Pathianin A Ngaihsak Che Em?

Davida’n Pathian ngaihsak a beisei chu thil âwm a ni em? Pathianin a ngaihsak che em? Mi tam tak tân chuan Pathian engkimtitheia’n anmahni a ngaihsak tih rin chu thil harsa tak a ni. Engvângin nge?

A chhan pakhatah chuan Pathian chu mihringte aia a sâng zâwk daih vâng a ni. A awmna sâng tak aṭanga enin, hnam zawng zawngte chu “bâlṭîna tui far khat ang lek an ni a, bûknaa thil dip bâng kai ang leka ruat an ni.” (Isaia 40:15) Rinhlelhna nei, tûn laia ziaktu pakhat chuan, “i thiltihte a mi mal taka ngaisak nghâltu Pathian a awm tih rin chu mahni inngaihhlutna tâwp khâwk a ni,” tiin thu tâwp a siam phah hial a ni.

Kawng leh lamah chuan, mi ṭhenkhat chuan an thiltihin Pathian ngaihsakna a phû lo niin an ngai a. Entîr nân, pa valai Jim-a chuan: “Remna leh insûmtheihna nei tûrin ka ṭawngṭai ziah a; mahse, thinur châng ka nei thut thut ṭhîn. A tâwpah chuan, mi sual tak ka nih avângin, Pathianin min ṭanpui thei lo niin thutâwp ka siam ta a ni,” tiin a sawi.

Pathian chuan min hre lo khawpin mihringte hi min hlat lutuk em? A thil siam ṭha famkim lote hi engtin nge a ngaih? Pathian chuan a chanchin min hrilh lo se chuan, tumahin Pathian tân thu an sawi thei lo vang a, chûng zawhna pawh chu an chhâng thei lo vang. Mahse, Pathian chuan mihringte hnênah a thâwk khum thuchah—Bible—a pe a, chu chuan mite ngaihsakna nei lo leh hla taka awm Pathian a ni lo tih min tiam a ni. Bible chuan Pathianin “min hlat lo ṭheuh si a,” tiin a sawi. (Tirhkohte 17:27) A dawta thuziak pali-ah chuan, Pathianin min ngaihsak ṭheuh tih a sawi leh nangmah ang mite chunga a ngaihsakna a lo târ lan dân kan ngaihtuah ang. (w14-E 08/01)