Rawngbâwlnaah Thiamna Tihmasâwn Rawh—Tuina Neite Chhinchhiahin

‘Nangmah leh i zirtîrnaah chuan fîmkhur rawh.’ (1 Tim. 4:16) Tirhkoh Paula’n Timothea hnêna he fuihna a pêk hian mi thar kan ni emaw, thiltawn ngah tawh tak kan ni emaw pawh ni se, hmasâwn tûrin theih tâwp kan chhuah tûr a ni tih a târ lang. Chu mi ti tûra min ṭanpui thei tûrin Kan Lalram Rawngbâwlna-ah hian “Rawngbâwlnaah Thiamna Tihmasâwn Rawh” tih thuziak inzawm chu a lo chhuak ṭhîn dâwn a ni. Thuziak apiangah chuan thiamna pawimawh tak leh chu mi neih chhoh dân chungchânga rawtnate pêk a ni ang. Tûn thla chhûng hian chu thiamna chu ngaihsak zual bîk tûra fuih ṭheuh kan ni a. Thla a tâwp hnu chuan, Rawngbâwlna Inkhâwm chuan chutiang tih kan hlâwkpui dân sawi theihna hun remchâng min pe ang. Tûn thla hian tuina neite chhinchhiah tûra fuih kan ni.

A Pawimawh Chhan: Kan mawhphurhna hlen chhuak tûr chuan thu hrilh mai aia tam kan tih a ngai a. Kan tuh tawh thutak chite chu tuia châwmin, tuina lantîrtute chu kan tlawhkîrin, kan zirtîr tûr a ni. (Mt. 28:19, 20; 1 Kor. 3:6-9) He mi atân hian mi chu kan tlawhkîr a, a thil ngaihven zâwngte sawipui a, kan inbiak hmasakna aṭanga sawi chhoh pui a ngai a. Chuvângin, ngaihventu kan hmuh hunah kan chhinchhiah a ngai a ni.