Jehova Thu Chu A Nung
Luka Bu Aṭanga Thu Pawimawh Hrilhfiahna
CHANCHIN Ṭha Matthaia ziak chu Judate tâna ziak leh Marka ziak chu Juda mi ni lote tâna ziak nia hriat a ni ṭhîn. Amaherawhchu, Chanchin Ṭha Luka ziak chu hnam zawng zawng tâna ziak a ni. Luka bu hi C.E. 56-58 vêla ziak a niin, Isua nun leh rawngbâwlna chanchin thuziak kim chang tak awmna a ni.
Khawngaihna rilru nei leh doctor fîmkhur tak Luka chuan “a bul ata engkim fel takin” a chhui a, a thuziak chuan kum 35—B.C.E. 3 aṭanga C.E. 33—chhûnga thilthlengte a huam a ni. (Lk. 1:3) Chanchin Ṭha Luka ziak thu awm zaa 60 vêl chu Chanchin Ṭha ziak dangah a tel lo.
RAWNGBAWL ṬANNA
Baptistu Johana leh Isua pian chungchâng kim chang taka a sawi hnuah, Luka chuan Tiberia Kaisara lal kum 15-naah Johana’n a rawngbâwlna a ṭan tih min hrilh a, chu chu C.E. 29 tîr lam a ni. (Lk. 3:1, 2) Chu mi kum tâwp lamah Isua chu Johana’n a baptis a. (Lk. 3:21, 22) C.E 30-ah chuan, ‘Isua chu Galili ramah a haw leh a, inkhâwmna inahte a zirtîr ṭan a ni.’—Lk. 4:14, 15.
Isua’n Galili rama thu hrila a zinna hmasa ber chu a ṭan a. Ani chuan mipui hnênah: “Khaw dangahte pawh Pathian ram chanchin ṭha ka hril tûr a ni,” tih a hrilh a ni. (Lk. 4:43) Isua chuan sangha mantu Simona leh mi dangte chu a kalpui a. “Tûn hnuah zawng mihring i man tawh ang,” a ti a ni. (Lk. 5:1-11; Mt. 4:18, 19) Isua Galili rama thu hrila a zin vawi hnihnaah chuan a tirhkoh 12-te chu a hnênah an awm a. (Lk. 8:1) Thu hrila a zin vawi thumnaah chuan, “Pathian ram thu hril tûr leh damlote tidam tûrin” 12-te chu a tîr chhuak a ni.—Lk. 9:1, 2.
Bible Chungchânga Zawhnate Chhânna:
1:35—Mari’n nau a pai nân a hmeichhe chi hman a ni em? Mari fa chu Pathian thutiam anga amah thlahtu Abrahama te, Juda te, leh Davida te thlah dik tak ni tûr chuan, naupainaah a hmeichhe chi a tel a ngai a. (Gen. 22:15, 18; 49:10; 2 Sam. 7:8, 16) Amaherawhchu, Pathian Fapa nunna ṭha famkim dahsawn nân leh Mari raitîr nân Jehova thlarau thianghlim chu hman a ni. (Mt. 1:18) Chu thlarau chuan Mari hmeichhe chi-a ṭhat famkim lohna awm zawng zawng chu hnâwlin, naute insiam chu famkim lohna ata atîr aṭangin a vêng nghâl ni berin a lang.
1:62—Zakaria kha ṭawng thei lo leh bengngawngin a awm em? Awm lo ve. A ṭawng thei lo mai a ni. Mi dangte’n nausên hming atân eng nge a duh tih ‘zaizira’ an zawh kha Zakaria bengngawn vâng a ni lo. A nupuiin nausên hming chungchâng a sawi chu a lo hriat ngei a rinawm a. Mi dangin Zakaria chu zaizirin an zâwt pawh a ni thei ang; mahse, ṭawng theihna chauh pêk lêt a ngaihna chuan Zakaria kha a beng a ngawng tel lo tih a târ lang a ni.—Lk. 1:13, 18-20, 60-64.
2:1, 2—Engtin nge “hming ziak hmasa ber” chungchâng sawina chuan Isua pian hun hre tûra min ṭanpui? Kaisara Awgusta lal laiin vawi khat aia tam hming ziah a ni a—Daniela 11:20-na thlen famkim nân hming ziak hmasa chu B.C.E. 2-ah leh a vawi hnihna chu C.E. 6 emaw, 7 emawah a ni. (Tirh. 5:37) Hêng hming ziak pahnih hi Suria rama Kurinia ram awptu a nih laia thleng a ni a, chu dinhmun chu vawi hnih a chelh zawm a nih hmêl hle. Luka’n hming ziak hmasa a sawi hian Isua pian hun chu B.C.E. 2-ah a ni tih a târ lang a ni.
2:35—Engtin nge Mari thinlung chu “ngûnhnâmin” a chhun tlang? Hei hian mipui a tam zâwkin Isua chu Messia anga an pawm duh loh avâng leh Isua hrehawm taka a thihna avânga Mari lungngaihna nasa tak a kâwk a ni.—Joh. 19:25.
9:27, 28—Isua’n a zirtîrte hnênah a Lalrama a lo kal an hmuh hma loh chuan, ṭhenkhat chu “thihna tem tawp lo tûr an awm” tih a tiam hnuah, hmêl dang lamna chu Matthaia leh Marka te’n “ni ruk achinah” a thleng tia an sawi laiin, engvângin nge Luka chuan “ni riat emaw laiah” tia a sawi? (Mt. 17:1; Mk. 9:2) Luka chuan Isua’n thu a tiam nî leh chu thutiam a thlen famkim nî, ni hnih dang chu a chhiar tel a ni ngei ang.
9:49, 50—Engvângin nge Isua’n ramhuai hnawt chhuaktu tuemaw chu amah zuitu a ni lo chung pawha a khap loh? Kristian kohhran chu din a la nih loh avângin Isua chuan chu pa chu a khap lo. Chuvâng chuan, Isua hming ring tûr leh ramhuai hnawt chhuak tûrin chu pa chuan Isua a zui kher a ngai lo a ni.—Mk. 9:38-40.
Kan Zir Tûrte:
1:32, 33; 2:19, 51. Mari chuan hrilh lâwkna tithleng famkimtu thilthlengte leh thusawi te chu a rilruin a vawng reng a ni. Isua thusawi leh tûn laia thilthlengte chu khaikhinin, “khawvêl tâwp” chungchâng a sawite chu rilruah kan vawng reng em?—Mt. 24:3.
2:37. Pitar Anni entîrna siam chuan Jehova chibai bûk reng tûr te, “ṭawngṭai fan fan” tûr te, leh kan Kristian “inkhâwmte” bânsan lo tûr tein min zirtîr a ni.—Rom 12:12; Heb. 10:24, 25.
2:41-50. Josefa chuan a nunah Pathian biakna chu a dah hmasa a, a chhûngkuate taksa lam leh thlarau lam ṭhatna chu a ngaihsak a ni. He mi chungchângah hian, chhûngkaw lûte tân entawn tûr ṭha a siam a ni.
4:4. Thlarau lam thil ngaihtuah lovin ni khat pawh kan liamtîr tûr a ni lo.
6:40. Pathian Thu zirtîrtu chuan a zirlaite tân entawn tûr ṭha a siam tûr a ni a. A thu hrilh angin a nung tûr a ni.
8:15. ‘Thu vawng renga, chhel taka rah’ tûr chuan, Pathian thu kan hriat thiam a, kan ngaih hlut a, thinlunga kan senglûh a ngai a ni. Bible leh Bible ṭanchhan thu leh hlate kan chhiar hian ṭawngṭaina leh ngun taka chhûtna kan nei ngei ngei tûr a ni.
ISUA RAWNGBAWLNA HNUHNUNG LAM
Isua chuan mi dang 70-te chu a kalna tûr Juda ram khaw tinah leh hmun tinah a tîr chhuak a. (Lk. 10:1) ‘Ani chuan zirtîr chungin khaw lian leh khaw tête a tlawh zêl a ni.’—Lk. 13:22.
C.E. 33 Kalhlen Kût hma ni ngaah, Isua chu sabengtung no chunga chuangin Jerusalemah a lût a. A zirtîrte hnêna a thusawi thlen famkim hun chu a lo thleng ta: “Mihring Fapa hian thil tam tak a tuar tûr a ni a, upate, puithiam lalte, lehkhaziaktute duh lohvin a awm tûr a ni a, thahin a awm tûr a ni a, ni thum niah kaihthawhin a awm bawk tûr a ni,” tih chu.—Lk. 9:22, 44.
Bible Chungchânga Zawhnate Chhânna:
10:18—Isua’n a zirtîr 70-te hnêna: “Ṭêk anga Setana vân aṭanga a lo tla kha ka hmu asin,” tih a sawi khân eng a tihna nge? Isua chuan Setana chu vân aṭanga paih thlâk a ni tawh a tihna a ni lo. Chu chu kum 1914-a vân lam Lala Krista ṭhuttîr a nih hnu lawkah chauh a thleng a ni. (Thup. 12:1-10) Chiang fakin sawi thei lo mah ila, nakina thilthleng tûr chu thleng tawh anga sawiin, Isua chuan thilthleng ngei ngei tûr a nihzia a sawi uar a ni.
14:26—Eng kawngin nge Krista hnung zuitute chuan an chhûngte an “huat” ang? Bible-ah hian, ‘hua’ tih hi mi emaw, thil emaw chu a dang aia hmangaih nêp zâwk sawi nâna hman a ni thei a. (Gen. 29:30, 31) Kristiante chuan an chhûngte an ‘haw’ tûr tih awmzia chu, Isua aiin an hmangaih nêp zâwk tûr tihna a ni.—Mt. 10:37.
17:34-37—“Mulukawlhte” chu tute nge ni a, an kal khâwmna “saruang” chu eng nge ni? ‘Kal bopui,’ a nih loh leh chhandama awmte chu hmun hla tak hmu thei mulukawlhte nêna tehkhin an ni a. An kal khâwmna “saruang” chu Krista hmuh theih lohva a lo kal lehna leh an tâna Jehova pêk thlarau lam chaw hi a ni.—Mt. 24:28.
22:44—Engvângin nge Isua chu a thla a phân êm êm? Chhan tam tak a awm. Isua chuan thil tisualtu anga a thihna tûrin Pathian Jehova leh A hming a nghawng dân tûr chu a ngaihtuah a. Chu bâkah, a chatuan nunna leh mihring zawng zawngte hmabâk chu a rinawmna chunga a innghat tih a hre chiang hle bawk a ni.
23:44—Dârkâr thum lai thimna chu nî âwkin a lem vâng a ni em? Ni lo ve. Ni âwkin a lem chu Kalhlên Kût hun lai ang thla bial lai ni lovin, thla thar hun lai chauhva thleng thei a ni a. Isua thih nia thim chu Pathian thilmak tih a ni.
Kan Zir Tûrte:
11:1-4. Hêng kaihhruainate leh tlêma danglam deuh hlek a hma kum khat leh a chanvea Tlâng Chunga Thusawia a zirtîr Lal ṭawngṭaina khaikhinna chuan kan ṭawngṭaina hi thu thuhmun chham nawnna mai mai a ni tûr a ni lo tih a târ lang chiang hle.—Mt. 6:9-13.
11:5, 13. Jehova chuan kan ṭawngṭaina chhâng duh mah se, kan dîl ngut ngut tûr a ni.—1 Joh. 5:14.
11:27, 28. Hamṭhatna, a nih loh leh hlimna dik tak chu chhûngkaw inlaichînna emaw, sum leh pai khâwlkhâwmna emaw aṭang ni lovin, Pathian duhzawng rinawm taka tihna aṭangin a lo awm a ni.
11:41. Mi rethei hnêna kan thilpêk chu thinlunga hmangaihna leh duhna vânga pêk a ni tûr a ni.
12:47, 48. Mawhphurhna lian zâwk neia ti si lo chu, a mawhphurhna hre lo emaw, hre thiam chiah lo emaw aiin a demawm zâwk a ni.
14:28-30. Kan neih bâka nun loh chu a finthlâk a ni.
22:36-38. Isua chuan a zirtîrte chu mahni invênhim nâna hriam hrei keng tûrin a ti lo. Chu ai mah chuan, man a nih zâna khandaih an ken avângin Isua chuan thil pawimawh tak a zirtîr theih phah a ni: “Khandaih ruaitute zawng zawng chu khandaih vêkah an thi dâwn si a,” tiin.—Mt. 26:52. (w08 3/15)
[Phêk 31-naa milem]
Josefa chuan chhûngkaw lûte tân entawn tûr ṭha a siam
[Phêk 32-naa milem]
Luka chuan Isua nun leh rawngbâwlna chanchin kim chang tak a ziak