Thutak Hi A La Pawimawh Reng Em?

Thil dik leh dik lo thliar hran hi a harsa telh telhin i hria em? Tûn laia mite chuan thutak leh thu dik aiin, an rilru veizâwng leh mi mal ngaih dânte chu an ngai pawimawh tawh zâwk a. Mi tam tak phei chuan thu dik a awm pawh an ring lo a ni.

Chu ngaih dân chu thil thar a ni lo. Kum 2,000 vêl kal ta khân, Rom ram Awptu Pontia Pilata chuan: “Thutak eng nge ni?” tiin Isua chu a zâwt satliah a. (Johana 18:38) Ani chuan Isua chhânna chu ngaichâng lo mah se, a thil zawh chu thil pawimawh tak a ni a. Mite’n thutak an ngaih pawimawh tawh lohna he khawvêlah, Bible chuan chhânna lungawithlâk tak a pe thei che a ni.

Thutak chu a awm tak zet em?

Awm e. Bible-a hman “thutak” tih thu mal chuan thil nihna dik tak a kawh mai bâkah, nungchang lama tehna dik tak pawh a kâwk bawk a. Pathian Jehovaa chu thutak Hnâr a nihzia sawiin, “thutak Pathian” tiin a ko a ni. (Sâm 31:5) Bible-ah hian Pathian hnên aṭanga lo kal thutak a chuang a; chu thutak chuan tûn lai khawvêla ngaih dân chi hrang hrang laka min kaihhruai theih avângin, Bible-in êng nên a tehkhin a ni.—Sâm 43:3; Johana 17:17.

Thutak chu engtin nge i zawn hmuh theih ang?

Pathianin Bible-a thutak chu ngaihtuah chiang lova pawm tawp tûrin min ti lo va. Chu aiin, kan rilru veizâwngte ni lovin, kan ngaihruat thiamna chu hmanga zir chiang tûrin min duh a ni. (Rom 12:1) Amah hriaa ‘rilru zawng zawnga’ hmangaih tûra min duh bâkah, Bible aṭanga thutak kan zirte chu fiah tûrin min fuih bawk a ni.—Matthaia 22:37, 38; Tirhkohte 17:11.

Dâwt thu chu tu tih chhuah nge ni?

Bible chuan dâwt thu chu Pathian hmêlma “dâwt pa,” Diabol Setana tih chhuah a ni tih a sawi a. (Johana 8:44) Ani chuan mihring hmasa berte hnênah Pathian chungchânga dâwt thu a sawi a. (Genesis 3:1-6, 13, 17-19; 5:5) Tûn thlengin dâwt thute thehdarhin Pathian chungchânga thutak chu a la thup zêl a ni.—Thupuan 12:9.

Engvângin nge dâwt sawi chu tûn laiah thil pângngai tak a nih?

Bible-in ‘ni hnuhnûng’ tia a koh tûna kan awmna hunah hian, Satana chuan tûn hma zawng aiin mite chu a thununin a hruai sual nasa lehzual a. Mite chuan mi dangte an hruai sual theih nân leh an hman ṭangkai theih nân dâwt an sawi nasa hle a. (2 Timothea 3:1, 13) Tûn laia sakhaw tam takah pawh dâwt thu a hluar hle a ni. Kan awmna hun chungchânga Bible-in a sawi lâwk angin, mite chuan “an bengte a zat avângin anmahni duh zâwng angin zirtîrtute an hnênah an khâwm” a, “an bengte chu thutak lamah an chhungawng” a ni.—2 Timothea 4:3, 4.

Thutak chu engvângin nge a pawimawh?

Thutak chuan mite inkârah inrin tawnna a awmtîr a. Inrin tawnna tel lo chuan inṭhianna a nghet thei lo va, mihringte pawh kan awm khâwm reng thei lo. Pathianin thutak ṭanchhanin amah kan be tûr a ni tia a sawi thu Bible-in min zirtîr a. “[Pathian] chibaibûktuten thlarau leh tih tak zetin chibai an bûk tûr a ni,” tiin a sawi. (Johana 4:24) Bible thutakin sakhaw zirtîrna dik lote hre tûr leh chumi aṭanga chhuah zalêna awm tûra a ṭanpui theih dân che hre tûrin, “Pathian Hmangaih Theih Lohva Siamtu Dâwt Thute,” tiha thuziak hrang hrangte chu en ang che.

Engvângin nge Pathianin thutak hre tûra min duh?

Pathianin chhandama i awm a duh a; chhandama awm tûr chuan ama chungchânga thutak i zir a ngai a ni. (1 Timothea 2:4) A chhia leh a ṭha chungchânga Pathian tehnate i hriata chumi mila i nun chuan, amah nêna inṭhianna ṭha tak i nei dâwn a ni. (Sâm 15:1, 2) Pathianin mite thutak zirtîr tûrin Isua chu he leiah hian a rawn tîr a. Isua zirtîrna chu pawm tûrin min duh a ni.—Matthaia 17:5; Johana 18:37.

Pathianin dâwt thute hi a titâwp ngai ang em?

Aw, a titâwp ang. Mite’n mi dangte buma an chunga remchâng an lâ ṭhîn chu Pathianin a haw hle a. He lei ata dâwt sawi hmangte tihboral min tiam a ni. (Sâm 5:6) Chutianga a tih hunah chuan: “Thutak hmui chu kumkhuain tihngheh a ni ang,” tih a thutiam pawh hi a thlen famkimtîr ang.—Thufingte 12:19.