Lehkha Chhiar Thiam Lutuk Lote Ṭanpui Dân Tûr

1. Lehkha chhiar thiam lutuk lote Bible zirpui an nih hian eng harsatna nge lo chhuak?

¹ Lehkha chhiar thiam lutuk lo in neitute chuan thlarau lam thil an ngaihven mai thei a, mahse, Bible leh lehkhabu dangte chuan zâmna a neihtîr thei a ni. Chutiang mite hnêna Bible Zirtîrna bu pêk—a lo berah pawh atîr lama pêk—chu a sâwt vak lo vang. Engtin nge anni chu thlarau lama kan ṭanpui theih? Ram 20 chuanga thiltawn nei thuchhuahtute chu an tih dân kan zâwt a. A hnuaiah hian an rawtna pêkte târ lan a ni.

2. Lehkha chhiar thiam lutuk lote ṭanpui nân eng hmanruate nge ṭangkai?

² Bible zirlai chu lehkha chhiar thiam lutuk lo emaw, chhiar thiam miah lo emaw a nih chuan, brochure pakhat Pathian Thu Ngaithla Rawh tih emaw, Pathian Thu Ngaithlain Chatuanin Nung Rawh tih emaw hmangin i ṭan thei ang. United State-a awm pioneer pakhat chuan mi chu he brochure pahnihte hmuhtîrin, a duh zâwk a thlantîr ṭhîn a ni. Kenya rama branch office chuan Africa hnam dânah chuan thil an inzirtîr hian zawhna leh chhânna aiin thawnthu anga sawi a ni a, chuvângin hêng brochure pahnihte hi a ṭangkai hle tih a târ lang. Lehkha thiamte chuan chhiara zawhna inzawh chu an pawm nghâl mai theih laiin, mi ṭhenkhat lehkha thiam lutuk lote chuan chutianga zirna neih chu an hreh deuh mai thei. Zirlaiin tlêm azâwng a chhiar ve thei a nih chuan, thuchhuahtu tam takte chuan Pathian Min Pêk Chanchin Ṭha! tih brochure emaw, a nih loh leh Ka Bible Thawnthu Lehkhabu emaw aṭanga ṭan chu an duh ṭhîn a ni.

3. Eng hriatthiamnain nge lehkha chhiar thiam lote zirtîrnaah hlawhtling tûrin min ṭanpui thei?

³ Fak Rawh: Lehkha chhiar thiam lote chu an zak mai thei a, mi tam tak chuan tlâktlai lo nia inhriatna an nei a ni. Anmahni thutak zirtîr thei tûra min ṭanpuitu rahbi pakhatna chu zak lo tûra siam hi a ni ṭhîn. Lehkha chhiar thiam lo mi tam takte chu an rilru a chakin an zir thiam thei a. Chuvângin, zahna lantîr la, zahawm takin cheibâwl ang che. (1 Pet. 3:15) Anni chuan an ṭan lâkna hi a manhla a ni tih an hriat a, thlarau lamah hma an sâwn chuan zir zawm châkna an nei ang. Chuvângin, anni chu fak mawlh mawlh ang che.

4. Engtin nge lehkha chhiar thiam lutuk lote chu zirna atâna inbuatsaih tûrin kan fuih theih?

⁴ Zirlai chuan lehkha chhiar a thiam lutuk lo a nih pawhin, zirna atâna inbuatsaih tûrin fuih ang che. Africa chhim lama thuchhuahtu ṭhenkhat chuan an zirpuite chu an chhûngkhaw zînga mite emaw, lehkha chhiar thiam an ṭhiante emaw hnêna ṭanpuina dîl tûrin an fuih a ni. Britain rama thuchhuahtu pakhat chuan a Bible zirpuite chu a chhânnate rîn a nih hian hmuh a awlsam lehzual a ni tih a zirtîr theih nân rei lo te chhûng chu a lehkhabu a hmantîr ṭhîn a. India rama unaupa pakhat chuan a Bible zirpui chu châwlhkâr leha an zir tûra milemte lo en tûr leh ngun taka lo ngaihtuah tûrin a fuih ṭhîn a ni.

5. Engtin nge Bible zirna kaihhruai laia dawhtheihna kan lantîr theih?

⁵ Dawhtheihna Nei Rawh: Thu leh hla chhuah engpawh hmang mah la, a thu pawimawh zual laite chu thlûr bingin, i zirpui chu ṭha taka hre thiam tûrin ṭanpui ang che. Atîr lamah chuan minute 10 aṭanga 15 vêl sawipui chu a ṭha ber mai thei a ni. Vawi khatah thu tam tak zirpui tum suh la, paragraph hnih thum vêl chauh zirpui zâwk rawh. Lehkha a chhiar muan hle chuan dawhtheihna nei ang che. Pathian Jehova ngaihhlutna a nei chho zêl ang a, lehkha chhiar lama hmasâwn duhna pawh a lo nei chho vang. Zirlaiin Jehova ngaihhlutna nei tûra ṭanpui tûrin, atîr aṭangin inkhâwmnaa tel tûra sâwm chu a ṭha a ni.

6. Engtin nge mite chu lehkha chhiar thiam tûra kan ṭanpui theih?

⁶ Bible zirlaite chuan lehkha an chhiar thiam chuan thlarau lamah hma an sâwn chak lehzual ang. (Sâm 1:1-3) Mi tam tak chuan an zirpuite chu zirna an neih zawh apiangin rei lo te chhûng chu ziak leh chhiar an zirtîr ṭhîn a. An ṭawnga hmuh theih a nih chuan hetiang atâna buatsaih Apply Yourself to Reading and Writing tih lehkhabu chu an hmang ṭangkai a ni. Zirlaiin lunghnualna a neih chuan, a zir thiam tawhte hriatnawntîrin mahni inrintâwkna i neihtîr thei a. Jehova’n a ṭan lâkna chu mal a sâwm ngei ang tih hrilh la, ṭanpuina dîla ṭawngṭai tûrin fuih ang che. (Thuf. 16:3; 1 Joh. 5:14, 15) Britain rama thuchhuahtu ṭhenkhat chuan an zirpuite chu anmahni nêna inâwm tâwka thiltum nei chho zêl tûrin an fuih a—atîr chuan A Aw B thiam nâl tûrin, chutah Bible châng thlan bîkte zawng thiama chhiar thiam tûrin, leh a tâwpah chuan Bible thu leh hla chhuah hriat awlsam tûra siamte chhiar thiam tûrin an fuih a ni. Mite lehkha chhiar thiam tûra ṭanpui chu chhiar dân zirtîr mai a ni lo, chhiar duhna nei tûra chawhthawh hi a ni fo a ni.

7. Engvângin nge lehkha chhiar thiam lutuk lote hnêna thutak hmêlhriattîr chu kan hreh loh vang?

⁷ Jehova chuan lehkha zir sâng lote chu a ngainêp lo. (Job. 34:19) Mi thinlung chu a en zâwk a ni. (1 Chro. 28:9) Chuvângin, lehkha chhiar thiam lutuk lote hnêna thutak hmêlhriattîr chu hreh suh. I zirpui ṭan theihna tûr hmanraw ṭha tak tak i nei si a. A tâwpah chuan, Bible Zirtîrna lehkhabu lamah pakaipuiin, Bible hriatthiamna famkim lehzual chu i pe thei a ni.