Timothea Hnêna Lehkhathawn Pakhatna

2 Chutichuan, a hmasa berin ngenna te, ṭawngṭaina te, ṭawngṭaisakna te leh, lâwmthu sawinate chu mi chi tinrêng tân hlân tûrin ka ngên a che. 2 Lalte leh thuneitu zawng zawngte tân pawh dîlsak ang che, engkima Pathian ngaihsakna lantîr leh thil zawng zawng taima taka thawk a,* hahdam tak leh thlamuang taka kan nun theihna tûrin. 3 Chu chu min Chhandamtu Pathian mit hmuhah a ṭhain a pawm tlâk a, 4 ani chuan mi chi tinrêngte chu chhandama an awm leh thutak hriatna dik an neih a duh a ni. 5 Pathian pakhat a awm a, Pathian leh mihring inkârah palai pakhat a awm bawk, ani chu mihring a ni, Krista Isua, 6 mi zawng zawng tâna a tlukpui tlanna* ni tûra inpea chu—chu chu a hun takah hriattîr a la ni ang. 7 Chu thu hriattîr tûr chuan thuhriltu leh tirhkohva ruat ka ni, rinna leh thutak chungchâng hnam dangte ka zirtîr theihna tûrin; thutak ka sawi a ni, dâwt ka sawi lo ve.

8 Tichuan, in inkhâwmna hmun apiangah mipate chu rinawmna nên an kut phar a, thinrim lo leh inhnial lova ṭawngṭai ṭhîn tûrin ka duh a ni. 9 Chutiang bawkin, hmeichhiate pawh mawi hnai tak leh thuam inchawih tâwk inbelin, rilru fîm tak pu sela, uchuak taka sam phiar lo* leh rangkachak te, tuikeplung te leh, thawmhnaw man to tak takte inbel lovin, 10 Pathian ngaihsak hmeichhiate tiha mawiin, thil tih ṭhattein inchei zâwk rawh se.

11 Hmeichhia chuan intukluhna pumhlûm nên zirtîrna chu ngawi rengin ngaithla rawh se. 12 Hmeichhiain a zirtîr emaw, mipa chunga thu a neih emaw ka phal lo, a ngawi reng zâwk tûr a ni. 13 Adama chu siam hmasak a ni a, a hnuah Evi siam a ni si a. 14 Chu bâkah, Adama chu bumin a awm lo va, hmeichhia erawh chu bumin a awm a, bawhchhetu a lo ni ta a ni. 15 Amaherawhchu, rinna leh hmangaihna leh rilru fîm tak nêna thianghlimna a* vawn reng chuan, fa hrin avângin a him ang.