Engvângin Nge Inhuatna A Thlen Leh Ṭhin?

Huatna Chu Eng Nge Ni?

Huatna chu mi dang emaw, pâwl dang emaw duh lohna nasa tak, a nih loh leh hmêlma ang hiala thlîrna a ni a. Chu chu mi dang chunga thinrimna satliah mai a ni lo.

MITE’N HUATNA AN NEIH CHHAN

Mite chuan chhan tam tak avângin huatna an nei ṭan a. Huatna chu mi dangte chunga rilru put hmang a ni a, an thiltih vâng ni kher lovin, anmahni hrim hrim huatna a ni. Chûng mite chu mi sual, mi hlauhawm, leh thlâk danglam theih loh anga ngaiin an haw tawp mai a ni. Anni chu mi hnuaihnung, mi hlauhawm, leh buaina siamtute anga thlîr an ni thei a. Mite huatna tâwktute chuan kutthlâkna te, rorêl dik lohna te, leh thungrulh duhna neihtîrtu thil eng emaw an tuar pawh a ni thei.

HUATNA A DARH ZAU DAN

Mi chuan a hriat ngai miah lohte pawh a haw thei a. Entîr nân, mite chuan an chhûngte leh an ṭhiante’n hnam dang an thlîr dân ang chu an nei tlângpui ṭhîn. Chuvângin, chhûngkuaa mi ṭhenkhatin hnam dang huatna an nei a nih chuan, an chhûngte pawhin chutiang rilru put hmang chu an nei ṭan thei a ni.

Huatna a darh zau chakzia hriatthiamna chuan mi tam takin mite an huat chhan chu min hriatthiamtîr thei a ni. Mahse, kan chênna khawvêl tichhetu inhuatna thleng leh ṭhîn titâwp tûr chuan huatna lo chhuah ṭanna kan hriat a ngai a. Chu chu Bible aṭangin kan hre thei a ni.

BIBLE-IN HUATNA LO CHHUAH ṬANNA A TAR LANG

HUATNA NASA TAK CHU MIHRINGTE AṬANGA INṬAN A NI LO. A hnua Diabol-Setana tia koh vântirhkoh pakhat, Pathian laka a hel khân huatna chu a inṭan a. Diabola chu a hel ṭan ‘tirh ata tualthat a ni.’ ‘Dawthei leh dâwt pa’ a nih angin, ani chuan huatna leh nunrâwnna chu a tipung zêl a. (Johana 8:44; 1 Johana 3:11, 12) Bible chuan ani chu mi chhiatna duhtu, thinur tak, leh nunrâwng tak niin a târ lang a ni.—Joba 2:7; Thu Puan 12:9, 12, 17.

ṬHA FAMKIM LO MIHRINGTE TAN HUATNA NEIH A AWL HLE. Mihring hmasa ber Adama chuan Setana sual kawng zawh chu a zui a. Chuvângin, mi zawng zawng hian sual leh ṭhat famkim lohna kan rochun ta a ni. (Rom 5:12) Adama fapa hmasa ber Kaina chuan a nau Abela chu a huat êm avângin a that a. (1 Johana 3:12) Ni e, mi tam tak chuan hmangaihna leh khawngaihna miziate an lantîr ngei mai. Mahse, sual kan rochun avângin mihring a tam zâwkte chuan huatna rilru min neihtîrtu mahni hmasialna te, îtsîkna te, leh chaponate an lantîr a ni.—2 Timothea 3:1-5.

DAWHTHEIH LOHNA KHAWVELAH INHUATNA A HLUAR HLE. Kan chênna khawvêlah hian lainatna neih lohna te, rilru put hmang ṭha lo te, leh nungchang ṭhat lohnate a hluar êm avângin inhuatna pawh a pung zêl a. ‘Khawvêl pumhlûm hi mi sual [Diabol-Setana] thu thua a awm’ avângin dawhtheih lohna te, inpâwng huatna te, insawichhiatna te, tihduhdahna te, leh mite thil neih tihchhiat duhnatein a khat a ni.—1 Johana 5:19.

Mahse, Bible chuan inhuatna lo chhuah ṭana mai ni lovin, a chinfel theih dân pawh a târ lang a ni.