Phûr Takin Chanchin Ṭha Puang Rawh
“Thlarau kawngah chuan ṭhahnemngai ula; Lalpa rawng bâwl ula.”—ROM 12:11.
1, 2. Kristiante chuan chanchin ṭha hriltu an nih angin eng rilru put hmang nge chhawmnun an tum?
TLANGVAL pakhat chuan a hna thar a phûrpui hle a. A hna a zawm nî chuan a pu zirtîrna leh a hna hmasa ber tûr chu a nghâkhlelin, a la urhsûn hle a; theihtâwp chhuaha thawh pawh a inhuam tlat a ni.
2 Chutiang chiah chuan, keini Kristiante pawh hi hna zawm ṭan angah kan inngai tûr a ni. Kan beisei chu chatuana nun a nih avângin, Jehova tâna kan hna thawh chu kan ṭan ve chauh a tih theih a ni. Min Siamtu chuan chatuana kan thawh tûr hna ruahmansa tam tak a nei a. Chûng zînga a hmasa ber chu Lalram chanchin ṭha puan hi a ni. (1 Thessalonika 2:4) He Pathian hna min tuk hi engtin nge kan ngaih? Chu tlangvâl angin, taima tak leh hlim chungin, theihtâwp chhuaha phûr taka thawh chu kan duh a ni!
3. Chanchin ṭha rawngbâwltu hlawhtling tak nih nân eng nge ngai?
3 Chutiang rilru put hmang ṭha neih chu thil harsa tak a ni ngei ang. A chhan chu kan rawngbâwlna bâkah hian, mawhphurhna dang tam tak kan nei a, chûng zînga ṭhenkhatte chuan kan tisa lam leh kan rilru lam pawh a nghawng theih vâng a ni. Chûng kan mawhphurhnate chu enkawl thei deuh reng mah ila, chutianga enkawl reng chu chona a tling a ni. (Marka 8:34) Isua pawhin Kristian hlawhtling ni tûrin beih ṭâng ṭâng a ngai ang tih a sawi uar si a.—Luka 13:24.
4. Ni tin nun lungkhamna chuan kan thlarau lam chu engtin nge a ngawng theih?
4 Thawh tûr a tam êm avângin, lunghnual châng leh tlâk hniam châng neih chu a awlsam êm êm a. ‘Dam chhûng khawsak ngaihtuahna’ chuan theocratic rawngbâwlna kan ngaihhlutna leh chu mi atâna kan ṭhahnemngaihna chu a dîp thei a ni. (Luka 21:34, 35; Marka 4:18, 19) Tin, kan ṭhat famkim lohna avângin, ‘kan hmangaihna hmasa ber’ pawh kan bânsan mai thei bawk. (Thu Puan 2:1-4) Chu bâkah, Jehova rawngbâwlna pêng engemaw ber chu a rûn dâl chauhvin kan thawk mai thei bawk a ni. A nih leh, taima taka rawng kan bâwl reng theih nâna pawimawh fuihna chu Bible-in engtin nge min pêk?
Kan Thinlunga “Mei Kâng” Ang
5, 6. Tirhkoh Paula’n engtin nge a thuhril theihna chanvo chu a thlîr?
5 Jehova rawngbâwlna min pêk hi thil narân mai nihtîr tûr atân chuan a hlu lutuk a ni. Tirhkoh Paula chuan chanchin ṭha hrilh chu chanvo ropui takah a ngai a; chuvângin, chu mi chanvo chelh tûr chuan tling lo a inti êm êm a ni. Hetiang hian a sawi hial a ni: “Jentailte hnêna Krista hausakna chhui chhuah rual lohte chanchin hril tûr leh, thurûk chatuan aṭanga Pathian engkim siamtuah inthupa awm enkawlna chu engnge ni tih mi zawng zawng entîr tûrin kei mi thianghlim zawng zawnga tê ber aia tê zâwk hnênah hian chu khawngaihna chu pêk a ni,” tiin.—Ephesi 3:8, 9.
6 Rawngbâwlna chungchânga Paula rilru put hmang chu kan tân entawn tlâk tak a ni. Rom mite hnêna a lehkha thawnah chuan: “Chanchin ṭha ka theihtâwpa hril tûrin ka inpeih reng a ni,” a ti a, chu chu a zahpui lo. (Rom 1:15, 16) A rawngbâwlna hlen duhna rilru put hmang dik tak a nei a ni.
7. Rom mite hnêna a lehkha thawnah Paula chuan eng chungchângah nge anni chu a vaukhân?
7 Tirhkoh Paula chuan taihmâk a pawimawhzia a hriat avângin, Rom khuaa Kristiante chu: “Taihmâk kawngah chuan thatchhe suh ula; thlarau kawngah chuan ṭhahnemngai ula; Lalpa rawng bâwl ula,” tiin a zilh a ni. (Rom 12:11) Greek thu mal “thatchhia” tia lehlin hian, “inthlahdah, zawmthaw” nihna pawh a keng tel a. Kan rawngbâwlnaah kan thatchhia a nih kher loh pawhin, thlarau lama inthlahdahna lakah kan fîmkhur ṭheuh a pawimawh a, kan inthlahdah ṭan tih kan hriat chuan, kan rilru put hmang kan siam ṭha nghâl vat tûr a ni.—Thufingte 22:3.
8. (a) Jeremia thinlunga “mei kâng” ang kha eng nge ni a, engvâng nge? (b) Jeremia thiltawn aṭangin eng nge kan zir theih?
8 Pathian thlarau hian kan lunghnual chângin min ṭanpui thei a ni. Entîr nân, ṭum khat chu zâwlnei Jeremia chu a lunghnual êm êm a, a zâwlnei hna chu bânsan a rilrûk hial a. Jehova chungchâng chu: “Ani chu ka lam lo vang a, A hmingin thu ka sawi tawh hek lo ang,” tiin a sawi hial a ni. Jeremia chu thlarau lamah a chak lo tihna êm ni? Ni lo ve. Thlarau lama a chakna te, Jehova a hmangaihna te, leh thutak tâna ṭhahnem a ngaihna te chuan a hna chhunzawm tûrin a thuam chak a ni. Ani chuan heti hian a hrilhfiah a ni: “Ka ruh chhûnga mei kâng inkhung ta ang mai hian ka thinlung chhûngah chuan a awm si ṭhîn, ka pai hle hle zo lo va, ka chelh ngang lo a ni,” tiin. (Jeremia 20:9) Pathian chhiahhlawh rinawmte chuan lunghnual châng an nei ṭhîn ngei ang. Mahse, Jehova ṭanpuina an dîl chuan, ani’n an thinlung a hria ang a, Jeremia ang rilru an neih phawt chuan a thlarau thianghlim chu phal takin a pe ang.—Luka 11:9-13; Tirhkohte 15:8.
“Thlarau chu Timit Suh Ula”
9. Kan tâna thlarau thianghlim hna thawh chu engin nge dang thei?
9 Tirhkoh Paula chuan: “Thlarau chu timit suh ula,” tiin, Thessalonika khuaa mite chu a fuih a. (1 Thessalonika 5:19) Ni e, Pathian dânte kalh zâwnga thiltih leh rilru put hmang chuan kan tâna thlarau thianghlim hna thawh chu a dang thei a ni. (Ephesi 4:30) Tûn lai Kristiante chuan chanchin ṭha hrilh tûr an nei a. He hna hi kan hlut hle a ni. Chuvângin, Pathian hre lote’n kan thuhrilh rawngbâwlna an hmusit pawh hi a mak kan ti lo. Mahse, Kristianin duh rêng avânga rawngbâwlna a ngaihthah chuan Pathian thlarau hnathawh a timit thei a ni.
10. (a) Kan mihringpuite thil thlîr dânin engtin nge min nghawng theih? (b) 2 Korinth 2:17-ah kan rawngbâwlna ngaih dân ṭha tak eng nge sawichhuah a nih?
10 Pâwn lam mi, ṭhenkhat chuan kan rawngbâwlna chu thu leh hla semna ang lekah an ngai mai thei a. Ṭhen khatte erawh chuan thawhlâwm khawn tûr ringawta in tina kalah min ngai sual thei bawk. Chutiang thlîr dânte’n kan rilru a nghâwng chuan, kan rawngbâwlna chu a tihniam thei a ni. Chuvângin, chutiang rilru put hmang innghawngtîr ai chuan, Jehova leh Isua’n kan rawngbâwlna an thlîr dân hi i vawng reng zâwk ang u. Tirhkoh Paula’n: “Mi tam takin Pathian thu hi mite buma sumdâwn nân an hmang angin keini zawngin kan hmang ve si lo va; tih tak zet zâwkin, Pathian tirh zâwkin, Pathian mithmuhin Kristaah chuan thu kan sawi ṭhîn a ni,” tia a puan hian rawngbâwlna a ngaihsânzia a lang a ni.—2 Korinth 2:17.
11. Kristian hmasate kha tihduhdahna hnuaiah pawh engin nge taihmâktîr reng thei a, an entawn tûr siam chuan engtin nge min nghawng ang?
11 Isua thih hnu rei lo têah Jerusalema a zirtîrte chu tihduhdah an ni nghâl a. Anni chu thu hril lo tûra thu pêk leh vau an ni. Chuti chung pawhin, Bible chuan anni chu: “Thlarau thianghlimin an lo khat a, huai takin Pathian thu an hril ta a,” tiin, a sawi a ni. (Tirhkohte 4:17, 21, 31) A hnu kum engemaw zâta Timothea hnêna Paula lehkha thawn chuan, Kristiante neih tûr rilru put hmang ṭha a lantîr a. Chu lehkha thawnah chuan, Paula’n hetiang hian a ziak a ni: “Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zâwk si a. Chutichuan kan Lalpa thu hriattîrna chu zahpui suh la, kei, ama mi tâng pawh hi mi zahpui hek suh ang che. Chanchin ṭha avânga hrehawm hi Pathian thiltihtheihna angzia ziain mi tuarpui zâwk ang che,” tiin.—2 Timothea 1:7, 8.
Kan Ṭhenawm Te Lakah Eng nge Kan Bat?
12. Chanchin ṭha kan hrilh chhan bul ber chu eng nge ni?
12 Kan rawngbâwlnaa rilru put hmang dik nei tûr chuan, a turtu dik kan nei ngei tûr a ni. Engvângin nge thu kan hrilh? A chhan bul ber chu Sâm ziaktu ṭawngkam: “Mi thianghlimte pawhin an fak ang che. I ram ropuizia thu sawiin, i thiltihtheihna thu chu tîtîah an la hmang ang; mihring fate hnênah a thiltih ropui takte leh, a ram mawina ropuizia hriattîr tûrin,” tihah hian a hmuh theih a ni. (Sâm 145:10-12) Ni e, vântlâng hmaa Jehova fak nân leh mi zawng zawng hmaa a hming tihthianghlim nân thu kan hril a ni. Chuvângin, mi tlêm tê chauhvin min ngaithla duh a nih pawhin, rinawm taka chhandamna thuchah kan puanchhuahna chuan Jehova a chawimawi a ni.
13. Engin nge chhandam beiseina mi dangte hnêna hrilh tûrin min chêttîr?
13 Tin, mite kan hmangaih avâng leh thisena thiam loh channa kan pumpelh nân thu kan hril bawk. (Ezekiela 33:8; Marka 6:34) Hei hi, Kristian ni lote chungchânga Paula thusawi: “Grik mite leh Awze mite hnênah bat ka nei; mi fing leh mi finglote hnênah pawh” tih nên hian a inkûngkaih a ni. (Rom 1:14) ‘Mi zawng zawng chhandam’ chu Pathian duhzâwng a nih avângin, Paula chuan mite hnêna chanchin ṭha puan chhuah chu a bat niah a ngai tlat a. (1 Timothea 2:4) Tûn laiah pawh, kan ṭhenawm te hmangaihna kan nei a, an lakah bat nei niin kan inhre bawk. Jehova mihringte hmangaihna chuan an tâna thi tûrin a Fapa leiah rawntîr tûrin a chêttîr a. (Johana 3:16) Chu chu inpêkna ropui tak a ni. Chuvângin, Isua inthawina avânga chhandamna chanchin ṭha chu mi dangte kan hrilh a, chu mi atâna hun leh tha leh zung kan hman hian Jehova hmangaihna kan entawn tihna a ni.
14. Bible-in Kristian kohhran pâwna khawvêl chu engtin nge a sawi?
14 Keini Jehova Thuhretute chuan mi tin chu Kristian unaute lo la ni tûr angin kan thlîr a. Chuvângin, huaisen takin thu kan hril tûr a ni—mi do tûr zâwnga huaisenna lam ni lovin. Mahse, Bible pawhin khawvêl chungchâng a sawiin, mi do zâwng ni âwm tak ṭawngkam khauh tak tak a hmang ngei si. Entîr nân, Paula’n “he khawvêl finna” tih leh “khawvêl châknate” tia a sawi khân “khawvêl” tih thu mal chu a ṭha lo lam hawiin a hmang a ni. (1 Korinth 3:19; Tita 2:12, 13) Ephesi khuaa Kristiante chu “he khawvêl dân anga” an kal lai khân, thlarau lama “thi” an ni tih a hriatnawntîr bawk. (Ephesi 2:1-3) He mi leh a thusawi dangte chu tirhkoh Johana thu: “Khawvêl pumhlûm hi mi sual thu thuin a awm” tih nên a inmil a ni.—1 Johana 5:19.
15. Kristian kohhran pâwna mite chungchângah eng nge kan tih loh vang a, engvângin nge?
15 Amaherawhchu, chûng thute chu, Pathian ata inmihrang khawvêl sawina a ni a, mi mal tuemaw sawina a ni lo tih hre reng ang che. Chuvângin, Kristiante chuan thuhrilh rawngbâwlna mite dawnsawn dân tûr ngaihdân an siam lâwk lo. Tumah kêl ang zînga mi anga sawi theih nân ṭanchhan rêng an nei lo bawk. Chu chu “kêl” zîng ata “berâm” hlîr tûra Isua a lo kal hun chauhva hriat theih thil a ni a, keini lo sawi theih a ni lo. (Matthaia 25:31-46) Keini chu rorêl tûr kan ni lo; Isua erawh chu rorêl tûra ruat a ni. Chu bâkah, nungchang chhe tâwpkhâwk ṭhenkhat chuan Bible thuchah an pawm a, tichuan an nun kawng an thlâk a, nun dân thianghlim taka nung Kristian an lo ni ṭhîn tih thiltawn chuan a târ lang a ni. Chuvângin, mi tuemawte ṭhiana neih chu duh lo mah ila, Lalram beiseina hrilh theihna hun remchâng kan neih phawt chuan, hrilh hriat kan hreh lo. Pathian Lehkha Thu chuan ring lotu an la ni chung pawha “chatuana nun duhna rilru dik tak nei,” an awm tih a sawi si a. Anni chu a tâwpah ringtu an lo ni ṭhîn a ni. (Tirhkohte 13:48, NW) Thu kan hrilh hma emaw, vawi tam tak kan hrilh hma emaw chuan chutiang rilru dik tak putu chu tunge a nih kan hre lo. Hei hi hre rengin, chhandamna thuchah la pawm lote pawhin an pawm duh mial beiseiin “thuhnuairawlh tak leh ṭih dêk” chungin ṭha takin kan cheibâwl a ni.—2 Timothea 2:25; 1 Petera 3:15.
16. “Zirtîr thiamna” tihhmasâwn kan duh chhan pakhat chu eng nge ni?
16 Zirtîr thiamna lama hma kan sâwnna chuan chanchin ṭha puanna kawnga kan phûrna a tipung ang. Entîr nân: Infiamna tuiawm tak chu a khelh dân hre lote tân chuan a tuiawm kher lo vang. Mahse, a khêl thiamte tân erawh chuan khelh nuam tak a ni thung. Chutiang bawkin, an “zirtîr thiamna” tihmasâwntu Kristiante chuan rawngbâwlna chu nuam an ti hle a ni. (2 Timothea 4:2, NW; Tita 1:9) Paula chuan: “Hnathawktu, thutak thu fel taka hmang chu zak tûr a ni lo angin, Pathian ngaiha ṭhaa inentîr tûrin ṭhahnem ngai rawh,” tiin Timothea chu a fuih a ni. (2 Timothea 2:15) Engtin nge kan zirtîr thiamna chu kan tihhmasâwn ang?
17. Engtin nge Bible thu hriat ‘châkna kan insiam’ theih a, chutiang hriatna chuan engtin nge kan rawngbâwlna tihhlawhtlin theih?
17 Kan tihhmasâwn theihna kawng khat chu hriatna dik neih belh zêl hi a ni. Tirhkoh Petera chuan: “Nausên piang tharte angin thlarau lam hnutê, engmah pawlh loh chu châk rawh u, chu miah chuan chhandamna tling khawpa in ṭhan len theih nân,” tiin min fuih a. (1 Petera 2:2) Nausên hrisêl pângngai chuan hnute châkna chu a pianpui a. Kristiante tân erawh chuan Bible thu hriat ‘châkna insiam chawp’ an ngai a ni. Chu chu mumal taka zir leh chhiar thinna hmangin kan nei ve thei a ni. (Thufingte 2:1-6) Pathian thu zirtîrtu thiam kan nih theih nân mahni inthunun a, beih ṭâng ṭâng a ngai a; mahse, chûng beihnate chu manhla tak a ni ṭhîn. Pathian Thu zir nuam tihna chuan Pathian thlarau lamah ṭhahnem min ngahtîr ang a, thil kan zirte chu mi dangte hrilh châkna min neihtîr bawk ang.
18. Engtin nge Kristian inkhâwmte chuan thutak thu chu thiam taka hmang tûrin min thuam?
18 Kristian inkhâwmnate hi thiam taka Pathian Thu kan hmanna kawnga min ṭanpuitu pawimawh tak a ni a. Vântlâng thusawinaah leh Pathian Lehkha Thu sawihona dang neih laia Bible chhiar a nihin, kan Bible lo keuvin, kan lo chhiar ve zel tûr a ni. Inkhâwmna chi hrang hrang leh kan thuhrilh rawngbâwlna chungchâng sawinaa tih tak zeta rilru lo pêk chu a finthlâk a ni. Lemchan tâwite hlutna chu kan ngainêp tûr a ni lo. Hetah pawh hian mahni inthununna leh ngaihtuah bingna a ṭûl leh bawk. (1 Timothea 4:16) Kristian inkhawmnate hian kan rinna a tundin rualin, Pathian Thu châkna min siam a; tin, phûr taka chanchin ṭha puangchhuaktu ni tûrin min zirtîr reng bawk a ni.
Jehova Ṭanpuina Kan Rinchhan Thei
19. Engvângin nge thuhrilh rawngbâwlnaa tel zat zat chu thil pawimawh tak a nih?
19 ‘Thlarau kawnga ṭhahnemngai’ leh chanchin ṭha puanzâr châk Kristiante chuan rawngbâwlnaa tel reng an tum hrâm hrâm ṭhîn. (Ephesi 5:15, 16) Dinhmun hrang hrang avângin, he nun chhanhim rawngbâwlnaa hun kan hman zât chu a inang vek thei lo. (Galatia 6:4, 5) Mahse, thuhrilh rawngbâwlnaa hun kan hmanral zât aia pawimawh zâwk chu mi dangte hnêna kan beisei chungchâng kan hrilh ngun dân hi a ni. (2 Timothea 4:1, 2) Chuvângin, kan hrilh tam poh leh, he hna pawimawhzia hi kan hre thiam lehzual ang. (Rom 10:14, 15) Beiseina nei lo, thawpika ṭap ṭhîn mi thinlung ṭhate kan kawm tam chuan inlainatna leh khawngaihna kawngah kan ṭhang ngei ang.—Ezekiela 9:4; Rom 8:22.
20, 21. (a) Eng hnathawh tûr nge la awm reng? (b) Engtin nge Jehova’n kan beihnaah min ṭanpui?
20 Jehova chuan chanchin ṭha chu min kawltîr a. Hei hi “a hna thawhpuite” anga a hnên aṭanga kan dawn hna hmasa ber a ni. (1 Korinth 3:6-9) Chuvângin, Pathian min pêk he mawhphurhna hi kan thinlung zawng zawng leh kan thiam tâwka hlenchhuah kan châk a ni. (Marka 12:30; Rom 12:1) Khawvêlah hian thutaka rilṭâm mi dik tak tak a la awm ṭeuh a ni. Hna thawh tûr tam tak nei mah ila, thawk chhuak turin Jehova ṭanpuinaah kan innghat thei a ni.—2 Timothea 4:5.
21 Jehova chuan a thlarau min pein, “thlarau lam ngunhnâm,” Pathian Thu chu min pe a. A ṭanpuina avângin, ‘chanchin ṭha thurûk huai takin kan puang’ thei a ni. (Ephesi 6:17-20) Paula’n Thessalonika Kristiante hnêna: “Khatia kan chanchin ṭha chu thu chauhva in hnêna thleng lova, thiltihtheihna leh thlarau thianghlim leh nasa taka rin tlatna nên a lo thlen zâwk kha,” tia a ziah kha kan chungchâng sawi nâna hman ni ve rawh se. Ni e, phûr takin chanchin ṭha i puang ang u!
Ennawnna Tawikim
• Dam chhûng khawsak lungkhamna avângin, rawngbâwlnaa kan ṭhahnemngaihna chungah eng nge thleng thei?
• Eng kawngin nge chanchin ṭha hrilh kan duhna chu kan thinlunga “mei kâng” ang a nih ang?
• Rawngbâwlna chungchânga rilru put dân dik lo kan pumpelh tûr chu eng nge ni?
• Kan rin dân mi ṭawmpui lote chu engtin nge kan thlîr ang?
• Thuhrilh rawngbâwlnaa kan ṭhahnemngaihna vawng reng tûrin engtin nge Jehova’n min ṭanpui?
[Phêk 9-naa milem]
Kristiante chuan Paula leh Jeremia ṭhahnemngaihna an entawn
[Phêk 10-naa milem]
Pathian leh ṭhenawmte hmangaihnain rawngbâwlnaah min tiphûr