Bible Ṭanchhan Zawhnate Chhânna

Pathian chu eng ang mi nge a nih?

Pathian chu hmuh thei loh thlarau mi a ni a. Vânte lei te, leh thil nung zawng zawngte chu ama siam a ni. Pathian chu tuma siam a ni lo va—bul inṭanna a nei lo. (Sâm 90:2) Pathian chuan amah kan zawn leh a chanchin thu dik kan hriat chu a duh a ni.—Tirhkohte 17:24-27 chhiar rawh.

Pathian hming chu kan hre thei a. A thil siamte ngun taka ngaihtuahna aṭangin a mizia ṭhenkhat kan hre thei bawk. (Rom 1:20) Mahse, Pathian hre chiang tûr chuan, a Thu Bible kan zir a ngai a. Chu chuan A mizia duhawm takte min hriattîr a ni.—Sâm 103:7-10 chhiar rawh.

Engtin nge Pathianin rorêlna dik lo chu a ngaih?

Min Siamtu Jehova chuan rorêlna dik lo chu a hua a. (Deuteronomy 25:16) Ani chuan ama anpuiin mihringte chu a siam a ni. Chuvângin rorêlna dik lo chu an haw deuh vek a. Kan chhehvêla rorêlna dik lo awmte hi Pathian tih a ni lo. Ani chuan mite hnênah zalên taka duh thlan theihna a pe a. Mahse, mi tam takin an zalênna hmang dik lo va, rorêlna dik lo, a nih loh leh thil sual tih nân an hmang chu a pawi hle. Chu chuan Jehova ‘rilru a tina’ a ni.—Genesis 6:5, 6; Deuteronomy 32:4, 5 chhiar rawh.

Jehova chuan rorêlna dik chu a ngaina a, rorêlna dik lo chu a dawh kumkhua lo vang. (Sâm 37:28, 29) Bible chuan Pathianin rorêlna dik lo zawng zawng chu a rawn titâwp thuai dâwn tih min tiam a ni.—2 Petera 3:7-9, 13 chhiar rawh. (w14-E 01/01)