Pathian Thu Aṭangin Inzir Rawh
Sakhua Chungchânga Chanchin Ṭha Chu Eng Nge Ni?
He thuziak hian i lo ngaihtuah mai theih zawhnate zâwtin, i Bible-a a chhânna i hmuh theihna laite a târ lang a. Jehova Thuhretute chuan chûng chhânnate sawipui che chu an châk hle a ni.
1. Sakhua zawng zawng hi a ṭha vek em?
Sakhaw tam takah hian Pathian tihlâwm duhna nei mi rilru ṭha tak tak an awm a. Pathian chuan chûng mite chu a hmuin a ngaihsak a ni. Mahse, lungchhiatthlâk takin mi ṭhenkhat chuan sakhuana chu thil ṭha lo tih nân an hmang a. Hun kal tawhahte chuan sakhaw hruaitute’n anmahni kalhtute chu an nghaisa hial ṭhîn a ni. (2 Korinth 4:3, 4; 11:13-15) Tûn laiah, chanchin thar puan chhuaha a lan dânin, sakhaw hruaitute chuan firfiaka chêtna leh indona an thlâwp a, naupang khawih chingpennaah an inhnamhnawih bawk a ni.—Matthaia 24:3-5, 11, 12 chhiar rawh.
Bible chuan sakhaw chi hnih a awm thu min zirtîr a, chu chu sakhaw dik leh dik lo hi a ni. Sakhaw dik lo chuan Pathian chungchâng thutak a zirtîr lo. Nimahsela, Pathian Jehova chuan a mite’n a chungchâng thutak an hriat chu a duh a ni.—1 Timothea 2:3-5 chhiar rawh.
2. Sakhua chungchânga chanchin ṭha chu eng nge ni?
Pathian chuan amah hmangaiha inchhâl si, a chungchâng thutak zirtîr si lo sakhuate buma mite an awm chu a duh lo va. Dik takin, chutiang sakhaw vuantute chuan Diabol-Setana thununna hnuaia awm he khawvêl ṭhian nih hi nuam an ti a ni. (Jakoba 4:4; 1 Johana 5:19) Bible chuan Pathian aia mihring sawrkârte thlâwp zâwktu sakhuate chu nawhchizuar angin a sawi a. Bible chuan chu nawhchizuar chu Nova hun laia Tuilêt hnua sakhaw dik lo inṭanna hmân lai khawpui hming chawiin, “Babulon Khaw Ropui” tiin a ko a ni. Nakin lawkah Pathian chuan mihringte bum a, awp bettu sakhua chu a rawn tiboral ang.—Thu Puan 17:1, 2, 5, 17; 18:8, 23, 24 chhiar rawh.
3. Engtin nge Pathianin ram tinah hlimna a rawn thlen ang?
Sakhaw dik lo chunga rorêlna lo thleng tûr chu chanchin ṭha a ni a. Chu chuan khawvêl puma mite chu awpbeh an nihna ata a rawn chhuah zalên ang. Sakhaw dik lote chuan mite a hruai bovin, a ṭhen darh leh tawh ngai lo vang. Mi tinte chu Pathian dik awmchhun biaknaah an inlungrual tawh zâwk ang.—Isaia 11:9; Thu Puan 18:20, 21; 21:3, 4 chhiar rawh.
4. Mi rilru ṭhat’en eng nge an tih ang?
Jehova chuan khawvêl puma sakhaw dik lo chhûnga awm mi rilru ṭhate chu a theihnghilh lo va. Chûng mite chu thutak zirtîrna hmangin a tilungrual mêk a ni.—Mika 4:2, 5 chhiar rawh.
Jehova chuan a rawng bâwl duhtute chu a chhûngkuaah a lâwm lût ṭhîn a. A rawng kan bâwl ṭan hian kan ṭhiante leh kan chhûngte chu lungni lo mah se, hlâwkna tam tak kan hmu a ni. Pathian ṭhian nihna te, hmangaihna ngah ‘chhûngkaw’ thara tel theihna te, leh chatuana nun beiseina te kan neih phah a ni.—Marka 10:29, 30; 2 Korinth 6:17, 18 chhiar rawh. (w12-E 05/01)
Hriat tam lehzual nân, Jehova Thuhretute tihchhuah Bible Zirtîrna Dik Tak Chu Eng Nge Ni? tih lehkhabu bung 15 leh 16-na hi en ang che.
[Phêk 26-naa milem]
The Complete Encyclopedia of Illustration/J. G. Heck