Jehova Mi Din Tharte’n Leilung Tluan Chhuakah Amah An Fak
‘Mipuite chu hmui thianghlim ka puttîr leh ang, LALPA hming chu an zaa an lam theih nân.’—ZEPHANIA 3:9.
1. Engvângin nge chungpikna thute chu Judai ram leh hnam dangte chungah a lo thlen famkim?
J EHOVA’N Zephania a puanchhuahtîr chungpikna thu chu a va râpthlâk êm! An hruaitute leh mipui tam zâwkte’n Jehova duhzâwng an tih loh avângin, chûng chungpikna thute chu Judai ram leh a khawpui Jerusalem chungah chuan a lo thleng a ni. An ṭhenawm hnam Philistia te, Moab te, leh Ammon te pawhin Jehova thinrimna chu an tuar bawk. Engvângin nge? Kum zabi tam tak chhûng nunrâwng taka Jehova mite an dodâl avângin. Chu mi avâng vêk chuan, khawvêl awptu Assuria pawh din ṭhat leh theih tawh loh tûra tihchhiat a ni.
2. Zephania 3:8 thu hi tute hnêna sawi nge?
2 Amaherawhchu, chutih lai chuan Judai ramah rilru dik tak pu mi tlêmtê an awm a. Chûng mite chuan mi suaksualte chunga Pathian rorêlna lo thleng tûr chu an nghâk a, an hnênah hêng thute hi sawi a ni: “Chuvângin râllâk la tûra ka thawh nî thlengin mi nghâk rawh u, tih hi LALPA thu chhuak a ni: ka thil tum chu, an chunga ka thinurna, ka thinurna hlauhawm tak mai chu leih tûra lalna ramte inkhâwmtîra hnamte koh khâwm hi a ni a; lei zawng zawng hi ka thîkna meiah a la kâng fai dâwn si a,” tih chu.—Zephania 3:8.
“Hmui Thianghlim,” Tu Tân Nge?
3. Eng beiseina thu nge Zephania chu puantîr a nih?
3 Awle, Zephania chuan Jehova chungpikna thu chu a puang a. Mahse, zâwlnei chu beiseina thu ropui tak pawh puang tel tûra tih a ni—Jehova laka rinawm zui zêlte tâna thlamuanthlâk tak mai chu. Zephania 3:9-a chhinchhiah angin Jehova chuan: “Chutih hunah chuan mipuite chu hmui thianghlim ka puttîr leh ang, LALPA hming chu an zaa an lama thu khat vuaa a rawng an bâwl tlân theih nân,” tiin a puang a ni.
4, 5. Mi fel lote chungah eng nge thleng? (b) Chu chu tute’n nge hlâwkpui a, engvâng nge?
4 Mahse, hmui thianghlim pêk ve loh tûr an awm a. Hrilh lâwkna thu chuan an chungchâng chu heti hian a sawi a ni: “I chhûng ata i mi, chapona hlimpuitute chu ka la bo vang,” tiin. (Zephania 3:11) Chuvângin, Pathian dân hmusittu, mi chapote leh fel lo taka thil titute chu lâk bo an ni ang. Tute’n nge chu chu hlâwkpui dâwn? Zephania 3:12, 13 chuan heti hian a sawi leh a ni: “I chhûng ata mi retheite leh tihduhdah tuarte chu ka [Jehova] zuah ang a, LALPA hming chu an ring ang. Israel mi la awm chhunte chuan khawlohna an ti lo vang a, dâwt an sawi hek lo vang; an kâah pawh bumna ṭawng a awm hek lo vang a: an eiin an mu ang a, tumahin an tihlau tawh lo vang,” tiin.
5 Hmân lai Israela mi rinawm la bângte chu a hlâwkpuitute an ni. Engvângin nge? Zephania 2:3-a thu: “Nangni leia mi thuhnuairawlh zawng zawng, a thu âwihtute u, LALPA chu zawng rawh u; felna zawng ula, thuhnuairawlh tum rawh u: LALPA thinrimna nîah chuan thuhrûkin in awm thei mahna,” tih zâwma thil an tih avângin.—Zephania 2:3.
6. Zephania hrilh lâwkna thlen famkimna hmasaah eng nge lo thleng?
6 Zephania hrilh lâwkna thlen famkimna hmasaah, Pathian chuan rinna nei lo Judai ram chu B.C.E 607 khân Khawvêl Awptu Babulon salah tântîrin a hrem a. Mi ṭhenkhat, Jeremia leh mi dangte chu an him a, mi dangte chu sal tânnaah pawh Jehova lakah an rinawm chhunzawm zêl a ni. Tichuan, B.C.E. 539-ah chuan Babulon chu Lal Kura kaihhruaina hnuaia Media leh Persia’n an titlâwm leh ta a. Kum hnih hnuah chuan, Kura chuan Israel la bângte chu anmahni in leh lova an kîr leh theih nân thu a pe ta a ni. Tichuan, Jerusalem biak in chu sak ṭhat leh a ni a; tin, puithiamte chuan Dân thu an zirtîr leh ta bawk a ni. (Malakia 2:7) Chuvângin, Jehova chuan a la bâng din thar lehte chu a tihmuingîl ta a ni—an rinawm chhûng zawng chu.
7, 8. Zephania 3:14-17-a hrilh lâwk thute chu tute tân nge ni a, engvângin nge chutianga i chhân?
7 Chu din thar lehnaa telte chungchâng chu Zephania chuan heti hian a sawi lâwk a: “Aw Zion fanu, zai rawh; aw Israel, au vak vak rawh; Aw Jerusalem fanu, i thinlung zawng zawngin lâwm la, hlim rawh. LALPAN i chungchâng rêlnate chu a la bo ta a, i hmêlma a paih chhuak ta: Israel lalber, LALPA pawh chu i chungah a awm e: thil ṭha lo i hlau ngai tawh lo vang. Chumi nîah chuan Jerusalem hnênah, hlau suh, aw Zion, i kut pawh zawi suh se, an ti ang. LALPA i Pathian chu i chungah a awm e, chhandamtu tûr mi chak tak chu: lâwmin i chungah a hlim ang a, a hmangaihna a tithar ang a, hla sain i chungah a lâwm ang,” tiin.—Zephania 3:14-17.
8 Chûng hrilh lâwkna thute chuan Babulon sal tânna ata Juda la bâng, an thlahtute rama hruaikîr lehte a kâwk a ni. Chu chu Zephania 3:18-20-a kan chhiar thu hian a tilang chiang a ni. “Nangmaha mi, inkhâwmpuia tel pha lova lungngaite chu ka hruai khâwm ang, nangmah avânga sawichhiatna phurrit phurtute chu. Ngai rawh, chumi hunah chuan nghaisatu zawng zawng che kha ka ngaihtuah ang: tin, kebai chu ka chhandam ang a, hnawh bova awm chu ka hruai khâwm ang; tin, lei chung zawng zawnga an lo mualphona chu fakna leh hmingthannaah ka chantîr ang. Chumi hunah chuan ka hruai lût ang che u a, chumi hunah chuan ka hruai khâwm ang che u: in hmuh ngeia in sal tânna ka lamlêt hunah chuan lei chung mi zawng zawngte zîngah hmingthanna leh fakna ka siamsak dâwn si che u a, LALPAN a ti.”
9. Engtin nge Judai ram chungthu-ah Jehova’n a hming a tihropui?
9 Pathian mite hmêlma, ṭhenawm ramte mak tih dân tûr leh thin ṭhâwn tûrzia chu han ngaihtuah teh! Juda mite chu Babulon chak tak chuan salah a hruai a, an kir leh a rinawm lo rêng rêng a ni. An in leh lote lah a ram vek bawk si nên. Mahse, Jehova thiltihtheihnain kum 70 hnuah chuan anmahni in leh lo an nei leh thei a, an hmêlma hnamte erawh chuan chhiatna an tuar a ni. Mi rinawm la bângte chu hruai kîrlehin Jehova chuan a hming a va tiropui êm! Anni chu “mi zawng zawngte zîngah hmingthanna leh fakna [a] siamsak” a ni. Chu din thar lehna chuan Jehova leh a hming putute fakna a va thlen nasa tak êm!
Jehova Biakna Chawisân A Ni
10, 11. Zephania din tharna hrilh lâwk thu thlen famkimna pui ber chu eng huna lo thleng tûr nge ni a, chu chu engtin nge kan hriat theih?
10 Vântlâng Kum Chhiar, kum zabi pakhatnaa Isua’n Israel la bângte biakna dika a hruaikhâwm leh khân din tharna dang a lo awm leh a. Chu chu thil lo la thleng tûrte entîr lâwkna mai a ni, din tharna thlen famkimna lian ber chu nakina lo la thleng tûr a nih avângin. Mika hrilh lâwkna thu chuan heti hian a sawi lâwk a ni: “Ni hnuhnûngahte chuan heti hi a ni ang a, LALPA in awmna tlâng chu tlâng lian chungahte chuan tihnghehin a awm ang a, tlâng tête chungah chuan chawisânin a awm bawk ang; chutah chuan chi tinrêngte chu an kal nguah nguah ang,” tiin.—Mika 4:1.
11 Hei hi engtikah nge a lo thlen dâwn? Mika leh Timothea sawi angin, ‘ni hnuhnûngah’ a ni ang. (2 Timothea 3:1) Hnamte’n pathian dik lote an biak reng lai, he kalhmangte tâwp hma ngeiin a lo thleng dâwn a ni. Mika 4:5 chuan: “Hnam tinin mahni pathian ṭheuh an bia ang,” a ti a. A nih leh, Pathian dik chibai bûktute chu engtin nge ni ang? Mika hrilh lâwkna chuan a chhâng a ni: “Keini pawh LALPA kan Pathian chu kumkhuain kan bia ang,” tiin.
12. He ni hnuhnûngah hian, biakna dik chu eng anga chawisân nge a nih?
12 Chuvângin, hêng ni hnuhnûngahte hian, “LALPA in awmna tlâng chu tlâng lian chungahte chuan tihnghehin a awm” tawh a ni. Jehova biakna dik sâng tak chu sakhaw dang zawng zawngte chungah nghet taka din thar a ni tawh a. Mika sawi lâwk angin, “chi tinrêngte chu an kal nguah nguah,” tûr a ni. Biakna dik be tute chuan ‘[an] Pathian Jehova chu kumkhuain an bia ang.’
13, 14. Eng hunah nge he khawvêl hi a ‘ni hnuhnûngah’ a luh a, chu hun aṭang chuan biakna dik chungchângah eng nge thleng?
13 Bible hrilh lâwkna thlen famkimna thil thlengte chuan he khawvêl hi ‘ni hnuhnûngah’ kum 1914 khân a lût tawh tih a târ lang a. (Marka 13:4-10) Jehova chuan hriak thih la bâng, vân lam beiseina neitute chu biakna dikah a sengkhâwm ṭan tih thilthleng chanchin chuan a târ lang a ni. Chu chu he leia chatuan nun beiseina nei “mipui tam tak . . . hnam tin zînga mi te, chi tin zînga mi te, mi tin zînga mi te, ṭawng tin zînga mi te,” sengkhâwmnain a zui leh bawk a ni.—Thu Puan 7:9.
14 Khawvêl Indopui I-na aṭanga tûn thlengin, a hming putute Jehova biakna chuan a kaihhruaina hnuaiah chak takin hma a sâwn a ni. Khawvêl Indopui I-na hnuah sâng tlêm tê chauh aṭanga pung chhovin, Jehova chibai bûktute chu maktaduai 6 dâwn lai an ni tawh a, ram 235-a kohhran 91,000 vêlah an awm a ni. Kum tinin, hêng mite hian dârkâr tlûklehdingâwn khat chuang zet mite hmaa Jehova fak nân an hmang a ni. Chuvângin, Isua hrilh lâwk thu: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tih tithleng famkimtu chu Jehova Thuhretute an ni tih a lang chiang hle.—Matthaia 24:14.
15. Engtin nge Zephania 2:3 chu tûnah a thlen famkim?
15 Zephania 3:17-na chuan: “LALPA i Pathian chu i chungah a awm e, Chhandamtu tûr mi chak tak chu,” a ti a. He ni hnuhnûnga Jehova chhiahhlawhte thlarau lama an tlai chhan chu amah Jehova ngei chu engkimtithei Pathian anga ‘an chunga’ a awm vâng a ni. Chu chu B.C.E. 537-a hmân lai Juda din thar lehnaah leh tûn huna din thar lehnaah a thleng dik ve ve a ni. Chuvângin Zephania 2:3 chu kan huna thlen famkimna ropui tak a neihzia kan hre thei a ni, chu mi châng chuan: “Nangni leia mi thuhnuairawlh zawng zawng, a thu âwihtute u, LALPA chu zawng rawh u,” a ti a. B.C.E. 537-a mi “zawng zawng” a tihte zîngah chuan an sal tânna aṭanga kîrleh Juda la bângte an tel a. Mahse, tûnah chuan khawvêl pum pui hnam tin zînga mi ṭha, khawvêl pum huap Lalram thuhrilhna ṭha taka lo dawng a, ‘Jehova in awmna tlânga’ kal nguah nguahte chu a entîr a ni.
Biakna Dik A Duah
16. Tûn lai Jehova chhiahhlawhte ṭhan duanzia an hmuh hian kan hmêlmate’n eng anga an chhân lêt nge i rin?
16 B.C.E. 537 hnua Pathian chhiahhlawhte an in leh lo, leh biakna dika din thar leh an nihna chuan ṭhenawm hnamte chu a barakhaih chiang hle a. Mahse, chu din thar lehna chu a tê tham hle a ni. Tûn laia Jehova chhiahhlawhte hmasâwn chakzia te, tlai nasatzia te, leh ṭhan duanzia an hmuhte chu an hmêlmate ngeiin an sawi hi i ring pha em? Hêng hmêlmate zînga ṭhenkhatte pawh hian, mipui tam takin Isua an zui avânga Pharisaite rilru put ang kha an pu ve ngei ang. Anni chuan: “En rawh u, khawvêlin amah an zui tâk hi” an ti hial a ni.—Johana 12:9.
17. Jehova Thuhretute chungchângah ziaktu pakhatin eng nge a sawi a, eng ang punna nge an tawn chhoh?
17 These Also Believe tih a lehkhabu-ah C. S. Braden-a chuan: ‘Jehova Thuhretute thuhrilhna hian khawvêl pumpui a tuam chhuak vek tawh a. He khawvêlah hian Lalram chanchin ṭha thehdarhna kawngah Jehova Thuhretute aia tlo leh taima sakhua pakhat tê mah a awm lo a tih theih ngei ang. He an hna thawh hi a chak chhoh tial tial a rinawm hle,’ tiin a sawi a ni. A va han sawi dik êm! Kum 50 vêl kaltaa he thu a ziah lai khân, khawvêl pum puiah Thuhretute 300,000 vêl chauhvin thu an la hril a. Tûnah chuan a lêt 20 vêla pungin, nuai 60 vêl kan ni tawh a, chu chu hmu ta se, engtin tak sawi ang maw?
18. Eng nge hmui thianghlim chu ni a, tute hnênah nge Pathianin a pêk?
18 Zâwlnei kaltlangin, Pathian chuan: “Chutih hunah chuan mipuite chu hmui thianghlim ka puttîr leh ang, LALPA hming chu an zaa an lama thu khat vuaa a rawng an bâwl tlân theih nân,” tih a tiam a ni. (Zephania 3:9) He ni hnuhnûnga Jehova hming lamtute chu Jehova Thuhretute an ni a, anni chuan, hmangaihnaa nghet taka phuarkhâwm—a ni, ‘thu khat vuain’—a rawng an bâwl a ni. Anni chu Jehova’n hmui thianghlim a puttîrte an ni. He hmui thianghlimah hian Pathian leh a thil tumte hriatthiamna a tel a. Chu hriatthiamna chu Jehova chauhvin a thlarau thianghlim hmangin a pe a ni. (1 Korinth 2:10) Tute hnênah nge a thlarau thianghlim a pêk? Rorêltu anga ‘a thu zâwm apiangte hnênah’ chauh a pe a ni. (Tirhkohte 5:32) Jehova Thuhretute chauhvin Pathian thu chu thil engkima Rorêltu angin a thu zawm an inhuam a ni. Chuvângin, anni chuan Pathian thlarau thianghlim an dawng a, Jehova leh a thil tum mak takte chungchâng thu dik, hmui thianghlim an pu a ni. Anni chuan chu an hmui thianghlim chu khawvêl pum puiah nasa taka Jehova fak lehzual nân an hmang a ni.
19. Hmui thianghlim putnaah eng dang nge tel?
19 Mahse, hmui thianghlim pu tih chu thutak rinna leh mi dangte zirtîrna mai a ni lo; Pathian dân leh thu bulte mila nun pawh a huam bawk a ni. Hriak thih Kristiante chuan Jehova zawnnaah leh hmuithianghlim putnaah hma an hruai a. A rah chhuahte chu han ngaihtuah teh! Hriak thihte chu 8,700 pawh tling tawh lo mah se, lei lam beiseina nei mi dang maktaduai 6 dâwn laite chuan Jehova zawnna leh hmui thianghlim putna kawngah anni chu an entawn a ni. Hêng hi Pathian thlarau lam biak in lei lam hungchhûnga rawngbâwl, Isua tlanna inthawinaa rinna nei hnam tin zînga mipui tam tak pung zêlte an ni a; anni chu he fel lohna khawvêlin a hmachhawn thuai tûr ‘hrehawm nasa takah’ an dam khawchhuak ang.—Thu Puan 7:9, 14, 15.
20. Hriak thih rinawmte tân eng hmabâk nge awm a, mipui tam takte tân eng nge awm?
20 Mipui tam takte chu Pathian felna khawvêl tharah lawm luh an ni ang. (2 Petera 3:13) Isua Krista leh hriak thih 1,44,000-te chu lal leh puithiamte ni tûrin vân nunnaah an tho leh ang a, leilung chu paradis-a chantîr tûrin hna an thawk ang a; tin, hmui thianghlim an pu chhunzawm zêl ang. An chungchângah hêng thute hi hman theih a ni: “I fate zawng zawng [fanute pawh] chu LALPA zirtîrin an awm ang a, i fate thlamuanna chu nasa tak a ni ang. Felna tihnghehin i awm ang,” tih hi.—Isaia 54:13, 14.
Mihringte Chanchina Zirtîrna Ropui Ber
21, 22. (a) Tirhkohte 24:15 târ lan angin, tute’n nge hmui thianghlim pu tûra zirtîr mamawh ang? (b) Tlukpui nei lo eng zirtîrna hna nge Lalram rorêlna hnuaiah thawh ni dâwn?
21 Khawvêl thara hmui thianghlim pu tûra zirtîrna dawng tûr mi tam takte chungchâng chu Tirhkohte 24:15-ah sawi lan a ni: “Mi felte leh fel lote thawhlehna a awm ang,” tiin. Hun kaltaah khân, Jehova hriatna dik dawng lovin mi vaibêlchhe tam tak an lo boral tawh a. Anni chu fel taka ruahmanin, a tinung leh ang. Tin, chûng kaihthawhte chuan hmui thianghlim pu tûra zirtîr an mamawh dâwn a ni.
22 Chu zirtîrna ropui taka tel chu chanvo ropui a va ni dâwn êm! Chu chu mihring chanchina zirtîrna ropui ber a ni ngei ang. Hêng zawng zawng hi Isua Krista’n ngilnei taka Ram thuneihna hmanga ro a rêlna hnuaiah tihhlawhtlin a ni ang. A tâwp a tâwpah chuan, mihringte chuan Isaia 11:9 thlen famkimna an hmu tawh ang: “Tuite hian tuifinriat a khuh reng angin, leilung hi LALPA hriatnain a khat zo vek dâwn a ni,” tih chu.
23. Jehova mite kan ni hi engvângin nge kan nihlawh hle kan tih theih?
23 Leilung zawng zawng Jehova hriatnaa a khah hun tûr, chu hun ropui tak atâna inpuahchah thei tûra he ni hnuhnûnga kan awm hi kan va nihlawh êm! Tin, Zephania 3:20-a chhinchhiah, hrilh lâwk thu thlen famkimna ropui tak hmutu, tûna Pathian mite zînga kan tel thei hi chanvo ropui a va ni êm! Chu mi chângah chuan Jehova thu tiam: “Lei chung mi zawng zawngte zîngah hmingthanna leh fakna ka siamsak dâwn si che u a,” tih chu kan hmu a ni. (w01 2/15
[Phêk 32-naa milem]
“Hmui thianghlim” puin, Jehova Thuhretute chuan Bible thu thlamuanawm tak chu mite an hrilh