Nun leh Rawngbâwlna Inzirna Lehkhabu Atâna Thu Lâk Chhuahnate
JUNE 5-11
PATHIAN THU AṬANGA RO HLUTE | JEREMIA 51-52
“Jehova Thute Chu A Thleng Famkim Vek”
(Jeremia 51:11) “Thalte chu hriam ula, phâwte chelh rawh u, Media lalte rilru chu LALPAN a chawk tho ta, a thil tum chu Babulon tihchhiat thu a ni si. Chu chu LALPA phuba lâkna a ni si a, a biak in phuba ngei chu.”
(Jeremia 51:28) Amah do tur hnamte buatsaih r’u, Media lalte, awptute, leh a puitute, a thuneihna ram zawng zawng nên.
it-2-E 360 ¶2-3
Media
Persia nên Babulon an hneh. B.C.E. kum zabi pariatnaah zâwlnei Isaia chuan Jehova’n Babulon bei tûrin ‘Media-ho a chawk tho vang a, chûngho chuan tangka an ngaihsak lo vang a, rangkachak pawh an lâwm lo vang. An thal ngulte chuan tlangvâlte chu a tisawm ang,’ tih a sawi lâwk a. (Is. 13:17-19; 21:2) Hmân lai Grik chanchin ziaktute’n Media leh Persia sawi kawp nâna “Media” chauh an lo hman fo tawh angin, heta “Media” tih hian Persia pawh a huam tel a rinawm. Tangkarua leh rangkachak an ngaihsak lohzia chu râllâk tûrte aiin Babulon hneh hrim hrim an tumnaah a lang a; chuvângin, thamna leh chhiah pêk tumna eng mahin an thiltum ata a la pêng lo. Persia mite ang bawkin Media mite indonaa râlthuam hman ber chu thal a ni a. A châng chuan dâra tuam (Sâm 18:34 nên khaikhin rawh) ni mah se, thinga siam thal ngulte chuan, a chhun tlang theih nâna tahhriam thal tam tak kah chhuahte hmangin ‘Babulon tlangvâlte chu a tisawm’ a ni.—Jer. 51:11.
Jeremia (51:11, 28) chuan Babulon beitute zîngah “Media lalte” an tel thu a sawi tel a, a tam sawina ṭawngkam chuan Kura hnuaiah pawh Media lal emaw, lalte emaw an awm zawm zêl tih a târ lang a, chu chu hmân laia thil awm ngai lo a ni lo. (Jer. 25:25 nên khaikhin rawh.) Chuvângin, Babulon chu Media te, Persia te, Elam te, leh an chhehvêla awm hnam ṭangrual pâwlte lâk a ni tih kan hmu a; mahse, Persia mi Lal Kura ruat ni âwm tak, Media mi Daria chu “Kaldai ram chunga lala siam” a ni bawk.—Dan. 5:31; 9:1; DARIA No. 1 en rawh.
(Jeremia 51:30) Babulon râl tu mite chu an ralbâng ta, an kulhpuiah an tawm reng e, an pachanna a dai a, hmeichhia ang mai an lo ni ta, an chênna hmunte a kâng zo va, a daidanna thîr tlâwn a tliak.
it-2-E 459 ¶4
Nabonidus-a
Ngaihvenawm takin, Chanchin Chhinchhiahna chuan Babulon tlûk chhiat zân chungchângah: “Kura sipaite chu beih ngai lovin Babulonah an lût,” tih a târ lang a. A awmzia chu indona chhuak lovin tihna a nih hmêl a, Jeremia’n ‘Babulon râl tu mite chuan an ralbâng ang’ tia a hrilh lâwkna nên a inmil chiah a ni.—Jer 51:30.
(Jeremia 51:37) Tin, Babulon chu chhe vawm khâwm mai, Sihal chênna hmun, mak tih huai leh chek khum, chêngtu awm lo hmun a lo ni ang.
(Jeremia 51:62) ‘Aw LALPA, he hnam chungchângah hian tumah, mi leh sa pawh, chên lohna tûra râwt bova awmin, kumkhuaa ṭiau zâwk tûrin thu i sawi tawh a,’ ti ang che.
it-1-E 237 ¶1
Babulon
Hun chhinchhiah tlâk tak, B.C.E. 539-a Babulon lâk a nih aṭang chuan a ropuina chu a chuai ṭan a. Babulon chu Persia lal Daria I-na (Hystaspis-a) lakah ṭum hnih lai a hel a, a ṭum hnihnaah chuan Babulon chu ṭhiah sawm a ni ta a. Khawpui din leh chu Zerzia I-na lakah a hel a, suasam a ni. Alexander Ropuia chuan Babulon chu a khawpuia siam a tum a; mahse, B.C.E. 323-ah a thi ta thut a. Nicator-a chuan khawpui chu B.C.E. 312-ah a hneh a, Selukai khawpui thar din nân Tigris lui kamah khawpuia thil tam tak chu a thiar a. Mahse, Kristian hmasate hun lai pawhin khawpui chu a la awm a, chutah chuan Juda mite an awm a, chu chu a lehkha thawna kan hmuh angin, tirhkoh Petera’n Babulon a tlawh chhan a ni. (1 Petera 5:13) Chumi hmuna lehkha ziak an hmuhte chuan Babulon mite Bel biak in chu C.E. 75 thlengin a awm tih a târ lang. C.E. kum zabi palina a thlen chuan khawpui chu tihchhiat a niin, a tâwpah chuan a mang ta a. Babulon chu “chhe vawm khâwm” mai a lo ni ta a ni.—Jer. 51:37.
Thlarau Lam Lunghlute Laih Chhuahna
(Jeremia 51:25) Ngai rawh, lei pum pui tichhetu, aw, tichhetu tlâng lian, ka do che a ni, tih hi LALPA thu chhuak a ni: i chungah ka kut ka lek ang a, khâm sâng ata ka lum thla ang che, tlâng kâng rêm tawhah ka siam ang che.
it-2-E 444 ¶9
Tlâng
Sawrkârte a entîr. Bible-a entîr nei tlângte hian ram emaw, sawrkâr rorêlna emaw a entîr a. (Dan. 2:35, 44, 45; Is. 41:15 nên khaihkhin rawh; Thup. 17:9-11, 18.) Babulon chuan sipai chaknaa ram dang tam tak a tihchhiat avângin, “tichhetu tlâng lian” tia koh a ni. (Jer. 51:24, 25) Indo mite chunga Jehova thiltih târ lanna fakna hla chuan, ani chu “êng tak, ramsate chêt tlatna tlângte aia ropui zâwk” angin a târ lang a. (Sâm 76:4, NW) “Ramsa chêt tlatna tlângte” tih chuan indo hrât tak ramte a entîr a ni. (Nahum. 2:11-13 nên khaikhin rawh.) Jehova chungchângah Davida chuan: “Ka tlâng chu i lo din nghehtîr tawh a,” tiin a sawi a, chu chu Jehova’n Davida lalram chu a chawisângin, a tinghet a tihna niin a lang. (Sâm 30:7; 2 Sam. 5:12 nên khaikhin rawh.) Tlângte chuan ramte a entîr nia hriatthiamna chuan “tlâng lianpui meia kâng lai” chungchâng sawina, Thu Puan 8:8 thu awmzia hre thian tûrin mi chu a ṭanpui a ni. Tlâng meia kâng ang a nihna chu mei anga tihchhiat theihna nei sawrkârna a sawina niin a lang.
(Jeremia 51:42) Babulon chu tuipuiin a chîm ta, a fâwn nasa tak chuan a khuh zo ta.
it-2-E 882 ¶3
Tuipui
Sipai tam tak. Jeremia chuan Babulon beitute thâwm chu “tuipui ri hum hum ang” niin a sawi a. (Jer. 50:42) Chuvângin, “tuipuiin” Babulon a chîm ang tia a sawi lâwk hian, hnehna changtu Media leh Persia hruaina hnuaia sipaite chungchâng a sawina a nih ngei a rinawm.—Jer. 51:42; Dan. 9:26 nên khaikhin rawh.
Bible Chhiar
(Jeremia 51:1-11) 51:1 LALPA chuan heti hian a ti: ngai teh, Babulon chungah leh Kaldai mite chungah, tichhetu thlipui ka tîr dâwn e; 2 Sisêp zâptute ka tîr dâwn, Babulon chungah, amah zâpin a ram an zâp fai ang, chhiatna nîah chuan hualin an bei dâwn si. 3 Thal ngul hmangtuin thal ngul kuai lovin, thîr kawr hain din pawh ding suh se, a tlangvâl rual pakhat pawh zuah lovin, a sipai zawng zawng nuai bo rawh u. 4 Kaldai ramah thahin an tlu ang a, a khawlaiahte chuan chhun tlang an ni ang. 5 Israel leh Juda chu an Pathian Sipaihote LALPA chuan a hnuchhawn si lo va, an ram chu Israel Mi Thianghlim chungah sualin a khat nâ a. 6 Tlân bo ula, Babulon khaw chhûng ata mi tinin mahni nun chhanhim rawh se; a khawlohna boral phah suh u, LALPA phuba lâk hun chu a ni si a. Ani chuan a thungrûl ngei dâwn a ni. 7 Babulon chu LALPA kuta rangkachak no, lei pum tihruihna chu a in a, hnamten a uain chu an in a, chuvângin hnamte lung a mâwl zo ta. 8 Babulon chu a tlu thut a, a boral ta. Amah chu ṭah vak vak rawh u, tihdam theih âwm a nih chuan thinghnai damdawi hnawih mi lâksak rawh u. 9 Babulon chu tihdam ka tum a, a dam chuang si lo, amah kalsanin mahni ram ṭheuhvah i kal ang u, a thiam lohnain vân a tawng a, vân dum thlenga chawi kân a ni. 10 LALPA chuan ka dikna a puang ta; hawh u, Zionah i puang ang u, LALPA kan Pathian thiltih chu. 11 Thalte chu hriam ula, phâwte chelh rawh u, Media lalte rilru chu LALPAN a chawk tho ta, a thil tum chu Babulon tihchhiat thu a ni si. Chu chu LALPA phuba lâkna a ni si a, a biak in phuba ngei chu.
JUNE 12-18
PATHIAN THU AṬANGA RO HLUTE | ṬAH HLA 1-5
“Beiseina Chuan Tuar Chhuak Tûrin Min Ṭanpui”
(Ṭah Hla 3:20, 21) Ka nunna hian chûng angte chu a hre reng zêl a, ka chhûngah hian a kun reng a ni. 21 Hei hi ka han hre chhuak leh ta a, chuvâng chuan beiseina ka nei ta;
(Ṭah Hla 3:24) LALPA chu ka chanpual a ni, ka nunnain a ti a, chuvângin amah chu ka beisei ang.
w12-E 6/1 14 ¶3-4
Nang Chu “Ka Chungah I Kûn Ang”
Lungngaihna kârah Jeremia chu beiseinain a khat a. Jehova hnênah: “Min hre reng ang a, ka chungah i kûn ang,” tiin a au chhuak a ni. (Châng 20, NW) Jeremia chuan a ringhlel lo. Jehova’n ani—a nih loh leh A mite zînga inlamlêtte—chu a theihnghilh lo vang tih a hria a ni. Mahse, engkimtithei Pathian chuan eng nge a tih ang?—Thu Puan 15:3.
Jeremia chuan Jehova chu inchhîr tak zette chungah a “kûn” dâwn tih a ring nghet tlat a. Ṭawng lehlin dang chuan: “Aw, min hre reng la, ka lamah rawn kûn rawh,” tiin a sawi a ni. Hêng thuziakte hian mitthla duhawm tak min hmuhtîr thei a ni. “Leilung zawng zawng chunga Chungnungber” Jehova chu rawn kûnin, dinhmun hniam taka awm amah betute chu a chawi kâng ang a, a duhsakna a pe leh ang. (Sâm 83:18) Chu beiseina nghet tak avâng chuan Jeremia’n a thinlung hliam atân thlamuanna dik tak a hmu a. Zâwlnei rinawm chuan Jehova’n a mite inlam lêt a chhan chhuah hun chu beisei tlat a tum a ni.—Châng 21.
Jehova Chu Ka Chanpual A Ni
8 Levi-hote chuan a hnam angin Jehova chu chanpualah an nei tûr a ni a. Mahse, Pathian laka an inpêkzia leh amah an rinchhanzia târ lan nâna mi mal anga “LALPA chu ka chanpual a ni,” tih ṭawngkam an hmang hi chhinchhiah tlâk tak a ni. (ṬH. 3:24) Chutianga titu Levi-hote zînga pakhat chu zai mi leh hla phuah thiam a ni a. Ani chu Lal Davida hun laia zaipâwl hruaitu Levia mi a ni a, Asapha chhûngkaw zînga mi ni mai thei mah se, Asapha tiin kan sawi mai ang a. (1 Chro. 6:31-43) Sâm 73-ah chuan Asapha (a nih loh pawhin a thlahte zînga pakhat) chu a ngaihtuahna a buai thu kan chhiar a. Mi suaksual nuamsa taka awmte chu îtin, heti hian a sawi hial a ni: “Athlâwn maiin a ni, ka thinlung hi ka tihfai a, ka kutte sawisêlbonaa ka sil ni,” tiin. Ani chuan a rawngbâwlna hlutzia chu a theihnghilh a nih hmêl hle a; Jehova a chanpual a nihna chu a ngaihlu lo a ni. ‘Pathian hmun thianghlima a luh’ hma chuan thlarau lama a ngaihtuahna chu a buai a ni.—Sâm 73:2, 3, 12, 13, 17..
(Ṭah Hla 3:26 27) LALPA chhandamna beiseia nghah veng veng chu a ṭha a ni. 27 Mi, a tleirâwl laia nghâwngkawl bah chu a ṭha a ni.
Jeremia Ṭah Hla Aṭanga Thu Pawimawh Hrilhfiahna
3:21-26, 28-33. Engtin nge nasa taka hrehawmna chu kan tawrh theih ang? Jeremia’n a tawrh theih dân min hrilh a ni. Jehova zahngaihna thiltih nasa tak leh a lainatna tam tak chu kan theihnghilh ngai tûr a ni lo. Nung dama kan awm ringawt pawh hi beiseina kan hloh loh chhan tûr a ni a, Jehova chhandamna chu phunnâwina tel lovin, dawhthei tak leh ngawi renga kan nghah a ngai a ni. Chu bâkah, ‘kan kâ vaivutah kan dah’ tûr a ni, chu chu chhan ṭha tak neiin Pathianin harsatna kan chunga a thlen a phal tih hre reng chunga inngaitlâwm takin kan hmachhawn tûr a ni tihna a ni.
3:27. Tleirâwl laia rinna fiahna hmachhawn tih chu harsatna leh nuihsawhna tawrh pawh a ni thei a. Mahse, ‘mi tân a tleirâwl laia nghâwngkawl bah chu a ṭha a ni.’ Engvângin nge? Tleirâwl laia hrehawm tawrhna nghâwngkawl bah zirna chuan mi chu a upat lama harsatnate hmachhawn thei tûra a buatsaih avângin.
Thlarau Lam Lunghlute Laih Chhuahna
(Ṭah hla 2:17) LALPAN a tum chu a tizo va, a thu a hlen ta a; hmâna a ruat angin a tichhia e lainat lovin; hmêlma chu i chungah a lâwmtîr e, i hnehchhiahtute kî a chawisâng ta.
Jeremia Ṭah Hla Aṭanga Thu Pawimawh Hrilhfiahna
2:17—Jerusalem nêna inkûngkaihin Jehova’n eng “thu” chiah nge a hlen? Heta a kawh hi Leviticus 26:17 a nih hmêl hle, chu chuan: “In chungah chuan ka hmai ka thuar ang a, in hmêlmate hmaah in tlâwm ang: nangmahni hawtuten in chungah ro an rêl ang a, tuma ûm lohvin in tlân ang,” a ti.
(Ṭah Hla 5:7) Kan pate zawng an sual a, an awm ta lo va; an khawlohnate kan phur a ni.
Jeremia Ṭah Hla Aṭanga Thu Pawimawh Hrilhfiahna
5:7—Jehova’n pi leh pute thilsualtih avângin mite chu a hrem em? Hrem lo, Jehova chuan thlahtute sualna avângin mite chu a hrem lo. “Kan zain Pathian hnênah mahni chanchin kan sawi ṭheuh tûr a ni,” tiin Bible chuan a sawi. (Rom 14:12) Amaherawhchu, an sualna rahchhuah chu a châm rêng theiin, a hnua an thlahte’n an tuar thei a ni. Entîr nân, hmân lai Israelte’n milem an biakna chuan a hnua Israel mi rinawmte tân pawh felna kawng zawh chu a tiharsa a ni.—Exodus 20:5.
Bible Chhiar
(Ṭah Hla 2:20–3:12) En la, aw LALPA, ngai teh, hetianga i tih tâkate hi! Hmeichhiaten an rîla rah, fanau an duat laite chu an ei tûr em ni? Puithiam leh zâwlnei Lalpa hmun thianghlimah chuan thahin an awm tûr em ni? 21 Tleirâwl leh putar kawtthlêr leian an thal phung e, ka nula leh vâl rual khandaihin an tlu; nangin i thinrim nîah chuan i that ta, i sâm buan e lainat lovin. 22 Kûtpui nî angin ka râpzâwngte kil tin aia i ko va, LALPA thinrim nîah chuan tlân chhuak leh zuah rêng an awm lo ve: ka chawi leh ka kaihtlei tâkte chu ka hmêlmain a tiboral ta.
3 A thinurna talhtum hnuaia tihhrehawmna hretu ka ni a: 2 Thimah mi khalh lûtin mi kaltîr a, êngah ni lovin; 3 Keima chungah nilêngin a kut a thlâk a thlâk ngei mai. 4 Ka tîsa leh vun a tisâwng a, ka ruhte a titliak a. 5 Ka lakah dai a theu va, khâkna leh hrehawmnain mi hung; 6 Hmun thimah min chêntîr a, thi daih tawhte angin. 7 Ka chhuah theih loh nân mi hung vêl a; ka khaidat a tirit a. 8 A ni, ṭanpui ka ngena ka au pawhin ka dîlna a khâr hnan a. 9 Lungchherin ka kalkawngte a hnawh a, ka kawngte a tikawi a. 10 Ka lakah savawm mi châng ang, sakeibaknei tawm ru khiau ang mai a ni. 11 Ka kawngte mi hruai kawisak a, mi pawt sawm a, khawhar takin mi siam a. 12 A thal ngul a kuai a, a kah tumah mi dah a.
JUNE 19-25
PATHIAN THU AṬANGA RO HLUTE | EZEKIELA 1-5
“Ezekiela Chuan Pathian Thuchah Puan Chhuah Chu Nuam A Ti”
(Ezekiela 2:9–3:2) Tin, ka han en a, ngai teh, kutin mi rawn ban a, tin, ngai teh, kutah chuan lehkhabu zial a awm a; 10 ka hmâah a han pharh a, a chhûng lam leh a pâwn lama ziak a ni a; ṭahnate, lusûnna te, chungpikna te ziakna a awm a.
3 Tin, ka hnênah, “Mihring fapa, i hmuh kha ei rawh; lehkhabu zial hi ei la, Israel chhûngte hnênah chuan thu va sawi rawh,” a ti a. 2 Chutichuan ka kâ ka âng a, lehkhabu zial chu mi eitîr ta a.
In Tina Rawngbawlnaa Harsatnate Hnehin
6 Ezekiela lehkhabu chuan huaisen taka thu kan sawi theihna tûra min ṭanpuitu thil dang a târ lang a. Jehova chuan inlârnaah Ezekiela chu “ṭahnate, lusûnna te” a chhûng lam leh a pâwn lama inziak lehkhabu zial chu a pe a, a hnênah chuan: “Mihring fapa, i pumah pai la, he lehkhabu ziak ka pêk che hian i kawchhûng tikhat rawh,” tiin ei tûrin thu a pe a ni. Chu inlârna awmzia chu eng nge ni? Ezekiela chuan a thuchah sawi tûr chu a hre chiang êm êm tûr tihna a ni a. Ama taksa pêng ang mai niin, a rilru veizâwng a khawih pha tûr tihna a ni bawk. Zâwlnei chuan: “Ka ei ta a, a thlumzia chu ka kâah chuan khawizû ang mai a ni,” tiin a sawi belh a ni. Pathian thuchah mipui zînga tlângaupui chu Ezekiela tân thil duhawm tak—khawizû thlum ang mai a ni a. Ani chuan ngaithla duh lote hnêna vaukhânna thu chu a hrilh ngai mah se, Jehova aiawh leh a hnathawh tûr pêk thawh zawh chu chanvo ropui takah a ngai a ni.—Ezekiela 2:8–3:4, 7-9 chhiar rawh.
7 He inlârna hian tûn laia Pathian chhiahhlawhte tân zir tûr ṭha tak a pai a ni. Keini pawhin kan thawhrimna hlut ṭhîn lotute hnênah vaukhânna thuchah hrilh tûr kan nei a. Kan tân Kristian rawngbâwlna chu Pathian min pêk chanvo hlu tak anga thlîr zêl tûr chuan, thlarau lama kan inchâwm ṭhat a ngai a ni. A pâwnlâng mai emaw, a châng châng chauh emawa zirna neih chu Pathian Thu hriat chian nân a tâwk ṭhîn lo. I mi mal Bible chhiarna leh zirna chu i tiṭha lehzual theiin, hun bi nei zâwkin i nei thei ang em? I thu chhiar chu ngun lehzualin i ngaihtuah zing zâwk thei ang em?—Sâm 1:2, 3.
it-1-E 1214
Kawchhûng
Chaw chu pumpuiin a pai ṭawih a. Chumi nih phung chu rilru lam, a nih loh leh thlarau lama thil pai ṭawihna entîrna atâna hman a ni a; inlârnaah Ezekiela chu lehkhabu zial chu ei a, a kawchhûng (Heb., me·ʽimʹ) tikhat tûra hrilh a ni. Ezekiela chuan lehkhabu ziala thuziakte chhût ngunna leh hriatrengna hmangin thlarau lam chakna a nei tûr a ni a. Chutiang chuan thlarau lamah a inchâwm ṭha a, a puan chhuah tûr thuchah pêk a ni.—Ezekiela 3:1-6; Thu Puan 10:8-10 nên khaihkhin rawh.
(Ezekiela 3:3) Tin, ani chuan ka hnênah, “Mihring fapa, i pumah pai la, he lehkhabu zial ka pêk che hian i kawchhûng tikhat rawh,” a ti a. Tichuan ka ei ta a, a thlumzia chu ka kâah chuan khawizû ang mai a ni a.
Ezekiela Bu Aṭanga Thu Pawimawh Hrilhfiahna—I
2:9–3:3—Engvângin nge ṭahna leh lusûnna lehkhabu zial chu Ezekiela tân thil thlum tak a nih? Ezekiela tâna lehkhabu zial thlum tak nihtîrtu chu a hna thawh tûr chunga a rilru put hmang hi a ni a. Ezekiela chu zâwlnei anga Jehova rawng a bâwl theih avângin a lâwm hle a ni.
Thlarau Lam Lunghlute Laih Chhuahna
(Ezekiela 1:20, 21) Thilnungte chu thlarau duhna lam lamah an kal a, tawlailîrte pawhin thilnungte tih ang chiahin an ti ve a, thilnungte thlarau chu tawlailîrte pawhin thilnungte thlarau chu tawlailîr kêahte a awm si a. 21 Tichuan, thilnungte chu an kalin emaw, an dinin emaw, boruaka chawikân an nihin emaw tawlailîrte pawh chutiang bawk chuan an awm ṭhîn, thilnungte thlarau chu tawlailîr kêahte chuan a awm si a.
(Ezekiela 1:26-28) Tin, an lu chunga vân dum chungah khân lalṭhutthlêng ang tak, sapphir lung ang maia lang hi a awm a: tin, lalṭhutthlêng ang tak chungah chuan mihring ang taka lang hi a awm a. 27 Tin, a kâwng achin chung lam chu ṭhihna puak sur ang maiin ka hmu a, a kâwng ni âwm achin hnuai lam chu mei ang mai hi niin ka hmu a, a êng vêl pup mai a. 28 Ruah sûr nia chhûm chunga chhimbâl lan dân ang mai hi a vêla êng lan dân chu a ni a. Hei hi LALPA ropuina lan dân ang chu a ni. Tin, ka hmuhin bawkkhupin ka tlu a, thusawitu aw chu ka hria a.
Ezekiela Bu Aṭanga Thu Pawimawh Hrilhfiahna—I
1:4-28—Vân tawlailîr chuan eng nge a entîr? Tawlailîr chuan Jehova inawpna pâwl vân lam pêng, thlarau thil siam rinawmte hmanga din chu a entîr a ni. Chu tawlailîr chakna hnâr chu Jehova thlarau thianghlim hi a ni a. Chu tawlailîr Khalhtu, Jehova aiawhtu chu a ropui hle. A muanawmna chu chhimbâl mawi tak hian a entîr a ni.
(Ezekiela 4:1-7) “Nang mihring fapa, leirawhchan phêk la la, i hmâah dah la, chumiah chuan khawpui, Jerusalem khawpui lem ziak rawh. 2 A vêla hualin kulh siam hnan la, mual pâwng siam hnan rawh, sipai riahbûkte siam hnan la, kulh sut chhiatnate a vêlin siam hnan rawh. 3 Tin, nangin thîr phêk la la, nangmah leh khawpui inkârah chuan thîr bang atân chhawng rawh; chu lam chu hmachhawn la, hualin a awm ang a, nangman i hual tûr a ni. Hei hi Israel chhûngte tân entîr lâwkna a ni ang. 4 Tin, nang chu vei lam delhin mû la, i chungah Israel chhûngte khawlohna nghat rawh. An khawlohna tuarin ni 390 chhûng mu rawh kum khat hrem an tuar aiah ni khat zêl i tuar dâwn a ni. 6 Chumi zawhah inlet la, i ding lam delhin mu leh rawh, Juda chhûngte khawlohna chu ni sawmli i tuar leh tûr a ni, hrem an tuar tûr kum khat zêlah ni khat. 7 Bân hlîm têl tâwlin Jerusalem hual lam kha hawi la, a chung thu sawi chhuak rawh.
Ezekiela Bu Aṭanga Thu Pawimawh Hrilhfiahna—I
4:1-17—Ezekiela chuan Jerusalem hual a nih tûr thu lem changin a entîr tak zet em? Ezekiela chuan chhang ur nâna hman tûr thil thlâk tûra a dîlna leh Jehova’n thlâk a phalsakna chuan lem changin a entîr tak zet tih a târ lang. Vei lam delha a mutna chu kum 390 chhûnga hnam sâwm lalram bawhchhiatna—din ṭan a nihna B.C.E. 997 aṭanga Jerusalem tih chhiat hun B.C.E. 607 thleng—atân a ni. Ding lam delha a mutna chu Judate kum 40 chhûng sualna, Jeremia zâwlneia ruat a nihna B.C.E. 647 aṭanga B.C.E. 607 thleng atân a ni. Chu ni 430 chhûng zawng chuan, Ezekiela chu chaw leh tui tlêm tê chauh rinchhanin a nung a, chu chuan Jerusalem hual a nih chhûnga ṭâm tla tûr chu a entîr lâwk a ni.
Bible Chhiar
(Ezekiela 1:1-14) Kum sawmthumna, thla lina, ni nganaah chuan, kei Ezekiela puithiam Buzia fapa chu, Babulon Kebar lui kama Juda sal tângte zîngah ka awm a. Vân a lo inhawng a, Pathin inlârna ka hmu a. 2 Lal Jehoiakina sala a tân kum ngana a ni. 3 Babulon rama Kebar lui kamah chuan LALPA thu sawi ka hria a, a thiltihtheihna chuan mi tuam a. 4 Tin, ka han en a, hmâr lam ata thlipui nasa tak lo thawk ka hmu a. Chhûmpui nasa tak aṭang hian kâwl hi a lo phe zawr zawr a, a kiang vêlte chu a êng pup mai a. Kâwl a phêtnaah chuan êng eng emaw, dâr tle mi ang hi a awm a. 5 Thipui lai takah chuan thilnung pali ang, mihring ruangâm pu ka hmu a, 6 hmai pali leh thla pali an nei ṭheuh a. 7 An kê an thluang a, bâwng tin ang an nei, dâr tle mi angin an êng a. 8 Hmai pali leh thla pali bâkah chuan mihring kut ang pali an nei ṭheuh a, an thla hnuaiah zêl a awm a. 9 Thilnungte chuan an thla pahnih an zâr pharh ṭheuh chuan an thla hmâwrte chu a intawk pha a, kil li neiin an ding a, an chêt sawn pawhin an zain an taksa her chuang lovin an che sawn ṭhîn a ni. 10 Thinlung palite chuan hmai pali an nei ṭheuh a, an hma lamah mihring hmêl an pu a, ding lamah sakeibaknei hmêl ang, vei lamah bâwngpa hmêl ang, hnung lamah mupui hmêl ang. 11 Thilnung paliten an thla pahnih ṭheuh chu a hmâwr intawk phain an zâr ṭheuh a, a dangte chu an taksa hrûlah an khup a. 12 Thilnungte chuan khawi lam pawh an hawi sa vek a ni, inher lovin thlarauvin a duhna lam apiangah an kalho thei. 13 Thilnungte zîngah chuan, êng eng emaw, meichher alh deuh ang mai hi a awm a, englai pawhin a che a. Mei chu a alh êng pup a, kâwlphe angin a êng chhuak zuai zuai a. 14 Thilnungte chu kâwlphe angin an vir tawn zawk zawk a.
JUNE 26–JULY 2
PATHIAN THU AṬANGA RO HLUTE | EZEKIELA 6-10
“Dam Khawchhuak Tûra Chhinchhiah I Ni Ang Em?”
(Ezekiela 9:1, 2) Tichuan ka beng hriatah chuan, “Khawpui enkawltute chu mi tin tihboralna hriamrei kengin lo hnai rawh se,” tiin ring takin a au va. 2 Tin, ngai rawh, hmâr lam kawngka chungnung kalna aṭang chuan mi paruk an lo kal a, mi tinin tihhlumna hriamhrei chu an keng ṭheuh va; tin, an laia mi pakhat puan zai sîn sin chuan lehkhatui bûr a pai a. Tin, an lût ta a, dâr maichâm bulah chuan an ding ta a.
w16.06-E 16-17
Chhiartute Zawhna
Ezekiela inlârnaa lehkhatui bûr paitu leh tihhlumna hriamhrei keng mi parukte chuan tute nge an entîr?
▪ Anni chuan Jerusalem tihchhiatnaa tel vân lam sipaite leh Armageddon-a Setana khawvêl suaksual tihboralnaa tel tûr vân lam sipaite an entîr a. Hei hi hriatthiamna hlui siamremna a ni. Engvânga siamrem ngai nge ni?
B.C.E. 607 hma, Jerusalem tihchhiat a nih hmain Jehova chuan Ezekiela hnênah chuta thilthleng tûrte chu inlârnain a hmuhtîr a. Ani chuan, Jerusalema thilthleng ṭha lo tam tak chu inlârnaah a hmu a ni. Chutah, ‘tihhlumna hriamrei keng ṭheuh’ mi paruk a hmu a. An zîngah chuan mi pakhat “puan zai sîn sin, lehkhatui bûr paitu” a awm bawk. (Ezekiela 8:6-12; 9:2, 3) Chu pa chu khawpui fang chhuak a, “a chhûnga thiltenawm tih tawhte avânga thawpika ṭap ṭhînte chu an chalah chhinchhiah” tûra hrilh a ni a. Chutah, hriamhrei keng mi parukte chu chhinchhiahna nei lo khawpuia awm zawng zawngte tihlum tûra hrilh an ni. (Ezekiela 9:4-7) He inlârna aṭang hian eng nge kan zir theih a, lehkhatui bûr kengtu chu tu nge ni?
Ezekiela chuan he inlârna hi B.C.E. 612-ah a hmu a. Chu chu hrilh lâwkna a ni a, Jehova’n a hnu kum ngaa Babulon sipaite Jerusalem a tihchhiattîr khân, a vawi khatna atân a thleng famkim a. Chutiang chuan, Babulon mite chu a thuâwih duh lotute hrem nân a hmang a ni. (Jeremia 25:9, 15-18) Mahse, khawpui chhûnga thilthleng ṭha lo zawng zawngte pawm duh lo Juda mi felte chu engtin nge an awm ang? Anni chu Jehova’n a chhanhim a ni.
Inlârnaah chuan, Ezekiela chu mite chhinchhiahnaah a tel lo va, khawpui tihchhiatnaah lah a tel hek lo. Chu ai chuan, Jerusalem tihchhiatnaa kaihruaitu chu vântirhkohte an ni zâwk a ni. Chuvângin, he hrilh lâwkna hian vâna thilthlengte min hriattîr a. Jehova chuan a vântirhkohte chu mi suaksualte tiboral tûr leh mi felte chhan chhuak tûra ruahmanna siam tûrin a hrilh a ni.
He hrilh lâwkna hi nakin hunah pawh a thleng famkim ang. Lehkhatui bûr kengtu chuan leia la dam hriak thih a la bângte a entîr niin kan lo sawi ṭhîn a. Mite’n chanchin ṭha an ngaithlâk a, an pawm hian anni chu chhandam ni tûra chhinchhiah niin kan lo sawi tawh ṭhîn bawk. Mahse, tûn hnai mai khân, he hrilh lâwkna kan hrilhfiah dân kan thlâk a ngai tih a lang chiang a. Matthaia 25:31-33 aṭangin Isua chu mite rorêlsaktu tûr a ni tih kan hria a. Chu chu nakin hun hrehawm nasa tak chhûngin a ti ang. Chutih hunah chuan, berâm anga rorêlsakte chu an dam khawchhuak ang a, kêl anga rorêlsakte erawh chu tihboral an ni ang.
Chuti chu, Ezekiela inlârna aṭangin eng nge kan zir? Zir tûr pangate chu târ lang ta ila:
(1)Jerusalem tihchhiat a nih hmain, Ezekiela te, Jeremia te, leh Isaia te chuan khawpui chunga thilthleng tûr chungchângah mite an vaukhân a. Anni chu vêngtute an ni. Tûn laiah, Jehova chuan hrehawm nasa tak inṭan hmaa a mite zirtîr tûr leh mi dangte vaukhân tûrin hriak thihte zînga mi tlêm tê chu a hmang a. A nihna takah chuan, Pathian mi zawng zawng—Krista chhûngte—chuan he vaukhânna hna hi an thawk a ni.—Matthaia 24:45-47.
(2) Ezekiela chuan dam khawchhuak tûrte a chhinchhiah lo va, tûn laia Pathian mite pawhin an chhinchhiah hek lo. Nakin huna thil lo thleng tûr chungchâng chu mite hnênah hrilhin an vaukhân mai zâwk a ni. He khawvêl puma thu hrilh rawngbâwlna hi vântirhkohte ṭanpuinaa thawh a ni.—Thu Puan 14:6.
(3) Ezekiela hun laia chhan chhuahte chuan an chalah chhinchhiahna tak tak an nei lo va, tûn laia chhandam ni tûrte pawhin chhinchhiahna tak tak an nei lo vang. Hrehawm nasa taka dam khawchhuak tûrin eng nge tih ngai? Vaukhânna thu an hriat hunah, Isua entawn dân an zir a, Pathian hnênah an inpumpêk a, chanchin ṭha hrilha Krista unaute an thlâwp bawk a ngai a ni. (Matthaia 25:35-40) Hrehawm nasa tak chhûngin, chûng mite chu chhinchhiahna pêk—chhan chhuah tûra thlan—an ni ang.
(4) Lehkhatui bûr paitu chuan Isua a entîr a. Hrehawm nasa tak chhûngin Isua chuan mipui tam takte chu berâm anga rorêlsakin anni chu a chhinchhiah ang a. Anni chuan he leia chatuana nun theihna hun remchâng an nei ang.—Matthaia 25:34, 46.
(5) Tihhlumna hriamhrei keng mi parukte chuan, Isua hruai vân lam sipaite an entîr a. Anni chuan rei lo têah hnamte leh mi suaksual zawng zawngte chu an tiboral ang.—Ezekiela 10:2, 6, 7; Thu Puan 19:11-21.
He inlârna aṭanga kan thu hriatte hian Jehova’n mi suaksualte rualin mi felte a tiboral lo vang tih rinnghehna min neihtîr a. (2 Petera 2:9; 3:9) Chu bâkah, kan hun laia thu hrilh rawngbâwlna hi a pawimawh hle tih min hriat nawntîr bawk. Mi tinte hian tâwpna a lo thlen hmain vaukhânna thu an hriat a ngai si a!—Matthaia 24:14.
(Ezekiela 9:3, 4) Tin, Israelte Pathian ropuina chu a awmna cherub aṭang chuan chu in kawngka bulah chuan a chho va; tin, puan zai sîn sin, lehkhatui bûr paitu kha a au va. 4 Tin, LALPA chuan a hnênah, “Khawpui chu fang la, Jerusalem chu fang chhuak rawh; a chhûnga thil tenawm tih tawhte avânga thawpika ṭap ṭhînte chu an chalah chhinchhiah ang che,” a ti a.
(Ezekiela 9:5-7) Tin, mi dangte hnênah chuan ka hriat ngeiin, “A hnungah sâwn khawpui chu fang chhuak ula, kut thla rawh u, in mitin hmuh hmaih suh sela, khawngaih hek suh u. 6 Putar te, tlangvâl te, nula te, naupangte leh nute that fai vek rawh u. Chhinchhiahna neite erawh chu rawn hnaih suh u; ka hmun thianghlimah ṭan rawh u,” a ti a. Tichuan, biak in kawta upahovah chuan an ṭan ta a. 7 Tin, ani chuan ka hnênah, “In chu tibawrhbâng ula, a hung chhûng te chu mi ruangin tikhat ula: chhuak rawh u,” a ti a. Tin, an chhuak ta a, khawpuiah chuan an che ta a.
Thlarau Lam Lunghlute Laih Chhuahna
(Ezekiela 7:19) An tangkarua leh an rangkachakte chuan LALPA thinurna nîah chuan a chhan chhuak thei lo vang a, an nun a titlai lo vang a, an pum a tipuar hek lo vang, an khawlohna tlûkna a nih tawh ṭhin avângin.
Pathian Zirtirna Ropui Bikzia
10 Pathian Jehova chuan nakina thil lo thleng tûrte a hriat theih avângin, amah chauhvin nakin hun atân min buatsaih thei a. Ani chuan mihringte nakin hun beisei tûr chu a siam a ni. (Is. 46:9, 10) Bible hrilh lâwkna chuan “LALPA ni ropui tak chu a hnai” tih a târ lang. (Zep. 1:14) Chu mi nî chungchângah, Thufingte 11:4 thu chu a thleng dik ang: “Thinur nî chuan sum leh paiin ṭangkaina a nei lo vang, felna erawh chuan thihna ata a chhan chhuak ang,” tih chu. Setana khawvêl chunga Pathian Jehova rorêlna a lo thlen huna thil pawimawh ber tûr chu Pathian pawm nihna hi a ni a. Sum leh pai chuan hlutna rêng a nei lo vang. Dik takin, Ezekiela 7:19 (C.L. Re-edited) chuan: “An tangkate chu khawlaiah an paih ang a, an rangkachakte pawh thil bawlhhlawh ang a ni ang,” a ti. Chu mi lo hriat lâwkna chuan tûna fing taka thil ti tûrin min ṭanpui thei a ni.
(Ezekiela 8:12) Tichuan ka hnênah, “Mihring fapa, Israel chhûng upate thim hnuaia thiltih chu i hmu em? Mi tinin milim pindana an tih chu? ‘LALPA chuan mi hmu lo va, LALPA chuan ram chu a kalsan tawh alâwm,’ an ti si a.
Pathian Thlarau I Inhruaitir Em?
14 Rinna tih chu a bul berah chuan Pathian Jehova chu kan tân a tak tihna a ni. Pathian chu kan tâna a tak loh chuan, thil sual tihnaah awlsam takin kan tel mai ang. Hmân lai Pathian mite chunga thilthleng hi han ngaihtuah teh. Jehova chuan zâwlnei Ezekiela hnênah mahni in luma thil tenawm tak an tihte chu a hriattîr a ni: “Mihring fapa, Israel chhûng upate thim hnuaia thiltih chu i hmu em? Mi tinin milim pindana an tih chu? ‘LALPA chuan mi hmu lo va, LALPA chuan ram chu a kalsan tawh alâwm,’ an ti si a,” tiin. (Ezek. 8:12) An harsatna belhchhahtu chu i lo hria em? Anni chuan an thiltih chu Jehova’n a hria tih an ring lo va. An tân Jehova chu a tak lo a ni.
Bible Chhiar
(Ezekiela 8:1-12) Tin, kum rukna, thla rukna, chumi thla ni nga nîah chuan heti hi a ni a, ka inah ka ṭhuta, Juda upate ka hmâa an ṭhut lai chuan Lalpa PATHIAN kut chu ka hnungah a lo awm a. 2 Tichuan, ka han en a, ngai teh, mi mei anga lang hi a lo awm a; a kâwng achin thlang lam ni âwma lang chu mei a ni a; a kâwng achin chung lam ṭhihna zia ang êng tak a ni. 3 Tin, kut ang hi a rawn zen chhuak a, ka chal samah mi man ta a, thlarau chuan lei leh vân kârah mi chawi kâng ta daih mai a, Pathian inlârnain Jerusalemah mi hruai a. Jerusalem hmâr lam hung chhûngnung kawngka khârna bulah chuan mi thlen ta a; tah chuan thîkna lim ṭhut hmun a awm a, chu chuan a thîktîr ṭhîn a. 4 Tin, ngai rawh, phaizâwla ka hmuh ang zêl khân chutah chuan Israel Pathian ropuina chu a awm. 5 Tichuan ani chuan ka hnênah, “Mihring fapa, hmâr lam hawiin mit han lên teh le,” a ti a. Chutichuan hmâr lam hawia ka mit ka han leh chuan, ngai teh, maichâm kawngka hmâr lam luhnaah chuan he thîkna lim hi a lo awm a. 6 Tin, ani chuan ka hnênah, “Mihring fapa, an thiltih kha i hmu em? Israel chhûngten thil tenawm nasa tak, heta an tih ngei, ka in thianghlim ata hla taka ka kal bo nân an tih kha? Mahse thil dang tenawm zawmah i la hmu leh ang,” a ti a. 7 Tin, hung chhûng luhnaah chuan mi hruai a; tin, ka han en a, bangah hian âwng zuk lo awm a. 8 Tichuan ka hnênah, “Mihring fapa, bang kha han ker teh,” a ti a. Tin, ka han ker tâk chuan kawngkhâr a lo awm reng mai a. 9 Tin, ani chuan ka hnênah, “Lût la, heta sual tenawm tak an tih hi en teh,” a ti a. 10 Tichuan ka lût a, ka hmu a, ngai rawh, thilnung chi tinrêng lem te, ramsa tenawm lem te, Israel chhûngte milim zawng zawngte chu bangah chuan a vêlin a lo chuang a. 11 Tin, an hmâah chuan Israel chhûng upate zînga mi sawmsarihte chu an ding a, an laiah chuan Saphana fapa Jaazania a ding a, mi tin chuan berhbu an keng ṭheuh va; tin, rimtui khu rim chu a chho ta mup mup a. 12 Tichuan ka hnênah, “Mihring fapa, Israel chhûng upate thim hnuaia thiltih chu i hmu em? Mi tinin milim pindana an tih chu? ‘LALPA chuan mi hmu lo va, LALPA chuan ram chu a kalsan tawh alâwm,’ an ti si a.