Pathian leh Ṭhenawmte Hmangaihna Neih Theih Dân

Mosia Dân chuan Kristiante chu phuar tawh lo mah se, thupêk ropui ber pahnih—Pathian leh ṭhenawmte hmangaihna—chuan Jehova thil min phûtte chu a la khaikhâwm reng tho va. (Mt. 22:37-39) Chutiang hmangaihna chu kan pianpui lo. Nei tûra ṭan kan lâk a ngai a ni. Engtin nge kan neih theih ang? Kawng pawimawh tak pakhat chu nî tina Bible chhiar hi a ni. Bible-a târ lan Pathian mize chi hrang hrangte kan ngaihtuah hian, “LALPA mawizia” kan hmu a. (Sâm 27:4) Chutianga kan tih chuan, amah kan hmangaihna a pungin, a ngaihtuah angin kan ngaihtuah lehzual a. Hei hian mahni hma sial lo mi dangte hmangaihna lantîr tûra thupêk pawh tiamin, Pathian thupêkte zâwm tûrin min chêttîr a ni. (Joh. 13:34, 35; 1 Joh. 5:3) Hetah hian Bible chhiar nuam kan tih lehzual theih dân rawtna pathumte a awm:

• Ngaihruat theihna leh i hriat theihnate chu hmang rawh. I thu chhiar lai huna awm angah han inchan rawh. Eng nge i hmuhin, eng thâwm nge i hriat ang a, eng rim nge i hriat ang? Chuta awmte chu engtin nge an awm ang?

  

• Tih dân hrang hrang hmang rawh. Hêng hi tih theih ṭhenkhat a ni: A ri chhuaka chhiar, a nih loh leh awthunsa ngaithlaa lo enpui. A bung indawta chhiar aia Bible-a chuang mi pakhat chanchin chhiar. Entîr nân, New World Translation of the Holy Scriptures-a Thu Belhna A7 leh B12-a Isua chungchâng chu hmang rawh. Ni châng atâna lâk chhuah Bible châng awmna a bung pum chhiar. Bible lehkhabute a ziak hun indawta chhiar.

  

• Hre thiam tûrin chhiar rawh. A hminga thu tam tak chhiar zawh tum avânga chhiar satliah aiin, nî tina hriatthiamna leh chhût ngunna nêna bung khat lek chhiar chu a ṭha zâwk daih a. A dinhmun chu ngaihtuah la. Chipchiar takin chhût rawh. Map-te leh Bible châng dang kawhhmuhna marginal reference-te chu hmang la. I hriatthiam loh thil pakhat tal zir bingna nei rawh. A theih chuan, chhiar nâna i hun pêk tûr ang zât chu chhût ngun nân hmang ang che.