Chhûngkuate Ṭanpuitu
1. Engtin nge chawlhkâr tina Sabbath serh chu Israel chhûngkuate’n an hlâwkpui?
1 Sabbath serh chu chhûngkuate hlâwkpui Jehova ruahmanna duhawm tak a ni a. Israelte chuan an hnathawh ṭhin ata châwlh hahdamna hun leh Jehova ṭhatna leh amah nêna an inlaichînna ngaihtuahna hun an neih phah a ni. Nu leh pate pawhin chu hun remchâng chu an fate thinlunga Dân thupêk tuh nân an hmang ṭangkai thei bawk. (Deut. 6:6, 7) Sabbath chuan Jehova mite chu an thlarau lam ngaihsakna hun chawlhkâr tin a pe a ni.
2. Sabbath chuan Jehova chungchâng eng nge min zirtîr?
2 Jehova chuan chhûngkuaa Sabbath serh chu min phût tawh lo. Amaherawhchu, chu dân thupêk chuan a chungchâng engemaw tak min zirtîr a ni. A mite thlarau lama an ṭhatna tûr a ngaihven hle reng a ni, tih chu. (Is. 48:17, 18) Tûn laia Pathian Jehova’n min ngaihsakna a lantîr dân kawng khat chu Chhûngkuaa Pathian Biakna neih zân hmangin a ni.
3. Chhûngkuaa Pathian Biakna neih zânin a tum chu eng nge ni?
3 Chhûngkuaa Pathian Biakna Neih Zânin A Tum Chu Eng Nge Ni? Kum 2009 January thla aṭangin, Kohhrana Lehkhabu Zirna Inkhâwm chu Theocratic Rawngbâwlna School leh Rawngbâwlna Inkhâwm neih zâna neih ṭan a lo ni a. Chutiang inthlâkthlengna kan neih chhan pakhat chu chhûngkuate’n chawlhkâr khata tlai khat tal chhûngkuaa Pathian biak nâna hmanga an thlarau lam mamawh an ngaihsak theih nân a ni. Chhûngkua zawng zawngte chu a theih phawt chuan tûn hmaa lehkhabu zirna kan neih ṭhin zân chu an chhûngkaw zirna atâna hmang tawh tûr leh chu mi hun chu hmanhmawh lo taka Bible thute sawiho nân leh an chhûngkaw mamawh ang zêla zirna atâna hmang tûra fuih an ni.
4. Chhûngkuate chuan an inkawmna chu dârkâr khat chhûng chauh an hmang tûr a ni em? Hrilhfiah rawh.
4 Kohhrana Lehkhabu Zirna Inkhâwma tel tûr chuan insiam nân, va kal nân, leh thil dangte atân hun kan pêk a ngai a. Kan zînga mi tam tak chuan he dârkâr khat awh inkhâwma tel tûrin hun tam tak kan sêng ṭhîn a ni. Kan inkhâwm dân siam danglam a nih tâk hnu chuan, chu mi zân chu chhûngkuaa Jehova biak nân kan hmang thei ta. Chuvângin, Chhûngkuaa Pathian Biakna neih zân chu dârkâr khat chhûnga zawh tum kher a ngai lo. Kan chhûngkaw mamawh leh tlin tâwk chu hre rengin, chu mi zân chu kan hmang zâwk tûr a ni.
5. Hun zawng zawng chu Pathian Thu sawiho nâna hman vek kher tûr a ni em? Hrilhfiah rawh.
5 Thu Sawiho Nâna Hman Zawh Vek Tûr A Ni Em? Nupa rek leh fa nei chhûngkuate’n Pathian Thute an sawiho hian, an intichak tawn ṭhîn a. (Rom 1:12) Chhûngkuate chu an inhnaih sawt bawk ṭhîn. Chuvângin, Pathian Thu sawihona chu Chhûngkuaa Pathian Biakna neih zâna kan thil dah pawimawh ber tûr chu a ni. Amaherawhchu, chhûngkuaa mi tinte chuan mahnia zirna neih nân hun an hmang thei bawk ang. Entîr nân, Pathian Thu sawihona neih hnuah, kal sawn chuang si lovin chhûngkaw zînga mi tinte chuan inkhâwm atâna inbuatsaih nân emaw, magazine chhiar nân emaw hun an hmang ṭheuh thei ang. Chhûngkaw ṭhenkhat chuan chu mi zânah TV en miah loh an tum bawk.
6. Sawihona chu eng anga kaihhruai tûr nge ni?
6 Sawihona Chu Eng Anga Kaihhruai Tûr Nge Ni? Sawihona a nih avângin zawhna leh chhânna a nih reng kher a ngai lo. Chhûngkuaa Pathian Biakna neih zân chu nung tak leh tuiawm tak nihtîr tûr chuan chhûngkaw tam tak chuan chawlhkâr chhûnga kan kohhran inkhâwm dân zûlzuiin an nei a. An thu sawiho tûr chu ṭhen tam taka ṭhen hrangin, kawng tam takin an kaihruai a ni. Entîr nân, Bible an chhiarho vang a, inkhâwm atâna a engemaw ber inbuatsaihin, rawngbâwlnaa thusawi dân tûr tihchhinna an nei thei ang. Phêk 6-naah he mi chungchânga rawtna ṭhenkhat târ lan a ni.
7. Nu leh pate chuan eng ang boruak nge siam an tum ang?
7 Nu leh Pate’n Eng Ang Boruak Nge Siam An Tum Ang? In chhûngkaw zînga mite chuan hmangaihna boruak hahdamthlâk tak hnuaiah thil an zir ṭha thei ber ang. Nî khua a ṭhat chuan zirna chu pâwn lama neih châng in nei thei ang. A ṭûl huna chawlh ṭhin chu hreh tûr a ni lo. Chhûngkaw ṭhenkhat chuan hun an hman hnuah ei leh in tûr vêl an chhawp bawk ṭhîn. Nu leh pate’n Chhûngkuaa Pathian Biakna neih zân chu fate hauh nân leh thunun nân an hmang tûr a ni lo; chutih rual chuan chhûngkuaa harsatna engemaw bîk takte sawi nân hun ṭhenkhat an hman a ngaih châng pawh a awm thei ang. Amaherawhchu, mi mal harsatna engemaw takte chu naupangte an unaute hmaa zak taka an awm loh nân hun danga a hranga sawipui chu a ṭha ber zâwk ang. Chhûngkuaa Pathian Biakna neih zân chu ninawm leh urhsûn lutuk a ni tûr a ni lo va, kan biak Pathian hlim mizia a târ lang zâwk tûr a ni.—1 Tim. 1:11, NW.
8, 9. Chhûngkaw lûte tân eng ang inbuatsaihna nge neih ngai?
8 Engtin Nge Chhûngkaw Lû Chu A Inbuatsaih Theih? Chhûngkaw lû berin Chhûngkuaa Pathian Biakna neih huna an sawiho tûr leh an sawiho dân tûr a inbuatsaih lâwk chuan, chhûngkua chuan a hlâwkpui tak zet ang. (Thuf. 21:5) He mi chungchângah hian pasal chuan a nupui a berâwn tûr a ni. (Thuf. 15:22) Chhûngkaw lûte u, engvângin nge a châng chuan in fate pawh in râwn chhin ve loh vang? Chutianga in râwn chuan an ngaihven zâwng leh an ngaih pawimawhte chu in hre thei ang.
9 Chawlhkâr tin atâna inbuatsaih nân chhûngkaw lû chuan hun tam tak a hman a ngai lo vang. I chhûngte chuan chawlhkâr tina thiltih a engemaw ber tih ziah chu nuam an ti ngei ang a; chhûngkaw lû tân chawlhkâr tina tih dân thar hman a ngai hran lo vang. Ani chuan a chhûngkaw thlarau lam mamawh a rilrua a thar lai, Chhûngkuaa Pathian Biakna neih zawh hlim apianga a lehpek atâna inbuatsaih chu hlâwk thlâk a ti hle mai thei. Chhûngkaw lû ṭhenkhat chuan an sawiho tûr chu tâwi têa ziak chhuakin awlsam taka an hmuh theihna tûr fridge-ahte an târ ṭhîn. Hei hian chhûngkuaah phûrna leh nghahhlelhna a siam bâkah, a ṭûl anga inbuatsaih theihna hun a pe bawk a ni.
10. Mahni chauhva awmte chuan Chhûngkuaa Pathian Biakna neih zân chu engtin nge an hman theih?
10 Mahni Chauhva Awm Ka Nih Chuan Engtin Nge Ni Ang? Chutiang mite chuan Chhûngkuaa Pathian Biakna neih zân chu mahnia zirna atân an hmang thei ang. Mahnia inzirnaah chuan Bible chhiar te, inkhâwm atâna inbuatsaih te, leh Vênnainsâng leh Awake! magazine chhiar te a tel tûr a ni. Thuchhuahtu ṭhenkhat chuan subject engemaw tak zir bing nân an hmang bawk. A châng chuan, thuchhuahtu dang emaw, chhûngkaw dang emaw chu Pathian Thu sawihona nei tûrin a sâwm thei bawk ang.
11, 12. Chhûngkuaa Pathian Biakna neih zân mumal taka hman a hlâwkna ṭhenkhat chu engte nge ni?
11 Chhûngkuaa Pathian Biakna Neih Zân Hman Ziah Hlâwkna Chu Engte Nge Ni? Biakna dika inhmang tak zettute chuan Pathian Jehova an hnaih lehzual ṭhîn. Chu bâkah, chhûngkuaa Pathian be ṭhînte chuan an chhûngkaw inzawmna an tinghet ṭhîn bawk. Nupa tuak khat chuan malsâwmna an dawnte chungchângah heti hian an ziak a ni: “Pioneer thawk fa nei lo nupa ni mah ila Chhûngkuaa Pathian Biakna neih zân chu kan nghâkhlel thei hle a. Inhnaih zual sauh leh kan Pa vâna mi hnaih zual sauh nia inhriatna kan nei a ni. Zirna neih nî tûr zînga kan thawh hian: ‘Zânin chu eng tih zân nge? Chhûngkuaa Pathian Biakna neih zân a nih hi!’ tiin phûr takin kan inhrilh ṭhîn,” tiin.
12 Chhûngkuaa Pathian biak nâna zan khat ruahmanna neih chuan chhûngkaw buai thei takte pawh a ṭanpui a ni. Regular pioneer thawh paha pasal ṭanpuina tel lova a fate pahnih enkawltu nu pakhat chuan: “Tûn hma chuan chhûngkuaa zirna kan nei ṭha thei lo. Ka chauh theih êm avângin neih loh châng pawh kan nei ṭhîn a. Mumal taka tih theih dân tûr ka hre lo. Chuvângin, Chhûngkuaa Pathian Biakna neih zân ruahmanna avânga lâwmthu hrilh tûrin he lehkha hi ka ziak a ni. Chhûngkuaa zirna hun chu mumal takin kan nei thei a, a hlâwkna pawh kan têl mêk a ni,” tiin a ziak a ni.
13. I chhûngkuain he ruahmanna a hlâwkpui dân tûr chu engin nge hril?
13 Sabbath ruahmanna ang bawkin, Chhûngkuaa Pathian Biakna neih zân pawh hi chhûngkuate ṭanpuitu kan Pa vâna mi thilpêk pakhat a ni. (Jak. 1:17) Israel chhûngkuate’n Sabbath an hman dân chuan an hlâwkpui dân tûr chu nasa takin a hril a. Chutiang bawkin, chhûngkuaa Pathian biak nâna hun kan neih kan hman dân chuan chhûngkuaa kan hlâwkpui dân tûr chu a hril bawk. (2 Kor. 9:6; Gal. 6:7, 8; Kol. 3:23, 24) He ruahmanna ṭha taka i hman ṭangkai chuan, i chhûngkua chuan fakna hla phuahtu hla thu: “Kei atân erawh zawng Pathian hnaih hi a ṭha a ni: Lalpa PATHIAN chu ka inhumhimnaah ka hmang a, i hnathawh zawng zawng thu chu ka hrilh theih nân,” tih chu an ṭâwmpui thei ang.—Sâm 73:28.
[Phêk 5-naa thu lâk chhuah]
Chhûngkuaa Pathian Biakna neih zân chu ninawm leh urhsûn lutuk a ni tûr a ni lo va, kan biak Pathian hlim mizia a târ lang zâwk tûr a ni
[Phêk 6-naa bâwm]
KAWL ṬHA RAWH
Chhûngkuaa Pathian Biakna Neih Dân Tûr Rawtna Ṭhenkhat
Bible:
• Chawlhkâr tina chhiar tûr Bible chângte zînga ṭhenkhat chu chhiarho rawh u. A thu nên a inrem chuan, mi pakhatin chanchin sawitu chan tûr a chhiar ang a, mi dangte chuan changtu chi hrang hrangte sawi tûr chu an chhiar thei ang.
• Bible chhiar zînga a khawi emaw lai a lemin in chang thei ang.
• Chhiar atâna in ruat Bible bungte chu lo chhiar lâwk a, a chhûng thu aṭanga zawhna pahnih khat vêl siam ṭheuh tûrin mawhphurhna pe rawh. Tichuan, zawhna in siamte chu a mal malin zir bingna in nei thei ang.
• Chawlhkâr tinin Bible châng chuanna card lehkhaden ang deuh siam la, chu Bible châng hriat leh hrilhfiah chu in tum thei ang a. Chutiang card tam tak siamin, chawlhkâr tin in lo chhinchhiah zât in hriat theih nân in ennawn thei ang.
• Bible chhiar ngaihthlâk theih chu Bible keu chungin in ngaihthla thei ang.
Inkhâwmte:
• Inkhâwma thusawi tûr a eng emaw ber chu in inbuatsaih tlâng thei ang.
• Chawlhkâr leha sak tûr Lalram hlate in lo zir lâwk thei ang.
• Theocratic Rawngbâwlna School emaw, Rawngbâwlna Inkhâwm emawah chanvo nei in awm chuan a sawi dân tûr in sawiho thei ang a, a nih loh pawhin chhûngkaw hmaah tihchhinna in nei thei ang.
Chhûngkaw Mamawhte:
• Lehkhabu Young People Ask emaw, Learn From the Great Teacher emaw aṭanga thute in sawiho thei ang.
• School-a harsatna chhuak theite tihven dân tûr chungchângah tihchhinna in nei thei ang.
• Naupangte leh nu leh pate chanvo inthlâk thlenga tihchhinna in nei thei ang a. Naupangte chuan thu pakhat chungchângah zir bingna an nei ang a, chu chu an nu leh pate an sawipui thei ang.
Rawngbâwlna:
• Inrinni leh Chawlhni-a hman theih tûr thusawi dân inbuatsaih leh tihchhinna in nei thei ang.
• Hriatrengna hun emaw, school chawlh chhûng emawa rawngbâwlna zauh nâna chhûngkua anga in tih tumte in sawiho thei ang.
• Chhûngkuaa mi tinte chu rawngbâwlnaa mite zawh mai theih zawhnate chhân dân tûr zir bingna neihtîr hnuah tihchhinna in neihpui thei ang.
Rawtna Dangte:
• Magazine chhuak thar ber aṭanga thuziak pakhat in chhiar ho thei ang.
• Chhûngkuaa mi tinte chu magazine chhuak thar ber aṭanga an ngaihven tak thuziak pakhat chhiar lâwktîrin, chu thuziak chungchâng chu in sawitîr thei ang.
• Thuchhuahtu pakhat emaw, nupa tuak khat emaw chu a châng chânga in Chhûngkuaa Pathian Biakna neih hunah sâwm tel ula, anmahni biangbiakna pawh in nei thei ang.
• Video kan neih tam takte zînga pakhat enin, in sawiho thei ang.
• Awake! magazine aṭanga “Ṭhalaite Zawhna” tih emaw, “Chhûngkuaa Ennawn Atân” tih emaw thuziakte in sawiho thei ang.
• Vênnainsâng aṭanga “I Fate Chu Zirtîr Rawh” tih emaw, “Naupangte Tân” tih emaw thuziakte in sawiho thei ang.
• Yearbook thar ber emaw, tûn hnai inkhâwmpuia tlâng zarh lehkhabu emaw a ṭhen lai chu chhiarin in sawiho thei ang.
• Inkhâwmpuia in tel hnu chuan, inkhâwmpuia thusawi pawimawh laite in sawiho thei ang.
• Jehova thil siamte zînga a engemaw ber enin, Jehova chanchin min zirtîrte chungchâng in sawiho thei ang.
• Thil lem siam, map ziah, a nih loh leh chart siam ang chi thil engemaw chu in tiho thei ang.