‘Mihringte hnêna thilpêkte’ Ngaihhlutna
“In zîngah thawkrim leh, . . . an hnathawh vânga hmangaiha ngaihlu êm êm tûrin ka ngên che u a ni.”—1 THESSALONIKA 5:12, 13.
1. Tirhkohte 20:35-a sawi angin, pêkchhuahna chuan eng thiltihtheihna nge a neih? Tehkhin thu pe rawh.
“ENGLO lâk aiin pêkin lukhâwng a nei zâwk.” (Tirhkohte 20:35) Isua thu sawi dikzia tilangtû i thiltawn hnuhnung ber i hre chhuak thei em? I hmangaih tak tuemaw hnêna i thilthlawn pêk a ni mai thei. I hmangaih tak thil hlut a nihna tûrin uluk takin i thlang a ni. I hmangaih tak lâwm hmêl hmuh chu—a va lungawi thlâk êm! Chêttîrtû dik tak avânga thilpêk chu hmangaihna lantîrna a ni a, chu chuan hlimna min pe tûrin thiltihtheihna a nei a ni.
2, 3. (a) Tumah Jehova aia hlim an awm lo tih hi engvânga sawi theih nge a nih a, engtin nge ‘mihringte hnêna thilpêkte’ pêkna chu a rilru tihlimtû an nih theih dân? (b) Pathian thilthlâwnpêkte chungah eng nge kan tih duh lo vang?
2 A nih leh ‘thil pêk ṭha zawng zawng’ Petû, Jehova aiin tunge hlim zâwk ang? (Jakoba 1:17; 1 Timothea 1:11) A thilthlâwnpêk zawng zawng chu hmangaihna-in a chettîr vânga a pêk a ni. (1 Johana 4:8) Chu chu Pathianin Krista kal tlanga kohhranho hnêna a thilthlâwnpêk-ah pawh a dik a ni—‘mihringte hnêna thilpêkte’ a pêkna-ah chuan. (Ephesi 4:8) Berâm vêng tûra upate pêkna chu Pathianin a mite a hmangaihna thûk tak a lantîrna a ni. Hêng mite hi fîmkhur taka thlan an ni—Pathian thu-in a tiam chinte an tlin tûr a ni. (1 Timothea 3:1-7; Tita 1:5-9) Anni chuan “berâmho chu ngilneihna nên an enkawl” tûr a ni tih an hria a; tichuan, berâmte chuan hmangaihtû berâmpute chungah lâwm nachhan tûr an nei ang. (Tirhkohte 20:29, NW; Sâm 100:3) Jehova’n a berâmte thinlung chu chutiang lâwmna nên a khat a ni tih a hmuh chuan, ama thinlung ngei pawh chu a hlim ngei ang!—Thufingte 27:11.
3 Pathian thilthlâwnpêk hlutna chu kan tikiam duh lo ngei ang a; a thilthlâwnpêk ngaihlu lo nih pawh kan duh hek lo vang. Zawhna pahnih a lo lang ta: Engtin nge upate’n kohhrana an chanvo chu an thlîr ang? Tin, engtin nge berâmte’n ‘mihringte hnêna thilpêkte’ an ngaihhlutna chu an lantîr ang?
‘I Thawhpuite Kan Ni’
4, 5. (a) Paula chuan kohhran chu eng nên nge a tehkhin a, engvângin nge hei hi tehkhinna inâwm tak a nih? (b) Paula tehkhin thu chuan kan inthlîr tawn dân tûr leh kan incheibâwl tawn dân tûr eng nge a târ lan?
4 Jehova chuan ‘mihringte hnêna thilpêkte’ chu kohhranah thuneihna engemaw zât a pe a ni. Upate chuan an thuneihna chu hman sual an duh lo ngei mai; mahse, mihring ṭha famkim lo kan nih avângin chûng chu tihpalh awl tak a ni tih an hria a ni. Chuti a nih chuan, berâmte nêna an inlaichinna chu engtin nge an thlîr ang? Tirhkoh Paula tehkhin thu hi han ngaihtuah teh. ‘Mihringte hnêna thilpêkte’ pêk a nih chhân sawiho hnû-ah Paula chuan: “Hmangaiha . . . engkimah amahah kan ṭhang lian thei zâwk ang: amah chu lû a ni, Krista chu. Amah azârah taksa pumhlûm chuan inzawmna tinrêng thawh avânga rem taka inchuktuah leh inzawm khâwmin, pêng tin thawhzia ang ṭheuhvin hmangaihnaa insiam ṭha tûrin taksa chu a lo tipung ṭhîn a ni,” tiin, a sawi a. (Ephesi 4:15, 16) Chuvângin, Paula chuan kohhran zînga mite, upate leh mi dangte, chu mihring taksa nên a khaikhin a ni. Engvângin nge tehkhin thu inâwm tak a nih?
5 Mihring taksa hi pêng chi hrang hrang tam tak nei-a din a ni a; mahse, lû pakhat chauh a nei a ni. Amaherawhchu, taksa-a awm zawng zawng—tihrawl te, hriatna tha zâm te, thisen hawn kawng te—ṭangkai lo engmah a awm lo. A pêng tinte chu a hlû-in, taksa hrisêlna leh mawi nân engemaw an thawh ve ṭheuh a ni. Chutiang bawkin, kohhran chu mi leh sa chi hrang hrang tam tak hmanga din a ni a; mahse, chûng mi tin—naupang an ni emaw, upa an ni emaw; an chak emaw, an chak lo emaw—te chuan thlarau lama kohhran pumpui hrisêlna leh hmêl mawi nân thawh theih engemaw an nei ṭheuh va ni. (1 Korinth 12:14-26) Tumah hi pawimawh lo lutuk ni-a inngaih a ngai lo. A lehlam pangah chuan tumah hi ṭha chungchuang ni-a inngaih tûr a ni lo, kan zavai-in—berâm vêngtû leh berâmte tiamin—taksa pênga mi kan ni a; tin, lû pakhat a awm a, Krista chu. Chutichuan, Paula chuan kan neih tûr inhmangaih tawnna te, inngaihsak tawnna te, leh inzah tawnna te chu phûr takin a lo ziak a ni. He mi pawmna hian upate chu inngaihtlâwmna nei tûr leh kohhrana an chanvote inbûk tâwk taka thlîr tûrin a ṭanpui a ni.
6. Tirhkoh thuneihna nei ni mah se la, Paula’n engtin nge inngaihtlâwmna thlarau a lantîr?
6 Hêng ‘mihringte hnêna thilpêkte’ hian an rinpuite nunna emaw, rinna emaw chu thunun tlat an tum lo. Tirhkoh thuneihna nei ni mah se, Paula chuan inngaitlawm takin: “In rinna chungah lalna kan nei, ka ti lo va, in lâwmna ṭanpuitu kan ni, ka ti zâwk a ni; rinnaa ding in ni si a,” tiin, a sawi a. (2 Korinth 1:24) Paula chuan a unaute rinna leh an nun kawng chu thunun tlat a duh lo va. Thil dik tih an duh avânga Jehova inawpna pâwla mi rinawmte an ni tawh a, anni chu a rintâwkzia a sawi chhuah tawh avângin, chutianga tih ṭûl lo tih a hre chiang a ni. Chuvâng chuan, a chungchâng leh a zinpui Timothea chungchâng chu Paula chuan: ‘Nangmahni nêna hlim taka Pathian rawngbâwl dun chu ka hna a ni,’ tiin, a sawi a ni. (2 Korinth 1:1) Inngaihtlâwmna thlarau a va ni tehlul êm!
7. Upa inngaitlâwmte’n kohhrana an chanvo chungchâng eng nge an chian a, an rinpuite chungah eng rintâwkna nge an neih?
7 Tûn laia ‘mihringte hnêna thilpêkte’ chuan chutiang hna chu an nei a ni. Anni chu ‘kan hlimna tûra kan thawhpuite’ an ni. Upa inngaitlâwm takte chuan mi dangte’n Pathian rawngbâwlna-a an thawh theih zât tûr tuksak chu an tih tûr a ni lo tih an hre chiang a ni. Mi dangte chu an rawngbâwlna tihzau emaw, tihmasâwn emaw tûra an fuih laiin, Pathian rawngbâwlna chu duhna thinlung aṭanga bul inṭan tûr a nihzia an hria a ni. (2 Korinth 9:7 khaikhin rawh) An thawhpuite an hlim chuan, theih tâwp an chhuah dâwn tih an ring tlat a ni. ‘Lâwm chunga LALPA rawng bâwl’ tûra an unaute ṭanpui chu an châk hlê a ni.—Sâm 100:2.
Hlim Chunga Rawng Bâwl Tûra Ṭanpui Ṭheuh
8. Upate’n an unaute Jehova rawng hlim chunga bâwl tûra an ṭanpui theih dân kawng ṭhenkhatte chu engte nge?
8 Upate u, inunaute’n hlim chunga rawng an bâwl theih nân engtin nge in ṭanpui theih? Entîr siamin i fuih thei a ni. (1 Petera 5:3) Rawngbâwlnaa i phûrna leh i hlimna chu lantîr ni rawh se; tichuan, i entîr chu entawn tûrin mi dangte a tiphûr ang. Soul pumhlûma an beihna chu fak rawh. (Ephesi 4:29) Phûr tak leh rilru dik taka fakna chuan mi dangte chu ṭangkai leh mamawh ni-a inhriatna a pe a ni. Chu chuan berâmte chu Pathian rawng bâwl tûra theih tâwp chhuahtîr duhna nei tûrin a fuih ang. Khaikhinna duhawm lo takte pumpelh rawh. (Galatia 6:4) Chutiang khaikhinnate chuan mi dang hmasâwntîr ai mahin a tilunghnual duh zâwk a ni. Chu bâkah, Jehova berâmte chu mi chi hrang hrang—dinhmun leh theihna chi hrang hrang nei an ni. Paula angin, i unaute chungah rintâwkna lantîr rawh. Hmangaihna chuan “engkim a ring a,” chuvângin kan unaute’n Pathian an hmangaih a, tihlâwm an duh a ni tih kan ring tûr a ni. (1 Korinth 13:7) ‘Mi dangte i chawimawi-in’ an ṭhatna lai ber i la chhuak a ni. (Rom 12:10) Berâmte chu fuih leh chawh harha an awmin, a tam zâwkte chuan Pathian rawngbâwlna-ah theih tâwp an chhuah ang a, chu rawngbâwlna-ah chuan hlimna an hmu ang.—Matthaia 11:28-30.
9. An upat puite thlîrna engin nge upa tinte hlim chunga Jehova rawng bâwl tûrin a ṭanpui theih ang?
9 Inngaitlâwm taka ‘thawhpui’ anga inngaihna chuan hlim taka rawngbâwl tûrin a ṭanpui che ang a, i thawhpui upate thilthlâwnpêk ṭha takte chu ngaisâng tûrin a ṭanpui bawk ang che. Upa tin-in kohhran hlâwk nâna hman theih thiamna leh theihna an nei ṭheuh a ni. (1 Petera 4:10) Ṭhenkhat chu zirtîrna lama malsâwm an ni mai thei a, mi dangte chu huaihawttû ṭangkai tak an ni mai thei bawk a ni. Khawngaihna leh lainâtna an neih avânga nêlawm zual bîkte pawh an la awm cheu mai thei bawk. Upa tumah hian thilthlâwnpêk zawng zawngte chu ang khat vekin an nei thei lo tih chu a dik a ni. Upa chu thilthlâwnpêk bîk—entîr nân, zirtîr thiamna—neihna hian upa dangte aiin a dah chungnung em? Teh suh e! (1 Korinth 4:7) Kawng lehlamah chuan, mi dang thilthlâwnpêk dawn avânga thikna neih emaw, upa dangte theihna hian mi dangte fak a hlawhtîr hunah tling lo ni-a inhriat emaw a ṭûl lo. I laka Jehova’n a hmuh thilthlâwnpêk i neihte chu hre reng ang che. Chu thilthlâwnpêkte enkawl puitling tûrin leh unaute ṭangkaipui nâna hmang tûrin a ṭanpui thei che a ni.—Philippi 4:13.
‘Thu Awih leh Intulût Tak Ni ang Che’
10. ‘Mihringte hnêna thilpêkte’ atâna ngaihhlutna kan lantîr chu engvângin nge a inmil chiah?
10 Thilthlâwnpêk kan dawnin ngaihhlutna lantîr chu thil tihâwm awm chhun a ni a. Kolossa 3:15 chuan, “lâwm nachâng hre . . . rawh u,” a ti a. Chuti chu, Jehova thilthlâwnpêk hlu tak ‘mihringte hnêna thilpêkte’ chungchâng chu eng nge ni ang? Dik takin, a bul berah chuan phal taka Thilthlâwnpêk Petû Jehova lakah kan lâwm a ni. A nih leh, anni ‘mihringte hnêna thilpêkte’ chungchâng ve thung chu eng nge ni? Kan ngaihhlutzia engtin nge kan lantîr ang?
11. (a) ‘Mihringte hnêna thilpêkte’ kan ngaihhlutzia engtin nge kan entîr ang? (b) “Thu awih” leh “intukluh” lanchhuahtîr pawimawhna eng nge ni?
11 ‘Mihringte hnêna thilpêkte’ kan ngaihhlutzia chu Bible ṭanchhan zilh-na leh thu tlûkna an siamte a rang lama ngaihvenna hmangin kan lantîr thei a ni. Bible chuan: “In hotute thu âwih ula, an thu thuin awm rawh u; chanchin sawi tûr an nih avângin, lungngai chunga sawi lova, hlim chunga an sawi theihna tûrin in thlarau an vênsak ṭhîn che u a ni; lungngai chunga sawi chu in tâna pawi tûr a ni si a,” tiin, kan tâna thurawn a pe a ni. (Hebrai 13:17) Hotute “thu âwih” mai ni lovin, an lakah kan ‘intulût’ bawk tûr a ni tih chhinchhiah ang che. Greek thumal ‘intulût’ tih awmze dik tak chu “thuneihna hnuaia tlâwm tlat” tihna a ni. Bible zirlai R. C. H. Lenski-a chuan “thu âwih” tih leh ‘intulût’ tih thumal chungchâng a ngaih dân chu hetiang hian a sawi a: “Miin an tih tûr dikna leh hlâwkna an hriat avânga rem ti-a an tihin thu âwih an ni a; thuneihna hnuaia tlâwm tlat tih chu ngaih dân dang a neih hun pawha . . . thu âwih tlat hi a ni,” tiin. Hotute kaihhruaina kan hriatthiam a kan pawm hun chuan thuâwihna chu amahin a lo lang nghâl mai thei a. Mahse, thu tihtlûk nachhan kan hriat thiam loh chuan engtin nge ni ang?
12. Thu tlûkna bîk chiah a zavaia kan hre vek lo a nih pawhin, engvângin nge kan intukluh ang a, a nih loh leh intukluh duhna rilru kan neih ang?
12 Hei hi intukluh, a nih loh leh thuneihna hnuaia tlâwm tlat a ṭûl hun a ni mai thei. Eng vângin maw? Thil pakhatah chuan, hêng thlarau lama tlinna neite hian thinlung takin kan ṭhatna tûr an ngaihtuah a ni tih kan rin tlat a ngai a ni. Engpawhnise, anni chuan an enkawl tûra pêk berâmte chanchin chu Jehova hmâ-a sawi tûr an nihzia an hre chiang a ni. (Jakoba 3:1) Chu bâkah, thu tihtlûkna an neih chhan thu rûk zawng zawngte kan hre vek kher lo thei tih kan hre reng tûr a ni.—Thufingte 18:13.
13. Upate thu tihtlûkna rorêlna a lo thlen huna intulût thei tûrin engin nge min ṭanpui theih?
13 Rorêlnate hnuaia intukluh chungchâng chu engtin nge ni? Hei hi a awlsam dâwn lo sa a ni; a bîk takin kan hmangaih tak tuemaw—kan chhûng khat laina emaw, kan ṭhian ṭha emaw—hnawhchhuah tûra thu tihtlûkna a awm hian. Hetah pawh hian, ‘mihringte hnêna thilpêkte’ rorêlna hnuaia tlâwm tlat hi a ṭha ber a ni. Anni chu keini aiin thil tum nei thei zâwk dinhmunah an ding a, thu dik chu keini aiin an hre thei zâwk a ni. Hêng unaute hi chutiang thu tlûkna avângin nasa takin an tuar fo va ni; ‘Jehova tâna rorêl’ chu mawhphurhna nasa tak a ni. (2 Chronicles 19:6) Pathian chuan ‘ngaihdam a peih’ tih an hriat avângin, zahngai thei ni tûrin nasa takin an bei a ni. (Sâm 86:5) Mahse, kohhran pawh an vawng thianghlim tûr a ni a, Bible chuan sim duh lo thil sual titute chu hnawtchhuak tûrin a kawhhmuh a ni. (1 Korinth 5:11-13) Thil sual titute chuan thutlûkna chu an pawm tlângpui a ni. Thununna chu a inhriat chhuah nâna a mamawh chiah chu a ni mai thei. Keini, a hmangaihte thutlûkna-ah kan intukluh chuan, thununna aṭanga hlâwkna nei tûrin kan ṭanpui a ni ang.—Hebrai 12:11.
‘Anni chu Ngaihlu Hlê Rawh’
14, 15. (a) 1 Thessalonika 5:12, 13-in a sawi dânin engvângin nge upate’n kan ngaihhlut an phû êm êm? (b) Upate chu ‘kan zînga thawk rimte’ an ni tih engvânga sawi theih nge an nih?
14 ‘Mihringte hnêna thilpêkte’ kan ngaihhlutna chu kan ngaihsakzia lantîrna hmangin kan lanchhuahtîr thei bawk a ni. Thessalonika kohhrante hnêna a lehkha thawnah Paula chuan: “In zînga thawkrim leh, Lalpaa in hotua awm leh, zilhtute che u chu hre tûr leh, an hnathawh vânga hmangaiha ngaihlu êm êm tûrin kan ngên che u a ni,” tiin, kohhran mite chu a fuih a ni. (1 Thessalonika 5:12, 13) “Thawkrim”—hei hi mahni hmasial lo taka kan aia inpe upa ṭhahnem ngaite sawina a ni lo vem ni? Hêng unau duh takte phûr rit chu han ngaihtuah lawk teh.
15 Anni chu chhûngkaw chawm nâna sorkâr hnathawk an ni tlângpui a. (1 Timothea 5:8) Upa-in fa a neih chuan, anni chuan pa ber ngaihsakna leh hun pêk an mamawh a ni. An school hna-ah ṭanpui an ngai thei a, intuaitharna ṭha-a an tleirâwl tha te hmang thei tûra hun duansak te an ngai mai thei bawk. (Thuhriltu 3:1, 4) A pawimawh berah chuan, a chhûngte thlarau lam mamawh a enkawl a, chhûngkaw Bible zirna neihpui zat zat-in, thlawhhma rawngbâwlna-ah a kalpui a, leh Kristian inkhâwmna-ahte a hruai bawk ṭhîn. (Deuteronomy 6:4-7; Ephesi 6:4) Kan zînga mi tam takte neih hêng mawhphurhna pângngai te mai bâkah upate chu hna dang thawh tûr tam tak an nei a ni tih i theihnghilh lo vang u. Chûng an hnate chu: inkhâwmna hrang hrang atân inbuatsaih te, berâm kan kual te, thlarau lama kohhran hma khua ngaihsak te, leh a ṭul huna rorêlna kengkawh te a ni. Ṭhenkhatte chuan bial inkhâwm te, district inkhâwmpui te, Kingdom Hall sakna-ah te, leh Damdawi In Inzawmna Ngaihtuahtû Pâwl-ah te mawhphurhna dang an chelh belh bawk a ni. Hêng unaute hi hna “thawkrim” te an ni ngei mai!
16. Upate ngaihhlutna kan lantîr theih dân kawngte sawifiah rawh.
16 Engtin nge anni chu kan ngaihhlutzia kan lantîr theih ang? “A hun taka chhânna dik hriat hi a va lâwmawm êm!” tiin, Bible thufing chuan a sawi a. (Thufingte 15:23; 25:11) Chuvângin, ngaihsânna tak tak leh fuihna thute chuan an thawhrimna te chu a tûr rêngah kan ngai lo tih a lantîr a ni. An lakah kan beisei a sâng lutuk tûr a ni lo bawk. Nimahsela, an ṭanpuina kan dîl hreh tûr a ni lo. ‘Kan thinlung nâ êm êm-in’ Pathian Thu “zirtîr tûra tling” te hnên aṭanga fuihna te, kaihhruaina te, a nih loh leh zilhna te kan mamawh châng a awm mai thei a ni. (Sâm 55:4; 1 Timothea 3:2, NW) Chumi rual chuan, upa chuan kohhrana thil dangte leh chhûngkaw mamawhte a hlamchhiah theih loh avângin hun tiam chin nei chauh min pe thei tih kan hriat rêng a ṭûl a ni. Hêng unau thawkrimte ‘lainâtna’ neiin, âwm lo takin thil kan phût duh lo vâng. (1 Petera 3:8) A âwmtâwka hun leh ngaihsakna min pêk theih apiangte chu i ngaihlu zâwk ang u.—Philippi 4:5.
17, 18. Upa nupui tam takte’n eng inpumpêkna nge an siam a, hêng farnu rinawmte hi a tûr rêngah kan ngai lo tih engtin nge kan lantîr theih ang?
17 Upate nupui chungchâng chu eng nge ni ve le? Anni pawhin kan ngaihsakna chu an phû ve lo vem ni? Engpawhnise, anni chuan an pasalte chu kohhran nên an inṭawm a ni. Hei hian anni lamah inpêkna a phût fo va ni. A châng chângin upate chuan an chhûngkuaa hun an hman theih tlai hun ṭha-te chu kohhran thil ngaihtuah nân an hmang ṭhîn a. Kohhran tam takah chuan Kristian hmeichhe rinawmte chuan chutiang inpêkna chu lâwm takin an siam a; chuvâng chuan, an pasalte’n Jehova berâmte an ngaihsak thei a ni.—2 Korinth 12:15, khaikhin rawh.
18 Hêng Kristian unaunu rinawmte inpêkna hi a tûr rêngah kan ngai lo tih engtin nge kan lantîr theih? Âwm lo taka an pasalte phût a awm lovin kan lantîr thei a ni. Ngaihhlutna thu tluangmâwl thiltithei tak pawh hi i theihnghilh ngai lo vâng u. Thufingte 16:24 chuan: “Thu pai nuam chu khawithlâr ang a ni a, nunna atân a thlum a, ruh tân hrisêlna a ni,” tiin, a sawi. Thiltawn hi han ngaihtuah teh. Kristian inkhâwm bânah chuan nupa tuak khat chuan upa chu panin an fapa tleirâwl chungchângah biak an duh thu an hrilh a. Upa-in chutianga nupa tuak a biak lai chuan a nupui chuan dawhthei takin a lo nghâk a. A hnû-ah nu chuan upa nupui hnênah chuan: “Kan chhûngkaw ṭanpui nâna i pasal-in hun a hmanna avângin lâwmthu hrilh che ka duh a ni,” tiin, a hrilh a ni. Chûng ngaihhlutna thu mâwl leh duhawm takte chuan upa nupui thinlung chu a khawih êm êm a ni.
19. (a) Upate’n a huho-in rinawm takin eng thil tum nge an tihpuitlin mêk?
19 Berâmte enkawl tûra upate pêk chu Jehova ‘thilpêk ṭha’ te zînga pakhat a ni. (Jakoba 1:17) Hêng mite hi kei mah ni ang bawka ṭhafamkim lo an ni a, tihsual an nei ṭhîn. (1 Lalte 8:46) Chu bâkah, pâwlho angin khawvêl pum kohhrana upate chuan an ngaihtuah aṭana Jehova thiltum chu rinawm takin an tifamkim mêk a—chûngte chu insiam ṭha tûrte inchawmdawl tûr te inzawmkhâwm tûr te leh berâm rual ho veng him tûr te-in. Upa tinte’n duat taka Jehova berâmte venhimna chhunzawm zêl tûrin thu titlu ṭheuh rawh se, tichuan a unaute tâna thilthlâwnpêk a nih loh leh malsâwmna a ni tih chianna a ni. Tin, kan za-in thu awihin leh an hnêna intulûtin leh an thawhrimnate kan hlutzia lantîrna hmangin ‘mihringte zînga thilpêkte’ kan ngaihsânzia lanchhuahtîr ṭheuh i tum ang u. Dik takin: ‘Hlim chunga Pathian rawngbâwl tûra ṭanpui che hi kan hna a lâwm’ ti a berâmte hnêna sawi tûra mi Jehova’n hmangaih taka min pêk avângin kan va lâwm thei teh rêng êm!
Engtin Nge I Chhân Ang?
◻ Engvângin nge kohhran chu taksa nêna inâwm takin kan tehkhin theih ang?
◻ Engtin nge upate’n hlim chunga Jehova rawng bâwl tûrin an unaute an ṭanpui theih?
◻ Engvângin nge hma hruaitute thu chauh ni lo va, an hnênah kan intukluh bawk ang?
◻ Upate kan ngaihhlutzia engtin nge kan lanchhuahtîr theih?
[Phêk 16-naa milem]
Upate chuan mi dangte chu soul zawng zawng a bei tûrin an fuih ṭhîn
[Phêk 17-naa milem]
Upate chuan an rawng bâwlna-a phûrna an entîrna hmangin chhûngkaw mi tinte leh mi dangte pawh hlim chunga rawngbâwl tûrin an ṭanpui thei a ni
[Phêk 18-naa milem]
Kan upa thawkrimte hi kan ngaihlu tak zet a ni!