Hrehawm Tuarte Tâna Thlamuanna

PATHIANIN hrehawm tawrh a phal chhan zawhna hian mi thiamte leh Pathian thu zir mite chu kum zabi engemaw zât chhûng a timangang tawh a. Ṭhenkhat chuan Pathian hi thil engkimtithei a nih avângin, hrehawm tawrhna chungchânga mawhphurtu berah an puh hial a ni. Kum zabi pahnihnaa a ziaktu hriat loh The Clementine Homilies lehkhabu chuan, Pathianin khawvêl hi a kut khing hniha awp angin a sawi a. Diabola, a “kut vei lam” chuan hrehawm tawrhna leh lungngaihna a awmtîr a; Isua, a “kut ding lam” chuan mi a chhandama, mal a sâwm ṭhin thu a sawi a ni.

Pathianin hrehawm tawrhna hi a awmtîr a ni lo chung pawha a awm zui zêl a phal theih pawm thei ngang lotu mi dangte chuan hrehawm tawrhna a awm tih an hnâwl a ni. “Suahsualna chu ngaihruat thil mai a ni. Ṭanchhan tak tak a nei lo,” tiin Mary Baker Eddy-i chuan a ziak a ni. “Sual te, natna te, leh thihna te hi engmah lo nia hriatthiam ni sela chuan, a bo mai ang.”​—Science and Health With Key to the Scriptures.

Mihring chanchina vânduaina râpthlâk tak tak, a bîk takin, indopui pakhatna aṭanga kan hun lai thlenga thilthlengte aṭang hian, mi tam tak chuan Pathianin hrehawm tawrhna a tireh thei lo tih ngaih dân an nei a. Juda mi thiam David Wolf Silverman-a chuan: “Ka ngaih dân chuan, Mihring Insâmna hian Pathian nihna sawi nâna engkimtithei hmanna chu a paih bo ṭhak a ni,” tiin a ziak a. Hetiang hian a ziah zawm a: “Pathian hi kawng engemaw tala hriat theih ni tûr chuan . . . A ṭhatna hi suahsualna rualin a lang ve tûr a ni a; chutia a lan rual si chuan, Pathian chu engkimtithei A ni lo tihna a ni si ang,” tiin.

Nimahsela, Pathianin hrehawm tawrhna engemaw ti takin a awmtîr tih emaw, hrehawm tawrhna a titâwp thei lo tih emaw, a nih loh leh hrehawm tawrhnate hi ngaihruat thil mai a ni tih emaw te hian hrehawm tuartu chu a hnêm tak tak lo. Chûng rin dânte chu Bible-a târ lan Pathian dik, thiltithei, leh mite ngaihsaktu nihna nên chuan a inkalh tlat zâwk a ni. (Joba 34:10, 12; Jeremia 32:17; 1 Johana 4:8) A nih leh, hrehawm tawrhna awm phal a nih chhan chungchângah eng nge Bible-in a sawi?

Engtin Nge Hrehawm Tawrhna A Lo Inṭan?

Pathian chuan mihringte hi hrehawm tuar tûrin a siam lo. Chutih ahnêkin, nupa hmasa ber Adama leh Evi te chu rilru leh taksa ṭha famkim a pe a, an awmna atân huan mawi duhawm tak a pe bawk a; tin, hna awmze nei tak leh lungawithlâk tak a tuksak bawk a ni. (Genesis 1:​27, 28, 31; 2:8) Nimahsela, an hlim zêlna tûr chu Pathian rorêlna leh a chhia leh a ṭha thutâwp siam tûra dikna a neih an pawmnaah a innghat a ni. Chu Pathian thupêk chu “a chhia leh a ṭha hriatna” thingin a lo entîr a. (Genesis 2:17) Adama leh Evi’n, chu thing rah ei lo tûra thupêk chu an zawm chuan Pathian laka an intukluhzia an lantîr tihna a ni ang.a

Lungchhiat thlâk tak maiin, Adama leh Evi chuan Pathian thu an zâwm lo va. A hnua Diabol-Setana tia hriat, thlarau thil siam hel chuan, Evi chu atân Pathian thu zawm a ṭha ber lo tih a rintîr ta a. A nihna takah chuan, Pathian chu Evi neih tûr thil duhawm tak pe duh lo anga puh a ni: mahnia dinchhan theihna leh mahni tâna a chhia leh a ṭha thlan theihna chu. Setana chuan Evi’n thing rah a ei phawt chuan, ‘a mit a lo vâr ang a, a chhia leh a ṭha hriain Pathian ang a lo nih’ tûr thu a sawi a. (Genesis 3:​1-6; Thu Puan 12:9) Mahnia dinchan beiseina buma awmin, Evi chuan thing rah ei thiang lo chu a ei ta a; Adama pawhin a ei ve ta bawk a.

Chu mi nî la la chuan, Adama leh Evi chuan an helna rah chu an seng ṭan ta mai a. Pathian rorêlna chu an hnâwl avângin, Pathian hnêna intukluhnain a pêk malsâwmna leh vênhimna zawng zawng chu an chân ta a ni. Pathian chuan Paradis ata a hnawt chhuak ta a, Adama hnênah chuan: “Lei hi nangmah avângin ânchhe dawngin a awm ta a ni; i dam chhûng zawngin rim taka thawkin a rah chu i ei tawh ang . . . leia i kîr leh hma loh chuan i hmaia thlantui luang zawih zawihin chaw i ei tawh ang,” tiin a hrilh bawk a ni. (Genesis 3:​17, 19) Adama leh Evi chuan natna te, tarna te, leh thihna te an tawrh a lo ngai ta a. Hrehawm tawrh chu mihringte thiltawn zînga mi a lo ni ta a ni.​—Genesis 5:29.

Thu Buai Chinfelna

Tuemaw chuan, ‘Pathianin Adama leh Evi sualna chu a enliam thei mai lâwm ni?’ an ti mai thei. A thei lo, chu chuan a thuneihna zahna chu a tichhe zêl ang a; tin, nasa lehzuala helna leh hrehawm tawrhna a thlen dâwn avângin. (Thuhriltu 8:11) Chu bâkah, chutiang thuâwih lohna pawmzamna chuan Pathian chu thil sual ti tute zînga mi a nihtîr dâwn a ni. Bible ziaktu Mosia chuan heti hian min hriattîr a: “Lungpuia chu, a thiltih a fel famkim; a awm dân zawng zawng chu dân a ni; Pathian rinawm, khawlohna nei lo, fel leh ṭha a ni,” tiin. (Deuteronomy 32;4) A mize nihna bulpui ang taka thil ti tûrin, Pathian chuan Adama leh Evi chu an thuâwih lohna rah an seng a phal a lo ngai ta a ni.

Engvângin nge Pathianin nupa tuak hmasa ber leh hmuh theih lohva anmahni heltîrtu, Setana chu a tihboral nghâl mai loh? Chutianga ti tûrin thiltihtheihna chu a nei ngei mai a. Chutiangin ti ta sela chuan Adama leh Evi-te chuan hrehawm tawrhna leh thihna rochungtu thlah an nei dâwn lo a ni. Nimahsela, chutianga Pathian thiltihtheihna lantîrna chuan, Pathianin a thil siam finna neite chunga rorêl tûra dikna a neihzia finfiah a ni dâwn lo va. Chu bâkah, Adama leh Evi chu fa nei lova an thih mai chuan, Pathian thiltum, an thlah mi ṭha famkimte hmanga leilung tihkhah chu a hlawhtling dâwn lo tihna a ni dâwn bawk. (Genesis 1:28) Tin, “Pathian chu dâwt hmang mihring mai a ni lo, . . . A lo sawi tawh chu a ti lo vang em ni? A lo sawi tawh chu a tipuitling lo vang em ni?”​—Number 23:​19.

A finna famkim hmangin, Pathian Jehova chuan helna chu hun engemaw chhûng awm zuitîr a tum ta a. Hel hmangte chuan Pathian laka inlâkhranna rah chhuah hriat theihna hun tam tâwk an nei dâwn a. Mihring chanchina thilthlengte chuan Pathian kaihhruaina kan mamawhzia leh mihringte emaw, Setana emaw rorêlna aia Pathian rorêlna ṭhat zâwkzia chiang takin a târ lang dâwn a ni. Chutih rualin, Pathianin he lei atâna atîra a thiltum chu tifamkim tûrin hma a la bawk a. Ani chuan, ‘Setana lu tithitling a,’ a helna leh a rahchhuah râpthlâk tak takte tiboral phiar tûr “thlah” a lo awm tûr thu a tiam a ni.​—Genesis 3:​15.

Chu thutiam Thlah chu Isua Krista a ni a. 1 Johana 3:​8-ah chuan, “Pathian Fapa lo lan chhan ber chu diabola hnathawhte a tihboral theih nân a ni,” tih kan chhiar a ni. Chu chu Adama fate sual leh thihna ata chhanchhuah nâna a hringnun ṭha famkim hlân a, tlanna man pein a ti a ni. (Johana 1:29; 1 Timothea 2:​5, 6) Isua inthawinaa rinna lantîr tak zettute chu hrehawm tawrhna ata zalênna tluantling tiam an ni. (Johana 3:16; Thu Puan 7:17) Chu chu eng hunah nge a lo thlen dâwn?

Hrehawm Tawrhna Tâwpna

Pathian thuneihna hnâwlna chuan hrehawm tawrhna sawisên loh a thlen a. Chuvângin, Pathian chuan mihringte hrehawm tawrhna tihtâwp nân leh he lei atâna atîra a thiltum hlen chhuah nân, a thuneihna kawng engemaw taka a hman chu thil âwm tak a ni. Isua chuan a hnungzuitute chu: “Kan Pa vâna mi, . . . i ram lo thleng rawh se. I duhzâwng vâna an tih angin leia mi’n ti rawh se,” tia ṭawngṭai tûra zirtîrin, chu Pathian ruahmanna chu a sawi lang a ni.​—Matthaia 6:​9, 10.

Tûnah hian, Pathianin mihringte mahnia inawp chhin nâna a hun phal chin chu a tâwp ṭêp tawh a. Bible hrilh lâwkna tithleng famkimin, a Lalram chu 1914-ah khân, vânah din a ni tawh a, Isua Krista chu a Lal a ni.b Chu chuan nakin lawkah, mihring sawrkâr zawng zawngte hi a tiboralin, a tikehsawm vek ang.​—Daniela 2:44.

Hun rei lo te chhûng leia rawng a bâwl lai khân, Isua chuan Pathian rorêlnain mihringte chunga malsâwmna a rawn thlen tûrte chu a lo lantîr lâwk a. Chanchin Ṭha ziakte chuan Isua’n mi retheite leh hnehchhiahte chunga khawngaihna a lantîr dân chiang takin a târ lang a ni. Damlote a tidam a, rilṭâmte a hrai puar a, mitthite pawh a kaitho va. Leilung chaknate thleng pawhin a thu an zâwm a ni. (Matthaia 11:5; Marka 4:​37-39; Luka 9:​11-16) Isua’n a tlanna inthawina chu thuâwih mihring zawng zawngte hlâwkna tûra a hman huna thil awm dân tûr chu han ngaihtuah teh! Bible chuan Isua rorêlna hmangin, Pathianin “[mihringte] mit ata mittui zawng zawng a hrufai ang a; thihna a awm leh tawh lo vang a, lungngaih te, ṭah te, nat te pawh a awm leh tawh hek lo vang,” tih min tiam a ni.​—Thu Puan 21:4.

Hrehawm Tuarte Tâna Thlamuanna

Hmangaihnaa khat leh Pathian thil engkimtithei, Jehova chuan min ngaihsak a, mihringte a tithawveng thuai dâwn tih hriat chu a va nuam êm! Dân narânin, damlo na tak chuan a damna tûr a nih pawh chuan inenkawlna tawrh hrehawm tak pawh ni se, duh takin a pawm ṭhîn. Chutiang bawkin, Pathian thiltih dânte chuan chatuan malsâwmna a thlen dâwn tih kan hriat phawt chuan, tûn hun rei lo te chhûngin hrehawm eng pawh tuar mah ila, chu hriatna chuan min chhawmdâwl thei a ni.

Thuziak hmasaa kan sawi tâk Ricardo-a khân Bible thutiamte aṭanga thlamuanna hmuh dân a zir a. Ani chuan: “Ka nupui a thih hnu chuan, mahnia inkulh hran duhna lian tak ka nei chho va; mahse, chu chuan ka nupui a tidam leh dâwn lo va, ka rilru a tikhaw lo zâwk mai dâwn tih ka hre chhuak thuai a ni,” a ti. Chutianga ti lovin, Ricardo-a chu Kristian inkhâwmnaah leh Bible thuchah mi dangte hrilhnaah a tel ngaiin a tel chhunzawm zêl zâwk a. Ani chuan heti hian a sawi: “Jehova min ṭanpuina leh thil tê tham taka langte thlenga ka ṭawngṭaina min chhâng tih ka han hriat chuan, amah ka hnaih zual sauh a ni. Pathian hmangaihna ka hriatna chu a ni, fiahna nasa ber ka tawh hun pawha tuar chhuak thei tûra min ṭanpuitu chu ni,” tiin. Hetiang hian a sawi belh a: “Ka nupui chu ka ngai êm êm reng tho va; mahse, tûnah chuan Jehova phalnaa lo thleng thil engmah hian chatuan chhiatna min thlen thei lo tih ka ring nghet tlat tawh a ni,” tiin.

Nang pawhin, Ricardo-a leh mi dang nuai tam takte angin, tûna mihringte hrehawm tawrhna hi ‘hriat renga a awm tawh loh va, rilru pawha a luh tawh hek loh hun tûr’ chu i nghâkhlel ve em? (Isaia 65:17) “Hmuh awla a awm lai hian LALPA chu zawng ula, a hnaih lai hian ko rawh u,” tih Bible thurâwn i zawm phawt chuan, Pathian Lalram malsâwmna chu i hmuh phâk thil a ni tih ring tlat ang che.​—Isaia 55:6.

Chutianga ti thei tûr chuan, Pathian Thu chhiar leh ngun taka zir chu i nunah dah pawimawh ber rawh. Pathian leh a tirh, Isua Krista chu hria ang che. Pathian tehnate mila nun tumin, a lal chungnunna hnuaia intukluh i duhzia târ lang rawh. Chutiang nun kawng chuan fiahna tawng reng chung pawhin, tûnah ngei pawh nun hlim zâwk a neihtîr ang che a. Tin, nakinah chuan, hrehawm tawrhna awm lohna khawvêla nun chu a neihtîr bawk ang che.​—Johana 17:3. (w03 1/1)

[Footnote-te]

[Phêk -naa bâwm 6, 7]

ENGTIN NGE HREHAWM TAWRHNA KAN HMACHHAWN THEIH ANG?

“In manganna zawng zawng [Pathian] chungah nghat vek rawh u.” (1 Petera 5:7) Keimahni’n emaw, kan hmangaih tuin emaw hrehawm an tawrh hian, kan mangang a, kan thin a rimin, ngaihthah nia inhriatna te kan nei ṭhîn. Mahse, Jehova chuan kan hrehawm tawrhte a hre thiam a ni tih ring tlat ang che. (Exodus 3:7; Isaia 63:9) Hmân lai mi rinawmte angin, a hnênah kan thinlung phawrhin, kan lungkhamnate leh mangannate kan thlen thei a ni. (Exodus 5:​22; Joba 10:​1-3; Jeremia 14:19; Habakuka 1:​13) Kan fiahna tawnte chu thilmak tihna hmangin rawn la kiang kher lo mah se, tih tak zeta kan ṭawngṭaina chhângin, chûngte hmachhawn thei tûrin chakna leh finna min pe thei a ni.​—Jakoba 1:5, 6.

“In zînga fiahna nasa tak lo awm, nangmahni fiahna tûra in chunga lo thleng hi, thilmak in chunga lo thleng angin mak ti suh u.” (1 Petera 4:​12) Heta Petera sawi hi tihduhdahna chungchâng ni mah se, ringtu apiangin an tawrh hrehawm engpawh atân a hman theih bawk a ni. Mihringte chuan retheihna te, natna te, leh lusûnna te an tuar a. Bible chuan mi zawng zawng chungah “hun leh khawrêl ang angin a thleng,” tih a sawi a ni. (Thuhriltu 9:11) Chûng thilte chu tûn lai mihringte dinhmun a ni a. Chu mi hriatna chuan hrehawm tawrhna leh vânduaina lo thlengte hmachhawn thei tûrin min ṭanpui ang. (1 Petera 5:9) A pawimawh berah chuan, “LALPA mit chuan mi felte lam a en ṭhîn a, a beng chuan an au hre tûrin a ngaithla reng ṭhîn,” tih thu hriatchhuah chu thlamuanna hnâr a ni bîk a ni.​—Sâm 34:15; Thufingte 15:3; 1 Petera 3:​12.

“Beiseina kawngah chuan lâwm ula.” (Rom 12:12) Hlimna kan chân tâkte ngaihtuah ngut ngut lovin, hrehawm tawrhna zawng zawng titâwp tûra Pathian thutiam chu kan ngaihtuah zâwk thei a ni. (Thufingte 7:10) He nghahchhan ṭha tak nei beiseina hian lukhumin lu a vênhim angin, min vênghim dâwn a ni. Beiseina chuan vânduaina lo thleng zawng zawngte chu tawrh a tinuam a, chûng chu kan rilru te, ngaihtuahna te, a nih loh leh thlarau lam hrisêlna te tihchhiattîr lo tûrin min ṭanpui a ni.​—1 Thessalonika 5:8.

[Phêk 5-naa milem]

Adama leh Evi’n Pathian rorêlna an hnâwl

[Phêk 7-naa milem]

Pathianin hrehawm tawrhna awm lohna khawvêl min tiam