Jehova Hming—Isua Tâna A Awmzia

1-2. (a) Isua’n tihhlum a nih hma zânah eng nge a tih? (b) He thuziakah hian eng zawhnate nge kan sawiho vang?

C.E. 33, Nisan 14 Nilaithawhṭan tlai lam a ni a. Isua chuan phatsan te, rorêlsak te, thiam loh chantîr te, nghaisak te leh, tihhlumte a tâwk dâwn a ni. In chung pindanah a zirtîr rinawmte nên zanriah pawimawh tak an kîl zawh hlim a ni a. An hnênah chuan fuihna thuchah hnuhnûng a sawi a ni. Chu pindan an chhuahsan hma lawk chuan, Isua chu châwl lawkin ṭawngṭaina pawimawh tak a hlân a. Chu ṭawngṭaina chu Johana bung 17-naah kan hmu thei a ni.

² Isua ṭawngṭaina chuan a thih hma lawka a thil vei berte chungchâng eng nge a târ lan? Leia rawng a bâwl chhûnga a thil ngaih pawimawh chungchâng eng nge a târ lan? Chûng zawhnate chhânna chu i lo sawiho vang u.

“AN HNENAH I HMING KA HRIATTIR TAWH”

3. Isua’n Pathian hming chungchângah eng nge a sawi a, eng a sawi tumna nge ni? (Johana 17:6, 26)

³ Isua’n a ṭawngṭainaah: “An hnênah i hming ka hriattîr tawh,” tiin a sawi a. A zirtîrte hnênah Jehova hming a hriattîr tawh tih vawi hnih lai a sawi a ni. (Johana 17:6, 26 chhiar rawh.) A sawi awmzia chu eng nge ni? An hming la hriat ngai loh a hriattîr tihna a ni em? Isua zirtîrte chu Juda mi an ni a; chuvângin, Pathian hming Jehova chu an hre tawh a ni. Chu hming chu Hebrai Pathian Lehkha Thu-ah vawi sâng tam tak a lang a. Chuvângin, Isua sawi tum chu Pathian hming bil ni lovin, chu hmingin Pathian nihna a târ lan zâwk chu a ni. Isua chuan Pathian thiltum te, thiltih te leh, miziate pawh tiamin, Pathian Jehova nihna chu tu dang zawng aia chiangin a hriattîr a ni.

4-5. (a) Tu emaw hming hriat awmzia chu eng nên nge kan tehkhin theih? (b) Isua zirtîrte chuan eng kawngin nge Jehova hming chu an rawn hriat?

⁴ Entîr nân, in kohhrana upa pakhat chu mi zai thiam doctor a ni a. Ani chu kum tam tak chhûng i lo hre tawh a ni. Mahse, ni khat chu hrisêlna lamah rîkrum thil i tâwk a. Chu unaupa thawhna damdawi inah chuan rang taka hruai i ni a, i nun a lo chhanhimsak che a ni. Tûnah chuan, chu unaupa hming chuan i tân awmze thûk lehzual a nei a ni lâwm ni? Ani chu i tân kohhran upa pakhat mai ni lovin, i nun chhanhimtu doctor a ni tawh a ni.

⁵ Chutiang bawkin, Isua zirtîrte chuan Pathian hming chu an hre tawh a. Mahse, Isua rawngbâwlna azârah chu hming chuan an tân awmze thûk lehzual a nei a ni. Engvângin nge chutianga kan sawi theih? Isua’n a thusawi leh thiltih engkimah a Pa mizia chu a lantîr vâng a ni a. Chuvângin, a tirhkohte chuan Isua zirtîr dân leh mi dangte a cheibâwl dân chu chîkin Jehova chu an ‘hre’ chiang lehzual a ni.—Joh. 14:9; 17:3, NWT.

“NANGMAH NGEIIN MIN PEK I HMING”

6. Eng kawngin nge Pathianin Isua hnêna A hming a pêk? (Johana 17:11, 12)

⁶ A ṭawngṭainaah chuan, Isua’n a zirtîrte tâna ngensakin: “Nangmah ngeiin min pêk i hming avângin anni chu vênghim rawh,” tiin a sawi a. (Johana 17:11, 12 chhiar rawh.) A nih chuan, Isua chu Jehova tia koh a ni tawh dâwn tihna a ni em? Ni lo ve. Isua’n Jehova tih hming a sawi khân “i hming” tiin a sawi a. Chuvângin, Pathian hming chu Isua hming a rawn ni tihna a ni lo. A nih leh, Isua’n Pathian hming a hnêna pêk a nih thu a sawi khân eng a tihna nge ni? A hmasa berin, Isua chu Jehova aiawhtu leh a tâna Thusawitu a ni a. A Pa hmingin a rawn kal a, chu hming chuan thil mak tam tak a ti a ni. (Joh. 5:43; 10:25) Chu bâkah, Isua tih hming awmzia chu “Jehova Chu Chhandamna A Ni,” tihna a ni a. Chuvângin, Pathian hming leh Isua hming chuan inzawmna hnai tak an nei a ni.

7. Isua’n Jehova hminga thu a sawi theih dân entîrna pe rawh.

⁷ Entîr nân, ram palai chu ram lal aiawhtu a nih angin lal hmingin thu a sawi thei a. Chuvângin, palai thusawite chuan lal thusawi tlukin thil a tithei a ni. Chutiang bawkin, Isua chu Jehova aiawhtu a ni a, A hmingin mite hnênah thu a sawi ṭhîn a ni.—Mt. 21:9; Lk. 13:35.

8. Eng kawngin nge Isua chuan leia a lo kal hmain Jehova hminga thil a tih? (Exodus 23:20, 21)

⁸ Thu a nih angin, Isua chuan Pathian thlarau fate leh mihringte hnênah kaihhruainate pein, Pathian aiawha Thusawitu angin rawng a bâwl a. (Joh. 1:1-3) Israelte thlalêra an awm laia anmahni ngaihsak tûra Pathian ruat vântirhkoh kha Isua a ni thei a ni. Pathianin an hnêna chu vântirhkoh thusawi ngaithla tûra a hrilh khân: “Amahah chuan ka hming a awm,” tiin a sawi a.a (Exodus 23:20, 21 chhiar rawh.) Chûng thute hmangin, Pathian Jehova’n Isua chu a aiawhtu a ni tih chiang takin a târ lang a. Chuvângin, Isua chu a Pa hming chawimawia tithianghlimtu ber a ni.

“KA PA, I HMING CHAWIMAWI RAWH”

9. Isua tân Jehova hming chu eng ang khawpa pawimawh nge a nih? Hrilhfiah rawh.

⁹ Kan sawiho tawh angin Isua tân Jehova hming chu thil pawimawh ber a ni a. Leia a awm lai pawhin, a tân Pathian hming a pawimawhzia chu a thiltih engkimah a tilang a ni. A rawngbâwl tâwp lamah Isua chuan: “Ka Pa, i hming chawimawi rawh,” tiin a ngên a. Chu veleh, a Pa chuan vân aṭangin: “Ka chawimawi tawh a, ka chawimawi leh bawk ang,” tiin aw ring takin a chhâng a ni.—Joh. 12:28, NWT.

10-11. (a) Engtin nge Isua’n Jehova hming a chawimawi? (Milem en bawk rawh.) (b) Engvângin nge Jehova hming chu tihthianghlima thiam chantîr a ngaih?

¹⁰ Isua pawhin a Pa hming chu a chawimawi a ni. Engtin nge? Kawng khat chu, a mizia leh thiltih ropui tak takte mi dangte hnêna hrilhna hmangin a ni. Kawng dang pawhin a Pa hming chu a chawimawi a. Jehova hming chu tihthianghlima thiam chantîr a ngai a ni. Chumi pawimawhzia chu a hnungzuitute hnêna Lal ṭawngṭaina a zirtîr khân a tilang a. Ani chuan: “Kan Pa, vâna mi, i hming tihthianghlim ni rawh se,” tiin a sawi a ni.—Mt. 6:9, NWT.

¹¹ Engvângin nge Jehova hming chu tihthianghlima thiam chantîr a ngaih? Eden huanah Diabol Setana chuan Pathian hming chu tibawrhbânga a sawichhiat vâng a ni. Jehova chu dawthei leh, Evi leh Adama te laka thil ṭha thuptu angin a puh a. (Gen. 3:1-5) A thiltih dân chu a fel lo niin a sawi bawk. Setana puhna dik lote chuan Jehova hming chu a tihliau a ni. A hnuah, Joba hun laiin Setana chuan Pathian rawngbâwltute chu A hnên aṭanga eng emaw an dawn avâng chauhva a rawngbâwl niin a sawi a. Chu sawichhetu chuan mihringte zîngah hian fiahna hnuaia Jehova rawngbâwl chhunzawm zêl tûr khawpa amah hmangaihtu tak tak an awm lo niin a puh hial a. (Job. 1:9-11; 2:4) Dâwt sawi hmang chu Jehova nge, Setana a nih tih finfiah nân hun pêk a ngai a ni.

‘KA NUN KA PE’

12. Jehova hming a hmangaih avângin Isua’n eng nge tih a huam?

¹² Isua chuan Jehova a hmangaih avângin a hming tithianghlim tûr leh thiam chantîr tûrin a tih theih apiang tih a duh a. Chuvângin, ‘Ka nun ka pe,’ tiin a sawi a ni. (Joh. 10:17, 18, NWT) Ni e, Jehova hming atâna thih hial pawh a inhuam a ni.b Mihring ṭha famkim Evi leh Adama chuan Pathian thu âwih lovin, Setana lamah an ṭang a. Anmahni ang lo takin, Isua chuan inhuam taka leia lo kalin Jehova a hmangaihzia chu a lantîr a ni. A thusawi leh thiltih engkima Jehova thu zâwmin chutiang chuan a ti a. (Heb. 4:15; 5:7-10) Nghaisakna bana tihhlum a nih thlengin a rinawmna chu a vawng tlat a. (Heb. 12:2) Chutiang chuan, Jehova leh a hming a hmangaihzia a lantîr a ni.

13. Engvângin nge Isua chu Setana dawthei a ni tih finfiah theitu ṭha ber a nih? (Milem en bawk rawh.)

¹³ Isua thiltih engkim chuan Jehova ni lovin, Setana chu dawthei a ni tih a finfiah a. (Joh. 8:44) Tu dang zawng aiin Jehova chu a hre chiang a. Jehova chungchânga Setana puhna zawng zawng zîngah thu dik pakhat tê a awm a nih pawhin Isua chuan a hre dâwn a ni. Mahse, Jehova hming chu rinawm takin a hum tlat a. Jehova’n a kalsan anga a lan hunah pawh, Isua chuan a hmangaih tak a Pa hnuchhawn aiin thih a inhuam a ni.—Mt. 27:46.c

“HNATHAWH TUR MIN PEK KHA KA THAWK ZO TAWH E”

14. Engtin nge Jehova chuan Isua chu a rinawmna avânga lâwmman a pêk?

¹⁴ Isua chuan a thih hma zâna a ṭawngṭainaah: “Hnathawh tûr min pêk kha ka thawk zo tawh e,” tiin a sawi thei a. (Joh. 17:4, NWT) A rinawmna avângin Jehova’n lâwmman a pe dâwn tih a ring a. (Joh. 17:4, 5) Chu a rinna chu a thlâwn lo a ni. Jehova chuan ani chu thlâna a awm hlen a phal lo va. (Tirh. 2:23, 24) A kai tho va, vânah nasa takin a chawimawi a. (Phil. 2:8, 9) A hnuah, Isua chuan Pathian Ramah Lal niin ro a rêl ṭan a ni. Pathian Ram chuan eng nge a hlen chhuah ang? Lal ṭawngṭaina chuan: “I Ram lo thleng rawh se. I [Jehova] duh zâwng vâna tih a nih angin, leiah pawh tih ni rawh se,” tiin min hrilh a ni.—Mt. 6:10, NWT.

15. Isua’n eng thil dangte nge a hlen chhuah ang?

¹⁵ Nakin lawkah, Armageddon-ah chuan Isua’n Pathian hmêlmate chu dovin mi sualte chu a tiboral ang a. (Thup. 16:14, 16; 19:11-16) Chumi hnu lawkah, Setana chu eng mah ti thei lova a awmna hmun tûr, ‘lei lâwtah’ a peih dâwn a ni. (Thup. 20:1-3) A Kum Sâng Rorêl chhûng chuan leiah remna awmtîrin mihringte chu ṭhat famkimnaah a hruai ang. Mitthite chu a kai tho vang a. Lei pum pui hi Paradis-a chantîrin Pathian thiltum chu a hlawhtling tawh ang!—Thup. 21:1-4.

16. Kum Sâng Rorêl tâwpah engte nge hlen chhuah a nih ang?

¹⁶ Kum Sâng Rorêl tâwpah eng nge thleng tûra kan beisei theih? Mihringte sualna leh ṭhat famkim lohna chu a awm tawh lo vang. Mihringte chuan tlanna ṭanchhanin an sualte avânga ngaihdam an dîl a ngai tawh lo vang a. Palai emaw, puithiam emaw an mamawh tawh lo vang. Chu bâkah, ‘hmêlma hnuhnûng ber [Adama avânga lo awm] thihna chu tihbovin a awm tawh ang.’ Mitthite pawh kaihthawh an ni tawh ang a. Leia mi zawng zawngte chu mi ṭha famkim an ni tawh ang.—1 Kor. 15:25, 26, NWT.

17-18. (a) Kum Sâng Rorêl tâwpah eng nge thleng ang? (b) A rorêl hun a tâwp chuan Isua’n eng nge a tih ang? (1 Korinth 15:24, 28) (Milem en bawk rawh)

¹⁷ Kum Sâng Rorêl tâwpah eng thil dangte nge la thleng ang? Chutih hunah chuan, thil danglam tak a thleng dâwn a. Jehova hming tihthianghlimna chungchânga thu buai chu chinfel a ni tawh ang. Engtin nge? Eden huanah khân, Setana chuan Jehova chu dawthei leh mihringte chunga hmangaihna nei lova rorêltu angin a puh a. Chumi hun aṭang chuan, a hming chu amah chawimawia zahtute hmanga tihthianghlim nawn fo a ni. Kum Sâng Rorêl tâwpah chuan Jehova hming chu thiam chantîr pumhlûm a ni tawh ang a. Hmangaihna ngah tak kan Pa vâna mi a nihzia hnial rual lohvin a nem nghet tawh dâwn a ni.

¹⁸ Setana puhnate chu a dik lo tih kumkhua atâna finfiah a ni tawh dâwn a. A nih leh, Isua’n a rorêlna a tâwp hunah eng nge a tih ang? Setana entawnin Jehova lakah a hel ang em? Hel lo vang! (1 Korinth 15:24, 28 chhiar rawh.) Isua chuan a Lalram chu a Pa hnênah a pe kîr leh ang a. A rorêlna hnuaiah chuan a intulût ang. Ni e, Setana ang lo takin Isua chuan Jehova a hmangaih avângin engkim chân a inhuam a ni.

19. Jehova hming chuan Isua tân eng awmzia nge a neih?

¹⁹ Jehova’n Isua hnêna a hming pêk a inhuam chu a mak lo ve! Isua chuan a Pa aiawhtu ṭha famkim a nihzia a lantîr tawh a. Chuvângin, Jehova hming chuan Isua tân eng awmzia nge a neih? A tâna thil pawimawh ber a ni. A hming avânga thih a inhuam bâkah, Kum Sâng Rorêl tâwpah Jehova hnênah engkim pêk kîr leh pawh a inhuam dâwn a ni. Engtin nge Isua chu kan entawn theih? Chu zawhna chhânna chu a dawta thuziakah kan sawiho vang.