Chutiang bawkin, hmeichhiate pawh mi zahawm, mi sawichhiat chîng lo, mahni inthunun thei leh, engkima rinawm an ni tûr a ni.
12 Kohhranho rawngbâwltute chu nupui pakhat nei, mahni fate leh mahni in chhûng ṭha taka enkawl thiam ni rawh se. 13 Ṭha taka rawngbâwl mipate chuan hming ṭha chherin, Krista Isua rinnaah chuan zalên taka thusawi theihna an nei a ni.
14 I hnêna lo kal thuai inbeisei mah ila, hêng thute hi i tân ka ziak a ni, 15 ka lo kal thuai theih loh palh pawha Pathian chhûngte zînga i awm dân tûr i hriat theihna tûrin; Pathian chhûngte chu Pathian nung kohhran, thutak ban leh innghahna an ni. 16 Tin, he Pathian ngaihsakna thurûk thianghlim: ‘Ani chu tisaa tih lan a ni a, thlarauva mi fela puan a ni a, vântirhkohte hnênah a inlâr a, hnamte zîngah a chanchin puan a ni a, khawvêla mite’n an ring a, ropui taka lâk chhohvin a awm ta,’ tih hi hnial rual lohvin a ropui a ni.