I Nunin Awmzia A Neih Zâwk Theih Dân

HMAN LAI thufing chuan: “Intihausa tûrin intihah suh la, nangma finna rin bâng rawh. Thil awm lo chungah i mit i nghat dâwn em ni? Sum chuan thla a insiam ngei ngei a, mupui vân lama thlâwk ṭhîn ang hian,” tiin a sawi a. (Thufingte 23:4, 5) Kawng danga sawi chuan, hausakna chu mupui thlâwk ang maia a thlawh bo theih avângin, hausak tum avânga intihchauh lutuk chu a finthlâk lo a ni.

Bible-in a târ lan angin, sum leh pai lama hausakna chu mitkhap kâr lovah a ral thei a. Leilung chhiatna (natural disaster) avâng te, sumdâwnna tlâk chhiat thut avâng te, a nih loh leh hun leh khawrêl dang avângte-in zankhat thil thu maiah engmah lovah a chang thei a ni. Chu bâkah, mi neinung tak takte pawh an beidâwng fo ṭhîn. Entîr nân, ramvei mite, infiam mi lâr tak takte, leh lalte lo ṭawiâwm ṭhîntu John-a chungchâng hi lo ngaihtuah ila.

John-a chuan: “Ka hnaah ka inpumpêk ṭhak a. Sum leh pai lamah ka hnianghnâr a, hotel nuam ber berahte ka thleng a, a châng phei chuan mi mal thlawhnain ka hnaah ka kal ṭhîn. Atîr chuan nuam ka ti hle a; mahse, ka ning tial tial a. Ka mi tihlâwm tumte pawh chu mi tak lo vek niin ka hre ta a. Ka nun hian awmzia rêng a nei ta lo,” tiin a sawi a ni.

John-a hmuh chhuah ang hian, thlarau lam hlutna tel lo nun chu a lungawithlâk lo a ni. Chuvângin, Isua chuan tlâng chunga a Thusawi hmingthang takah: “Mahni thlarau lam mamawh ngaihven mite chu an eng a thâwl e; vân ram an ta a ni si a,” tiin hlimna tluantling neih theih dân a târ lang a ni. (Matthaia 5:3, NW) Chuvângin, nuna thlarau lam thilte dah hmasak chu a finthlâk hle a ni. Tin, thil dangte pawhin nun awmze nei zâwk nei tûrin min ṭanpui thei bawk.

I Chhûngkua leh Ṭhiante An Pawimawh Tak Zet

I chhûngte nêna inzawmna ṭha leh ṭhian ṭha i neih loh chuan i nun a hlim thei ang em? Hlim lo tawp vang. Min Siamtu chuan mite hmangaih tûr leh hmangaihna mamawhin min siam a. Chu chu Isua pawhin ‘mahni inhmangaih anga kan vêngte kan hmangaih’ a pawimawhzia a sawi chhan pakhat a ni a. (Matthaia 22:39) Chhûngkua hi mahni hma sial lo hmangaihna lantîr nâna ruahhmanna duhthusâm Pathian thilthlâwnpêk a ni.—Ephesi 3:14, 15.

Engtin nge kan chhûngkua hian nun awmze nei zâwk min neihtîr theih? Aw le, chhûngkaw ṭangrual chu huan mawi tak, ni tina min tiharh sawng sawng ṭhîntu ang a ni. Chutiang bawkin, chhûngkuaah chuan, kan khawharnate tireh a, mi tihharh sawng sawng thei inṭhianna duhawm tak kan hmu thei a ni. Chutiang chhûngkaw himna hmun chu amaha lo awm mai a ni lo. Mahse, chhûngkaw inzawmkhâwmna kan tihngheh hian, kan lo inhnaih tial tial a, nun a tihausa tial tial a ni. Entîr nân, kan kawppuite hmangaihna leh zahna lantîr nâna hun leh ngaihtuahna kan pêkte chu a tâwpa rah duhawm tak chhuah thei ni tina inkhâwlkhâwmna a lo ni.

Fa kan nei a nih chuan, an seilenna tûr chhehvêl dik pêk kan tum tûr a ni. Anmahni nêna hun hman dun te, inpawh taka awm te, leh thlarau lam zirtîrna te pêk chu a hautak mai thei a. Mahse, chûng hun, leh tha leh zung kan sênte chuan lungawina nasa tak min thlen thei a ni. Nupa hlawhtlingte chuan an fate chu malsâwmna, ṭha taka enkawl tûr Pathian laka an rochan an ni tih an hria a ni.—Sâm 127:3.

Ṭhian ṭhate pawhin nun lungawithlâk leh awmze nei tak an siam thei bawk. (Thufingte 27:9) Inlainatna lantîrin, ṭhian tam tak kan siam thei a. (1 Petera 3:8) Ṭhian ṭha dik tak chuan kan tlûk hunah min kaitho leh thei a ni. (Thuhriltu 4:9, 10) Tin, ṭhian ṭha chu “mangan nî atâna unauva piang a ni.”—Thufingte 17:17.

Inṭhian ṭhatna chu a va lungawithlâk thei êm! Ṭhian ṭha tak nên chuan tlai ni tla a mawi zual a, chaw ei a tui sawtin, rimawi pawh a ngaihnawm zual ṭhîn. Dik tak chuan, kan chhûngkua leh ṭhian rinawmte chu nun awmze nei neih theihna kawng hnih mai chauh a la ni. Pathianin kan nun awmze neihtîr zâwk thei ruahmanna dang eng nge a siam?

Kan Thlarau Lam Mamawh Phuhrûkna

Atîr lama kan hriat tawh ang khân, Isua Krista chuan hlimna chu kan thlarau lam mamawh ngaihvenna nên a thlun zawm tlat a. Thlarau lam leh rilru lam thiltihtheihna neia siam kan ni. Chuvângin, Bible pawhin “thlarau mi” leh “thinlunga mihring thurûk” chungchâng a sawi rêng a ni.—1 Korinth 2:15; 1 Petera 3:3, 4.

W. E. Vine-a An Expository Dictionary of New Testament sawi dân chuan, entîr nei thinlung chuan “mihring rilru leh nungchang zawng zawng, hriatthiamna leh rilru vei zâwng zawng zawng” ai a awh a ni. A hrilhfiahnaah Vine-a chuan: “Thu danga sawi chuan, thinlung chu mize inthup lo chhuah ṭanna sawi nâna hman a ni,” a ti a. Tin, chu dictionary vêk chuan “thinlung chu chhûngril taka inphûm, ‘mihring mize inthup,’ . . . mihring nihna dik tak a ni,” tiin, a hrilhfiah bawk.

A nih leh “thlarau mi” emaw, “mihring mize inthup,” an tih “thinlunga mihring thurûk” emaw mamawh chu engtin nge kan phuhrûk theih ang? “LALPA chu Pathian a ni tih hre rawh u: min siamtu chu amah chu a ni a, ama ta kan ni; a mite leh a ran tlatna hmuna berâmhote chu kan ni,” tia thâwk khuma fakna hla phuahtu thusawite kan pawm chuan, kan thlarau lam mamawhte kan phuhruin, chu mi kawngah chuan rahbi pawimawh tak kan lo rap reng tihna a ni. (Sâm 100:3) He mi hriatna hian Pathian lakah mawh kan phur tih min hriattîr a ni. “A ran tlatna hmuna berâmhote” zînga tel kan duh chuan, a Thu, Bible nêna inmilin kan khawsa tur a ni.

Pathian laka mawh phurhna neih chu thil ṭha lo em ni? Ni lo ve, kan nungchang chuan Pathian tân awmzia a nei tih hriatna chuan nun awmze nei zâwk min neihtîr avângin. Chu chuan mi ṭha zâwk, thiltum ropui tak nei ni tûrin min fuih bawk. Sâm 112:1 chuan: “LALPA ṭih mi chu a eng a thâwl e, a thupêkahte nasa taka lâwm mi chu,” tiin a lo sawi a ni. Pathian ṭihna ṭha leh a thu pêkte tih tak zeta zawmna chuan nun awmze nei zâwk min neihtîr thei a ni.

Engvângin nge Pathian thu awihna chuan min tihlungâwi? Mihringte hnêna a thilthlâwnpêk, chhia leh ṭha hriatna kan neih vâng a ni. Chhia leh ṭha hriatna chu nungchang endiktu, kan thiltih emaw, kan tih tumte emaw chu pawmtlâk a nih leh nih loh endik a, lo chhinchhiahtu a ni. Kan zain kan chhia leh ṭha hriatna tihbuaiin kan awm ṭhîn. (Rom 2:13-16) Mahse, kan chhia leh ṭha hriatna chuan min chawimawi thei bawk. Pathian leh mi dang laka mahni hma kan sial loh chuan, lungawina kan nei ṭhîn. Chuvângin, “englo lâk aiin pêkin lukhâwng a nei zâwk,” tih kan hmu chhuak a ni. (Tirhkohte 20:35) Hei hian chhan pawimawh tak a nei a ni.

Min siamtu chuan kan mihring puite duhna leh mamawhnaten kan rilru khawih thei tûrin min siam a. Chuvângin, mi dangte kan ṭanpui hian kan hlim a ni. Chu mai bâkah, ṭanpui ngaite kan ṭanpui hian, Pathianin a laka thil ṭha ti angah min ngai tih Bible chuan chiang takin min hrilh a ni.—Thufingte 19:17.

Chhûngrîla lungawina bâkah, kan thlarau lam mamawh ngaihvenna chuan min ṭanpui thei em? Middle East rama sumdâwng pakhat Raymond-a chuan a theih a ring tlat a. Ani chuan: “Hausak chu ka thiltum lian ber a ni; mahse, Pathian a awm tih leh a duhzâwng chu Bible-in a sawi tih ka pawm aṭang chuan, mi danglam tak ka lo ni ta a. Ei zawnna lam chu ka nunah dah hmasak a ni ta lo. Pathian tihlâwm ka tumna azârah mi tichhe thei tak inhuatna lakah ka fihlîm ta a ni. Ka pa chu indonaa thi ni mah se, a thattute laka phuba lâk duhna rêng ka nei tawh lo,” tiin a sawi a ni.

Raymon-a hmuhchhuah ang hian, “thlarau mi” mamawh ṭha taka ngaihvenna chuan rilru hliam tuar pawh a tidam thei a ni. Mahse, ni tina harsatna lo awm te kan hneh si loh chuan, nun hi a lungâwi thlâk tak tak thei lo vang.

“Pathian Thlamuanna” Kan Nei Thei

He buaina khawvêlah hian, tluan ni a vâng hle. Chêtsualna a lo thlengin, ruahmanna a kal sual ṭhîn a; tin, miten min tilunghnual bawk ṭhîn. Hêngte hian kan hlimna a labo thei a ni. Mahse, Pathian Jehova rawng bâwltute hnênah Bible chuan chhûngrila lungawina a tiam a ni—“Pathian thlamuanna” chu. He thlamuanna hi engtin nge kan neih theih ang?

Tirhkoh Paula chuan: “Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se. Tichuan Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u,” tiin a ziak a ni. (Philippi 4:6, 7) Kan buainate mahni chauhva sut kian tum ai chuan, tih tak zeta ṭawngṭaiin, kan ni tin phur rit chu Pathian hnêna kan thlen a ngai a ni. (Sâm 55:22) Thlarau lama hma kan sâwn zêl a, Pathian min ṭanpui dân kan hriat tam zêl chuan, Pathianin kan ngennate chu a fapa Isua Krista hmangin a chhâng a ni tih kan rinna chu a pung zêl ang.—Johana 14:6, 14; 2 Thessalonika 1:3.

“Ṭawngṭaina ngaithlatu,” Pathian Jehova lakah rinna kan nghah chuan, dam lohna te, kum upatna te, a nih loh leh lusûnna ang chi fiahna tawrhhlelhawm tak takte pawh kan tuar chhuak thei dâwn a ni. (Sâm 65:2) Mahsela, nun awmze dik tak neih nân chuan, hma lam hun kan ngaihtuah tel a ngai a ni.

Hmabâk Beiseinaah Chuan Hlim Rawh

Bible chuan mihring thuawite ngaihsak tak, vân sawrkâr fel awpna “lei thar leh vân thar,” chu a tiam a ni. (2 Petera 3:13) Pathian tiam chu khawvêl tharah chuan, indona leh hleih neihnate chu remna leh diknain a thlâk thleng tawh ang. Hei hi duhthusâm mai a ni lo va, ni tina ṭhang chak deuh deuh thei thutlûkna a ni zâwk. Chu chu chanchin ṭha leh hlimna tûr chhan a ni na meuh mai.—Rom 12:12; Tita 1:1, 2.

Atîra kan sawi tâk John-a chuan, a nunin awmzia a nei zâwk tawh niin a hria a. Ani chuan: “Ka sakhaw mi lêm lo nâ a, Pathianah rinna ka nei reng ṭhîn. Mahse, Jehova Thuhretu pahnihte’n min tlawh hma kha chuan Pathian ka rinna chu engahmah ka chantîr ngai lo. Zawhna tam tak: ‘Engvângin nge he leiah hian kan awm? Khawiah nge kan kal dâwn?’ tih zawhna ang chite hmangin ka hnial chiam ṭhîn a. Pathian Lehkha Thu hmanga an chhânna lungawithlâk tak chuan, ka nunah thiltum a neih ṭantîr a. Chu chu a ṭanna chauh a la ni. Thutakah ka tuihâl ṭan a, chu chuan ka nuna thil ka lo dah pawimawhte a thlâk ta vek a ni. Ka hausa tawh lo nâ a, thlarau lamah chuan mi hausa tak niin ka inhria,” tiin a sawi a ni.

Nang ngei pawhin, John-a ang bawkin kum tam tak chhûng chu thlarau lamah i lo muhîl a ni mai thei. Nimahsela, “finna thinlung” chherin, i tiharh leh thei a ni. (Sâm 90:12) Tum ruh taka i beih ṭang ṭang chuan, hlimna, remna, leh beiseina dik tak i nei thei ang. (Rom 15:13) Ni e, i nunin awmzia a nei zâwk thei a ni. (w00 7/15)

[Phêk 6-naa milem]

Ṭawngṭaina chuan “Pathian thlamuanna” min pe thei

[Phêk 7-naa milem]

Engin nge chhûngkaw nun hlawhtling zâwk siam thei tih i hria em?