Nupa Inkâra Boruak Ṭha Lo Chu Thlîr Dân Dikin Thlîr Rawh

“Innei sate hnênah chuan thu ka pe keima pêk erawh chu ni lovin, Lalpa pêk a ni zâwk.” —1 KOR. 7:10.

KAN HRILHFIAH THEI EM?

Eng kawngin nge Pathianin nupate chu a zawm?

Engtin nge upate chuan nupa inkâra harsatna nei Kristiante chu an ṭanpui theih?

Engtin nge inneihna hi kan thlîr ang?

1. Engtin nge Kristiante’n inneihna chu an thlîr a, engvângin nge?

KRISTIANTE’N nupui pasal an neih hian, Pathian hmaah thu an tiam a ni—holam taka lâk tûr ni lo mawhphurhna rit tak chu. (Thur. 5:4-6) Jehova chu inneihna Dintu a nih avângin, nupa anga inneite chu Jehova tuah rem, a nih loh leh “zawm” anga sawi theih a ni. (Mk. 10:9) Inneite chu eng ram dân hnuaiah pawh innei mah se, Pathian zawm an ni a. Jehova chhiahhlawhte chuan an inneih laiin Pathian betu an lo ni tawh emaw, la ni lo emaw pawh ni se, an inneihna chu kumkhaw daih tûr angin an thlîr tûr a ni.

2. He thuziakah hian eng zawhnate nge kan ngaihtuah ang?

² Inneihna hlawhtling chuan hlimna nasa tak a thlen thei a. Mahse, nupa inkârah boruak ṭha lo a awm chuan eng nge tih theih awm? Chutiang inneihna chu tihchak theih a ni em? Remna tlachham nupate tân ṭanpuitu eng nge awm?

HLIMNA NGE NI ANG A, LUNGNAIHNA ZAWK?

3, 4. Miin kawppui tûr thlanna kawnga thu tlûkna âtthlâk a siam chuan, chu chuan eng thil nge a thlen theih?

³ Kristian inneihna hlawhtling chu hlimna leh Jehova chawimawina thlentu a ni a. A hlawhtlin loh erawh chuan, a lo berah pawh lungngaihna thlentu a ni. Nupui pasal neih tum mêk Kristian chu Pathian kaihhruaina zuina hmangin, inneihna bul ṭha tak ṭan thei tûr dinhmunah a ding a. Kawng lehlamah chuan, kawppui tûr thlanna kawnga thu tlûkna âtthlâk siamtu chuan lungawi lohna leh lungngaihna a tâwk thei thung a ni. Entîr nân, ṭhalai ṭhenkhat chuan nupui pasal nei tûra mawhphurhnate lâk an inpeih hmaain ngaihzâwng an nei ṭan a. Mi ṭhenkhat chuan Internet aṭanga kawppui tûr zawngin hmanhmawh takin an innei a, a hnu lawkah nupa hlim lo tak an ni nghâl thuai ṭhîn. Ṭhenkhat dang chuan an inneih hmain sual lian tham tak an ti a, chutiang chuan inzah tawnna nei meuh lovin an inneihna bul chu an ṭan a ni.

⁴ Kristian ṭhenkhat chuan “Lalpaa awm mi” chauh an nei lo va, chhûngkuaa sakhaw thumun vawn loh avânga lo awm hrehawmnate chu an tuar fo a ni. (1 Kor. 7:39) Chutiang thil chu i tawng a nih chuan, Pathian ngaihdamna leh ṭanpuina dîlin ṭawngṭai ang che. Pathian chuan mite’n an thil tihsual avânga hrehawm an tawrhte chu paih bosak lo mah se, inchhîrna neite chu tuar thei tûrin a ṭanpui ṭhîn a ni. (Sâm 130:1-4) Tûnah leh chatuan thlengin amah tihlâwm tum tlat la, ‘Jehova lâwmna chu i chakna a lo ni ang.’—Neh. 8:10.

NUPA INKAR A ṬHAT LOH HUNAH

5. Nupa inkâra boruak a ṭhat loh hunah eng ang ngaihtuahna nge pumpelh ngai?

⁵ Nupa inkâr boruak ṭha lova awmte chuan: ‘Hlim lo taka kan inneihna hian hum a phu tak zet em le? Hun liam tawhte hi kokîr theiin, kawppui dang nên bul ṭan ṭha leh thei ila ka va ti tak êm!’ tiin an ngaihtuah mai thei a. ‘Aw, zalên taka awm leh ka va duh êm! Engah nge ka ṭhen mai loh vang? Bible dân angin ṭhen thei lo pawh ni ila, engvângin nge awm hrang a, nun hlim tak ka neih leh loh vang?’ tia ngaihtuahin an kawppuite kalsan chu an rilrûk mai thei a ni. Chutiang lam hawia ngaihtuah emaw, ‘ta se,’ tia suangtuah kual vêl emaw ai chuan, Kristiante chuan Pathian kaihhruaina zawnga nunpuiin, an dinhmun tawn mêk chu sâwt taka hman an tum zâwk tûr a ni.

6. Matthaia 19:9-a chhinchhiah Isua thusawi awmzia hrilhfiah rawh.

⁶ Kristian tuemaw chuan inṭhen a tum chuan, Pathian Thu lam aṭangin nupui pasal dang nei tûrin zalênna a nei lo thei a. Isua chuan heti hian a sawi a ni: “Tupawh tlangvâl ngaih vâng ni lova, nupui maa mi dang nei apiang chu, a uirê a ni; mâk hnu nei apiang pawh a uirê a ni,” tiin. (Mt. 19:9) Heta ‘ngai’ tihah hian uirêna leh mipat hmeichhiatna lama sualna dangte pawh a tel a. Inngaihna vâng ni lova inṭhen tumte tân chuan ṭawngṭaina nêna ngun taka ngaihtuah a, thil engkim bûk tawn chu a pawimawh hle.

7. Kristian inneihna a hlawhchham chuan a lo hmutute chuan engtin nge an ngaih theih?

⁷ Inneihnaa hlawhchhamna chu thlarau lama chak loh vâng a ni thei a. Tirhkoh Paula chuan: “Miin ama in chhûng khawsak mah a rêl fel thiam si loh chuan Pathian Kohhranho engtin nge a enkawl theih ang?” tih zawhna pawimawh tak hi a siam a ni. (1 Tim. 3:5) A nihna takah chuan, nupate chu Kristiana inchhâl ve ve si a, an inneihna a hlawhchham si chuan, a lo hmutute chuan an thu hrilh an nunpui tak tak lo niin an ngai thei a ni.—Rom 2:21-24.

8. Kristian nupain awm hran emaw, inṭhen emaw an tum chuan eng thil dik lo nge awm thei ang?

⁸ Baptisma chang tawh nupate’n Bible ṭanchhan ṭha awm si lo va awm hran emaw, inṭhen emaw an tum a nih chuan, an nunah thlarau lama dik lohna engemaw tak a awm a ni tih a chiang hle a. A pakhat zâwk emaw, an pahnih emawin Bible thu bulte an nunpui loh vâng a ni thei ang. An ‘thinlung zawng zawnga LALPA an rin’ chuan, inneihna hlawhtling nei thei lo tûra inhriat chhan tûr an nei lo vang.—Thufingte 3:5, 6 chhiar rawh.

9. Engtin nge inneihnaa Kristian ṭhenkhatte dawhthei taka ṭan lâkna chu malsâwm a nih?

⁹ Hlawhtling lo tûr anga lang inneihna tam tak chu a hnuah a hlawhtling hle thei a. Inneihnaa harsatna an tâwk chung pawha tlâwm mai lo Kristiante chuan a lâwmman chu an dawng fo ṭhîn. Sakhaw thuhmun vawn lohna in chhûnga thilthleng thei hi han ngaihtuah teh. Tirhkoh Petera chuan heti hian a ziak a ni: “Nangni nupuite u, mahni pasalte thu thuin awm rawh u; chutichuan an zînga tupawhin thu chu âwih lo mah sela, thu lovin an nupuite chêtziaa hnehin an awm thei ang, ṭih dêk chunga in chêtze thianghlim enin,” tiin. (1 Pet. 3:1, 2) Ni e, a kawppui chêtze mawi avângin, ring lotu zâwk chuan thutak a pawm mial mai thei asin! Chutianga humhim inneihna chuan Pathian a chawimawi a, pasal, nupui, leh fa an neih chuan an fate tân malsâwmna nasa tak a ni thei a ni.

10, 11. Nupa inkârah beisei loh takin eng buaina nge a chhuah theih a, mahse Kristian chuan eng nge a hriat reng ang?

¹⁰ Jehova tihlâwm an duh avângin, Kristian tam tak chuan baptisma chang tawh ngei nupui pasala neih chu an thlang a. Chuti chung pawhin, beisei loh zâwng takin thil a thleng thei tho a ni. Entîr nân, thleng khât viau mah se, kawppui tuemaw zâwk chuan rilru lam buaina nasa tak a nei mai thei a. A nih loh leh, an inneih hnu lamah kawppui chu rawngbâwlnaa tel tawh lo thuchhuahtu a lo ni mai thei bawk. Entîrna lo târ lang ta ila: Kristian ṭhahnemngai tak leh nu inpumpêk tak Linda-ia chuan a pasal baptisma chang tawhin inchhîrna nei lêk lova Bible duh loh zâwng kawng a zawh avânga hnawhchhuah a ni ta chu a ngaihna a hre lo hle a. Chutiang thil avânga an inneihna siam ṭhat theih loh khawpa a chhiat chuan Kristianin eng nge a tih ang?

¹¹ ‘Eng thil pawh lo thleng se, kan inneihna siam ṭhat tumin ka bei ṭâng ṭâng reng mai dâwn em ni ang?’ tiin i ngaihtuah mai thei. Chu mi chungchângah chuan tuman thu tlûkna an siamsak tûr che a ni lo. Mahse, nupa inlaichînna ṭha lo chu siam ṭhat tuma bei hrâm hrâm tûrin chhan ṭha tak a awm a. Pathian hriatna, a nih loh leh Pathian lama chhia leh ṭha hriatna avânga an nupa inkâra harsatna awmte tuar ṭâng ṭâng Pathian ngaihsaktute chu A tân an hlu hle a ni. (1 Petera 2:19, 20 chhiar rawh.) Jehova chuan an inkâra boruak ṭha lo a awm chung pawha theihtâwp chhuahtu nupate chu a Thu leh a thlarau hmangin a ṭanpui ang.

ṬANPUI TURIN AN INPEIH RENG

12. Upate hnêna ṭanpuina kan dîl chuan, anni chuan engtin nge min thlîr ang?

¹² Nupa inkâra harsatna in neih chuan, Kristian puitlingte hnênah thlarau lama ṭanpuina dîl hreh suh ang che u. Upate chu berâm vêngtu ang an ni a, Pathian thâwk khum Bible-a chuang fuihna thute chu lâwm takin an kawhhmuh ang che u. (Tirh. 20:28; Jak. 5:14, 15) Upate hnêna thlarau lam ṭanpuina in dîl a, in nupa inkâra buainate in hrilh avângin an zah loh phah tûrah ngai suh ang che u. Pathian tihlâwm in duh tak zet tih an hmuh avângin an ngaisâng zâwk mah dâwn che u a ni.

13. Eng fuihna thu nge 1 Korinth 7:10-16-ah kan hmuh?

¹³ Sakhaw thuhmun vuan lo chhûngkuaa awm Kristiante’n ṭanpuina an dîl hian upate chuan Paula fuihna thu ang chite chu an kawhhmuh ṭhîn: “Innei sate hnênah chuan thu ka pe (keima pêk erawh chu ni lovin, Lalpa pêk a ni zâwk): nupui chuan a pasal ṭhen suh se; a ṭhen vêk chuanin pasal nei tawh lovin awm law law rawh se, a nih loh leh a pasal nên vêk innei leh rawh se; tin, pasal chuan a nupui ma suh se. . . . Aw nupui, i pasal i chhandam dâwn leh dâwn loh engtin nge i hriat ni? Aw pasal, i nupui i chhandam dâwn leh dâwn loh engtin nge i hriat ni?” tih hi. (1 Kor. 7:10-16) Ring lo mi kawppuite biakna dika hruai luh theih chu malsâwmna a va ni êm!

14, 15. Engtikah nge Kristian chuan a kawppui ṭhen chu a ngaihtuah theih a, mahse, engvângin nge chu mi chungchâng chu ṭawngṭaina nêna ngun taka kan ngaihtuah a pawimawh?

¹⁴ Eng dinhmun hnuaiah nge Kristian nupui chuan a pasal a “ṭhen,” a nih loh leh a kalsan theih? Ṭhenkhat chuan an kawppuite’n chhûngkua an enkawl duh tlat loh avângin awm hran an thlang a. Mi dangte chuan kut an tawrh nasat vâng emaw, an thlarau lam tâna a hlauhawm vâng emawin awm hran mai chu an thlang bawk.

¹⁵ Awm hran leh hran loh chu mi mal duhthlanna a ni a. Mahse, baptisma chang zâwk chuan awm hran chungchâng chu ṭawngṭaina nên ngun takin a ngaihtuah tûr a ni. Entîr nân, a thlarau lam tâna a hlauhawm chhan chu ring lotu a kawppui vâng liau liau nge ni a, amah zâwkin Bible zir te, inkhâwm te, leh rawngbâwl te a ngaihthah?

16. Engin nge Kristiante chu inṭhenna chungchânga thu tlûkna siam hmanhmawh lo tûrin vêng ang?

¹⁶ Pathian nêna kan inlaichînna leh a thilpêk inneihna kan ngaihhlutna chuan inṭhen chungchânga thu tlûkna siam hmanhmawh lo tûrin min vêng tûr a ni a. Jehova chhiahhlawh kan nih angin, a hming tihthianghlimna lam chu kan ngai pawimawh tûr a ni. Chuvângin, mi dang neih tum rûk avânga kan kawppuite ṭhen chu kan tum ngai lo vang.—Jer. 17:9; Mal. 2:13-16.

17. Eng dinhmun hnuaiah nge Pathian chuan Kristian nupate chu inrem taka awm tûrin a ko kan tih theih?

¹⁷ Ring lotu kawppuia nei Kristian chuan innei nghet reng tûrin theihtâwp a chhuah tûr a ni a. Mahse, Kristian chuan theihtâwp a chhuah chung pawha ring lotu a kawppuiin inneih zêl a duh loh chuan inthiam lohna tûr a nei lo. Paula chuan: “A ring lo zâwk chuan ṭhen sela, ṭhen mai rawh se, chutiangah zawng unaupa emaw, farnu emaw hrên an ni tawh lo ve; Pathian erawh chuan inrem taka awm tûrin min ko a ni,” tiin a ziak a ni.—1 Kor. 7:15.b

JEHOVA NGHAK RAWH

18. Inṭhen lo thei lo dinhmunah kan ding a nih pawhin, inṭhen lo tûra theihtâwp kan chhuahna chuan eng rah ṭha nge a chhuah theih?

¹⁸ Nupa inkâra harsatna engpawh i tâwk a nih chuan, huaisenna nei tûrin Jehova ṭanpuina dîl la, amah chu nghâk zêl ang che. (Sâm 27:14 chhiar rawh.) Atîra kan sawi tâk Linda-i kha han ngaihtuah leh ta ila. Ani chuan an nupa inkâra harsatna chu siam ṭhat tumin kum tam tak chhûng ṭan la mah se, a tâwpah chuan an inṭhen ta tho tho va. Ani chuan a hun khawhral mai maiah a inngai em? “Ngai lo ve, theihtâwp ka chhuahna chuan a lo hmutute hnênah thu ṭha takin a hriattîr a. Chhia leh ṭha hriatna thiang tak ka nei bawk a. Chu aia pawimawh zâwk chu, khâng hun chhûnga ka thiltihte khân kan fanu chu thutaka ding nghet tûra ṭanpuiin, Jehova Thuhretu inpumpêk leh ṭhahnemngai tak pakhat a lo ni chho hi a ni,” tiin a sawi.

19. Inṭhen lo tûra theihtâwp chhuahna chuan eng nge a rah chhuah theih?

¹⁹ Kristian hmeichhe pakhat Marilyn-i chu Pathian ring tlat chunga inṭhen lo tûra theihtâwp a chhuahna avângin a lâwm hle a. Heti hian a sawi a ni: “Sum leh pai lama min ṭanpui loh avâng leh ka thlarau lam tâna a hlauhawm avângin ka pasal laka awm hran mai chu ka duh a. Mahse, ka pasal chu sumdâwnna âtthlâk taka a inrawlh hma chuan kohhran upa a ni a. A hnuah chuan inkhâwm a ṭhulh ṭan ta a, kan inbe pawh ngai ta lo ringawt mai a ni. Mi firfiakte’n kan khawpui an rawn beihna chuan min tihhlauh êm avângin ka inkulh hrang ta tlat a. Chutah keipawhin dik lohna ka nei tih ka inhre chhuak a. Kan inbe ṭan leh ta a, chhûngkuaa Bible zirna pawh kan ṭan lehin, inkhâwmnaah pawh kan tel leh ta a ni. Upate chu an ngilneiin an ṭangkai hle a. Kan nupa inkâr pawh a ṭha thar leh a ni. A hnuah chuan, ka pasal pawhin kohhranah mawhphurhna a nei leh thei ta a. Hei hi rah chhuah ṭha tak nei tawn hrehawm tak si a ni,” tiin.

20, 21. Inneihna chungchângah eng nge tih kan tum tlat ang?

²⁰ Nupui pasal kan nei emaw, nei lo emaw pawh ni se, Jehova nghâk reng chungin huaisen taka thil i ti reng ṭhîn ang u. Inneihnaah harsatna kan tâwk a nih chuan, nupaa insiam tawhte chu “pahnih an ni tawh lo va, tisa pum khat an ni tawh zâwk” tih hre rengin, chûng harsatnate chingfel tûrin theihtâwp kan chhuah tûr a ni. (Mt. 19:6) Chu bâkah, sakhaw thuhmun vuan lo chhûngkuaa harsatna tâwk chung pawha ṭan kan lâk hrâm hrâm chuan, kan kawppuite’n biakna dik an rawn zawm avânga hlimna chu kan tawng hlauh thei tih i hre reng bawk ang u.

²¹ Eng dinhmun hnuaiah pawh ding mah ila, kohhran pâwna mite hnêna thu hrilhna ṭha tak a nih theih nân fîmkhur taka awm chu i tum tlat ang u. Kan inneihna a derthâwng a nih chuan, tih tak zeta ṭawngṭaiin, kan rilru put hmang dik tak enfiah ila, ngun taka Pathian Lehkha Thu bih chiangin, thlarau lama upate ṭanpuina i dîl ang u. Chu bâkah, thil engkima Pathian Jehova tihlâwm tum tlatin, a thilpêk ropui tak inneihna kan ngaihhlutzia i lantîr ang u. (w12-E 05/15)

[Footnote-te]

[Phêk 16-naa thu lâk chhuah]

An inkâra boruak ṭha lo a awm chung pawha tlâwm mai lo nupate chuan lâwmman ṭha tak an hmu fo ṭhîn

[Phêk 18-naa thu lâk chhuah]

Jehova nghâk reng la, huaisenna neih nân a lam hawi rawh

[Phêk 15-naa milem]

Jehova chuan nupa inkâra boruak ṭha lo siam ṭhat tum hrâm hrâmtu Kristiante chu mal a sâwm ṭhîn

[Phêk 17-naa milem]

Kristian kohhran chu thlamuanna leh thlarau lama ṭanpuina hnâr a ni thei