Timothea Hnêna Lehkhathawn Pakhatna
6 Pathian hming leh a zirtîrna sawichhiata a awm ngai lohna tûrin, bâwih nghâwngkawl bâttute chuan an pute chu thinlung zawng zawngin zah rawh se. 2 Chu bâkah, ringtu pu neite chuan rinnaa unau an nih avângin an pute chu zah lo suh se. Chu aiin, an hnathawh ṭhat hlâwkpuitute chu ringtute leh duh takte an nih avângin châk lehzualin rawng bâwlsak zâwk rawh se.
Ka thu hrilh che ṭanchhanin zirtîrin fuih zawm zêl rawh. 3 Tu pawh thurin dang zirtîr a, kan Lalpa Isua Krista hnên aṭanga kaihhruaina ṭha leh Pathian ngaihsakna nêna inmil zirtîrna pawm lo chu, 4 mi chapo leh eng mah hre thiam lo a ni a. Ani chu ṭawngkam hman chungchânga inhnial leh inbeih hrât tak a ni. Chûngte chuan îtsîkna te, intih buaina te, sawichhiatna te, rinhlelhna sualte a tichhuak a, 5 mihring rilru chhe tawh leh thutak nei lo, Pathian ngaihsakna chu hlâwknaa ngaitute chunga thil ho tê têa inhnialna ti chhuak ṭhîntu a ni. 6 Pathian ngaihsakna hi lungawina nên chuan hlâwkna nasa tak a ni rêng a ni. 7 Khawvêlah hian eng mah kan luhpui si lo va, eng mah kan chhuahpui thei hek lo. 8 Chuvângin, ei tûr leh silhfên inbel tûr* neiin, chûngah chuan kan lungawi ang.
9 Nimahsela, hausak tumte chu thlêmnaah te, thangah te, thil âtthlâk tam takah te, châkna ṭha lovahte an tlu lût a, chu chuan anni chu chhiatna leh boralnaah a hruai lût ṭhîn. 10 Sum ngainat hi chhiatna tinrêng bul a ni si a, chu chu mi ṭhenkhatin neih tuma nasa taka beiin rinna chu an pênsan a, anmahni leh anmahni natna tam takin an inchhun tlang ta chuk a.
11 Nimahsela, Aw nang Pathian mi, chûng thilte chu tlânsan rawh. Amaherawhchu, felna te, Pathian ngaihsakna te, rinna te, hmangaihna te, chhelna te leh, nunnêmnate* ûm zêl zâwk ang che. 12 Rinna inbeihna ṭha chu bei la, koh i nihna leh thuhretu tam takte mit hmuha vântlâng hmaa ṭha taka i puan chhuah tawh chatuan nunna chu nghet takin vuan tlat ang che.
13 Pathian, thil zawng zawng vawng nungtu leh Krista Isua, thuhretu anga Pontia Pilata hmaa vântlâng mit hmuha ṭha taka thusawitu hmaah thu ka pe a che: 14 Kan Lalpa Isua Krista rawn inlâr hma loh chuan, thupêk kha bawlhhlawh kai lo leh sawisêl bovin zâwm rawh. 15 Hun ruatah chu Lal hlim thei tak leh thiltithei tak chu a rawn inlâr dâwn si a. Ani chu lalberte Lalber leh lalte Lal, 16 thih theih lohna neitu awm chhun, hnaih theih rual loh ênga awm, tu man an hmuh ngai loh leh an hmuh theih loh a ni. A hnênah chawimawina leh chatuana thiltihtheihna awm rawh se. Amen.
17 He khawvêla* hausate hi chapo lo tûr leh hausakna ral mai tûr chunga an beiseina nghat lo va, engkim kan hlimpui tûra nasa taka min petu Pathian chunga nghat zâwk tûrin thu pe rawh. 18 Anni chu thil ṭha ti tûr te, thil ṭha tih ngah tûr te, thilphal tûr te, an thil neih mi dangte sem inpeih tûrtein hrilh la, 19 hma lam hun atâna lungphûm ṭha tak anmahni tân him taka an phûm theihna tûrin hrilh bawk rawh; tichuan, nunna tak tak chu nghet takin an vuan thei ang.
20 Timothe, i hnêna kawltîr kha vênghim la, thil thianghlim sawichhiatna thusawi awmze nei lote leh, thu dik kalh zâwnga thusawina thlentu hriatna dik lote chu hawisan rawh. 21 Chutiang hriatna chu an zui avângin mi ṭhenkhatin rinna chu an pênsan ta si a.
Khawngaihna nasa tak in hnênah awm rawh se.