Engtik Khân Nge Pathian Ramin Ro A Rêl Ṭan?​—Ṭhen 2-na

NEBUKADNEZZARA MUMANG—TAWI TEA ENNAWNNA

Cameron-a: Kan inhmu leh thei chu a lâwmawm hle mai Jon. Bible kan zir dunna hi nuam ka ti thei khawp mai.a I lo ṭha maw?

Jon-a: Ka ṭha e.

Cameron-a: A lâwmawm hle mai. Ka lo kal hmasak ber ṭum khân, Jehova Thuhretute’n kum 1914-ah Pathian Ramin ro a rêl ṭan nia kan sawi chhante kan sawi dûn a.b Chumi finfiahna pakhat chu Bible-a Daniela bu, bung 4-naa hrilh lâwknaah kan hmu a. Chutah chuan engtin nge a inziah i la hria em?

Jon-a: Lal Nebukadnezzara’n a mumanga thingkûng lian tak a hmuh chungchâng a nih kha.

Cameron-a: Ni e, a dik lutuk. Nebukadnezzara chuan a mumangah vân tawng khawpa sâng thingkûng lian tak a hmu a. A hnuah, Pathian thupêk puang chhuaktuin thing chu kih a nih tûr thu leh leia a bul bâwr zuah a nih tûr thu a sawi chu a hria a. “Hun sarih” a liam hnuah thing chu a ṭhang leh ang.c Chu hrilhlâwknain thlenfamkimna pahnih a neih thu kan sawi bawk a. A thlenfamkimna hmasa zâwk kha i la hria em?

Jon-a: Amah, Nebukadnezzara chunga thilthlengah khân a ni em? Kum sarih chhûng a hriatna a hloh.

Cameron-a: A dik chiah. Nebukadnezzara’n hun eng emawti chhûng a hriatna a hloh avângin, a rorêlna chu tihkhaihlak a ni a. Mahse, a thlenfamkimna lian zâwk chu hun sarih chhûng Pathian rorêlna tihkhaihlak a ni tûr hi a ni. Kan hriat tawh ang khân, hun sarih chu B.C.E. 607-a Jerusalem tihchhiat a nih khân a inṭan a. Chuta ṭang chuan leiah hian Pathian mite chunga rorêltu tûr Pathian Jehova aiawhtu lal an awm tawh lo. Mahse, hun sarih a ral hun chuan, Pathian a mite chunga rorêltu tûr Rorêltu thar chu vânah a ruat ang. Thu danga sawi chuan, hun sarih tâwpna chu Pathian vân lam Lalramin ro a rêl ṭan tih chhinchhiahna a ni ang. Tûnah chuan, hun sarih inṭanna chungchâng kan sawi dûn tawh a. Chu chuan engtia rei nge a awh tih kan hriat chian chuan, Pathian Ramin ro a rêl ṭan hun chu kan hre thei ang. Khami thleng kha chu i hre thiam tiraw?

Jon-a: Aw, kan ennawnna hian hriatthiam lehzual tûrin min ṭanpui khawp mai.

Cameron-a: Ṭha lutuk. A nih chuan, hun sarih rei zâwng chu lo bih chiang ta ila. Hemi chungchâng hi a pawimawh laite ka inharitnawntîr theih nân ka lo chhiar zo deuh chiah a. Ka thiam ang tâwka hrilhfiah ka’n tum ang nge aw.

Jon-a: Awle.

HUN SARIH A TAWP—NI HNUHNUNG A INṬAN

Cameron-a: Nebukanedzzara chunga hrilh lâwkna thlen famkimna hmasa zâwkah kha chuan, hun sarih hian kum sarih a entîr a. Mahse, Pathian Ram nêna inkûngkaiha a thlenfamkimna tûrah hi chuan, hun sarih hi kum sarih aia a lêt tam taka rei a nih a ngai a ni.

Jon-a: Engvângin nge?

Cameron-a: Pakhatah chuan, hun sarih chu B.C.E. 607-a Jerusalem tihchhiat a nih khân a inṭan tih hre reng la. Chumi hun aṭanga kan chhiara a kum sarihna chu B.C.E. 600-na a ni a. Mahse, chumi kum chuan Pathian rorêlna nêna inkûngkaihin thilthleng chhinchhiah tlâk eng mah a awm lo. Chu bâkah, kan sawi tawh ang khân, kum zabi tam tak hnua leia Isua a lo kal khân, ani chuan hun sarih chu a la tâwp loh thu a sawi a ni.

Jon-a: Aw, ni tak e. Ka hre chhuak leh chiah.

Cameron-a: Chuvângin, hunsarih hian kum sarih tak tak ni lovin, hun rei tak chhûng a awh a ngai a ni.

Jon-a: Engtia rei nge?

Cameron-a: Bible-a Daniela bu nêna inzawmna nghet tak nei Thu Puan bu chuan hun sarih rei zâwng dik tak chu hre thei tûrin min ṭanpui a ni. Chutah chuan, hun thum leh a chanve rei zâwng chu ni 1,260 a nih thu târ lan a ni a.d Chuti a nih chuan, hun sarih—ni thum leh a chanve lêt hnih rei zâwng—chu ni 2,520 tihna a ni. I la hre thiam zêl tiraw?

Jon-a: Aw, ka hre thiam e. Mahse, hei hian kum 1914-ah Pathian Ramin ro a rêl tih a târ lan dân ka va hre lo ve.

Cameron-a: Awle, kan thlunzawm theih dân lo en ta ila. A châng chuan, Bible hrilh lâwknaa ni khat hian kum khat a entîr ṭhîn a.e Ni khat aiah kum khat kan hmang a nih chuan, hun sarih rei zâwng chu kum 2,520 chiah a lo ni ang. Tichuan, B.C.E. 607 aṭanga chhiar ṭana kum 2,520-na chu kum 1914-na chiah hi a lo ni ta a ni.f Chuvângin, kum 1914 hi hun sarih tâwpna, Isua’n Pathiam Rama Lal nia ro a rêl ṭanna tiin kan sawi thei a ni. Chu bâkah, Bible-in ni hnuhnûnga thilthleng tûr a sawi lâwk ang ngeiin, kum 1914 aṭangin khawvêlah hian thilthleng lian tham tak takte a thleng a ni.

Jon-a: Eng ang thilthlengte nge?

Cameron-a: Matthaia 24:7-a chhinchhiah Isua thusawite hi han ngaihtuah teh. Vâna ro a rêl ṭan hun tûr chu ngaihtuahin Isua chuan: “Hnam hrang leh hnam hrang an indo vang a, ram hrang leh ram hrang an indo vang a; hmun hrang hrangah ṭâm te a tla ang a, lîr te a nghîng ang,” tiin a sawi a ni. Isua chuan chutih hunah chuan ṭâm tlâk leh lîrnghîngte a thlen tûr thu a sawi lâwk tih lo chhinchhiah la. Kum za liam taahte khân khawvêlah hian chûng thilte chu vawi tam tak a thleng tih kan hmu rêng a ni lâwm ni?

Jon-a: A dik khawp mai.

Cameron-a: He Bible chângah vêk hian, Isua chuan Pathian Rama Lal a nih hun chuan indona a thlen tûr thu a sawi lâwk bawk a. Chu bâkah, Bible-a Thu Puan bu chuan, chu indona chu tual chhûng indona mai ni lovin, hun hnuhnûng chhûnga thleng tûr khawvêl pum huap indona a nih tûr thu a sawi lâwk bawk a ni.g Khawvêl indopui pakhatna chhuah kum kha i la hria em?

Jon-a: Kum 1914-ah, Isua rorêl ṭan kum nia i sawi nên a inmil chiah a nih hi! Hetiang hian ka lo thlunzawm ngai miah lo.

Cameron-a: Hetianga kan han thlunzawm hian—hun sarih chungchânga hrilh lâwkna mai bâkah, tâwpna hun chungchânga hrilh lâwkna pawh ni se—awmzia a nei lehzual a. Jehova Thuhretute chuan kum 1914 aṭang khân Isua’n Pathian Rama Lal niin ro a rêl ṭan tih leh chumi kum vêk chuan ni hnuhnûng a inṭan tih kan ring nghet tlat a ni.h

Jon-a: Hêng zawng zawng fel fai taka hre thiam tûr chuan hun ka la mamawh deuh ka ring.

Cameron-a: I hriatthiamawm lutuk. Ka sawi tawh ang khân, kei pawhin hre thiam vek tûrin hun eng emaw chen ka mamawh alâwm. Chutihrualin, kan sawi dunna aṭang khân, Bible-ah hian Pathian Ramin ro a rêl ṭan hun chu kum 1914 hi a ni, tia chiang taka târ lanna awm lo mah se, Jehova Thuhetute chuan Bible chângte ṭanchhanin kum 1914 ngei hi a ni tih kan rin nachhan ka sawite kha i hriatthiam ngei ka beisei.

Jon-a: Ni e, i thusawi apiang Bible châng i ṭanchhan zêl thei hi mak ka ti thei lutuk. Nangma ngaih dân i sawi ngai lo bawk a. Mahse, ka rilrua lo awm chu, engvângin nge hemi chungchâng hi awlsam taka kan hriatthiam theih mai loh? Engvângin nge Pathianin kum 1914-ah Isua’n vânah ro a rêl ṭan dâwn, tia Bible-a a târ lan mai loh?

Cameron-a: Chu chu zawhna ṭha tak a ni. Dik tak chuan, Bible-ah hian kim chang taka târ lan loh thil tam tak a awm asin. A ni leh, engvângin nge Bible-a thu ṭhenkhat hi theih tâwp chhuaha kan chhût ngun hnu chauhva hriatthiam theih tûr zâwnga Pathianin a ziah? Chumi chungchâng chu ka lo kal leh hunah kan sawi dûn leh dâwn nia.

Jon-a: A ṭha ngawt ang.