Bung Sawm
‘Chhe Ngai Tawh Lo Tûr’ Lalram Chu
1. Mihringte chanchin pum puiah hian khawvêl thil thlengte hian eng thu nge a târ lan chian?
NI TINA khawvêl thil thlengte hian, mihringin Jehova lal chungnunna hnâwla anmahnia ro inrêl an tumna aṭangin hlimna an hmu lo tih a rawn târ lang chiang zêl a ni. Eng mihring sawrkâr mahin mihringte hnênah hlâwkna inang tlâng a thlen thei lo. Science lama mihringte thiamna chu sâng hle tawh mah se, mi pakhat lek tân pawh natna emaw, thihna emaw chu an dang thei chuang lo a ni. Mihringte rorêlna hian indona te, tharum thawhna te, dân bawhchhiatna te, hlêp rûkna te, a nih loh leh retheihna te chu a tibo thei lo va. Sawrkâr râwng tak takte hian ram tam takah mipuite an la awpbet cheu a ni. (Thuhriltu 8:9) Khâwl lam thila thiamna te, duhâmna te, leh thil chinchâng hriat lohna te hian khawmual, tui, leh boruak te a tibawlhhlawh a. Hotu liante’n sum leh pai dik lo taka an enkawlna chuan mi tam tak tân khawsak nâna mamawhte takngial pawh hmuh a tiharsa a ni. Kum sâng tam tak chhûng mihring ro inrêlna hian “mihring awm dân chu, mahni thu mai a ni lo . . . Tungchhova kal mihringah hian, a pheikhai hruai tûr a awm lo” tih thu dikzia hi a tichiang hle a ni.—Jeremia 10:23.
2. Mihringte harsatna tihvenna awmchhun chu eng nge ni?
2 A tihvenna chu eng nge ni ta ang? Isua’n a hnungzuitute hnêna: “I ram lo thleng rawh se. I duhzâwng vâna an tih angin leia mi’n ti rawh se,” tia dîl tûra a lo hrilh Pathian Ram hi a ni. (Matthaia 6:9, 10) Pathian vân Ram chu 2 Petera 3:13 chuan “vân tharte” tiin a sawi a, chu chuan mi fel awmho, “lei thar” chungah ro a rêl dâwn a ni. Pathian vân Ram chu a pawimawh êm avângin, Isua pawhin a thu hril thupui berah a hmang a. (Matthaia 4:17) Kan nuna a hmun chan tûr pawh hetiang hian min hrilh a ni: “A ram leh a felna chu zawng hmasa zâwk rawh u,” tiin.—Matthaia 6:33.
3. Engvângin nge tûna Pathian Ram chanchin hriat hi a hmanhmawhthlâk êm êm?
3 Pathian Ram chanchin hriat hi tûnah chuan a hmanhmawhthlâk êm êm tawh a ni; chu Lalram chuan he leia rorêlna hi chatuan atân a rawn thlâk danglam thuai tawh dâwn avângin. Daniela 2:44 chuan heti hian a sawi lâwk a: “Chûng lalte [tûna rorêltu sawrkârte] nîah chuan vân Pathianin [vânah] ram a . . . din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang [mihringin leiah ro an rêl leh tawh ngai lo vang]; [tûna] hêng ram zawng zawngte hi a tikeh sawmin a tiral zâwk ang a, kumkhuain a ding reng ang,” tiin. Chutiang chuan, Lalram chuan hêng ni hnuhnûngte hi a rawn titâwp ang a, he khawvêl suaksual hi a tichhe vek dâwn a ni. Chu mi hunah chuan vân Ramin lei chunga ro a rêlna chu hnial buai a ni tawh lo vang. Chu miin kan hrehawmna zawng zawng a tihkian hun tûr chu a hnaih tawh êm avângin, nasa taka lâwm tûr kan va ni êm!
4. Lalram nêna inkûngkaihin kum 1914-ah vânah hian eng thil nge thleng a, chu chu engvângin nge kan tân thil pawimawh tak a nih?
4 Kum 1914-ah chuan, Krista Isua chu Lalah ṭhuttîr a ni tawh a, “[amah] dotute zîngah ro rêl” tûrin thuneihna pêk a ni bawk. (Sâm 110:1, 2) Chu mi kumah tho chuan, he khawvêl suaksual ‘ni hnuhnûngte’ chu a inṭan bawk a ni. (2 Timothea 3:1-5, 13) Chu mi rual vêk chuan Daniela’n inlârnaa a lo hmuh thilte kha a takin vânah a thleng a. Pathian Jehova, “Hmakhawsânga” chuan mihring Fapa, Isua Krista hnênah ‘mi tin te, hnam tin te, leh tawng tinte zawng zawngin a rawng an bâwl nân rorêlna te, ropuina te, ram te a pe’ a ni. Inlârna chungchâng chu Daniela’n heti hian a lo ziak a ni: “A rorêlna chu rorêlna hlun, ral ngai lo tûr a ni a, a ram chu tihchhiat rual a ni lo vang,” tiin. (Daniela 7:13, 14) Krista Isua kuta nghah he vân Ram hmang hian, Pathianin felna ngainatute chu Paradis-a kan nu leh pa hmasa berte a dah laia thil ṭha chhiar sên loh pêk a lo tumte chu a pe dâwn a ni.
5. Lalram chungchânga thil chipchiar tak engte nge kan ngaihven a, chu chu engvâng nge?
5 Chu Lalram khua leh tui rinawm tak nih chu i châk em? I châk a nih chuan he vân sawrkâr inrêlbâwl dân leh hnathawh dân te hi i ngaihven zâwng tak a ni ngei ang a. Tûna chu sawrkâr thil tih mêk te, nakina a la tih tûr te, i laka a thil phût te hriat chu i duh ngei bawk ang. Chu Lalram i enfiah rualin, chu mi avânga i lâwmna pawh a lo pung chho ve zêl tûr a ni. A rorêlna chu ṭha taka i lo chhân lêt chuan, thuawih mihringte tâna Pathian Ramin thil ropui tak a la tih tûr chanchin chu mi dangte hnêna hrilh tûra thuam ṭhat lehzual i ni ang.—Sâm 48:12, 13.
Pathian Rama Lalber
6. (a) Messia Lalram hmanga lantîr lal chungnunna neitu chu engtin nge Pathian Lehkha Thuin a târ lan? (b) Engtin nge Lalram chungchâng kan thil hriatte hian min nghawng ang?
6 Chutiang enfiahnain a târ lan hmasakte zînga pakhat chu, he Messia Lalram hi Jehova lal chungnunna lanchhuahtîrna a ni tih hi a ni. Jehova chu a Fapa hnêna “rorêlna te, ropuina te, ram te” petu a ni a. Pathian Fapa chu Lal anga rorêl ṭan tûra thiltihtheihna pêk a nih hnu chuan, vâna aw-in heti hian a rawn puang chhuak ta a: “Khawvêl ram chu kan Lalpa [Pathian Jehova] leh a Krista ram a lo ni ta, ani [Jehova] chuan chatuanin ro a rêl ang,” tiin. (Thu Puan 11:15) Chuvângin, he Lalram chanchin leh a thil hlen chhuah kan hriat zawng zawngte hian amah Jehova chu min hnaihtîr lehzual sauh thei a. Kan thil hriatte chuan a lal chungnunna hnuaia chatuana intukluh duhna min neihtîr tûr a ni.
7. Engvângin nge Isua Krista chu Jehova Aiawha Rorêltu a ni hi kan ngaihven bîk?
7 Jehova’n Isua Krista chu a Aiawha Rorêltu atân lalṭhutthlêngah a ṭhuttîr tih hi ngaihtuah bawk teh. Leilung leh mihringte siam tûra Pathian mi hman Mi Themthiama a nih angin, Isua chuan keini aiin kan mamawhte chu a hre zâwk daih a. Chu bâkah, mihringte awm ṭan tirh aṭang tawhin Isua chuan a ‘lâwmna chu mihring fate chungah’ a ni tih a lo târ lang tawh bawk a ni. (Thufingte 8:30, 31; Kolossa 1:15-17) Mihringte a hmangaihna chu a nasat êm avângin, amah ngei leiah a lo kal a, kan aiah tlan nân a nun hial pawh a rawn pe a. (Johana 3:16) Chutiang chuan sual leh thihna aṭanga zalênna tûr leh chatuana nun theihna hun remchâng chu kan tân a rawn siam ta a ni.—Matthaia 20:28.
8. (a) Mihringte rorêlna ang lo takin, engvângin nge Pathian sawrkâr chuan chatuan a daih ang? (b) “Bawi rinawm, fing tak” chuan vân sawrkâr nên eng inlaichînna nge a neih?
8 Pathian Ram chu sawrkâr nghet leh chatuan daih a ni a. A nihzia chu Jehova thih ve theih lohna hian a tichiang a ni. (Habakuka 1:12) Pathianin lalna a pêk Isua Krista pawh hi mihring lalte ang lo takin a thi thei lo va. (Rom 6:9; 1 Timothea 6:15, 16) Vân lalṭhutthlênga Krista rorêlpui tûrte chu mi 1,44,000 an ni a, anni chu “chi tina mi te, ṭawng tina mi te, mi tina mi te, hnam tina mi te” zînga Pathian chhiahhlawh rinawmte an ni. Anni pawh thi thei lo nun pêk an ni bawk. (Thu Puan 5:9, 10; 14:1-4; 1 Korinth 15:42-44, 53) An zînga a tam zâwkte chu vânah an awm tawh a, an zînga la bâng leia la awmte chu tûn laia “bawi rinawm, fing tak” hi a ni a, anni chuan he leia chu Lalram leh a kaihhnawih thilte tihhmasâwn zêl nân rinawm takin hna an thawk a ni.—Matthaia 24:45-47.
9, 10. (a) Lalram chuan eng inṭhen darhna leh thununna ṭha lote nge a tihbo dâwn? (b) Pathian Ram hmêlma nih kan duh loh chuan mi tibuai thei eng thilte nge kan pumpelh ngai?
9 Nakin lawka a hun ruat a lo thlen hunah chuan Jehova chuan lei thian fai tûrin a vân sipaite a tîr chhuak ang a. Anni chuan duh rêng vânga Jehova lal chungnunna pawm duh lo tute leh Isua Krista hmanga ruahmanna duhawm tak a siam lo hnâwltute zawng zawng chu chatuan atân an tiboral tawh ang. (2 Thessalonika 1:6-10) Chu chu hun rei tak kan lo nghah tawh, Lei leh Vâna Lal Chungnungber a nihna thiam a chantîrna hun, Jehova nî a ni dâwn a ni. “Ngai teh, . . . mi sualte chu ram chhûng ata tiboral tûrin LALPA nî chu nasa takin thinrimna leh thinurna nasa tak nên, a lo thleng dâwn e.” (Isaia 13:9) “Chumi nî chu thinurna nî a ni a, mangan leh hrehawm nî, chhiatna leh ṭiauna nî, thimna leh khawdur nî, chhûm leh thim chhah mup nî a ni.”—Zephania 1:15.
10 He khawvêl rorêltu suaksual hmuh theih loh hian duh duha a chawhleh sakhaw dik lo zawng zawngte leh mihring sawrkâr leh an sipai zawng zawngte hi chatuan atân tihboral an ni ang a. Mahni hmasialna te, rinawm lohna te, leh nungchang bawlhhlawhna te ûmna hmanga he khawvêl awm dân latute chu tihhlum vek an ni ang. Setana leh a ramhuaiho chu leia chêngte nên inpawh thei miah lo tûrin, kum sângkhat chhûng khung bo an ni dâwn a ni. Chu mi hunah chuan, Pathian Ramin lei chungah thuneihna pumhlûm a nei tawh ang. Felna ngainatu zawng zawngte tân chuan a va hahdamthlâk dâwn êm!—Thu Puan 18:21, 24; 19:11-16, 19-21; 20:1, 2.
Lalram Thiltumte—A Hlawhtlin Dân
11. (a) Engtin nge Messia Lalramin lei tâna Jehova thiltum chu a tihpuitlin ang? (b) Chu mi huna leia chêngte chuan Lalram rorêlna chu engtin nge an hlâwkpui ang?
11 Messia Lalram chuan lei atâna atîra Pathian thiltum chu a tipuitling ang. (Genesis 1:28; 2:8, 9, 15) Vawiin thleng hian mihringte’n chu thiltum chu an thlâwp lo va. Nimahsela, “khawvêl lo la awm tûr” chu mihring Fapa, Isua Krista thu hnuaiah a awm dâwn a ni. He khawvêl hlui chunga Jehova rorêlna ata dam khawchhuak zawng zawngte chuan, lei pum pui hi paradis a lo nih theih nân, Lal Krista kaihhruai ang zêla awmin, a hnuaiah lungrual tak leh lâwm takin an thawk tlâng ang. (Hebrai 2:5-9) Mi zawng zawngin an kut hnathawh rah an seng ang a, leiin rah tam tak a chhuahte chu an hlâwkpui dâwn a ni.—Sâm 72:1, 7, 8, 16-19; Isaia 65:21, 22.
12. Engtin nge Lalram khua leh tuite chu rilru leh taksa ṭha famkim neihtîr an nih dâwn?
12 Adama leh Evi kha siam an nih khân an ṭha famkim a, an thlahte nên rilru leh taksa ṭha famkim neia lei luah khahtîr chu Pathian thiltum a ni a. Chu thiltum chu Lalram rorêlna hnuaiah ropui takin a famkim ang. Chutiang ni tûr chuan sual rah chhuah zawng zawng nuai bo vek a ngai a, chu mi atân chuan Krista chu Lalber a nih bâkah Puithiam Lal a ni tel bawk a ni. Ani chuan a hring nun inthawina hlutna chu a thuâwih a khua leh tuite’n an hlâwkpui theih nân dawhthei takin a ṭanpui ang.
13. Lalram rorêlna hnuaiah tisa lam hlâwkna engte nge awm dâwn?
13 Lalram rorêlna hnuaiah chuan, leia chêngte chuan tisa lamah pawh hlâwkna mak tak an tawng dâwn a ni. “Chumi hunah chuan mitdelte mit chu tihmenin a awm ang a, bengngawngte beng chu tihvârin a awm ang. Chumi hunah chuan ke baite chu sakhi angin an zuang ang a, ṭawngthei lote lei chu hlim takin a zai ang.” (Isaia 35:5, 6) Kum upat vâng emaw, natna vâng emawa taksa vuai tawhte chu naupang taksa ai pawhin a rawn no tawh zâwk ang a, natna benvawnte pawh hrisêlna ṭha tak chuan a rawn luahlân vek tawh bawk ang. “A taksa hi tleirâwl thar leh sela, a vânglai chakna nîte chu lo kîr leh tawh se.” (Joba 33:25) Tuman, “Ka dam lo ve,” tih chhan tûr a neih tawh loh hun chu a lo thleng dâwn a ni. Engvâng nge? Pathian ṭihtute chu sual leh a rah chhuah lungchhiatthlâk tak lak ata chhuah an nih dâwn avângin. (Isaia 33:24; Luka 13:11-13) Ni e, Pathianin “an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta.”—Thu Puan 21:4.
14. Mihring ṭhat famkimna neih nân eng nge ngai tel?
14 Amaherawhchu, ṭhat famkimna neih nân taksa leh rilru ṭha neih mai bâkah thil dang tam tak a la ngai tel a. Jehova miziate ṭha taka lan chhuahtîr hi a tel a ni; ‘Pathian anpui, amah ang taka’ siam kan nih avângin. (Genesis 1:26) Chutianga ti thei tûr chuan nasa taka zir a ngai ang. Khawvêl thar chu “a chhûnga felna awm” a ni ang a. Chuvângin, Isaia sawi lâwk ang hian “khawvêla awmte chuan felna an zir ṭhîn” dâwn a ni. (2 Petera 3:13; Isaia 26:9) He mizia hian chi tina mi kârah te, ṭhian bulhnaite kârah te, mahni chhûngkuaah te, leh a pawimawh berah chuan Pathian nêna kan inkârah te remna a awmtîr a. (Sâm 85:10-13; Isaia 32:17) Felna zirtu zawng zawng chu an tâna Pathian duhzâwngte zawi zawia zirtîr an ni zêl ang. Jehova hmangaihna chu an thinlunga a lo intuh ngheh zêl chuan, a kawngte chu an nun kawng engkimah an zâwm zêl tawh ang a. Isua sawi ang hian, ‘Ka Pa lawmzâwng apiang ka ti fo a ni,’ an ti ve thei tawh ang. (Johana 8:29) Mihring zawng zawngin he thu an sawi theih hunah chuan nun chu a va hlimawm dâwn êm!
Tûna Thil Hlen Chhuah Tawhte
15. He mi paragraph-a zawhnate hmang hian, Lalram thil hlen chhuahte leh tûna kan tih tûrte târ lang rawh.
15 Pathian Ram leh a khua leh tuite thil hlen chhuah ropui tak chu a lang chiang hle a. A hnuaia zawhna leh Bible chângte hian chûng thil hlen chhuah ṭhenkhat chu a hriatnawntîr ang che a, Lalram khua leh tui zawng zawngin tûna an tih theih leh an tih tûrte chu a hriatnawntîr bawk ang che.
Lalram chuan tunge a do hmasak ber a, eng nge a rah chhuah? (Thu Puan 12:7-10, 12)
Lalṭhutthlênga Krista a ṭhut aṭangin eng pâwl zînga mi la bângte lâk khâwmna hna nge ngaihsak a nih? (Thu Puan 14:1-3)
Matthaia 25:31-33-a ziak angin, hrehawm nasa tak a inṭan hnua Isua’n a hna thawh tûr a sawi lâwk kha eng nge ni?
Hrehawm nasa tak a lo thlen hmaa thawh tûr eng hna nge tûn laiah thawh mêk a nih? Tute’n nge chu hna chu thawk? (Sâm 110:3; Matthaia 24:14; Thu Puan 14:6, 7)
Engvângin nge politics lam leh sakhaw lam aṭanga dodâltute’n thuhrilh rawngbâwlna hi an tihtâwp theih loh? (Zakaria 4:6; Tirhkohte 5:38, 39)
Lalram rorêlna hnuaia intulûtte nunah eng inthlâk thlengna nge a awm ṭhin? (Isaia 2:4; 1 Korinth 6:9-11)
Kum Sâng Lalram
16. (a) Engtia rei nge Krista’n ro a rêl dâwn? (b) Chu mi hun chhûng leh a zawh hunah eng thil mak tak tak nge tih ni dâwn?
16 Setana leh a ramhuaite leilâwta khung an nih hnuah, Isua Krista leh a rorêlpui 1,44,000-te chuan lal leh puithiam niin kum sângkhat chhûng ro an rêl ang a. (Thu Puan 20:6) Chu mi hun chhûng chuan mihringte chu ṭha famkima siam an ni ang a, Adama avânga sual leh thihna chu chatuan atân nuai bo a ni tawh ang. Kum Sâng Rorêl tâwpah chuan, Isua’n Lal-Puithiam Messia anga a thawh tûr a thawh zawh vek hnuah, Pa hnênah “ram chu a pe ang . . . Pathian chu engkima engkim a nih theihna tûrin.” (1 Korinth 15:24-28) Chutah chuan, mihring ṭha famkim tawhte chu lei leh vâna Jehova lal chungnunna an thlâwp leh thlâwp loh fiah tûrin Setana chu rei lo te chhûng chhuahtîr a ni ang a. Chu fiahna hnuhnûngber a zawh hnuah Jehova chuan Setana leh a lama ṭang zawng zawngte chu a tiboral vek ang. (Thu Puan 20:7-10) Jehova lal chungnunna—rorêl tûra dikna a neih—thlâwptute chuan an rinawmna a nghehzia an târ lang kim tawh dâwn a ni. Tichuan, Jehova nêna inlaichînna dik tak an nei tawh ang a, ani chuan fapate leh fanute anga a pawm tawh avângin, chatuanin an nung tawh ang.—Rom 8:21.
17. (a) Engtin nge kum sângkhat a tâwp hunah Lalram chu a awm dâwn? (b) Lalram chu “a chhe ngai tawh lo vang” a tih hi eng kawngin nge a dik theih?
17 Chuvângin, lei lam thu-a Isua leh 1,44,000-te chanvo chu a inthlâk thleng tawh ang. A nih leh, eng nge an thawh zêl dâwn? Bible-in a sawi lang lo. Mahse Jehova lal chungnunna hi rinawm taka kan thlâwp tlat chuan, chûng mite tân leh vânlâwt mak ropui tak tâna Jehova thiltum hre thei tûrin, Kum Sâng Rorêl tâwpah pawh kan la dam zêl dâwn a ni. Nimahsela, Krista kum sâng rorêlna chu “rorêlna hlun” a ni ang a, a Lalram chu “tihchhiat rual a ni lo vang.” (Daniela 7:14) Chu chu eng kawngin nge a nih dâwn? Pakhatah chuan, Jehova chu Rorêltu a nih dâwn avângin rorêl tûra thuneihna chu thiltum dang neite kutah hlan chhâwn a ni dâwn lo. Chu bâkah, Lalramin a hlenchhuahte chuan chatuan a daih dâwn avângin, Lalram chu “a chhe ngai tawh lo vang.” (Daniela 2:44) Lal-Puithiam Messia leh a ṭhian lal-puithiamhote chu rinawm taka Jehova rawng an bâwl avângin chatuana chawimawi an ni bawk ang.
Ennawn Nâna Sawiho Tûrte
• Engvângin nge Pathian Ram chauh hi mihringte harsatna tihvenna awmchhun a nih? Pathian rama Lalberin engtikah nge ro a rêl ṭan?
• Pathian Ram leh a thil hlen chhuah tûr engin nge a bîk taka hîp che?
• Lalram thil hlen chhuah engte nge kan hmuh theih tawh a, chûngah chuan eng chanvo nge kan neih?
[Phêk 92, 93-naa Milemte]
Pathian Ramah chuan mi zawng zawngin felna an zir ang