Chhiartute Zawhna
Isaia bung 53-ah chuan Messia chungchâng hrilhlawkna lâr tak a awm a. Châng 10-na chuan heti hian a sawi a: “LALPAN ani chu vuak thitlin a duh rêng a ni; a tina ta ngei a,” tiin. Hei hi engtihna nge ni?
Isaia 53:10 chungchânga zawhna a chhuah chhan hi a hriat theih nghâl mai a. Kristian dikte chuan khawngaihna leh mi ngaihsak tak kan Pathian hian, mi dangte vuak thitlin emaw, tihnat emaw a duh chu an ring hauh lo va. Bible chuan Pathianin sual nei lote nghaisak a duh lo tih rin theihna tûr chhan ṭha tak min pe a. (Deuteronomy 32:4; Jeremia 7:30, 31) Kum zabi tluanchhuakin, Jehova chuan a finna leh hmangaihna nêna inrem hrehawm tuarna a remtih châng a awm thei ang. Mahse, a Fapa duh tak, Isua hrehawm tawrhna chu ama awmtir a ni lo. Chuti a nih si chuan he mi chângin a sawi tum chiah hi eng nge ni ang?
Aw le, he mi chânga awm “duh” tih leh “duhzâwng” tih ngaihtuah chunga chu mi châng avaia kan chhiar chuan a sawi tum chu kan hre thiam thei ang. Isaia 53:10-ah chuan: “LALPAN ani chu vuak thitlin a duh rêng a ni; a tina ta ngei a: a nunna chu sual tân thil hlana i hman tikah, a chi thlah chu a hmu tawh ang a, a dam chhûng nite chu a tisei ang a, LALPA duhzâwng chu a kutah hlawhtlingin a awm ang,” a ti a ni.
Bible thu tlângpui chu châng tâwp lama thu, “LALPA duhzâwng,” tih hian a târ lang a; chu chu Lal ram hmanga a thiltum tihfamkimnaah a innghat a ni. Chu chuan, Jehova lal chungnunna chu thiam a chantir ang a, a thu âwih mihringte sual rochun pawh a thian fai ang—kan sualte ngei chu. (1 Chronicles 29:11; Sâm 83:18; Tirhkohte 4:24; Hebrai 2:14, 15; 1 Johana 3:8) Hêng zawng zawng tih theih nân, Pathian Fapa chu mihring anga a lo kal a, tlanna inthawi nâna a inpêk a ngai ta a. Kan hriat angin, Isua chuan hrehawm a tuar ta ngei a ni. Bible-in min hrilh angin, ani chuan “a thil tuarahte chuan thu âwih a zîr ta a ni.” Chuvangin, Isua chuan chûng a tuarnate aṭangin hlâwkna chu a dâwng ta ngei bawk.—Hebrai 5:7-9.
Isua chuan nun kawng ropui tak a zawh tûrah chuan hrehawm tawrhna ṭhenkhat a tel dâwn tih a hre lawk vek a ni. Chu chu Johana 12:23, 24-a chhinchhiah a thu sawi hian a tifiah hle. Chu mi chângah chuan: “Mihring Fapa chawimawia a awm hun chu a thleng tawh. Tih tak meuhvin, tih tak meuhvin ka hrilh a che u, buh fang leia a tlâk loh va, a thih loh chuan, a mal chauhvin a awm reng ṭhîn; a thih erawh chuan, tam takin a rah thîn,” tih kan chhiar a ni. A dik a ni, Isua chuan thih thlenga rinawm a ngai dâwn tih a hria a ni. Heti hian a chhunzawm leh a: “‘Tunah ka rilru a mangang e; engnge ka sawi ang aw? “Ka Pa, he mi hun lakah hian mi chhan dam rawh,” ka ti ang em ni? Engpawh ni sela, he mi tûr hi, he mi hun thleng hian ka awm chhan a ni. Ka Pa, i hming chawimawi rawh,’ a ti a. Chutichuan vân aṭangin aw a lo chhuak a, ‘Ka chawimawi tawh, ka chawimawi leh bawk ang,’ a ti a.” tiin.—Johana 12:27, 28; Matthaia 26:38, 39.
He thu aṭangin Isaia 53:10-a thu chu kan hre thiam thei a ni. Jehova chuan a Fapa chunga thil thlêng tur, vuak thitlinna tih theih chu a hmu lâwk a. Chutichung pawhin, chu miin a rah chhuah tûr thil ṭha tak ngaihtuahna avângin, Jehova chuan Isua thil tawn tûr chu a duh a ni. Chu mi kawng chuan Jehova chuan Messia chu “vuak thitlin a duh” a ni. Tin, Isua pawhin a thil tihtheih chu a duh a, a tihlawhtling ta rêng bawk. Dik takin, Isaia 53:10-na tâwpna sawi angin, “LALPA duhzâwng chu a kutah hlawhtlingin a awm” ta rêng a ni. (w00 8/15)