Rei Lo Tê Hnua Hrehawm Tawrhna Zawng Zawng A Tâwp Chhan Tûr
“Lungpuia chu, a thiltih a fel famkim.”—DEUTERONOMY 32:4.
1, 2. (a) Engvângin nge chatuana nun beiseina chu i hlut? (b) Engin nge mi tam takte chu nakin hun tûr chungchânga Pathian thutiam mak ropui takte rin lohtîr?
PARADIS-A awm anga han inchan chu nuam i ti em? He leilung mak ropui tak bih chiang tûra zin chhuakin, nungcha chhiar sên lohte chanchin zir angah i inmitthla mai thei a. A nih loh leh leilung enkawl tûr leh khawvêl pum huan mawi taka siamna kawnga mi dangte nêna in thawhhona avânga i neih tûr lungawina chu i ngaihtuah mai thei. A nih loh leh tûn lai buai philina nuna zir tûra hun i pêk theih loh lem ziak thiamna te, in sak thiamna te, rimawi tum thiamna te, leh thiamna dang dangte zir chu i ngaihtuah mai thei a ni. A enga pawh chu ni se, Bible-in “nuna taktak” tia a koh beiseina—Jehova’n kan tâna a tum ang ngeia chatuan nunna—chu i hlut a ni.—1 Timothea 6:19.
2 Mi dangte hnêna Bible ṭanchhan beiseina hrilh chu a nuamin, chanvo hlu a ni lâwm ni? Mahse, mi tam tak chuan chutiang beiseina chu an hnâwl a. Anni chuan chu beiseina chu ngaihruat thil mai, bum awlte tâna duhthusam thil mai angah an ngai a ni. Paradis-a chatuan nunna tiamtu Pathian rin chu harsa an ti hial mai thei bawk. Engvângin nge? Mi ṭhenkhat tibuaitu chu sual avânga lo awm buaina tia koh ṭhin chu a ni. Anni chuan Pathian a awm a, engkim tithei leh hmangaihna nei a nih chuan, khawvêla sual leh hrehawm tawrhnate chu hrilhfiah theih a ni lo tih ngaih dân an nei a. An chhût dân chuan sual ngaithei Pathian a awm thei lo va—a awm a nih pawhin, engkim tithei a ni lo emaw, min ngaihsak lo emaw a ni ngei ang. Ṭhenkhat tân chuan hetiang chhût dân hi a rin tlâk hle. Setana chuan mihringte thinlung chu thiam takin a tidel tak zet a ni.—2 Korinth 4:4.
3. Eng zawhna khirh tak chhâng tûrin nge mi dangte kan ṭanpui theih a, engvângin nge chutianga chhâng thei tûr dinhmun ṭha taka kan din?
3 Jehova Thuhretute kan nih angin, Setana leh he khawvêl finna buma awmte ṭanpui theihna dinhmun ṭha takah kan ding a ni. (1 Korinth 1:20; 3:19) Mi tam takin Bible thutiamte an rin loh chhan chu kan hre thiam a. Jehova chu an hre lo ringawt mai a ni. A hming emaw, a hming awmzia emaw chu an hre lo mai thei a, a miziate emaw, a thutiamte a hlen chhuah ṭhinna chanchinte emaw chu an hre tlêm hle emaw, an hre lo hulhual emaw thei bawk. Chutiang hriatna kan nei chu kan nihlawh hle. “Engvângin nge Pathianin sual leh hrehawm tawrhna awm a phal?” tih hi mihringte zawhna neih zînga harsa ber a ni a. A chhânna hmu tûra ‘hriatna thim’ neite kan ṭanpui theih dân a khât tâwka kan ennawn ṭhin chu a ṭangkai a ni. (Ephesi 4:18) A hmasain a chhânna lungâwithlâk tak atâna lungphûm kan phûm theih dân chu kan ngaihtuah phawt ang a. Tichuan, Jehova’n sual thil a chinfel dân aṭanga lo lang a miziate chu kan sawiho vang.
Chu Zawhna Chhân Dân Dik
4, 5. Tuemaw chuan Pathianin hrehawm tawrhna awm a phal chhan chungchânga zawhna a siam hunah eng nge kan tihhmasak ngai? Hrilhfiah rawh.
4 Tuemaw chuan Pathianin hrehawm tawrhna awm a phal chhan an zawh hunah, engtin nge kan chhân? Eden huana thilthleng aṭanga ṭanin, a hrilhfiahna chipchiar tak pêk chu kan duh mai thei. A ṭhenah chuan, chu chu a ṭha mai thei bawk. Mahse, fîmkhur deuh chu a ngai a. Lungphûm ṭhenkhat phûm chu a ngai thei a ni. (Thufingte 25:11; Kolossa 4:6) Chu zawhna kan chhân hma chuan, mi dangte ṭanpuina kawnga min pui theitu tûr thil pathumte chu i lo ngaihtuah ang u.
5 A hmasain, mi chu khawvêla sualna hluar takin a tilungngai bîk a nih chuan, amah ngei emaw, a hmangaihte emaw chu sualin a nghawng pawh a ni thei a. Chutiang a nih chuan khawngaihna dik tak lantîr ṭan chu a finthlâk thei a ni. Tirhkoh Paula chuan Kristiante chu: “Ṭapte chu ṭahpui rawh u,” tiin a fuih si a. (Rom 12:15) Khawngaihna, a nih loh leh ‘inlainat tawnna’ lantîrna chuan mi rilru a khawih mai thei a. (1 Petera 3:8) Amah kan ngaihsak tih a hriatthiam chuan, kan thusawi tûr chu a ngaithla duh zual ang.
6, 7. Engvângin nge miin amah tilungngaitu Bible chungchâng zawhna tih tak zeta a zawh hunah kan fak ang?
6 A pahnihnaah chuan, mi chu he zawhna a zawh avâng hian tih tak zetin kan fak thei a. Ṭhenkhat chuan hêng zawhnate hi an ngaihtuah avângin anni chu Pathian ring lo emaw, zah lo emaw angah an ruat a ni. Sakhaw hruaitute hial pawhin chutiang chuan an lo hrilh mai thei bawk. Amaherawhchu, chutiang zawhna siam chu rinna tlâkchham vâng a ni kher lo. Dik tak chuan, Bible hun laia mi rinawnte pawhin chutiang chi zawhna chu an lo zâwt tawh ṭhîn a ni. Entîr nân, fakna hla phuahtu Davida chuan: “Aw LALPA, engati nge hla taka i din ṭhin le? Engati nge mangan laitea i inthup ṭhin le?” tiin a zâwt a. (Sâm 10:1) Chutiang bawkin, zâwlnei Habakuka pawhin: “Aw LALPA, eng chen nge ka au vang a, min ngaihthlâk loh vang? Inpâwngnêkna thu i hnênah ka au chhuahpui a, nangin i chhanhim si lo va. Engati nge khawlohna te min entîr a, thiltih dik lo tak te hi i en reng? Inrawkna leh inpâwngnêkna te ka hmâah an awm reng si a: inhauhna leh innghirnghona te a lo chhuah a ni,” tiin a sawi a ni.—Habakuka 1:2, 3.
7 Hêngte hi mi rinawm, Pathian zahna nasa tak neitute an ni a. Chutiang zawhna khirh takte an zawh avâng chuan sawisêl an ni em? Ni lo ve, Jehova chuan chutiang tih tak zeta zawhna an siamte chu a Thu-ah a chhinchhiahtîr zâwk mah a ni. Tûn laiah, sualna hluar tak avânga lungngaitu chuan Bible chauhvin a pêk theih chhânna chu nghâkhlelhin, thlarau lamah a ril ṭâm mai thei a. Isua’n thlarau lama ril ṭâmte, a nih loh leh “rilrua retheite” a fak tih chu hre reng rawh. (Matthaia 5:3) Chutiang mite Isua thutiam aṭanga hlimna nei tûra ṭanpui chu chanvo hlu a va ni tak êm!
8. Mite chu eng zirtîrna hnawk takte hian nge Pathian chu hrehawm tawrhna awmtîrtu nia rintîr a, engtin nge anni chu kan ṭanpui theih ang?
8 A pathumnaah chuan, Pathian chu khawvêla suahsualna hluar tak awmtîrtu a ni lo tih hre thiam tûra ṭanpui chu a ngai mai thei a. Mi tam takte chuan kan awmna khawvêla rorêltu chu Pathian a ni a, ani chuan hmasâng aṭang tawhin kan chunga thil lo thleng tûrte chu a rêl sa vek a; tin, mihringte hrehawm tawrh chhan hrilhfiah hleih theih loh tam tak a nei bawk tih zirtîrna an dawng a ni. Hêng zirtîrnate hi a dik lo. Pathian a chawimawi lo va, khawvêla suahsualna leh hrehawm tawrhna awmtîrtu-ah a chan tlat zâwk a ni. Chuvângin, chutiang ti dik tûr chuan Pathian Thu kan hman a ngai thei ang. (2 Timothea 3:16) He kal hmang bawlhlawh tak chunga rolrêltu hi Jehova ni lovin, Diabol-Setana a ni zâwk a. (1 Johana 5:19) Jehova chuan a thil siam vântirhkohte leh mihringte hma lam hun tûr a ruat lâwk lo va; a ṭha leh ṭha lo, a dik leh dik lo thlan theihna hun remchâng leh zalenna a pe ṭheuh zâwk a ni. (Deuteronomy 30:19) Tin, Jehova chu suahsualna awmtîrtu a ni ngai lo va, suahsualna chu a hua a, dik lo taka hrehawm tuarte chu a ngaihsak hle zâwk a ni.—Joba 34:10; Thufingte 6:16-19; 1 Petera 5:7.
9. Pathian Jehova’n hrehawm tawrhna awm a phal chhan hre thiam tûra mite ṭanpui nân, “bawi rinawm, fing tak” chuan eng ang thu leh hlate nge an tihchhuah?
9 Chutiang lungphûm i phûm tawh chuan, i thu ngaithlatu chuan Pathianin hrehawm tawrhna awm zawm zêl a phal chhan zir belh tûrin a inpeih ang. Nangmah ṭanpui tûr chein, “bawi rinawm, fing tak” chuan thu leh hla chhuah ṭangkai tak takte chu a tichhuak a. (Matthaia 24:45-47) Entîr nân, kum 2005/06 “Pathian Lawmzâwng Thuâwihna” District Inkhâwmpuiah Hrehawm Tawrhna Zawng Zawng A Tâwp Thuai Dâwn! tih tract chu tlângzarh a ni a. He tract hi in ṭawnga hmuh theih a nih chuan engvângin nge a chhûng thute chu hriat bel hle i tum loh vang? Chutiang bawkin, ṭawng 157-a hmuh theih tawh What Does the Bible Really Teach? tih lehkhabu bung khat chuan he zawhna pawimawh tak hi a chhâng a ni. Hetiang thu leh hla chhuahte hi hmang ṭangkai hle ang che. Chûng chuan Eden huana chawh chhuah lei leh vâna lal chungnunna thu buai Bible-a târ lan chu chiang takin a hrilhfiah a ni. He thu i sawipui hian, i thu ngaithlatute chu hriatna pawimawh ber—Jehova leh a mizia ropui takte hriatna—chu i hrilh tih hre reng rawh.
Jehova Miziate Thlûrbing Rawh
10. Mi tam tak chuan Pathianin hrehawm tawrhna awm a phal chhan chungchângah eng nge hriat thiam harsa an tih a, eng hriatnain nge anmahni chu ṭanpui mai thei?
10 Jehova’n Setana thununna hnuaia mihringte ro an inrêl a phal chhan hre thiam tûra mite i ṭanpui hian, Jehova mize ropui takte lama an ngaihsakna lâk chu tum rawh. Mi tam tak chuan Pathian chu thiltithei tak a ni tih an hria a, Pathian enkimtithei tia koh chu an hre fo ṭhîn. Amaherawhchu, a thiltihtheihna hmanga rorêl dik lohna leh hrehawm tawrhna zawng zawng a tihtâwp nghal mai loh chhan chu hriat thiam harsa an ti mai thei a. Jehova mize dang thianghlimna te, rorêl dikna te, finna te, leh hmangaihna ang chite chu an hre thiam lo pawh a ni thei bawk. Jehova chuan hêng miziate hi famkim tak leh inbûk tâwk takin a lantîr a ni. Chuvângin, Bible chuan: “A thiltih a fel famkim,” a ti. (Deuteronomy 32:4) He mi chungchânga chhuak ṭhîn zawhnate i chhân hian, engtin nge hêng Pathian miziate hi i dah pawimawh ber theih ang? Entîrna ṭhenkhat ilo ngaihtuah ang u.
11, 12. (a) Adama leh Evi te an sual khân engvângin nge ngaihdam theih an nih loh? (b) Engvângin nge Jehova chuan sualna chu kumkhuain a dawh loh vang?
11 Jehova chuan Adama leh Evi chu a ngaidam mai thei em? He mi chungchângah hi chuan ngaihdamna chu pêk theih a ni lo. Mihring ṭha famkim an nih angin, Adama leh Evi te chuan anmahni duhthlanna ngeiin Jehova lal chungnunna an hnâwl lui a, a aiah Setana kaihhruaina chu an pawm zâwk a ni. Chuvângin, hêl hmangte lama inchhîrna a awm miah lo hi thilmak a ni lo. Amaherawhchu, mite’n he mi chungchânga ngaihdamna an sawi hian, a nihna takah chuan Jehova’n a tehnate tihniama sualna leh helna chu a ngaihzam mai loh chhan an ngaihtuah pawh a ni zâwk thei a. A chhânna chu Jehova nihna bul pawimawh tak—thianghlimna—nên a inkûngkaih a ni.
12 Bible chuan Jehova thianghlimna chungchâng chu vawi tam tak a sawi a. Mahse, lungchhiatthlâk takin he khawvêl bawlhhlawh taka mi tlêm tê chauhvin, chu a mizia chu an hre thiam a ni. Jehova chu a thianghlim a, sual zawng zawng ata a fihlîm a ni. (Isaia 6:3; 59:2) Sual chungchângah chuan a thâwi damna tûr, a tihrehna tûr chu a ruahman a, sual chu a dawh kumkhua lo vang. Jehova chuan sual chu kumkhua atân dawh rêng ta se chuan, nakin hun beiseina kan nei lo vang. (Thufingte 14:12) A hun ruatah chuan, Jehova chuan a thil siam zawng zawng chu a tithianghlim dâwn a ni. Chu chu a chiang a ni, Mi Thianghlima duhzâwng a ni si a.
13, 14. Engvângin nge Jehova’n Eden huana hel hmangte chu a tihboral nghâl loh?
13 Jehova chuan Eden huana hêl hmangte chu tiboral maiin, bul a ṭan ṭha leh mai thei lâwm ni? Tiboral tûrin thiltihtheihna zawng a nei ngei mai a; nakin lawkah chuan chu a thiltihtheihna chu hmangin suahsualna zawng zawng chu a tiboral ang. Ṭhenkhat chuan: ‘Engvângin nge lei leh vâna mi sual pathum chauh an awm laia a tihboral mai loh? Chutiangin ti se chuan sual darh zauna—leh khawvêla kan hmuh lungngaihna zawng zawngte—chu pumpelh theih a ni dâwn lâwm ni?’ tiin an ngaihtuah mai thei. Engvângin nge Jehova’n chutianga thil a tih loh? Deuteronomy 32:4 chuan: “A awm dân zawng zawng chu dân,” a nih loh leh rorêl dikna a ni a ti. Jehova chuan rorêl dikna a ngai pawimawh hle a. Dik takin, “LALPA chuan rorêlna fel a ngaina” a ni. (Sâm 37:28) Rorêlna fel a ngainat avângin, Jehova chuan Eden huana hel hmangte chu a tiboral lo. Engvângin nge?
14 Setana helna chuan Pathian lalchungnunna dikna chungchângah rinhlelhna a tichhuak a. Jehova rorêl dikna neih chuan Setana chona chu dik taka chhân a phût tlat a ni. Hel hmangte chuan phu hle mah se, anmahni tihhlum nghâlna chuan chutiang chhânna chu a pe dâwn lo va. Chu chuan Jehova thiltihtheihna chu a târ lang zual ngei ang a; mahse buaina chu thiltihtheihna a neih leh neih lovah a ni lo. Chu bâkah, Jehova chuan Adama leh Evi hnênah a thiltum chu a lo puang tawh a. Anni chuan fate nei a, leilung hi luah khatin, leia thil siam zawng zawng chungah thu an nei tûr a ni. (Genesis 1:28) Jehova chuan Adama leh Evi te kha tiboral mai se chuan, mihringte chungchânga a thiltum a sawi chhuah tawh chuan awmzia a nei lo vang. Jehova rorêl dikna chuan chutiang thil a thlen chu a phal ngai dâwn lo, a thiltum chu engtik lai pawha a tihhlawhtlin ṭhin avângin.—Isaia 55:10, 11.
15, 16. Mite’n Eden huana chona tihchhuah “chinfel dân” tûr dang an rawt hunah, engtin nge anni chu kan ṭanpui theih ang?
15 Lei leh vâna tuemaw hian helna chu Jehova tih aia ṭha zâwkin a chingfel thei ang em? Ṭhenkhat chuan Eden huana helna “chinfel dân” tûr atân anmahni ngaih dân an thawh mai thei a. Mahse, chutianga an tih chuan buaina chinfel dân ṭha zâwk an ngaihtuah thei an tihna a ni dâwn lâwm ni? Chu chu an suahsual vânga ti an ni lo mai thei a; mahse, Jehova leh a finna ropui tak chu an hre thiam lo zâwk a ni. Tirhkoh Paula chuan Rom khuaa Kristiante hnêna a lehkha thawnah, Pathian finna chu nasa takin a lai lang a, chutah chuan Jehova’n mihring rinawmte tlan nân leh a Hming tihthianghlim nâna Messia Lalram hman a tum chungchâng “thurûk” pawh a tel a ni. Engtin nge Paula’n chu thiltum ruahmantu Pathian finna chu a ngaih? Tirhkoh chuan a lehkha thawn chu hêng thute hian a titâwp a ni: “Pathian finga chauh hnênah chuan Isua Krista avângin chatuana ropuina awm rawh se. Amen,” tiin.—Rom 11:25; 16:25-27.
16 Paula chuan Jehova chu—lei leh vâna fing ber—“finga chauh,” a nih loh leh fing awmchhun a ni tih a hria a. Ṭha famkim lo mihringte zînga tuin nge Pathian finna chonate zînga harsa ber sawi loh, thil dang engpawh chinfel dân kawng ṭha zâwk ngaihtuah thei ang? Ngaihtuah thei an awm loh avângin, “thinlunga fing” Pathian kan zahna ang nei ve tûrin mite kan ṭanpui a ngai a ni. (Joba 9:4) Jehova finna kan hriat thiam poh leh a thil chinfel dân chu a ṭha ber a ni tih ka ring zual sauh vang.—Thufingte 3:5, 6.
Jehova Mize Langsâr Ber Chu Hlutin
17. Engtin nge Jehova hmangaihna hriat thiam lehzualna chuan Pathianin hrehawm tawrhna awm a phalnain a tihbuai mite chu a ṭanpui?
17 “Pathian chu hmangaihna a ni.” (1 Johana 4:8) Hêng rilru khawih tak thute nên hian, Bible chuan Jehova mize langsâr ber, a mize dang zawng zawng zînga duhawm ber, leh suahsualna a hluar avânga lungngaite tâna thlamuanthlâk ber chu a târ lang a ni. Jehova chuan a thil siam chunga sualin chhiatna nasa tak a thlente a chinfel dân kawng engkimah hian a hmangaihna a lantîr a. Hmangaihna chuan Jehova chu sual nei Adama leh Evi te thlah hnênah beiseina pe tûrin a chêttîr a. (Genesis 3:15) Pathian chuan ṭawngṭaia a hnên lam an pan a phalsak a, amah nênna inlaichînna pawm tlâk an neih theihna tûr kawng a hawnsak a ni. Hmangaihna chuan Pathian chu sual ngaihdam pumhlûmna leh nun ṭha famkim, chatuana nunna kawng hawng tûra tlanna siam tûrin a chêttîr a. (Johana 3:16) Tin, hmangaihna chuan mihringte chunga dawhthei tûr leh a tam thei ang berte chu Setana hnâwl a, Jehova chu an Lalchungnung ber anga thlan theihna hun remchâng pe tûrin a chêttîr bawk a ni.—2 Petera 3:9.
18. Eng hriatthiamna nge kan neih a, a dawta thuziakah eng nge kan sawiho vang?
18 Pastor pakhat chuan fîrfiaka chêtna avânga chhiatna nasa tak champhaa kalkhâwm mipuite hnênah chuan: “Pathianin sual leh hrehawm tawrhna awm zawm zêl a phal chhan hi kan hre lo,” tiin a sawi. A va lungchhiatthlâk tak êm! He mi chungchâng hriattiamna kan nei hi kan va lâwm tak êm! (Deuteronomy 29:29) Tin, Jehova chu fing tak, rorêltu dik, leh hmangaihna nei a nih avângin, hrehawm tawrhna zawng zawng chu a titâwp thuai dâwn tih kan hria a. Chutianga ti tûr chuan thu a tiam ngei bawk a ni. (Thu Puan 21:3, 4) Mahse, kum zabi tluanchhuaka thi tawh zawng zawngte tân beiseina a awm em? Jehova’n Eden huana chona tihchhuah a chinfel dân chuan anni chu beisei bovin a dah em? Dah lo ve. Hmangaihna chuan kaihthawh lehna hmanga beiseina pe tûrin a chêttîr a ni. Chu chu a dawta thuziaka sawiho tûr chu a ni ang. (w07 5/15)
Engtin Nge I Chhân Ang?
• Pathianin hrehawm tawrhna awm a phal chhan zâwttu hnênah eng nge kan sawi theih?
• Engtin nge Jehova’n Eden huana helna a chinfel dânah a thianghlimna leh a rorêl dikna chu a lan?
• Engvângin nge mite chu Jehova hmangaihna hre thiam lehzual tûra kan ṭanpui ang?
[Phêk 13-naa milem]
Khawvêla hrehawm tawrhnain a tihlungngaihte chu ṭanpui dân zawng rawh
[Phêk 15-naa milem]
Mi rinawm Davida leh Habakuka chuan Pathian hnênah tih tak zetin zawhna an zâwt