I Bible Zirpuite Chu Baptisma Chang Zirtîrte Ni Tûrin Ṭanpui Rawh

1. Kum zabi khatnaa mipui pung khâwm chu eng ti tûra hrilh nge an nih?

RAM hrang hranga mi, ṭawng hrang hrang hmangtu a hmei a pa mi tam tak chu an pung khâwm a. Chumi nî chuan thilmak chhinchhiah tlâk tak a thleng a ni. Juda mi pângngai maite chuan anmahni rawn tlawhtute ṭawngin thu an sawi thei tlat mai! Chu chuan mipui mak tih a hlawh hle a; mahse, an hnêna Juda mite thusawi leh chuta awm zawng zawngte hnêna tirhkoh Petera thusawi chu a chhinchhiah tlâk lehzual a ni. Mipuite chu Isua Krista an rin chuan chhandam an ni thei tih hriattîr an ni a. Chu an thu hriat chuan an thinlung a khawih hle a ni. Chuvângin: “Engtin nge kan tih tâk ang?” tiin an zâwt hial a. Petera chuan: “Baptisma chang ṭheuh rawh u,” tiin a sawi a ni.—Tirh. 2:37, 38.

2. He thuziakah hian eng nge kan sawiho vang? (A kâwma milem en rawh.)

² A dawta thilthleng pawh hi chhinchiah tlâk tak a ni. Chumi nî chuan mi 3,000 vêl chu baptisma changin Krista zirtîrte an rawn ni a. Chu chu Isua’n a hnungzuitute hnêna thawk tûra thu a pêk zirtîr siamna hna ropui tak inṭanna a ni. Chu hna chu kum zabi 21-na thleng hian thawh zawm zêl a la ni a. Tûn laiah, mi chu baptisma chang tûr chuan dârkâr rei lo te chhûnga ṭanpui theih an ni tawh lo. Chutianga baptisma chang thei tûr chuan Bible zirlaiin a thla têl, kum khat emaw, a aia rei emaw pawh a mamawh thei a. Bible zirpui i nei a nih chuan zirtîr siamnaa thawhrim a ngaihzia chu i hre ngei ang. He thuziakah hian baptisma chang thei tûra kan Bible zirpuite kan ṭanpui theih dân sawiho a ni ang.

I BIBLE ZIRPUI CHU A THU ZIRTE NUNPUI TURIN ṬANPUI RAWH

3. Matthaia 28:19, 20-a sawi angin, Bible zirlaiin baptisma chang thei tûr khawpa hma sâwn tûrin eng nge a tih ngai?

³ Bible zirlai chuan baptisma a chan hmain, a thu zirte a nunpui tûr a ni a. (Matthaia 28:19, 20 chhiar rawh.) Zirlaiin a thu zirte a nunpui hian Isua thenkhin thua lungpui chunga in sa tûra thûk taka laitu “mi fing” ang a ni. (Mt. 7:24, 25; Lk. 6:47, 48) Engtin nge Bible zirlai chu a thu zirte nunpui tûra kan ṭanpui theih? Rawtna pathum i lo sawiho vang u.

4. Engtin nge Bible zirlai chu baptisma chang thei tûra zawi zawia hma la tûra kan ṭanpui theih? (“I Bible Zirpui Chu Thiltumte Insiam A, Hlen Thei Tûrin Ṭanpui Rawh,” tih bâwm chu en bawk rawh.)

⁴ I Bible zirpui chu thiltumte insiam tûrin ṭanpui rawh. Engvângin nge chutianga i tih ang? He tehkhin thu hi han ngaithuah teh: Hmun hla takah i zin dâwn a nih chuan, kawng laka hmun nuam leh mawi ṭhenkhatahte chuan chawlh i duh ngei ang. Chutianga i tih chuan, i zin kawng chu i huphurh lo deuh vang. Chutiang bawkin, Bible zirlaiin thiltum tênau zâwkte insiama a hlen zêl chuan, baptisma chan chu a ban phâk loh tûr thiltum niin a thlîr lo vang. I Bible zirpui hmasâwn tûra ṭanpui nân Chatuanin I Hlim Thei! tih lehkhabua “Tih Tum Rawh,” tih bâwm chu hmang ang che. Zirlai pakhat in zawh apiangin, a thu zirte chuan a thiltumte nêna inkûngkaihna a neih dân sawipui rawh. I Bible zirpui tâna thiltum dang i nei a nih chuan, “A Dang,” tih hnuaiah ziakin chhinchhiah la. I Bible zirpui neih thiltum tênau leh lian thamte ennawnpui nân, chûng zirna hmêlhmangte chu hmang ziah ang che.

5. Marka 10:17-22-a sawi angin, Isua’n mi hausa chu eng ti tûrin nge a hrilh a, engvângin nge?

⁵ I Bible zirpui chu a nunah inthlâk danglamna siam tûrin ṭanpui rawh. (Marka 10:17-22 chhiar rawh.) Isua chuan mi hausa tân a thil neih zawng zawng hralh chu a harsa ang tih a hria a. (Mk. 10:23) Chutichung pawhin, mi hausa chu a nunah inthlâk danglamna lian tham siam tûrin a hrilh a ni. Engvângin nge? A hmangaih vâng a ni. A châng chuan, Bible zirlai chu inthlâk danglamna siam tûra la inpeih chiah lova kan ngaih avângin, a thu zirte nunpui tûra fuih chu kan hreh mai thei. Mihring hlui miziate hlîp thlaa, mihring thara inthuam tûr chuan hun a duh ngei ang. (Kol. 3:9, 10) Mahse, chumi chungchâng chu i sawipui hma poh leh zirlai chuan inthlâk danglamna a siam hma lehzual thei ang a. Chutianga i sawipuina chuan amah i ngaihsakzia a lantîr ang.—Sâm 141:5; Thuf. 27:17.

6. Engvângin nge ngaih dân phawrh chhuak thei zawhnate chu kan hman ang?

⁶ Ngaih dân phawrh chhuak thei zawhna chu zirlaiin a thu zira a ngaih dânte a sawi chhuah theih nâna hman a ni ṭhîn a. I Bible zirpuiin a hriatthiam leh thiam loh, a rin leh rin loh hriat nân chutiang zawhna chu hmang ang che. Chutianga i tih fo chuan, a tâna pawm harsa mai thei thute in zir hunah sawipui a awlsam lehzual ang. Chatuanin I Hlim Thei! tih lehkhabuah chuan ngaih dân phawrh chhuak thei zawhna tam tak a chuang a. Entîr nân, zirlai 04-naah chuan: “A hming i lam hunah Jehova chu engtin nge a awma i rin?” tih zawhna a awm a. Zirlai 09-naah chuan: “Eng thilte nge ṭawngṭainaah i telh duh?” tih zawhna a awm bawk a ni. A tîr chuan, i Bible zirpuiin ngaih dân phawrh chhuak thei zawhnate chu chhân harsa a ti mai thei a. Bible châng târ lante leh milemte ṭanchhana chhût dân zirtîrin i ṭanpui thei a ni.

7. Engtin nge a taka thiltawnte chu ṭha taka kan hman theih?

⁷ I Bible zirpuiin a tih tûrte a hriatthiam tawh chuan, chutianga ti tûra amah fuih nân a taka thiltawnte chu hmang ang che. Entîr nân, inkhâwma lo tel a harsat chuan, zirlai 14-naa “Hriat Belh Nân,” tih section-a Jehova’n Min Ngaihsak tih video chu i chhuahsak thei a ni. Chatuanin I Hlim Thei! tih lehkhabua zirlai tam takah chuan, “Zir Belhin Hmuh Belh Rawh,” tih leh “Hriat Belh Nân,” tih section-ahte chuan chutiang thiltawnte chu i hmu thei ang.b I Bible zirpui hnênah, “Ani pawhin a tih theih chuan, nang pawhin i ti thei ang,” tia sawia mi dang nêna khaikhin lo tûrin fîmkhur ang che. Mahniin thu tlûkna siamtîr la. Bible zirtîrnate nunpui tûra video-a lang unaupa emaw, unaunu emaw ṭanpuitu thu pawimawh laite chu hrilh ang che. Bible châng pakhat emaw, a thiltih ṭhat pakhat emaw i sawi chhuak thei a ni. A remchân hun apiangah, Pathian Jehova’n video-a lang unaupa emaw, unaunu emaw a ṭanpui dân chu sawi uar ang che.

8. Engtin nge kan Bible zirpui chu Jehova hmangaih tûra kan ṭanpui theih?

⁸ I Bible zirpui chu Jehova hmangaih tûrin ṭanpui rawh. Engtin nge i ṭanpui ang? Pathian Jehova miziate zir belh tûra i ṭanpui theih nân hun remchângte zawng la. Pathian Jehova chu amah hmangaihtute ṭanpuitu Pathian hlim anga thlîr tûrin ṭanpui ang che. (1 Tim. 1:10, 11; Heb. 11:6) I Bible zirpui hnênah a thu zirte nunpui chu a hlâwkpui ang tih hrilh la, chûng chu Pathian Jehova hmangaihna târ lanna a nihzia hrilhfiah ang che. (Is. 48:17, 18) Jehova a hmangaihna a nasat poh leh a ṭûl anga inthlâk danglamna siam tûra chêttîrin a awm ang.—1 Joh. 5:3.

I BIBLE ZIRPUI CHU KOHHRANA UNAUTE NEN INHMELHRIATTIR RAWH

9. Marka 10:29, 30-na nêna inmilin, mi chu baptisma chang thei tûra thil ṭhenkhat chân ngam tûrin engin nge ṭanpui thei?

⁹ Baptisma chang thei khawpa hma sâwn tûr chuan, Bible zirlai chuan thil chânte a neih a ngai ang. A chunga kan sawi tâk mi hausa angin, zirlai ṭhenkhat chuan sum leh paite an chân a ngai thei a. An hnathawh chu Bible thu bulte nêna inmil lo a nih chuan, hna dang an zawn pawh a ngai thei a ni. Tam tak chuan Pathian Jehova hmangaih lotu an ṭhiante chu an kâwm tawh lo pawh a ni thei a. Mi dangte chu Jehova Thuhretute duh lotu an chhûngte’n an tuithlâr pawh a ni thei bawk. Isua’n mi ṭhenkhat tân chutianga chânna neih chu a harsa thei tih a sawi a. Mahse, a hnungzuitute chu an beidawng lo vang tih a tiam a ni. Anni chu thlarau lam chhûngkaw duhawm tak pea malsâwm an ni ang. (Marka 10:29, 30 chhiar rawh.) Engtin nge kan Bible zirpui chu, chu thilpêk hlu tak dawng tûra kan ṭanpui theih?

10. Unau Manuel-a thiltawn aṭangin eng nge kan zir?

¹⁰ I Bible zirpui chu ṭhianah siam rawh. I Bible zirpui chunga ngaihsakna i lantîr chu a pawimawh hle. Engvângin nge? Mexico rama Unau Manuel-a sawi hi lo chhinchhiah ang che. Bible a zir lai hun chu ngaihtuah lêtin ani chuan: “Bible zirna kan ṭan hmaiin, min zirtîrtu chuan ka dam leh dam loh min zâwt ṭhîn a. Hahdam taka awm tûra min ṭanpui bâkah, thil dang sawina hunte pawh min pe ṭhîn a. Min ngaihsak tak zet tih ka hre thei a ni,” tiin a sawi.

11. Engtin nge kan Bible zirpuite’n hun kan hmanpui chu an hlâwkpui theih?

¹¹ Isua’n a hnungzuitute hun a hmanpui ang bawkin, i Bible zirpui chu hun hmanpui ang che. (Joh. 3:22) A rem chuan, ani chu thingpui in tûr te, chaw ei tûr te, leh thla tin chhuak Broadcasting en tûrtein i ina lêngah sâwm ang che. A chhûngte leh a ṭhiante’n sakhaw dik lo kût nîte an hman laia chutianga lênga i sâwm chuan a lâwm lehzual ngei ang. Uganda rama Unau Kazibwe-a chuan: “Bible kan zirna aṭanga Jehova chanchin ka zir zât chu min zirpuitu nêna kan inkawmna aṭang pawhin ka zir chhuakin ka inhria. Pathian Jehova’n a mite a ngaihsakzia leh a mite hlimzia chu ka hmu a. Chutianga awm chu ka duh ve a ni,” tiin a sawi.

12. Engvângin nge Bible kan zirpuinaah thuchhuahtu dangte kan hruai ang?

¹² I Bible zirpuinaah thuchhuahtu dangte sâwm rawh. A châng chuan, mahni chauhva zirpui emaw, thuchhuahtu ngai ringawt hruai emaw chu awlsam zâwkin kan hre mai thei a. Chutianga tih chu remchâng zâwk thei mah se, a chânga thuchhuahtu dangte hruai ṭhin chu zirlaiin a hlâwkpui ngei ang. Moldova rama awm Unau Dmitrii-a chuan: “Bible ka zirnaa lo tel ve thuchhuahtute chuan kan thu zirte chu thlîr dân dangin min hrilhfiah ṭhîn a. Chu chuan ka thu zirte chu kawng danga nunpui theih dân hre tûrin min ṭanpui a ni. Unau tam tak ka hmêlhriat tawh avângin, ka inkhâwm hmasak ber ṭumah pawh ka zâm lutuk lo,” tiin a sawi.

13. Engvângin nge kan Bible zirpui chu inkhâwma lo tel tûra kan ṭanpui ang?

¹³ I Bible zirpui chu kohhran inkhâwmahte tel tûrin ṭanpui rawh. Engvângin nge? Pathian Jehova chuan amah chibai bûktute chu inhmu khâwm tûrin thu a pe a, chu chu kan biakna pêng pakhat a ni. (Heb. 10:24, 25) Chu bâkah, unaute chu kan thlarau lam chhûngkaw zînga mi an ni a. Inkhâwma kan telho hian chaw tui tak kîlho ang kan ni. I Bible zirpui chu inkhâwma tel tûra i ṭanpui hian, baptisma chang tûra rahbi pawimawh berte zînga pakhat rap tûrin i ṭanpui tihna a ni. Mahse, a tân chuan chutianga hma lâk chu a awlsam lo thei a. A nih chuan, Chatuanin I Hlim Thei! tih lehkhabu chuan engtin nge i Bible zirpui chu a hmachhawn harsatnate hneh tûra a ṭanpui theih?

14. Engtin nge kan Bible zirpui chu inkhâwma lo tel tûra kan ṭanpui theih?

¹⁴ I Bible zirpui inkhâwma lo tel tûra ṭanpui nân, Chatuanin I Hlim Thei! tih lehkhabua zirlai 10-na chu hmang ang che. Chu lehkhabu tlângzarh a nih hmain thiltawn ngah thuchhuahtute chu he zirlai 10-na hi an Bible zirpuite inkhâwma lo tel tûra ṭanpui nâna hmantîr an ni a, an hlawhtling hle a ni. I Bible zirpui chu inkhâwma lo tel tûra sâwm tûrin zirlai 10-na in thlen thleng i nghah kher a ngai lo. A hma thei ang berin sâwm la, sâwm zawm zêl bawk ang che. Bible zirpuite chuan harsatna chi hrang hrang an hmachhawn a. Chuvângin, i Bible zirpui mamawhte chu ngaihven tlat la, ṭanpuina i pêk theih dâwn leh dâwn loh hriat tum ang che. Inkhâwmahte a lo tel nghâl mai lo a nih pawhin, lunghnual suh. A chungah dawhtheihna lantîr la, sâwm zawm zêl ang che.

I BIBLE ZIRPUI CHU A HLAUHNATE HNEH TURIN ṬANPUI RAWH

15. Kan Bible zirpuiin eng hlauhna nge a neih mai theih?

¹⁵ Jehova Thuhretute zînga pakhat ni tûra hlauhna i neih lai kha i la hria em? Rawngbâwlnaa tel thei ngai lo tûrah i inngai pawh a ni thei. A nih loh leh, i chhûngte leh i ṭhiante’n an dodâl che i hlau pawh a ni thei bawk. Chutiang a nih chuan, i Bible zirpui rilru awm dân tûr chu i hriatthiampui ngei ang. Isua chuan mi ṭhenkhatin chutiang hlauhna an nei thei tih a hria a. Mahse, ani chuan a hnungzuitute hnênah an hlauhna chu Jehova rawngbâwl loh phah nâna hmang lo tûrin a fuih a ni. (Mt. 10:16, 17, 27, 28) Engtin nge Isua’n a hnungzuitute chu an hlauhna hneh tûra a ṭanpui? Engtin nge a entawn tûr siam chu kan zui theih?

16. Engtin nge kan Bible zirpui chu mi dangte hnêna a thurinte hrilh tûra kan ṭanpui theih?

¹⁶ I Bible zirpui chu mi dang hnêna a thurinte hrilh tûrin ṭanpui rawh. Isua’n thu hril tûra a zirtîrte a tirh chhuah khân, anni chu an zâm mai thei a. Mahse, an hrilhna tûr hmun leh an thusawi tûrte hrilhin a ṭanpui a ni. (Mt. 10:5-7) Engtin nge Isua kan entawn theih? I Bible zirpui chu thu a hrilh theihna tûr hmun hre tûrin ṭanpui ang che. Entîr nân, Bible thutak zirna hlâwkpuitu tûr tuemaw a hriat leh hriat loh zâwt la. Chumi hnuah, awlsam taka sawi theih dân hrilh la, inbuatsaih tûrin ṭanpui ang che. A rem chuan, Chatuanin I Hlim Thei! tih lehkhabua “Mi Ṭhenkhat Sawi Dân,” tih leh “Mi Ṭhenkhat Zawhna,” tih hmêlhmang chu inbuatsaihpui nân i hmang thei a ni. Chutianga i tih hunah, Bible hmanga chhânna tawi fel tak pe thei tûrin zirtîr ang che.

17. Matthaia 10:19, 20, 29-31-na chu engtin nge Pathian Jehova rinchhan tûra kan Bible zirpuite ṭanpui nâna kan hman theih?

¹⁷ I Bible zirpui chu Jehova rinchhan tûrin ṭanpui rawh. Isua chuan a zirtîrte chu Jehova’n a hmangaih avângin a ṭanpui ang tih a tiam a. (Matthaia 10:19, 20, 29-31 chhiar rawh.) I Bible zirpui hnênah Pathian Jehova chuan ani pawh a ṭanpui ang tih hrilh ang che. In ṭawngṭai dun hunah zirlai thiltumte sawi langin Jehova rinchhan tûrin i ṭanpui thei a ni. Poland rama awm Unau Franciszek-a chuan: “Bible min zirpuitu chuan a ṭawngṭainaah ka thiltumte a sawi lang fo va. Pathian Jehova’n chûng ṭawngṭainate a chhâng tih ka hmuh chuan ka ṭawngṭai ve ta nghâl a. Inkhâwmte leh inkhâwmpuite atâna ka hna thar aṭanga chawlh ka dîlna kawngah Pathian Jehova ṭanpuina dawng niin ka inhria,” tiin a sawi.

18. Engtin nge Pathian Jehova chuan Kristiante thawh zirtîr siam rawngbâwlna chu a ngaih?

¹⁸ Pathian Jehova chuan kan Bible zirpuite chu a ngaihsak tak zet a. Ani chuan amah hnaih lehzual tûra mi dangte ṭanpuina kawnga Kristiante thawhrimna chu a ngaihluin, anni chu a hmangaih a. (Is. 52:7) Tûnah Bible zirpui i la nei rih lo a nih pawhin, a neite chu zuiin, Bible zirlaite chu baptisma chang thei tûr khawpa hmasâwn tûrin i ṭanpui thei tho a ni.