Thessalonika Khuaa Mite Hnêna Lehkhathawn Pahnihna

1 Kei Paula, Silvana* leh, Timothea te hian kan Pa Pathian leh Lalpa Isua Krista nêna inpumkhat Thessalonika khuaa kohhran hnênah he lehkha hi kan thawn a ni:

2 Pa, Pathian leh Lalpa Isua Krista hnên aṭanga khawngaihna nasa tak leh thlamuanna* in hnênah awm rawh se.

3 Unaute u, nangmahni avângin Pathian hnênah lâwmthu sawi fo tûr rêng kan ni. In rinna nasa taka a ṭhan chhoh avâng leh, in inhmangaih tawnna a pun zêl avângin chutianga tih chu a inâwm hle. 4 Chumi avâng chuan, tih duhdahna leh hrehawm in tawrhna zawng zawngah, in chhelna leh in rinna avângin Pathian kohhranho zîngah kan chhuang hle che u a ni. 5 Chu chu Pathianin fel takin ro a rêl tih finfiahna a ni a; chumi avâng chuan, Pathian Rama lût tlâk ni tûra ruat in ni. Chu chu hrehawm in tawrh chhan a ni si a.

6 Chu Pathian rorêlna chu a fel a ni, nangmahni ti hrehawmtute chu hrehawmnain a thungrûl dâwn si a. 7 Lalpa Isua vân aṭanga a vântirhkoh thiltithei takte nên mei alh zînga a lo lan hunah chuan, nangni tûna hrehawm tuarte hi in hrehawmnate kan ruala lâk kiansak in ni ang. 8 Chutih hunah chuan, Pathian hre lote leh kan Lalpa Isua chanchin ṭha âwih lote chungah phuba a rawn la ang. 9 Chûng mite ngei chu thiam loh chantîr an ni ang a, Lalpa hma ata leh a chakna ropui tak lak ata chatuana tih boralin an awm ang. 10 A mi thianghlimte nên chawimawia awm tûra kan Lalpa a lo kal hunah chuan, amaha rinna lantîrtu zawng zawngte chuan an chawisâng ang a; tin, kan thu hrilh che u kha in rin avângin, nangni pawh an zîngah in tel ve ang.

11 Chuvângin, kan Pathianin a kohna dawng tlâka a ngaih theihna tûr che uin, in tân kan ṭawngṭai fo ṭhîn a. A thiltihtheihna hmanga nangmahnia thil ṭha a tih duh zawng zawng a hlen chhuah theihna tûr leh, in rinna thil tihte a hlawhtlin theihna tûrin kan dîl bawk ṭhîn. 12 Chutichuan, kan Pathian leh Lalpa Isua Krista khawngaihna nasa tak ang zêlin, nangmahni avângin kan Lalpa Isua hming chawimawiin a awm thei ang a; tin, nangni pawh amah nên pumkhat in ni thei bawk ang.