1 | Ṭawngṭaina “In Manganna Zawng Zawng Ama Chungah Nghat Vek Rawh U”

BIBLE SAWI DAN: “[Pathianin] a ngaihsak ṭhin che u avângin, in manganna zawng zawng ama chungah nghat vek rawh u.”—1 PETERA 5:7.

Chumi Awmzia Chu

Pathian Jehova chuan harsatna min thlentu kan rit phurh eng pawh a hnêna hrilh tûrin min sâwm a. (Sâm 55:22) Ṭawngṭainaa thlen atân harsatna lian lutuk emaw, tê lutuk emaw a awm lo. Kan tâna thil pawimawh chu Jehova tân pawh a pawimawh a. A hnêna ṭawngṭai hi rilru thlamuanna kan neih theih nâna kawng pawimawh tak a ni.—Philippi 4:6, 7.

A Ṭanpui Theih Dân Che

Rilru hrisêlna lama harsatna kan neih hian, mal hle nia inhriatna kan nei thei a. Mi dangte chuan kan harsatna tawh chu min hriatthiampui vek reng lo. (Thufingte 14:10) Mahse, ṭawngṭaia Pathian hnêna kan rilrua awmte tih tak zeta kan thlen hian, ani chuan ngilnei taka min ngaihthlâksakin min hre thiam a. Jehova’n min hmuin kan natnate leh harsatnate a hria a; tichuan, kan lungkhamna eng pawh chu ṭawngṭaia a hnêna thlen tûrin min duh a ni.—2 Chronicles 6:29, 30.

Ṭawngṭaia Jehova kan biakna chuan min ngaihsak a ni tih kan rinna a tinghet a. “Ka manganna hi i hmu si ṭhîn a; ka nunna hi a hrehawm laite pawhin i hre ṭhîn,” tia ṭawngṭaitu fakna hla phuahtu rilru ang chu kan pu ve thei a ni. (Sâm 31:7) Jehova’n kan thil hmachhawnte a hria tih hriatna ringawt pawhin hun harsa takte paltlang tûrin nasa takin min ṭanpui thei a. Mahse, ani chuan kan mangannate chu a hre mai a ni lo. Tu dang zawng aiin kan thil hmachhawnte a hre chiang zâwk a, Bible aṭanga chakna leh thlamuanna hmu thei tûrin min ṭanpui a ni.

Bible-in A Ṭanpui Dân Julian-a

Lungkhamna Nasa Takin Min Nghawng Dân

“Lungkhamna nasa tak leh thil vei ngut ngutna ang chi rilru lam natna, obsessive-compulsive disorder (OCD) ka nei a. Lungkhamna nasa tak ka nei thut thut ṭhîn. Ka dam ṭhat viau lai pawhin, a hnu lawkah chhan mumal tak pawh awm chuang lovin nasa takin lungkhamna ka nei ṭhîn a ni. A bîk takin, mi dang bula ka awm hian chutiang chuan ka awm ṭhîn. Min ngaih dân tûr chu ka engto thei hle.

“Lungkhamna nasa tak ka nei tih hretu ka ṭhiante chuan theih tâwp chhuahin min ṭanpui a. A châng chuan an thusawite chu ka mamawh tak a ni lo. Mahse, theih tâwp an chhuahna chu ka ngaihlu tak zet a ni.

“A châng chuan, ka lungkhamna nasa tak leh OCD chuan ṭawngṭai a tiharsa hle a. Insâwrbing tûr leh ṭawngṭaia Pathian Jehova be tûrin, rilru lamah nasa taka ṭan ka lâk a ngai ṭhîn. Ka rilru a inthlâk danglam zung zung ṭhîn a, chu chuan min tibuai thei khawp mai. Ka ngaihtuahnate ka thunun zawh loh hian, Jehova hnêna ka rilrua awmte hrilh chu a harsa hle.”

Bible-in Min Ṭanpui Dân

“Bible ka zirna aṭangin, ṭawngṭaina chu Pathian pawm tlâk ni tûrin thiam taka chham leh sei tak a nih kher a ngai lo tih ka hria a. Ka rilrua awmte ka sawi chhuah theih loh châng chuan, ‘Pathian Jehova, khawngaihin min ṭanpui rawh,’ tiin ka dîl tawp ṭhîn. Chutiang hunah pawh chuan Jehova’n min hre thiam tih leh, chutih lai taka ka mamawh chu min pe tih ka hria a ni. Ṭawngṭaina bâkah, mi thiamte nêna inbiakna hmanga inenkawlna pawh ka la bawk a. Chûng ṭanpuina pahnihte zârah ka dinhmun chuan nasa taka hma a sâwn avângin ka lâwm hle. Ka Pa vâna mi be pawh tûra theih tâwp chhuah leh a ṭanpuina duhawm tak dawn chu a manhla tak zet a ni.”