Johana Hnêna Thu Puan Chhuah
6 Berâm No chuan lehkha zial chârna pasarih zînga pakhat a phelh lai ka hmu a, thil nung palite zînga pakhat chuan khawpui ri ang maiin: “Lo kal rawh!” a tih ka hria a. 2 Ngai teh! Sakawr vâr ka hmu a, a chunga chuang chuan thal ngul a keng a; a hnênah lallukhum pêk a ni a, hneh chung leh hnehna famkim chang tûrin a kal chhuak ta a.
3 Lehkha zial chârna pahnihna a han phelh chuan, thil nung pahnihna chuan: “Lo kal rawh!” a tih ka hria a. 4 Sakawr dang, a sen a lo chhuak a, leia mite an inthah tawn theih nâna lei aṭanga remna la bo tûrin thuneihna a dawng a; tin, a hnênah ngûnhnâm lian tak pêk a ni a.
5 Lehkha zial chârna pathumna a han phelh chuan, thil nung pathumna chuan: “Lo kal rawh!” a tih ka hria a. Tin, ngai teh! Sakawr dum ka hmu a, a chunga chuang chuan bûkna a keng a. 6 Thil nung palite zîng aṭanga lo chhuak ni âwm tak aw ka hria a, chu aw chuan: “Denarii* khatin buh quart tehkhâwng* khat, denarii* khatin barli quart tehkhâwng* thum; oliv hriak leh uain erawh chu ti chhe suh,” tiin a sawi a.
7 Lehkha zial chârna palina a han phelh chuan, thil nung palina chuan: “Lo kal rawh!” a tih ka hria a. 8 Ngai teh! Sakawr dâng ka hmu a, a chunga chuang hming chu Thihna a ni. Ani chu Thlânin* a zui a. Leia mihring hmun lia ṭhena hmun khatte chu ngûnhnâm sei tak te, ṭâm te, thihna hri te leh, leia sakawlh hmangtea ti hlum tûrin an hnênah thuneihna pêk a ni a.
9 Lehkha zial chârna pangana a han phelh chuan, maichâm hnuaiah chuan Pathian thu avâng leh an thu hriattîrte avânga an tih hlum tâkte nunna* ka hmu a. 10 Anni chu: “Lalpa Chungnungber, thianghlim leh dik, leia awmte rorêlsak lo leh kan thisen phuba la lovin eng chen nge i awm dâwn?” tiin aw ring takin an au va. 11 Tin, anni chu kawrfual vâr pêk an ni ṭheuh va, anmahni anga thah mai tawh tûr an bâwihpuite leh an unaute zât a kim hma loh chuan rei lo tê la nghâk rih tûra hrilh an ni.
12 Lehkha zial chârna parukna a phelh ka hmu a, lîr nasa tak a lo nghîng a; nî chu sahmula* siam saiip ang maiin a lo dum a, thla chu thisen ang maiin a lo sen ta vek a, 13 thli na takin theipui kûng a nuai a, a rah helte a ṭîl angin, vâna arsite chu leiah a tla a. 14 Vân chu lehkha zial anga inzialin a bo ta a, tlâng zawng zawng leh thliarkâr zawng zawng chu an awmna hmun aṭangin sawn an ni ta vek a. 15 Tin, leia lal te, thuneitu sâng te, sipai hotu te, mi hausa te, mi chak te, bâwih zawng zawng te leh, mi zalên zawng zawngte chu pûkahte leh tlânga lungpui kârahte chuan an biru a. 16 Anni chuan tlângte leh lungpuite hnênah chuan: “Min delh ula, lalṭhutthlênga Ṭhua lakah leh Berâm No thinrimna lakah hian min thukru rawh u, 17 an thinrimna ni ropui tak chu a lo thleng ta si a, chumi lak aṭang chuan tu nge dam chhuak thei ang?” an ti a.