‘Jehova Zawngtute Chuan Thil Ṭha Rêng Rêng An Tlachham Lo Vang’

1. Davida chuan eng dinhmun khirh tak nge a hmachhawn?

DAVIDA chu a nun atân a tlân chhia a. Israel lal thiltithei tak Saula’n tihhlum a tum a ni. Davida’n ei tûrte a mamawh chuan Nob khuaah a châwl a, chutah chuan inngaitlâwm takin chhang hlâwm nga a dîl a. (1 Sam. 21:1, 3) A hnuah, a mite nên bihrûkna tûr pûk an zawng hmu a ni. (1 Sam. 22:1) Engtin nge Davida chuan chutiang dinhmun chu a tawh?

2. Engtin nge Saula chu dinhmun hlauhhawma a indah? (1 Samuela 23:16, 17)

² Saula chuan Davida chu a hmingthanna leh indonaa a hlawhtlinnate avângin âtthlâk takin a thîk a. Chu bâkah, a thuâwih lohna avângin Jehova’n Israel lal atân a hnâwl tih leh Davida chu lalṭhutthlênga ṭhu tûrin a thlang tih pawh a hre bawk. (1 Samuela 23:16, 17 chhiar rawh.) Chuti chung pawhin, Israel lal Saula chuan sipai tam tak leh thlâwptu tam tak a neih avângin, Davida chu a nunna atâna a tlân chhiat a ngai a ni. Saula chuan Pathian chu Davida lala siam lo tûrin a dan theih a ring tak tak em? (Is. 55:11) Bible-in chumi chungchâng eng mah sawi lo mah se, thil pakhat erawh kan hre thei a ni: Saula chu dinhmun hlauhawmah a indah mai a ni tih chu. Pathian dodâltute chu an hlawhtling ngai si lo va!

3. Davida chu dinhmun harsa tak tâwk mah se, engtin nge a awm?

³ Davida chu mi inngaitlâwm tak a ni a. Israel lal nih chu a tum lo. Jehova’n chu chanvo chelh tûrin a thlang zâwk a ni. (1 Sam. 16:1, 12, 13) Chuvângin, Saula chuan Davida chu a haw ta êm êm mai a. Mahse, Davida chuan dinhmun hlauhawma a awm avângin Jehova chu a mawhpuh lo va; ei tûr tlêm tê chauh a neih avâng leh pûka a bihrûk a ngaih avângin a phunnawi hek lo. Chu aiin, pûka a bihrûk lai chuan, kan thuziak ṭanchhan Bible châng: ‘Jehova zawngtute chuan thil ṭha rêng rêng an tlachham lo vang,’ tih thu pawh telin, fakna hla mawi tak takte a phuah a ni.—Sâm 34:10.

4. Eng zawhnate nge kan ngaihtuah ang a, engvângin nge chûng zawhnate chu a pawimawh?

⁴ Tûn laiah, Jehova chhiahhlawhte zînga tam tak chu ei leh bâr harsatnate bâkah, nuna mamawh bulpui dangte tlachhamin an awm a.b Hei hi tûn hnaia hripui a lên aṭang khân a dik lehzual a ni. “Hrehawm nasa tak” a thlen dâwn ṭêpah, dinhmunte chu a harsa lehzual ang tih kan beisei thei a ni. (Mt. 24:21) Chûngte chu rilru-ah dahin, hêng zawhna pali hi i lo chhâng ang u: Eng kawngin nge Davida chuan ‘thil ṭha rêng rêng a tlâkchham loh?’ Engvângin nge lungawi dân kan zir ang? Engvângin nge Jehova’n min ngaihsak ang tih kan rin tlat theih? Engtin nge nakin hun atân tûn aṭanga kan lo inbuatsaih theih? tihte hi.

“KA TLACHHAM LO VANG”

5-6. Engtin nge Sâm 23:1-6-nain Pathian chhiahhlawhte’n “thil ṭha rêng rêng an tlachham lo vang” tia Davida thusawi awmzia hre thiam tûra min ṭanpui?

⁵ Davida chuan Jehova chhiahhlawhte’n “thil ṭha rêng rêng an tlachham lo vang” a tih khân, eng a tihna nge ni? Sâm 23-naa kan hmuh thute ngaihtuahna hmangin a awmzia kan hre thei a. (Sâm 23:1-6 chhiar rawh.) Davida chuan chu fakna hla chu heti hian a ṭan a ni: “LALPA chu mi vêngtu a ni a; ka tlachham lo vang,” tiin. Chu fakna hlaa châng dangahte chuan, Davida’n hlutna tluantling nei thilte—Jehova chu Berâm Vêngtu anga a pawm avânga thlarau lam malsâwmna hnianghnâr tak a dawnte—chu a târ lang a. Jehova chuan ani chu “felna kawngahte” a hruai ṭhîn a, hun nuamah leh hrehawmahte pawh rinawm takin a ṭanpui ṭhîn a ni. Davida chuan Jehova’n “hlobet hring dup hmunahte” hruai ṭhîn mah se, a nunah buainate a pumpelh vek dâwn lo tih a hria a. “Thihna hlim kawr ruam zawh” ang maia lunghnual chângte a nei theiin, hmêlmate pawh a nei thei a ni. Mahse, Jehova chu a Berâm Vêngtu a nih avângin, ani chuan “thil ṭha lo rêng rêng” a hlau lo vang.

⁶ Chuvângin, kan zawhna: Eng kawngin nge Davida chuan ‘thil ṭha rêng rêng a tlâkchham loh?’ tih chhânna chu kan hmu ta. Ani chuan Jehova hnaih tlat tûrin a mamawh engkim a nei a ni. A hlimna chu tisa lam thila innghat a ni lo. Chu aiin, Jehova’n a pêk thilahte chuan lungawina a nei a. A tâna pawimawh ber chu Pathian malsâwmna leh a humhimna a ni.

7. Luka 21:20-24-a sawi angin, kum zabi khatnaa Judai rama awm Kristiante’n eng dinhmun khirh tak nge an hmachhawn?

⁷ Davida thusawi aṭangin, tisa lam thilte chunga thlîr dân dik kan neih a pawimawhzia kan hmu thei a. Kan thil neih eng pawh chu kan hlimpui thei a; mahse, chûngte chu kan nuna thil pawimawh ber a ni tûr a ni lo. Chu chu kum zabi khatnaa Judai rama awm Kristiante hriatthiam ngai thu dik pawimawh tak a ni. (Luka 21:20-24 chhiar rawh.) Isua chuan Jerusalem khua chu ‘sipaihote huala’ a awm hun a lo thleng dâwn tih a vaukhân a. Chutianga a lo thlen hun chuan, ‘tlângahte an tlân bo’ a ngai ang. Chutianga tlân chhuah chu an tân chhandamna a ni ang a; mahse, thil tam tak an chân a ngai ang. Kum eng emaw zât kal ta khân, Vênnainsâng chuan heti hian a sawi a ni: “An lo leh ramte an kalsan a, an ina an thil neih tak ngial pawh an khâwm lo a ni. Jehova vênhimna leh ṭanpuinaah rinna nghatin, amah biakna chu thil dang pawimawh taka langte ai pawhin an dah hmasa a ni,” tiin.

8. Kum zabi khatnaa Judai rama awm Kristiante chunga thilthleng aṭangin eng zir tûr pawimawh tak nge kan neih?

⁸ Kum zabi khatnaa Judai rama awm Kristiante chunga thilthleng aṭangin eng zir tûr pawimawh tak nge kan neih? A chunga kan sawi tâk Vênnainsâng chuan: “Sum leh pai bungraw thilte kan thlîr dân chungchângah fiahna pawh a lo awm mai thei a; chûng chu thil pawimawh ber an ni em? A nih loh leh, Pathian aṭanga chhandamna kan za atâna lo kal tûr hi a pawimawh zâwk em? Ni e, kan tlânchhiatna chuan harsatna leh mangannate pawh a huam tel mai thei a. Eng thil pawh a ṭûl a nih chuan, kan anpui kum zabi pakhatna a mi Juda aṭanga . . . tlânte tih ang khân ti tûrin kan inpeih ang,” tiin a sawi.c

9. Engtin nge Hebrai Kristiante hnêna tirhkoh Paula fuihna aṭanga chakna i hmuh?

⁹ Chûng Kristiante tâna an neih zawng zawng deuhthaw kalsan a, a tîr aṭanga bul ṭan ṭhat leh a harsat dân tûr chu i mitthla thei em? An mamawh zualpuite atâna Jehova rinchhan tûrin rinna an neih a ngai a ni. Mahse, anni chu ṭanpuina dawng lovin an awm lo. Rom sipaite’n Jerusalem an hual hma kum ngaah, tirhkoh Paula chuan Hebrai Kristiante hnênah hetiang hian fuihna pawimawh tak ṭhenkhat a pe a ni: “In rilru putzia chu tangka ngainatna tel lo ni rawh se; in thil neih chhun chungahte chuan lungawi rawh u; amah ngeiin, ‘Engtikah mah ka thlahthlam tawp lo vang chia, kal pawh ka kalsan tawp lo vang che,’ a ti si a. Chutichuan, huai takin, ‘Lalpa chu mi ṭanpuitu a ni, ka hlau lo vang; mihringin eng nge mi tih theih ang?’ kan ti ṭhîn a ni,” tiin. (Heb. 13:5, 6) Rom sipaite’n an rawn hual hmaa Paula fuihna ngai pawimawhtute tân chuan an in thara samkhai taka nung tûra insiamrem chu a awlsam ngei ang. Jehova’n an mamawh zualpuite chu a pe ang tih an ring tlat a. Paula thute chuan, keini pawh, chutiang rinna nei tûrin min ṭanpui thei a ni.

“CHUNGAH CHUAN KAN LUNGAWI ANG”

10. Eng “thurûk” nge Paula’n min hrilh?

¹⁰ Paula chuan chutiang fuihna chu Timothea hnênah chauh ni lovin, keimahni hnênah pawh min pe a ni. Heti hian a ziak a ni: “Nimahsela, ei tûr leh silh tûr neiin chûngah chuan kan lungawi ang,” tiin. (1 Tim. 6:8) A nih leh, chaw tui tak ei te, awmna hmun nuam tak neih te, leh a chânga thawmhnaw thar leite chu a khap tihna a ni em? Chu chu Paula sawi tum a ni lo. Tisa lama kan thil neihahte chuan kan lungawi tûr a ni a tihna zâwk a ni. (Phil. 4:12) Chu chu Paula “thurûk” a ni. Kan thil neih hlu ber chu tisa lama kan thil neihte ni lovin, Pathian nêna kan inlaichînna hi a ni.—Hab. 3:17, 18.

11. Lungawina chungchângah Israel mite hnêna Mosia thusawi aṭangin nge nge kan zir theih?

¹¹ Kan mamawhte chungchânga kan thlîr dân leh Jehova thlîr dânte chu a inang lo mai thei a. Thlalêra kum 40 chhûng an awm hnua Israel mite hnêna Mosia thusawi hi han ngaihtuah teh: “LALPA in Pathian chuan in thawh apiangahte mal a sâwm ṭhîn che u a, he thlalêr zau tak hi in kal tlang dânte chu a hre si a; hêng kum sawmli chhûng zawng hian LALPA chu in hnênah a awm a, eng mah in tlâkchham loh kha,” tih hi. (Deut. 2:7) Chûng kum 40 chhûng chuan, Jehova’n Israel mite chu manna pein a châwm a. Aigupta an chhuahsan laia an hâk an thawmhnawte pawh a chhe lo. (Deut. 8:3, 4) Mi ṭhenkhat chuan chûng Pathian ṭanpuinate chu tlêm tham lutuk angin ngai thei mah se, Mosia chuan Israel mite chu an mamawh engkim an nei tih a hriatnawntîr a. Jehova min pêk thilte chu tlêm tê pawh ni se, chûngte chu a malsâwmna anga thlîra lâwmna leh ngaihhlutna kan lantîr chuan, ani chu a lâwm hle ngei ang.

JEHOVA’N A NGAIHSAK ANG CHE TIH RING TLAT RAWH

12. Davida’n mahni ni lovin, Jehova a rinchhan tlat tih engin nge târ lang?

¹² Davida chuan Jehova’n amah hmangaihtute chunga rinawmna a lantîr bâkah, anni chu a ngaihsak tak zet tih a hria a. Sâm 34-na a ziah laiin, a nun chu dinhmun hlauhawmah awm mah se, ani chuan rinna mitin “LALPA vântirhkoh chuan a awm chilh” tlat tih a hmu a ni. (Sâm 34:7) Ani chuan Jehova vântirhkoh chu indona hmuna hmêlmate laka harhvâng taka awm rengtu sipai nên a khaikhin pawh a ni thei. Amah ngei pawh sipai huaisen chak tak a niin, Jehova’n lalṭhutthlênga ṭhu tûrin tiam mah se, Davida chuan hmêlma hneh tûrin a lung vawm thiamna emaw, a ngûnhnâm hman thiamna emaw chu a rinchhan lo. (1 Sam. 16:13; 24:12) Chu aiin, Pathianah rinna a nghat a, Jehova vântirhkohvin ‘Amah ṭihtute chu a chhanhim’ ang tih a ring tlat a ni. Ni e, tûn laiah chuan, mak danglam taka humhimna dawn kan inbeisei lo. Mahse, Jehova chunga rinna nghattu chuan a chhiat hlenna tûr thil eng mah a hmachhawn lo vang tih erawh kan hria a ni.

13. Magoga rama Goga’n min beih hunah, engvângin nge humhimtu nei lo anga kan lan ang a; mahse, engvângin nge kan hlauh loh vang? (A kâwma milem en rawh.)

¹³ Nakin lawkah, Jehova’n min humhim thei tih kan rinna chu fiahin a awm ang. Magoga rama Goga, hnam insuih khâwmin Pathian mite a beih hun chuan, kan nun chu dinhmun hlauhawma awm angin a lang ang. Jehova chuan min chhanhim theiin, min chhanhim ngei ang tih kan rin tlat a ngai ang. Chûng hnam insuih khâwm tân chuan chhanhimtu nei lo berâm ang maiin humhimtu nei lo angin kan lang ang. (Ezek. 38:10-12) Râlthuam kan keng lo vang a, indo dân pawh kan zir hek lo vang. Hnamte chuan beih awlsam tak angin min hmu ang a. Rinna mita kan hmuh—Pathian mite humhim tûra inpeihsa vântirhkoh tam tak min hual vêltute—chu an hmu ve lo vang. Engtin nge hnamte chuan an hmuh theih tehlul ang? Anni chuan Pathian chungah rinna an nei si lo. Vân lam sipaite’n min rawn ṭanpui hun chuan mak an va ti dâwn tak êm!—Thup. 19:11, 14, 15.

NAKIN HUN ATAN TUNAH INBUATSAIH RAWH

14. Nakin hun atâna inbuatsaih tûrin tûn aṭangin eng hma lâknate nge kan neih theih?

¹⁴ Nakin hun atâna inbuatsaih tûrin tûnah eng nge kan tih theih? A hmasa berah chuan, tisa lama kan thil neihte chu kan kalsan hun a la awm dâwn tih hriain, chûng tisa lam thilte chungchângah thlîr dân dik tak kan neih a ngai a. Kan thil neiha lungawina neih leh Jehova nêna kan inlaichînna chu kan hlimna ber kan nihtîr a ngai bawk. Kan Pathian kan hriat chian poh leh Magoga rama Goga’n min beih hunah Pathianin min humhim thei tih kan rinna chu a nghet lehzual ang.

15. Tûn hmaa eng thiltawnte’n nge Davida chu Jehova’n a tilunghnual ngai lo vang tih ring tlat tûra ṭanpui?

¹⁵ Fiahnate atâna inbuatsaih tûra Davida anga min ṭanpui theitu thil dang pawh hi han ngaihtuah teh. Davida chuan: “LALPA ṭhatzia chu tem chhin teh rêng u; Amaha rinna nghat mi chu a eng a thâwl e,” tiin a sawi. (Sâm 34:8) Chûng thute chuan Davida’n Jehova ṭanpuina a rinchhan thei tih a hriat chhan hre thiam tûrin min ṭanpui a. Ani chuan Jehova chu a rinchhan fo avângin, tihlunghnualin a awm ngai lo. A tleirâwl laiin, Philistia mi, mi hrawl tak Goliatha a hmachhawn a, chu hmêlma ṭihbaiawm tak hnênah chuan: “Vawiinah hian LALPAN nang hi ka kutah min pe dâwn a ni,” tiin a hrilh a. (1 Sam. 17:46) A hnuah, Davida chu vawi tam tak amah thah tumtu lal Saula inah rawngbâwlin a awm a. Mahse, Davida “hnênah LALPA a awm” tlat a ni. (1 Sam. 18:12) Ani chuan tûn hmaa Jehova ṭanpuina a lo dawn tawh avângin, tûna fiahna a tawh chhûng pawh hian a ṭanpui ang tih a hria a ni.

16. Eng kawngin nge Jehova ṭhatzia chu kan “tem chhin” theih?

¹⁶ Tûn aṭanga Jehova kan inkaihhruaitîr nasat poh leh nakin hunah pawh min chhanhim thei tih kan rinna chu a nghet lehzual ang. Bial inkhâwmpuiahte leh Regional inkhâwmpuiahte kan tel theih nâna kan hnathawhna pute hnêna chawlh lâk dîl tûr te, chawlhkâr chhûng inkhâwma tel kim thei tûr te, leh rawngbâwlnaa tam lehzuala kan tel theih nâna kan hnathawh dân hun duante siamrem tûrtein rinna leh Jehova rinchhan duhna kan neih a ngai a ni. Kan hnathawhna pu chuan kan dîlna chu hnâwlin, hna kan chân angah han inchan teh. Jehova’n min kalsanin min thlahthlam ngai lo vang tih leh kan mamawh zualpuite chu min pe reng ang tih rinna kan nei em? (Heb. 13:5) Hunbi kima rawngbâwl unau tam tak chuan Jehova chu an mamawh hun taka ṭanpuitu a nihzia târ langtu thiltawnte an nei a. Jehova chu a rinawm a ni.

17. Kum 2022 atâna kum châng chu eng nge ni a, engvângin nge inâwm tak a nih?

¹⁷ Kan lamah Jehova a ṭan phawt chuan, nakin hun atâna kan hlauh a ngai lo. Kan Pathian chuan kan nuna a Lalram kan dah hmasak chhûng chuan min thlahthlam ngai lo vang. Nakina kan hmachhawn tûr hun harsa tak atâna tûn aṭanga inbuatsaih lâwk a ngai tih min hriatnawntîr nân leh Jehova’n min thlahthlam ngai lo vang tih kan rin tlat theih nân, Governing Body chuan Sâm 34:10 hi kum 2022 atâna kum châng atân a thlang a ni: ‘Jehova zawngtute chuan thil ṭha rêng rêng an tlachham lo vang.’