Nun Awmze Nei Tak Chu Neih Theih A Ni Tak Zet Em?

HENG thute hi a va dik tak êm! He khawvêla kan nun hi ‘thawhrimna leh lungngaihnain’ a khat a. Chuvângin, ‘Tûna nun awmze nei tak neih chu thil theih pawh a ni dâwn em ni le?’ tiin i ngaihtuah mai thei a ni.

Entîr nân, Maria-i hi han ngaihtuah teh. Ani chu mi ṭuan ṭha tak a ni ṭhîn a, mahse, tûnah chuan kum 84 mi niin, in pawh amahin a chhuahsan thei tawh lo. A rilru la chak hle mah se, a taksain a tlin tawh lo a ni. Engtin nge chutiang nun chu nun awmze nei tak nia a ngaih theih tehrêng ang?

Nang engtin nge? I nunin awmzia a neih leh neih loh inzawh châng i nei mai thei a. I hnathawh chu tihnawn chhên ngai, hna ninawm leh hahthlâk tak a ni mai thei a ni. I hnathawh emaw i thawhrimna emaw mite’n an hre lovin, an ngaihsak lo pawh a ni thei. I hlawhtling thawkhat a nih pawhin, hma lam hun atân i lungngai pawh a ni thei bawk a. A châng chuan, mal nia inhriatna i nei emaw, rilru beidawnna i nei emaw pawh a ni mai thei bawk. In chhûngkaw nun chu inrem lohna leh innghirnghona hlîrin a khat pawh a ni thei a. I hmangaih tak chu thihna avângin i chân pawh a ni thei a ni. André-a tia koh pa pakhat chu a ngainat êm êm a pa chuan vawi leh khata na thutin a boralsan ta mai a. Chu chu André-a tân a râpthlâk hle a, ruak nia a inhriatna chu reh thei ngai tawh lo tûrah a ngai a ni.

Manganna engpawh tâwk mah ila, kan hriat ngai thil eng emaw a awm a ni: Nun awmze nei tak chu neih theih a ni tak zet em? tih hi. A chhânna chu kum 2,000 vêl liam taa leia lo kal mi pakhat—Isua Krista—nunah hian kan hmu thei a ni. Ani chuan harsatna tam tak tâwk mah se, nun awmze nei tak a nei a. Chuvângin, a entawn tûr siamte kan zui chuan keini pawhin kan nei ve thei a ni. (w13-E 04/01)