Bible Ṭanchhan Zawhnate Chhanna
Engvângin nge Pathian Ram lo thleng tûra kan ṭawngṭai?
Pathian Ram chungchâng leh chu miin a rawn tih tûrte hriat belh i duh ang em?
Pathian Ram chu vân sawrkâr a ni a. Chu chuan leiah hian felna leh remna a awmtîr dâwn avângin Isua’n a hnungzuitute chu dîl tûrin a hrilh a ni. Mihring sawrkâr a enga mah hian tharum thawhna te, rorêl dik lohna te, a nih loh leh natna te hi a tireh vek thei lo. Pathian Ram erawh chuan a tireh thei a, a tireh ngei dâwn a ni. Pathian chuan a Lalrama Lal ni tûrin a Fapa Isua chu a thlang tawh a. A Lalrama Isua rorêlpui tûrin Isua hnungzuitute zînga pâwl khat chu a thlang tawh bawk a ni.—Luka 11:2; 22:28-30 chhiar rawh.
Pathian Ram chuan Pathian rorêlna dodâltu zawng zawngte chu a tibo thuai dâwn a. Chuvângin, Pathian Ram lo thleng tûra ṭawngṭai chu Pathian sawrkârin mihring sawrkâr zawng zawng thlâk vek tûra ngenna a ni.—Daniela 7:13, 14; Thu Puan 11:15, 18 chhiar rawh.
Engvângin nge Pathian Ramin mite chungah hlâwkna a thlen ang?
Isua chu mi khawngaih thei tak a nih avângin, Lal atâna duhthusâm a ni a. Pathian Fapa a nih avângin, ṭanpui tûra Pathian autu zawng zawngte ṭanpui tûrin thiltihtheihna a nei bawk.—Sâm 72:8, 12-14 chhiar rawh.
Pathian Ram lo thleng tûra tih tak zeta dîltute leh Pathian duhzâwng mila nungte tân Pathian Ram chuan hlâwkna nasa tak a thlen ang. Pathian Ram chungchânga Bible zirtîrna zir chu i inchhîr ngai hauh lo vang.—Luka 18:16, 17; Johana 4:23 chhiar rawh. (w14-E 10/01)