A KAWM THU | ENGVANGIN NGE KAN RINAWM ANG?
Rinawmna Hi A Hmân Lai Tawh Em?
Hitoshi-a chuan Japan ram office pakhatah sum enkawlna hna a thawk a. A pu nêna sum dinhmun an chinfel lai chuan dik lo taka siam rem tûra beisei a nih thu hrilh a ni a. Hitoshi-a chuan a chhia leh ṭha hriatnain rinawm lo taka thiltih a phal loh thu a hrilh a. Chuvângin, a pu chuan a hna aṭanga bânah a vau va, a tâwpah a hna a chân ta ngei a ni.
A hnu thla tam tak chhûng chuan, Hitoshi-a chu a hna zawnna kawngah a beidawng ta hle a. Entîr nân, hna dîla interview-naah chuan, rinawm lo taka thil a tih theih dâwn loh thute a sawi tel a. A zâwttu chuan: “I ngaihtuah dân chu a danglam hle mai!” a ti a ni. Hitoshi-a chhûngte leh a ṭhiante chuan a rinawmna chu vawng reng tûrin an fuih a; mahse, rinhlelhna a nei ṭan ta a. Entîr nân, “Ka rinna avânga rinawmna vawn chu a ṭha ber ang em?” tiin a ngaihtuah ṭan a ni.
Hitoshi-a thiltawn chu mi zawng zawngin rinawmna an hlut vek lo tih thudik hriat nuam lo tak min hriattîrtu a ni a. Mi ṭhenkhat phei chuan, a bîk takin sumdâwnnaah, rinawm loh chu tihmâkmawhah an ngai hial a ni. South Africa rama hna thawk nu pakhat chuan: “Mi rinawm lote hual vêlin ka awm a, a châng chuan anmahni anga awm tûra nêksâwrna chu a nasa hle,” tiin a sawi.
Tûn laia hluar tak rinawm lohna chi khat chu dâwt sawi hi a ni a. Kum engemaw zât kal taah khân, the University of Massachusetts Amherst-a rilru lam zirmi Robert S. Feldman-a zirna neih chuan puitling zaa 60 chuan minute sâwm chhûng inbiakna an neih hian, a lo berah pawh vawi khat tal dâwt an sawi tel tih a hmu chhuak a. Feldman-a chuan: “Chu chu a mak hle. Dâwt sawi hian chuti taka kan nî tin nun a chaihpiah hneh kan beisei lo,” tiin a sawi. Mi tam tak chuan mi bum nih an duh loh hle laia dâwt an sawi deuh vek si hi a inkalh hle a ni lâwm ni?
Engvângin nge tûn laiah dâwt sawi te, thil rûk te, leh rinawm lohna thiltih dangte chu a hluar êm êm? Engtin nge rinawm lohna chuan mihring zawng zawngte chu a nghawng? Engtin nge chûng rinawm lohna thiltih chu kan pumpelh theih? (wp16.01-E)