Bung Khat
Kan Hun Laia Biakna Inpumkhat—Eng Nge A Awmzia?
1, 2. (a) Kan hun laiah hian eng thil phûrawm tak nge thleng mêk? (b) Mi thinlung ṭhate’n eng beiseina ropui tak nge an neih?
KHAWVEL pum puiah hian biakna inpumkhat siam tûr thil phûrawm tak a thleng mêk a. Chu chu hnam tina mi te, chi tina mi te, leh ṭawng tina mi te maktaduai tam tak hruai khâwmna hi a ni a, anni chu kum tinin an pung zêl a ni. Chûng mite chu Bible chuan Jehova ‘thuhretute’ a ti a, “mipui tam tak” tiin a ko bawk. Anni chuan “achhûn azânin” Pathian rawng an bâwl a. (Isaia 43:10-12; Thu Puan 7:9-15) Engvângin nge chutianga rawng an bâwl? Jehova chu Pathian dik awmchhun a ni tih an hriat vâng a ni a. Chu chuan a kawng felte mila an nun siam ṭha tûrin a chêttîr a ni. Chu bâkah, he khawvêl suaksual “ni hnuhnûngahte” kan awm a ni tih te, rei lo têah Pathianin a tiboral dâwn tih te, leh paradis khawvêl tharin a rawn thlâk thleng dâwn a ni tih te an hre bawk.—2 Timothea 3:1-5, 13; 2 Petera 3:10-13.
2 Pathian Thu chuan: “Rei lo tê achinah mi suaksual chu a awm tawh dâwn si lo . . . Thuhnuairawlhte erawh chuan ram hi an luah ang a: remna chênin an hmuingîl ang.” (Sâm 37:10, 11) “Mi felte chuan ram hi an luah ang a, a chhûngah hian kumkhuain an awm ang.” (Sâm 37:29) “[Pathianin] an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” tih min tiam a ni.—Thu Puan 21:4.
3. Biaknaa inpumkhatna dik tak chu eng anga lo awm nge ni?
3 Tûna biakna dika inpumkhatte hi khawvêl thara chêng hmasa tûrte an ni a. Anni chuan Pathian duhzâwng an zir a, an theih tâwpin an zâwm bawk a ni. Chutianga tih a pawimawhzia târ langin, Isua chuan heti hian a sawi: “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin. (Johana 17:3) Tirhkoh Johana chuan: “Khawvêl hi a châknate chawpin a boral mêk a ni, Pathian duhzâwng titu erawh chu kumkhuain a awm reng ang,” tiin a ziak a ni.—1 Johana 2:17.
A Awmzia Tak Chu
4. (a) Kan hun laia mi tam tak biakna inpumkhata hruai khâwmna chuan eng awmzia nge a neih? (b) Engtin nge Bible-in he lâk khâwmna hi a sawi?
4 Kan hun laia mi tam takte biakna inpumkhata hruai khâwmna chuan eng awmzia nge a neih? Chu chu he khawvêl suaksual tâwpna leh Pathian khawvêl tharin a rawn zui nghâl hun tûr kan hnaih tawhzia târ lanna chiang tak a ni. He lâk khâwmna ropui tak chungchâng Bible hrilh lâwk thute thlen famkimna chu mit ngeia hmutute kan ni a. Chutiang hrilh lâwkna pakhat chuan heti hian a sawi: “Ni hnuhnûngahte [tûn ni hnuhnûngahte] chuan heti hi a ni ang a, LALPA in awmna tlâng [a biakna dik chawi sân tawh] chu tlâng lian chungahte [biakna dang rêng rêng chungah] chuan tihnghehin a awm ang a, . . . chutah chuan chi tinrêngte chu an kal nguah nguah ang. Tin, hnam tam takte chu an kal ang a, Lo haw ula, LALPA tlângah, Jakoba Pathian inah chuan i chho vang u; tichuan anin a kawng chanchinte chu min zirtîr ang a, a kalkawngahte chuan kan kal ang, an ti ang,” tiin.—Mika 4:1, 2; Sâm 37:34.
5, 6. (a) Engtin nge hnamte chuan Jehova lam an pan tih chu a dik? (b) Eng zawhnate nge mahnia kan inzawh tûr?
5 Hnam zawng zawng chu Jehova be tûrin a thlarau lam inah an kal khâwm vek lo nâa, hnam tina mi maktaduai tam tak chu an kal khâwm a ni. Pathian Jehova hmangaih thiltum leh a mize duhawm takte an hriat chuan an thinlung a khawih hle a. Pathianin ti tura a duhte chu hriat tumin inngaitlâwm takin an zawng a ni. An ṭawngṭaina chu fakna hla phuahtu ṭawngṭaina ang hi a ni ve a ni: “I duhzâwng tih mi zirtîr ang che; ka Pathian i ni si a.”—Sâm 143:10.
6 Jehova’n biakna inpumkhata a hruai khâwm mêk mipui tam tak zingah hian i tel ve em? A Thu aṭanga kaihhruaina i dawnte i lo chhân lêt dân chuan Jehova chu a lo chhuahna Bul ber a nihzia i pawm tak zet tih a lantîr em? Eng chen chiah nge “a kalkawngahte chuan” i kal ang?
A Lo Din Chhuah Dân
7. (a) A tâwpah biakna inpumkhat chuan eng angin nge a huap zau dâwn? (b) Engvângin nge tûna Jehova betu nih hi a hmanhmawhthlâk a, engtin nge mi dangte chu Jehova betu lo ni tûra kan ṭanpui theih?
7 Thil siam finna nei zawng zawngte biakna dik taka an inpumkhat hi Jehova thiltum a ni a. Mi nung dam zawng zawngin Pathian dik awmchhun an biak hun chu kan va nghâkhlel tak êm! (Sâm 103:19-22) Mahse, chu mi hun a lo thlen hma chuan Jehova’n a duhzâwng fel ti duh lotu zawng zawngte chu a tiboral phawt tûr a ni. Hmun tina mite’n an nun kawng thlâk thlengna hun remchâng an neih theih nân, a thiltih tûr chu zahngai takin a hriattîr lâwk a. (Isaia 55:6, 7) Chuvângin, kan hun laia “hnam tinrêng te, chi tinrêng te, ṭawng tinrêng te, mi tinrêng te” hnênah he ngenna hmanhmawhthlâk tak hi puan chhuah a ni: “A rorêl hun chu a lo thlen tâk avângin Pathian chu hlau ula, chawimawi rawh u; vân te, lei te, tuifinriat te, tuihna te siamtu chu chibai bûk rawh u,” tih hi. (Thu Puan 14:6, 7) Chu sâwmna chu i pawm tawh em? I pawm tawh a nih chuan Pathian dik tak hre tûr leh be tûra mite sâwm chhâwng tûrin chanvo hlu tak i nei a ni.
8. Bible zirtîrna thu bulte kan hriat hnuah, eng hmasâwn zêlna nge tih tak zeta siam kan tum ang?
8 Pathian biaa inchhâl si a, mahni ṭhatna tûr ringawt ûmtute’n amah an biak chu Pathian thiltum a ni lo. Pathian chuan mite chu ‘ama duhzâwng hriat famkimnaa’ khat tûr leh, chu chu an nuna lantîr tûrin a duh a. (Kolossa 1:9-12) Chuvângin, Bible zirtîrna thu bulte hriaa lâwm nachâng hriate chuan Kristian puitlin lam pan zêl chu an duh a ni. Anni chuan Jehova hriat chian lehzual an châk a, a Thu an hriatthiamna pawh tihzauh leh tihthûk zêl an duh a, nunpui tam lehzual pawh an duh bawk a. Vâna kan Pa miziate chu lantîr an tum a, a thil thlîr dân anga thlîr ve an tum bawk a ni. Chu chuan kan hun laia Jehova’n he leia nun chhanhimna hna a thawhtîrah hian tel ve dân tûr kawng zawng tûrin a chêttîr a ni. Chu chu i duhzâwng a ni ve em?—Marka 13:10; Hebrai 5:12–6:3.
9. Eng kawngtein nge inpumkhatna dik tak tûnah a awm theih?
9 Bible chuan Jehova rawngbâwltute chu an inpumkhat tûr a ni tih a târ lang a. (Ephesi 4:1-3) He inpumkhatna hi inthliar hranna khawvêla kan awm chung leh ṭha famkim lo kan ni chung pawhin, tûnah pawh a awm ngei tûr a ni. Isua chu a hnungzuitu zawng zawngte’n inpumkhatna dik tak an neih a, pumkhat an nih nân tih tak zetin a ṭawngṭai a ni. Chu chu engtihna nge ni? A pakhatnaah chuan, Jehova leh a Fapa nên inlaichînna ṭha tak an neih nân leh a pahnihnaah chuan, an zîngah inpumkhatna a awm nân a ṭawngṭai tihna a ni. (Johana 17:20, 21) Chu mi tihlawhtling tûrin, Jehova chuan Kristian kohhran chu a mite zirtîr nân inawpna pâwl angin a hmang a ni.
Eng Thilte’n Nge Inpumkhatna Awmtîr?
10. (a) Min khawihtu zawhnate chhânna hmu chhuak tûra mahni ngeiin Bible kan hmanna hian eng nge min neihtîr? (b) He paragraph-a zawhnate chhângin Kristian inpumkhatna awmtîrtu thilte zir ang che.
10 Biakna inpumkhat awmtîrtu thil pasarihte chu a hnuaiah hian ziak chhuah a ni. A zawhna ken telte i chhân rualin, thu tin hian Jehova leh i Kristianpuite nêna in inlaichînna a khawih dân ngaihtuah tel ang che. Hêng thilte ngun taka i chhût a, a thu ziah lan kher lohva Bible châng târ lante pawh i en chuan, kan zavaia mamawh mizia—Pathian finna te, ngaihtuah theihna te, leh ngaihruat thiamna te nei tûrin a ṭanpui ang che. (Thufingte 5:1, 2; Philippi 1:9-11) Hêng thil pasarihte hi a mal tê têin lo ngaihtuah teh.
(1) A chhia leh a ṭha tehkhâwng siam tûra Jehova dikna neih chu kan pawm. “I thinlung zawng zawngin LALPA ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zêl ang che.”—Thufingte 3:5, 6.
Engvângin nge thutlûkna kan siam hunah Jehova thurâwn leh kaihhruaina kan zawn ang? (Sâm 146:3-5; Isaia 48:17)
(2) Min kaihruai tûrin Pathian Thu kan nei. “Pathian thu kan hnên ata in hriat, in pawm lai khân, mihring thu pawmin in pawm lo va, Pathian thu pawmin in pawm zâwk avâng khân; chu chu Pathian thu a ni rêng a, nangni a ringtute chhûnga thawk bawk ṭhîna chu a ni.”—1 Thessalonika 2:13.
Dik nia kan “hriat” tih rîkngawt hi eng nge a hlauhawmna? (Thufingte 14:12; Jeremia 10:23, 24; 17:9)
Thil engemaw chungchânga Bible thurâwn kan hriat chiah loh chuan engtin nge kan tih ang? (Thufingte 2:3-5; 2 Timothea 3:16, 17)
(3) Thlarau lam châwmna thuhmun kan hlâwkpui ṭheuh. “I fate zawng zawng chu LALPA zirtîrin an awm ang.” (Isaia 54:13) “Hmangaih leh thil ṭha tiha inchawk tho tûrin inngaihtuah tawn ang u; ṭhenkhat tih dân anga kan inkhâwmte bânsan lovin, infuih tawn zâwk ang u; [boralna] ni chu lo hnai telh telha in hriatin infuih tawn nasa lehzual sauh rawh u.”—Hebrai 10:24, 25.
Jehova ruahman thlarau lam châwmna hmang ṭangkaitute’n eng hlâwkna nge an hmuh? (Isaia 65:13, 14)
(4) Mihring ni lovin, Isua Krista chauh hi min Hruaitu a ni. “Nangni erawh chu ‘Rabbi’ tihin awm suh u; in zirtîrtu chu pakhat chauh a ni a, nangni zawng zawng chu unau in ni si a. Tin, lei chungah hian tumah ‘Ka pa’ ti suh u; in Pa chu pakhat chauh a ni, vâna mi khi. ‘Hruaitute’ tihin awm hek suh u, in hruaitu chu pakhat chauh a ni, Krista chu.”—Matthaia 23:8-10.
Kan zinga mi tupawh hian mi dangte aia chungnung zâwka inngaihna kan nei tûr em ni? (Rom 3:23, 24; 12:3)
(5) Pathian Ram sawrkâr chu mihringte beisei tûr awmchhun a ni. “Chutichuan nangni chuan hetiang hian ṭawngṭai rawh u: ‘Kan Pa vâna mi, i hming zahawm rawh se. I ram lo thleng rawh se. I duhzâwng vâna an tih angin leia mi’n ti rawh se.’ A ram leh a felna chu zawng hmasa zâwk rawh u.”—Matthaia 6:9, 10, 33.
‘A ram zawn hmasakna’ chuan engtin nge kan inpumkhatna vênghim tûra a ṭanpui? (Mika 4:3; 1 Johana 3:10-12)
(6) Kristian inpumkhatna atâna pawimawh miziate chu thlarau thianghlimin Jehova betute a neihtîr. “Thlarau rah . . . chu hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te a ni.”—Galatia 5:22, 23.
Pathian thlarauvin keimahniah rah a neih theih nân eng nge kan tih ngai? (Tirhkohte 5:32)
Pathian thlarau neihna chuan kan Kristianpuite nêna kan inlaichînna engtin nge a thunun? (Johana 13:35; 1 Johana 4:8, 20, 21)
(7) Pathian betu dik zawng zawngte chu a Lalram chanchin ṭha puannaah an tel. “He ram chanchin ṭha hi hnam zawng zawng hriattirna tûrin khawvel zawng zawngah hrilhin a awm ang; chu mi zawhah chuan tâwpna chu a lo thleng ang.”—Matthaia 24:14.
He thu hrilh rawngbâwlnaa tel ve duhna nei tûrin engin nge min chêttîr ang? (Matthaia 22:37-39; Rom 10:10)
11. Bible thutak kan nunpui hian, eng nge a rah chhuah?
11 Inpumkhata Jehova biakna chuan amah min hnaihtîr lehzual a, kan rinpuite nên pawh inkawmhona nuam tak min neihtîr thei bawk. Sâm 133:1 chuan: “Ngai teh, unaute inngeih dial diala awm khâwm hi a va ṭhain, a va nuam êm!” a ti a. He khawvêla mahni hmasialna te, nungchang bawlhhlawhna te, leh tharum thawhna te kalsan a, Jehova hmangaih tak taktu leh a dân zâwmtute nêna awm khâwm chu a va thawventhlâk êm!
Inṭhen Hranna Awmtîr Theite Pumpelh Rawh
12. Engvângin nge inlâk hran duhna kan pumpelh a ngaih?
12 Khawvêl puma kan inpumkhatna hlu tak hi a chhiat loh nân, inṭhen hranna awmtîr theite chu kan pumpelh tûr a ni. Chûng zînga pakhat chu Pathian leh a dânte lak aṭanga inlâk hran duhna hi a ni a. Jehova chuan inlâk hranna bul ṭantu chu Diabol-Setana a nihzia târ langin, chutiang rilru chu pumpelh tûrin min ṭanpui a ni. (2 Korinth 4:4; Thu Puan 12:9) Pathian thusawite ngaihthah tûr leh Pathian duh loh zâwnga thutlûkna siam tûra Adama leh Evi thununtu chu Setana a ni a. A rah chhuah chu an tân leh kan tân chhiatna râpthlâk tak a ni. (Genesis 3:1-6, 17-19) He khawvêl hi Pathian leh a dân aṭanga inlâk hran duhna hian a chiah hneh hle a. Chuvângin, chutiang duhna lakah chuan kan invên tlat a ngai a ni.
13. Engin nge Pathian felna khawvêl thara nung tûra tih tak zeta kan inbuatsaih leh buatsaih loh lantîr ang?
13 Entîr nân, he khawvêl suaksual hi vân tharte leh lei thar, a chhûnga “felna awmte” nêna a thlâk thleng tûr thu Jehova thutiam phûrawm tak hi lo ngaihtuah teh. (2 Petera 3:13) Chu thutiam chuan felna a dinchan huna chêng ve tûra inbuatsaih ṭan tûrin min chêttîr tûr a ni dâwn lâwm ni? Chu mi tih theih dân chu, Bible zilhna thu fiah tak: “Khawvêl hi hmangaih suh ula, khawvêla thil awmte pawh hi hmangaih hek suh u. Mi tupawhin khawvêl hi a hmangaih chuan Pa a hmangaihna amahah a awm lo,” tih zawm hi a ni. (1 Johana 2:15) Chuvângin, he khawvêl rilru put hmang—inlâk hran duhna te, a lutuka mahni hmasialna te, nungchang bawlhhlawhna te, leh tharum thawhna te—hi kan hawisan a ni. Kan tisa ṭha famkim lo châknate nên inkalh mah se, thinlung taka Jehova thu ngaihthlâk leh a thu âwih chu kan chîn ṭhan kan nihtîr a ni. Kan nun kawng pum pui hian kan ngaihtuahna leh kan tumte chu Pathian duhzâwng tih lam hawi a nihzia a lantîr a ni.—Sâm 40:8.
14. (a) Engvângin nge hun remchâng awm hi Jehova kawngte zir nân leh nunpui nâna hman nghâl a pawimawh? (b) He mi paragraph-a Bible châng târ lante hian keimahni ṭheuhvah eng awmzia nge a neih?
14 He khawvêl suaksual tak leh a kawng zawhtu zawng zawngte tiboral tura Jehova hun ruat a lo thlen hunah chuan, ani chu a tlai khawmuang lo vang. Ani chuan thinlung chanve chauhva Pathian duhzâwng zir leh zâwm chunga khawvêl nun kawng la vuan reng si tute a ngaihtuah avângin a hun ruat chu a sawn hla dâwn lo va, a tehna a thlâk thleng dâwn hek lo. Tûn hi chêt hun chu a ni! (Luka 13:23, 24; 17:32; 21:34-36) Chuvângin, mipui tam takte’n he hun remchâng hlu tak hi hmang ṭangkai a, Jehova’n a Thu leh a inawpna pâwl hmanga kaihhruaina a pêkte phûr taka zawng a, khawvêl thar lam pana a kalkawnga lungrual taka an kal han hmuh chu a va lâwmawm tak êm! Chu bâkah, Jehova chanchin kan hriat tam poh leh kan hmangaih lehzual ang a, a rawng bâwl kan châk lehzual ang.
Ennawn Nâna Sawiho Tûrte
• Biakna chungchânga Jehova thiltum chu eng nge ni?
• Pathian zirtîrna thu bulte kan hriat hnuah eng hmasâwn zêlna nge tih tak zeta neih kan tum ang?
• Jehova betu dangte nêna inpumkhat tûrin mi mal tinin eng nge kan tih theih?
[Phêk 4-naa milem]
“Thuhnuairawlhte chuan ram hi an luah ang a, remna chênin an hmuingîl ang”