Pathianin Abrahama Rinna A Enchhin

ABRAHAMAN hetah hian enge a tih i hmu thei em? Chemte a keng a, a fapa a tihlum dawn niin a lang. Engvanginnge chu chu a tih? A hmasain Abrahama leh Sarin fapa an neih dan i en phawt ang u.

Fapa an nei ang tih Pathianin a tiam kha hrereng la. Mahse Abrahama leh Sari an upat tawh em avangin chu chu theihin a lang lo. Amaherawchu, theih lohva lang pawh Pathianin a ti thei tih Abrahama chuan a ring a. Tichuan enge lo thleng ta?

Pathianin thu a tiam hnuah kum khat pumhlum a ral a. Tin Abrahama chu kum 100-a upa leh Sari chu kum 90-a upa a nihin fapa an nei a, a hmingah lsaka an sa a. Pathian chuan a thutiam a hlen ngei mai.

Mahse Isaka a lo upat deuhvin, Jehovan Abrahama rinna a enchhina. ‘Abraham,’ a ti a. Abrahama chuan: ‘Heta hi ka awm,’ tiin a chhang a. Tichuan Pathianin: ‘I fapa, i fapa neihchhun Isaka hruai la, ka hmuhtir tur che tlang chhipah kal rawh. Chutah chuan i fapa tihlum la, inthawina angin hlan rawh,’ a ti a.

Abrahama chuan a fapa a hmangaih em em vangin chung thute chuan Abrahama chu a va tilungngai em! Abrahama fate chu Kanaan ramah an cheng ang tih Pathianin a tiam kha hrereng la. Mahse Isaka a thih chuan chu chu engtinnge a nih theih ang? Abrahama chuan a hre thiam lo va, mahse Pathian thu a la awih tho va.

Tlang a thlen chuan Abrahaman lsaka a phuar a, a maicham siamah chuan a dah a. Tin a fapa tihlum turin chemte a phawrh a. Mahse chutih lai tak chuan Pathian vantirhkohvin a ko va: ‘Abraham, Abraham,’ tiin. Tin Abrahama chuan: ‘Heta hi ka awm,’ a ti a.

Naupang chu tina suh la, a chungah engmah ti suh. Tunah chuan i fapa i neihchhun pawh ka tan i ui loh vangin, keimahah rinna i nei tih ka hria,’ Pathianin a ti ta a.

Abrahaman Pathian rinna a va nei nasa em! Jehova tan engmah theih loh a awm lo va, Jehova chuan thihna atangin Isaka a kaitho thei tih a ring a. Mahse Abrahaman lsaka a tihhlum chu Pathian duhzawng a ni tak tak lo. Chuvangin a kiang thingbukah Pathianin beram a tantir a, a fapa aia inthawi nana hmang turin Abrahama a hrilh ta a.