Hremhmun Chungchanga Thu Dik Hriatna Chuan Engtin Nge A Nghawng Che?

HREMHMUN chungchâng zirtîrtute chuan Pathian Jehova leh a miziate chu dik lo takin an theh darh a ni. Bible chuan Pathianin mi suaksualte chu a tiboral dâwn tih a sawi ngei mai. (2 Thessalonika 1:6-9) Mahse, thinurna fel chu Pathian mize bul ber a ni lo.

Pathian chu nunrâwng tak emaw, phuba lâk hmang emaw a ni lo. Ani chuan: “Mi sual thihnaah hian lâwmna rêng ka nei em ni?” tiin a zâwt hial a ni. (Ezekiela 18:23) Pathianin mi sual thihnaa lâwmna a neih loh chuan, hêng mite chatuana nghaisak chu engtin nge nuam a tih theih tehlul ang?

Pathian mize langsâr ber chu hmangaihna a ni a. (1 Johana 4:8) Dik takin, “LALPA chu engkim chungah pawh a ṭha a ni; a lainatnate chu a thil siam zawng zawng chungah a awm a.” (Sâm 145:9) Pathian chuan tih tak zeta amah hmangaihna nei tûrin min duh a ni.—Matthaia 22:35-38.

Engin Nge Chêttîr Che—Hremhmun Hlauhnain Nge, Pathian I Hmangaihnain?

Hremhmun meidîla thlarau nghaisak ni anga zirtîrna chuan Pathian râpna a awmtîr a. Inkalh takin, Pathian chungchânga thutak zir a, amah hmangaihtu chuan Pathian ṭihna a nei ang. “LALPA ṭihna chu finna bul a ni a; chutianga ti apiangte chuan hriat thiamna ṭha an nei,” tiin Sâm 111:10-na chuan a hrilhfiah a. Hetianga Pathian ṭihna chu amah râpna lam ni lovin; Siamtu a nih anga zahna thûk tak neihna a ni zâwk a. Chu chuan keimahniah amah tihlâwm loh hlauhna ṭha tak a awmtîr a ni.

Hremhmun chungchâng thutak hriatnain tûn hmaa ruihhlo ngai ṭhîn, kum 32 mi Kathleen-i a nghawng dân hi ngaihtuah rawh. Tûn hmain a nun chu intihhlimna te, tharum thawhna te, mahni inhuatna te, nungchang bawlhhlawhna tein a khat tlat a. Ani chuan: “Ka fanu kumkhat mi chu enin, ‘A chunga ka thiltih hi han en teh. He mi avâng hian hremhmunah nghaisak ka ni ngei ang,’ tiin ka inngaihtuah ṭhîn,” tiin a sawi a ni. Kathleen-i chuan ruihhlo ngaih chu bânsan a tum a; mahse, a sâwt thei si lo. Ani chuan: “Mi ṭha nih ka duh a; mahse, ka nun leh khawvêla thil engkim mai hi a lungchhiatthlâk hle. Ṭhatna tûr chhan rêng a awm lo,” a ti.

Tichuan, Kathleen-i chuan Jehova Thuhretute a tawng fuh a. Ani chuan: “Hremhmun mei dîl a awm lo tih ka hre ta a. Bible chângte chuan chu chu thil âwihawm tak a nihzia a târ lang. Hremhmun mei dîla hrehawm ka tawrh a ngai lo tih ka hriatna chuan mi tihahdam huai a ni,” a ti. Chu bâkah, Pathian thutiam, mi suaksualte awm lohna he leiah hian mihringte hi chatuanin an nung thei tih a zir bawk a ni. (Sâm 37:10, 11, 29; Luka 23:43) “Tûnah chuan beiseina dik tak—Paradise-a chatuan nun beiseina chu ka nei ta!” a ti a ni.

Hremhmun mei dîl hlauhna tel lovin, Kathleen-i chuan a ruihhlo ngaih ṭhin chu a bânsan thei ang em? Ani chuan: “Ruihhlo ka châk êm êm châng hian, Pathian Jehova ṭanpuina chu ngênin, ka ṭawngṭai a. Chutiang thil chîn bawlhhlawh takte a thlîr dân chu ka ngaihtuah a, amah tihlunghnual chu ka duh lo va. Ani chuan ka ṭawngṭaina min chhânsak ṭhîn a ni,” a ti. (2 Korinth 7:1) Pathian tihlâwm loh hlauhna ṭha chuan Kathleen-i chu a ruihhlo ngaihna a thlahtîr thei ta a ni.

Ni e, hremhmun mei dîla hrehawm tawrh hlauhna ni lovin, Pathian hmangaihna leh amah ṭihna chuan hlimna chatuan daih chên tûra Pathian duhzâwng ti tûrin min chêttir thei a ni. Ni e, fakna hla phuahtu chuan: “LALPA ṭih apiang chu an eng a thâwl le, a kawng zawhtute chu,” tiin a ziak a ni.—Sâm 128:1. (w08 11/1)

[Phêk 9-naa bâwm/milemte]

Tute Nge Hremhmun Aṭanga Chhuak Tur?

Bible lehlin ṭhenkhat chuan thawhleh beiseina awm tawh lova chatuana boral hlenna sawina Grik thu mal, Geʹen·na chu “hremhmun” anga leh chhuah châng a nei a. Chu mi nêna inkalh takin, “hremhmun” tia kan hriat lâr êm êm, atîra Grik ṭawnga Haiʹdes (Mizo Bible-in “Mitthi Khua” tia a leh chhuah) an tiha awmte chuan thawhleh beiseina an nei thung a ni.

Chuvâng chuan, Isua a thih a, a thawhleh hnuin, tirhkoh Petera chuan a thu ngaithlatute hnênah, Isua chu ‘Mitthi Khuaa [“hremhmuna,” King James Version] hnutchhiah a ni lo’ tih a hrilh a ni. (Tirhkohte 2:27, 31, 32; Sâm 16:10) He Bible chânga ‘Mitthi Khua’ tia lehlin hi Grik thu mal Haiʹdes a ni a. Chu chu tûn laia kan ngaih anga mei alh hluah hluahna hmun, “hremhmun” a ni lo. Chutiang hmunah chuan Isua chu a kal lo. Mitthi Khua, a nih loh leh “hremhmun” kan tih chu thlân pângngai a ni. Mahse, Isua chu Pathianin Mitthi Khua aṭanga a chhuahtîr awmchhun a ni lo.

Thawhlehna nêna inkûngkaihin, Bible chuan: “Thihna leh Mitthi Khua [“hremhmun,” KJ] chuan an chhûnga mitthi awmte chu an chhuahtîr bawk a,” a ti. (Thu Puan 20:13, 14) Mitthi Khua, a nih loh leh “hremhmun” ti ruak tih chu, Pathianin thawhlehna chang tlâka a ruat zawng zawngte kaithawh lehna hi a ni. (Johana 5:28, 29; Tirhkohte 24:15) Kan hmangaih takte thlân aṭanga an lo kîrleh hmuh hun chu, nakin hun beisei tûr ropui tak a va ni êm! Hmangaihna dai ngai lo neitu Pathian Jehova chuan chu thil chu a rawn thlentîr dâwn a ni.