Bible-a Chhinchhiah Thilmak Tihte Chu I Ring Thei Em?
TUEMAWIN chanchin maksak tak hrilh ta che se la, i rin dâwn leh dâwn loh chu a hrilhtu che a rin tlâk leh tlâk lovah a innghat dâwn lâwm ni? Chutiang rin tlâknaah chuan thu sawituin a sawi dân phung mai bâkah, thudik sawi kawnga hming a lo chher tawh dân pawh a tel a ni. Ani chuan kum tam tak chhûng thu dik hlîr a hrilh che a, dâwt a hrilh luih ngai miah loh che chuan tûna a thu hrilh che pawh chu ring tûrin chhan ṭha tak i nei a ni.
Bible-a chhinchhiah thilmak tihte pawh chutiang bawk chu a ni a. Kan zînga tumah hi chûng thilmak tihte a thlen lai hmu phâk kan awm lo. Mahse, Bible thute chu a rin tlâkin, thutak a pai tih kan fiah thei a ni. Engtin nge? Bible-a chhinchhiah thilmak tihte rin tlâkna belhchhahtu thil ṭhenkhat a awm e.
Thilmak tih tam tak chu vântlâng hmaa tih a ni. A châng chuan thilmak tih hmutute chu mi maktaduai têl an nih loh pawhin, a sâng têl an ni a. (Exodus 14:21-31; 19:16-19) Mipui hmuh theih loh va, a rûka tih a ni lo.
Thilmak tihte chu pângngai taka tih a ni. Hmanraw bîk emaw, mit la tûra intheh kual emaw, mi bum nâna thil êng vêl emaw a awm lo. A tam zâwkah chuan Bible-a chhinchhiah thilmak tihte chu ruahman lâwkna pawh a awm lo va, mite ngenna chhân lêt nâna tih a ni. (Marka 5:25-29; Luka 7:11-16) Chutiang hunah chuan thilmak titu tân a thiltih tûrte chu ruahman lâwk theih a ni lo.
Thilmak titute thiltum chu mahni hmingthan nân, ropui nân, leh hausak nân a ni lo. Chu ai mahin, Pathian ropui nâna ti an ni. (Johana 11:1-4, 15, 40) Chutiang thilmak tih theihna aṭanga hausak tuma beihna rêng rêng chu thiam loh chantîr a ni ṭhîn.—2 Lalte 5:15, 16, 20, 25-27; Tirhkohte 8:18-23.
Bible-a chhinchhiah thilmak tih chi hrang hrangte chuan mihringte thiltih mai a nih theih lohzia a târ lang. Entîr nân, tuipui leh thlipui te chu hauh reh a ni a, tuite pawh uain-ah chantîr a ni bawk a, khuate a khêngin, ruahte sûrtîr a ni bawk a, damlote tihdam an niin, pian tirh ata mitdelte mit pawh tihvârsak a ni bawk. Chûng thilmak tih zawng zawngte leh a dang tam takte chuan chûngte phênah chuan thil zawng zawng thunun theitu, mihringte thiltihtheihna aia chungnung zâwk a awm tih a târ lang a ni.—1 Lalte 17:1-7; 18:41-45; Matthaia 8:24-27; Luka 17:11-19; Johana 2:1-11; 9:1-7.
Thilmak tihte hmutu dodâltute chuan chûng thilte chu a thleng tih an pha lo. Isua’n a ṭhian Lazara a kaihthawh khân, a hmêlma sakhaw hruaitute chuan Lazara a thi tih an pha lo. Engtin nge an phat theih tehrêng ang? Ni lî lai phûm a ni tawh si a. (Johana 11:45-48; 12:9-11) Isua thih hnu kum zabi engemaw zâtah pawh, Judaho lehkhabu Talmud ziaktute chuan Isua’n thilmak tih theihna a neih thu an pawm a. Chûng thiltihtheihnate lo chhuahna chu an sawisêl mai zâwk a ni. Chutiang bawkin, Isua zirtîrte Judaho rorêlna hmaa hruai an nih pawh khân, an zawhna zawh chu, “Thilmak in ti em?” tih hi a ni lo. “Eng thiltihtheihnain nge, tu hmingin nge hêng hi in tih?” tiin an zâwt zâwk a ni.—Tirhkohte 4:1-13.
Chuti a nih chuan, Bible-in thilmak tih chungchâng min hrilhte hi i ring thei em? Tûna kan ngaihtuah tâkte aṭangin, Bible-a chhinchhiah thilmak tihte chu a rin tlâk hle tih a chiang a ni. Hêng Bible thuziakte a rin tlâk chhan dang pawh a la awm a. Entîr nân, Bible-in thilthleng chanchin a sawi rêng rêngin, a thlen hun te, a thlenna hmun te, leh chûng thilthlenga telve mihring hmingte a târ lang ṭhîn. Bible sawisêltute meuh pawhin, Bible-a târ lan hmân laia thilthleng chanchin kimchang takte dikzia chu mak an ti a ni. Bible-a hrilh lâwkna tam takte chu a tê ber thlengin a thleng famkim vek tawh a. Chu bâkah, Bible-ah chuan apui apang leh mi chi tinrêngte hlâwkpui thurâwn pawh a chuang bawk. Mihring inlaichînna chungchângah chuan Bible-a thurâwn chuangte chu a ṭha lawr lak a ni.
Bible i la ring thlap hrih lo a nih chuan, engvângin nge ngun lehzuala endik nân hun i hman loh vang? I hriat chian poh leh i rinna chu a pung lehzual dâwn a ni. (Johana 17:17) Tûn hmaa thilmak tihte chungchâng a sawite pawh a rin tlâk a ni tih i hre thei ang a. Chûng thuziakte i rin hnu chuan, hma lam huna thil lo thleng thuai tûr a sawite pawh i ring thei dâwn a ni. (w12-E 08/01)
[Phêk 5-naa milem]
Isua dodâltute chuan Lazara a thi tih an pha lo