ZIRLAI 6

Mitthite Tân Beisei Tûr Eng Nge Awm?

1. Mitthite chungchânga chanchin ṭha chu eng nge ni?

Tho leh Lazara chu a farnu Marthi leh Mari ten an lâwm

Isua chu Jerusalem bul Bethani khua a va thlen chuan, a ṭhianpa Lazara thihna chu ni li lai a lo ni tawh a. Mitthi ta farnu Marthi leh Mari nên chuan an zalhna thlânah an va kal a ni. Chutah chuan mipui an lo pungkhâwm ta thuai a. Isua’n Lazara a kaihthawh laia Marthi leh Mari te lâwm dân tûr chu i ngaihtuah thei em?—Johana 11:21-24, 38-44 chhiar rawh.

Marthi chuan mitthite chungchânga chanchin ṭha chu a lo hre daih tawh a. Pathian Jehova chuan leia nung leh tûrin anni chu a kaitho dâwn tih a hria a ni.—Joba 14:14, 15 chhiar rawh.

2. Mitthite dinhmun chu eng nge ni?

Adama chu siam a ni a, a hnuah a thi leh — Pathianin Adama hnênah: “Vaivut i ni a, vaivutah i kîr leh tûr a ni,” a ti.—⁠GENESIS 3:⁠19.

Mihringte chu vaivut aṭanga siam kan ni a. (Genesis 2:7; 3:19) Tisa neia nung thlarau kan ni lo. Taksa nei thil siam kan ni a, kan thih hnuah chuan keimahniah nung chhun zawm zêl thei thil engmah a awm lo. Kan thih hian kan thluak pawh a thi a, kan ngaihtuahna pawh a bo nghâl a ni. Chuvângin, kaihthawh a nih hnuah Lazara chuan a thih laia a thiltawn engmah a sawi lo; mitthite’n engmah an hre thei si lo va.—Thuhriltu 9:5, 6, 10 chhiar rawh.

Pathianin mite chu an thih hnuah meiin a nghaisa em? Bible chuan mitthite’n engmah an hre lo a tih avângin, hremhmun meidîl chungchâng zirtîrna hi Pathian sawichhetu zirtîrna dik lo a ni. Meia mite hrem chu Pathian thil tenzâwng tak a ni si a.—Jeremia 7:31 chhiar rawh.

Mitthite Dinhmun Chu Eng Nge Ni? tih video en rawh

3. Mitthite’n min be thei em?

Mitthite chu an ṭawng thei lo va, thâwm an hre thei hek lo. (Sâm 115:17) Mahse, vântirhkoh ṭhenkhat chu an sual a, mihringte chu biain, mitthi tawhte angin an inchhâl thei a. (2 Petera 2:⁠4) Pathian Jehova chuan mitthite biak tum chu a khap tlat a ni.—Deuteronomy 18:10, 11 chhiar rawh.

4. Tute nge tho leh dâwn?

Paradis-ah tho leh mi pakhat chuan Pathian chungchânga a zir a. Ani chuan tho leh mi dangte chu a zirtîr leh

Thlâna awm mi maktaduai tam takte chu leiah hian an lo tho leh ang a. Pathian Jehova hre lote leh thil sual titu ṭhenkhat pawh an tho leh ang.—Sâm 37:29; Tirhkohte 24:15 chhiar rawh.

Tho lehte chuan Pathian chungchâng thutak zirin, Isua thu âwihna hmangin rinna an lantîr thei ang a. (Thu Puan 20:11-13) Tho lehte zînga thil ṭha titute chuan leiah chatuana nunna an chên thei ang.—Johana 5:28, 29 chhiar rawh.

5. Thawhlehna aṭangin Jehova chungchâng eng nge kan hriat theih?

Pathianin a Fapa chu kan tâna thi tûra rawn tîrin, mitthite tân beisei tûr a siamsak a. Chuvângin, thawhlehna chuan Jehova hmangaihna leh khawngaihna min hriattîr a ni. Mitthite an lo thawhleh hunah chuan tu nge i hmuh châk ber?—Johana 3:16; Rom 6:23 chhiar rawh.

Hriat tam lehzual nân, Bible Zirtîrna Dik Tak Chu Eng Nge Ni? tih lehkhabu bung 6, 7, leh 10-na chu en ang che.