Nun leh Rawngbâwlna Inzirna Lehkhabu Atâna Thu Lâk Chhuahnate
SEPTEMBER 4-10
PATHIAN THU AṬANGA RO HLUTE | EZEKIELA 42-45
“Biakna Thianghlim Din Ṭhat Leh A Ni!”
(Ezekiela 43:10-12) Tin, nang mihring fapa, a in pui lem chu Israel chhûngte hnênah entîr rawh, an thiltih sual chu an zahpui theih nân, a ruahman dân pawh lo teh rawh se. 11 Tin, an thiltih zawng zawngte an zahpui chuan a in pui awm dân te, a chhuahna te, a luhna te, a rîruang te, a hman dân te, a vawn dân te entîr la, an mithmuh ngeiah ziak rawh; a dân pum pui leh a hman dân zawng zawng an vawna, an zawm theih nân. 12 Hei hi a in pui atâna dân tûr chu a ni: tlâng chhîp chung zâwl vêl zawng zawng chu hmun serh theihtâwp tûr a ni, ngai teh, hei hi in pui atâna dân chu a ni e.
Pathian Biakin Lamah “I Rilru Nghat Tlat Rawh!”
3 He inlârna thui tak Ezekiela lehkhabu bung kua lai awh hi, thutiam rinna tihngheh nân Juda hnawhchhuahte hnênah pêk a ni. Biakna thianghlim chu siamṭhat a ni leh dâwn! Chu mi kum zabi aṭanga kan hun thleng hian he inlârna hi Jehova hmangaihtute tân chuan mi tichaktu bul a la ni ta reng a ni. Engtin nge a nih? Zâwlnei Ezekiela inlârna hian Israel vâkvaite tân eng nge awmzia a neih lo zirho ila. Hlâwm chi hrang pali a nei a: Biak in, puithiam hote, lalte leh ram a ni.
it-2-E 1082 ¶2
Biak In
Ezekiela hmuh biak in inlârna. Jerusalem khawipui leh chuta awm Solomona biak in tihchhiat a nih hnu kum 14-na, B.C.E. 593-ah, puithiam-zâwlnei Ezekiela chu inlârna hmanga tlâng sâng tak chîpa hruaia awmin Jehova biak in ropui tak chu hmuhtîr a ni a. (Ezek. 40:1, 2) Chu chu mi rinawmte tâna thlamuanna ni fâwmin, Juda saltângte timualpho tûr leh inchhîrtîr tûrin, Ezekiela chu “Israel chhûngte” hnêna a thil hmuh zawng zawng puang tûra tih a ni a. (Ezek. 40:4; 43:10, 11) Inlârna chuan tehna chungchâng chipchîar tak chu min ngaihventîr a. Tehna atâna an hman chu “tiang” (tiang sei zâwng chu, 3.11 m; 10.2 ft) “tawng” (tawng sei zâwng chu, 51.8 cm; 20.4 in) a ni a. (Ezek. 40:5) Tehnate sawi lan a nih avângin, inlârnaa hmuh biak in hi Israel mite Babulon sal tânna aṭanga an chhuah hnua Zerubbabela biak in sak atâna entawna hman a ni tiin ṭhenkhat chuan an ring a ni. Mahse, chutiang chiah chuan a ni tih rin tûr ni lo.
(Ezekiela 44:23) Ka mite chu thil serh leh serh lo danglamzia an zirtîr tûr a ni, thil thiang leh thiang lo an thliar hrantîr tûr a ni.
(Ezekiela 45:16) Rama mi zawng zawngte chuan Israel lal hnênah he thilhlan hi an pe ang.
Pathian Biakin Lamah “I Rilru Nghat Tlat Rawh!”
10 Hêng zawng zawng hian chûng vakvaite thinlung chu a va tiphûr ngei dâwn êm! Chhûngkaw tinte chuan ramah chuan rochan an neih tûr chu a chiang a ni. (Mika 4:4 khaikhin rawh) Chu mi hmun laili lai tak chu biakna thianghlim chuan luahin chawisân a ni dâwn a ni. Tin, Ezekiela inlârna hmuhah hian lal chu, puithiamho angin mipuiin ram bung serh hran tawhah chuan an chêng ang tih a târ lang bawk a ni. (Ezekiela 45:16) Tichuan, ram siamtharah chuan mipuite chu Jehova’n hma hruai tûra a thlante hnêna hna thawh khâwm tûrin, leh an mahni kaihhruaina nêna thawkhova, an mahni chhawmdâwl tûr an ni. He ram hi inawpna, thawhhona, leh muanna entîrna a ni.
Thlarau Lam Lunghlute Laih Chhuahna
(Ezekiela 43:8, 9) An kawngkâ chu ka kawngka bul taka siamin, an kawngka biang chu ka kawngka biang hrûla dahin anmahni leh keima inkârah bang chauh awmtîrin an thiltih tenawm te chuan ka hming thianghlim chu a tibawrhbâng ta a; chuvângin ka thinurnain anmahni chu ka tiboral ta a ni. 9 Tûn aṭang hian hurnate, an lal ruangte chu ka lak aṭanga hla takah dah bo sela; tin, an zîngah kumkhuain ka chêng ang.
it-2-E 467 ¶4
Hming
Israelte’n Pathian hming pu hnam an nih anga a thupêk fel an zawm loh avângin Pathian hming chu tihbawrhbâng, a nih loh leh tihhmingchhiatin a awm a. (Ezek. 43:8; Amos. 2:7) Israel mite chu an rinawm lohna avângin Pathianin a hrem a, chu chuan hnam dang mite tân zah lo taka a hming sawina hun remchâng a pe bawk. (Sâm 74:10, 18; Is. 52:5 Khaikhin rawh.) Hremna chu Jehova hnên aṭanga lo kal a ni tih an hriat loh avângin, chûng hnamte chuan Israelte chunga chhiatna lo thleng chu Jehova’n a mite humhim thei lo niin an ngai sual a ni. Chutianga a hming tihbawrhbânna tireh tûrin Jehova chuan a hming avângin Israel la bângte chu an ramah a din ṭha leh a ni.—Ezek. 36:22-24.
(Ezekiela 45:9, 10) Lalpa PATHIAN chuan heti hian a ti: Aw, Israel lalte u, tâwk tawh rawh se, pâwngnêkna leh inramna chu bân daih ula, fel taka rêl leh dik taka tih chîng tawh ula, ka mite hnawh chhuah ṭhin chu bân tawh u, tih hi Lalpa PATHIAN thu chhuak a ni. 10 Bûkna leh bûk lung dik tak hman ṭheuh tûr a ni. Ephah pawh Bath pawh a dik tûr a ni.
it-2-E 140
Rorêlna Fel
Chuvângin, Jehova chuan a pawm hlawh duhtute chu rorêlna fel chungchânga a tehnate hria a, zâwm tûrin a phût reng a ni. (Is. 1:17, 18; 10:1, 2; Jer. 7:5-7; 21:12; 22:3, 4; Ezek. 45:9, 10; Amos. 5:15; Mik. 3:9-12; 6:8; Zak. 7:9-12)
Bible Chhiar
(Ezekiela 44:1-9) Tin, hmun thianghlim kawngka pâwnta zâwk, khaw chhak lam hawi lamah chuan mi hruai lêt a, khâr a lo ni a. 2 Tin, LALPA chuan ka hnênah, “He kawngkâ hi a inkhâr reng ang a, a inhawng lo vang a, tumah an lût hek lo vang! LALPA, Israel Pathian chu a lo luh tawh avângin; a inkhâr reng dâwn a ni. 3 Lal erawh zawng LALPA hmâa chaw ei tûrin chutah chuan a ṭhu chauh vang; sumhmun kawngkâah a lût ang a, chumiah vêk chuan a chhuak leh ang,” a ti a. 4 Tin, hmâr lam hawi kawngkaah chuan in pui kawtah mi hruai a; tin, ka han en a, ngai teh, LALPA in chu LALPA ropuinain a khat vek mai a; tin, bawkkhupin ka tlu ta a. 5 Tin, LALPA chuan ka hnênah, “Mihring fapa, LALPA in hman dân leh a dânzawng zawng i hnêna ka sawi chungchângah chuan i beng chhî la, i mit lên la, i rilruah chhinchhiah ṭha tê rawh khai! A in pui luh dân te, a hmun thianghlim ata chhuah dân te chu i rilruah chhinchhiah ngun ang che. 6 Tin, helhmang, Israel chhûngte ngei hnênah chuan heti hian i sawi tûr a ni: Lalpa PATHIAN chuan heti hian a ti a ni: Aw, nangni Israel chhûngte u, in tenawmna zawng zawng belhchhah tûra awze mi, thinlung leh tîsa serhtan loh, ka chhang te, thau te, thisen te in hlan laia ka hmun thianghlim, ka in ngei tibawrhbâng tûra in hruai luh a, ka thuthlung in bawhchhiatah khân in tenawmna zawng zawngte chu lo tâwp tawh rawh se. 8 Tin, ka thil serhte nangnin in vawng lo va, hêng awze mite hi ka hmun thianghlimah in aia vawngtuah in ruat ta zâwk a. 9 Lalpa PATHIAN chuan heti hian a ti a ni: Awze mi tumah, thinlung leh tîsa serhtan loh, Israel fate zînga awze mi rêng rêng chu ka hmun thianghlimah an lût tûr a ni lo.
SEPTEMBER 11-17
PATHIAN THU AṬANGA RO HLUTE | EZEKIELA 46-48
“Din Thar Leh Israelte Dawn Tûr Malsâwmnate”
(Ezekiela 47:1) Tichuan in pui kawngkhârah chuan mi hruai lêt a, tin, ngai teh, in pui kawngka bul hnuai aṭang chuan, chhak lam hawiin tui a lo luang chhuak a; in pui chu chhak lam hawi a ni si a: tin, tui chu maichâm chhim lam in pui sîr ding lam hnuai aṭangin a lo luang thla a.
(Ezekiela 47:7-12) Tin, ka han kîr chuan, ngai teh, vaukam tluan chuan, vaukam tawnin thing tam tak a lo awm a. 8 Tin, ani chuan ka hnênah, “He tui khaw chhak ram lama luang hi Araba ramah a luang lût tûr a ni; tuipuiah a luang lût ang a, tuipui tui al chu tui thianghlimah a chantîr ang. 9 Tin, heti hi a lo ni ang a, luite chu an luanna apiangah rannung tinrêngin an dam phah ang a, sanghate an awm huai huai ang: tuipui tui a thianghlimna tûr leh a luanna apiangah rannungten an nun phahna tûrin hêng lui hi a lo luang a ni si a. 10 Tin, heti hi a lo ni ang a, a kamah chuan sangha mantute an ding ang: Engedi aṭanga Eneglaim thlengin lên dena hmun a ni ang; a sangha chu an chi ang zêlin, tuipui lian sangha ang maiin an tam êm êm ang. 11 Chirhdûp leh dûmte erawh chu an thianghlim ve lo vang a, chi khur atân hnutchhiah a ni ang. 12 A luikamah chuan a kam tuakin thei kûng tinrêng a ṭo vang a, chûngte chu a hnah vuai ngai lo vin a rah lo ngai hek lo vang, hmun thianghlim aṭanga lui lo luang chhuak châwm a nih avângin thla kipin a rah ang: a rah chu ei atân a ni ang a, a hnah chu tihdam nân a ni ang.
Pathian Biakin Lamah “I Rilru Nghat Tlat Rawh!”
11 Chu ram chu Jehova’n mal a sâwm ang em? He zawhna hi hrilhlâwkna chuan rilru phûrna nêna hrilhfiahin a chhâng a ni. Biak in aṭangin tui lo luang chu a luang zau zêl a, Tuipui Thi-a a luan luh chuan tuipui lian tak a lo ni ta a ni. Chutah chuan, nunna nei lo tui chu nunna a pe leh a, tuipui kama sangha manna hlawhtling tak chu a tihlawhtling bawk a ni. Luipui kam tuaka thing chi hrang hrang ṭote chuan kumtluanin rah a chhuah a, chakna leh damna a pe a ni.—Ezekiela 47:1-12.
12 He thutiam hian siamṭhatlehna hrilhlâwkna hmasa zâwk lâwm taka an lo pawm tawh chu vakvaite hnênah a hrilh nawn lehin, a tinghet a ni. Paradis anga Israel luahkhah leh te, siamṭhat leh te chu Jehova thâwkkhum zâwlnei chuan vawikhat aia tam a sawi a ni. Ram rote chuan nunna an lo nei leh ang tih zâwlnei thu chu a lo thleng nawn leh a. (Isaia 35:1, 6, 7; 51:3; Ezekiela 36:35; 37:1-14) Tichuan, mite chuan Jehova nun pek malsâwmna chu biak in siamṭhat aṭanga luipui angin a luang chhuak dâwn tih an beisei thei a ni. Chuti chuan, thlarau lama hnam thi tawhte chu an lo nung leh dâwn a ni. Mihring siam ṭhat leh te chu thlarau lam ṭhat chungchuangnaa malsâwm an ni ang a—mite chu inlârnaa tuipui kam tuaka thing ṭote angin an nghet in an fel ang a, ram chhe tawh dintharlehnaa hma hruaitu tûrte chu. Isaia pawhin ‘hmun hlui chhe tawhte’ rem leh tu tûr “felna thing” chu a lo ziak tawh bawk a ni.—Isaia 61:3, 4.
(Ezekiela 47:13, 14) Lalpa PATHIAN chuan heti hian a ti a ni: Hei hi Israel hnam sâwm leh hnam hnih zînga ram inṭhen dân tûr chu a ni e: Josefan chan hnih a chang ang. 14 Inang rengin in chang tûr a ni; in thlahtute hnêna pêk tûra chhia ka chham tawh kha: he ram hi in ram chanah a tlu dâwn a ni.
Pathian Biakin Lamah “I Rilru Nghat Tlat Rawh!”
10 Hêng zawng zawng hian chûng vakvaite thinlung chu a va tiphûr ngei dâwn êm! Chhûngkaw tinte chuan ramah chuan rochan an neih tûr chu a chiang a ni. (Mika 4:4 khaikhin rawh) Chu mi hmun laili lai tak chu biakna thianghlim chuan luahin chawisân a ni dâwn a ni. Tin, Ezekiela inlârna hmuhah hian lal chu, puithiamho angin mipuiin ram bung serh hran tawhah chuan an chêng ang tih a târ lang bawk a ni. (Ezekiela 45:16) Tichuan, ram siamtharah chuan mipuite chu Jehova’n hma hruai tûra a thlante hnêna hna thawh khâwm tûrin, leh an mahni kaihhruaina nêna thawkhova, an mahni chhawmdâwl tûr an ni. He ram hi inawpna, thawhhona, leh muanna entîrna a ni.
(Ezekiela 48:9, 10) Ram zuat LALPA hnêna in hlan tûr chu a dung tawng sînghnih leh sângnga, a vâng tawng sînghnih a ni tûr a ni. 10 Tin, hemiah hian puithiamte tân ram serh zuat tûr a ni ang a, hmâr lam zâwngin a dung tawng sînghnih leh sângnga leh thlang lam zâwngin a vâng tawng sîngkhat leh chhak lam zâwngin a vâng tawng sîng khat, chhim lam zâwngin a dung tawng sînghnih leh sângnga a ni tûr a ni, a laia LALPA hmun serh awmin.
Thlarau Lam Lunghlute Laih Chhuahna
(Ezekiela 47:1) Tichuan in pui kawngkhârah chuan mi hruai lêt a, tin, ngai teh, in pui kawngka bul hnuai aṭang chuan, chhak lam hawiin tui a lo luang chhuak a; in pui chu chhak lam hawi a ni si a: tin, tui chu maichâm chhim lam in pui sîr ding lam hnuai aṭangin a lo luang thla a.
(Ezekiela 47:8) Tin, ani chuan ka hnênah, He tui khaw chhak ram lama luang hi Araba ramah a luang lût tûr a ni; tuipuiah a luang lût ang a, tuipui tui al chu tui thianghlimah a chantîr ang.
(Ezekiela 48:30) Tin, hêngte hi khawpui ata chhuahna te chu an ni; hmâr lampang tawng sangli leh zangaah chuan kawngka pathum:
(Ezekiela 48:32-34) tin, chhak lampang tawng sângli leh zangaah chuan kawngka pathum; josef kawngka pakhat, Benjamin kawngka pakhat, Dan kawngka pakhat an ni ang a: 33 tin, chhim lampang tawng sângli leh zangaah chuan kawngka pathum: Simon kawngka pakhat, Isakar kawngka pakhat, Zebulun kawngka pakhat an ni ang a; 34 thlang lampang tawng sângli leh zangaah chuan kawngka pathum: Gad kawngka pakhat, Aser kawngka pakhat, Naphtali kawngka pakhat, an ni ang.
Pathian Biakin Lamah “I Rilru Nghat Tlat Rawh!”
14 Hêng thil thleng hi Ezekiela inlârna hmuh thlenfamkimna awmchhun em ni? Ni lo; thil ṭhenkhat pawimawh zâwk pawh a awm a ni. Ngaihtuah teh: Biak in Ezekiela’n a hmuh kha a sawi ang khân sak tak tak a ni lo va. Dik takin, Judaho chuan kha inlârna kha urhsun takin an la a, ṭhenkhatte chu chipchiar takin a takin an hmang bawk a ni. Mahse, inlârna biak in pumpui chu biak in hlui hmun, Moria Tlânga rem tûr tak ngial pawhin a lian lutuk a ni. Chu bâkah, Ezekiela biak in chu khawpui chhûnga awm ni lovin, engemaw zâta hlâ ram zau tak hrang daihah a awm laiin, biak in pahnihna chu Jerusalem khawpui, an thlahtute lo awmnaah chuan sak a ni thung a ni. (Ezra 1:1, 2) Lui tak tak chu Jerusalem biak in aṭâng chuan a luang ngai lo bawk. Tichuan, hmân lai Israelte chuan Ezekiela hrilh lâwk thlenfamkimna chauh chu an hmu a ni. Hei hian he inlârna thlarau lama a thlenfamkimna chu a ropui zâwk ngei dâwn tih a tichiang a ni.
(Ezekiela 47:6) Tin, ka hnênah, “Mihring fapa, hei hi i hmu em?” a ti a. Tin, luikam hrût tûrin mi hruai kîr ta a.
it-2-E 1001
Mihring Fapa
13 Hebrai Pathian Lehkha Thua ṭawngkam hman tam ber chu Ezekiela buah hmuh a ni a, chutah chuan Pathianin zâwlnei chu “mihring fapa” tia kohna, vawi 90 chuang a awm a ni. Zâwlnei chu lei mihring mai a nihzia sawi uar nân a hmang niin a lang, chu chuan a aiawha thusawitu amah leh a chanchin sawi tûr Petu, Pathian Chungnungbera a inthlauhzia a tilang zual a ni. Zâwlnei Daniela pawh Daniela 8:17-ah chutianga koh a ni bawk.
Bible Chhiar
(Ezekiela 48:13-22) Puithiam chan zûl zêlah chuan Levia chiten chan an nei ang a, a dung tawng sînghnih leh sângnga, a vâng tawng sîngkhat a ni ang. 14 Tin, an hralh tûr a ni lo va, an thleng tûr a ni hek lo: a ram ṭha ṭha pawh mi dang hnênah pêk tûr a ni lo: LALPA tâna serh a ni si a. 15 Tin, a vâng tawng sînghnih leh sângnga bâka tawng sângnga chu vântlâng chan, khawpui dinna tûr, chênna in tûr te leh daifêmte atân a ni ang: khawpui chu a lai takah a awm ang. 16 Tin, a teh vêl dân chu hetiangin a ni ang: a hmâr lampang tawng sângli leh zanga, a chhim lampang tawng sângli leh zanga; a chhak lampang tawng sângli leh zanga, a thlang lampang tawng sângli leh zanga. 17 Tin, a khawpui chuan daifêm a nei ang a, hmâr lampang chuan tawng zahnih leh sawmnga, chhim lampang tawng zahnih leh sawmnga, chhak lampang tawng zahnih leh sawmnga, thlang lampang tawng zahnih leh sawmnga. 18 Tin, a dung lam la chuang ram zuat serh tawh hrûla mi chu chhak lamah tawng sîngkhat, thlang lamah tawng sîngkhat a ni ang: ram zuat serh tawh hrûl zêl a ni tûr a ni: tin, chuta thil chhuakte chu khawpuia hnathawktute ei tûr a ni ang. 19 Tin, khawpuia hnathawktu Israel hnam zawng zawnga mite chuan a lei an let ang. 20 Ram zuat pum pui chu a dung tawng sînghnih leh sângnga, a vâng tawng sînghnih leh sângnga a ni ang, ram zuat serh tawh, kil li bial, khawpui chan nên in hlân tûr a ni. 21 Tin, a bâk ram zuat serh tawh leh khawpui chan sîr tuak ve ve chu lal chan a ni ang a, chhak lam zâwngin ram zuat tawng sînghnih leh sângnga bâk leh thlang lam zâwngin tawng sînghnih leh sângnga bâk, ram bung dangte hrûl zêl chu lal chan a ni ang: tichuan ram zuat serh tawh leh in pui hmun serh chu a lai takah a awm ang. 22 Tin, Levia chi chan leh khawpui chan chu lal chante inkârah a awm ang a, lal chan chu Juda chan leh Benjamin chan nên a inri ang.
SEPTEMBER 18-24
PATHIAN THU AṬANGA RO HLUTE | DANIELA 1-3
“Jehova Chunga Rinawmna Chuan Malsâwmna A Thlen”
(Daniela 3:16-20) Sadraka te, Mesaka te, Abednegoa te chuan lal chu an chhâng a, a hnênah, “Aw Nebukadnezzar, he thu-ah hian kan chhân che pawh a ngai lo ve. 17 Kan Pathian, a rawng kan bâwl ṭhina chuan rawhtuina meipui ata min chhan chhuak thei si a, i kut ata pawh, aw lalber, min chhan chhuak mai ang. 18 Chutilo pawh ni sela, aw lalber, i pathiante rawng chu kan bâwl dâwn lo va, i rangkachak milim din pawh chu chibai kan bûk hek lo vang, tih hi hria ang che,” an ti a. 19 Tichuan, Nebukadnezzara chu a thin a tâwt ta êm êm a, Sadraka te, Mesaka te, Abednegoa te lakah chuan a hmêl lan dân a dang zo ta a; rawhtuina mei chu a sat dân pângngai lêt sariha tisa tûrin thu a pe a. 20 Tin, a sipai rual zînga mi chak ṭhenkhatte chu Sadraka te, Mesaka te, Abednegoa te phuar tûr leh rawhtuina meipuia theh lût tûrin thu a pe a.
Pathian Ram Tâna I Rinawmna Chu Vawng Zêl Rawh
15 Chhia leh ṭha hriatna thiang tak neia Jehova rawngbâwl kan duh avângin, a châng chuan kan hnathawhpui te, school kalpui te, ṭhenawm te, a nih loh leh chhûngkhat te lakah kan danglam hle thei ang. (1 Petera 2:19) Kan danglam bîk avângin mite huat kan ni dâwn tih Isua chuan min hrilh a ni. Min dodâltu a tam zâwkte chuan Pathian Lalram chungchâng an hre lo tih hria ang che. Chuvângin, anni chuan mihring sawrkârna aia Lalram tâna rinawm chu kan tân a pawimawh zâwkzia an hre lo.
16 Jehova chunga rinawm tûr chuan mi dangte’n engpawh sawiin, engpawh ti se, a thu kan zâwm tlat tûr a ni. (Daniela 3:16-18) A bîk takin, ṭhalaite chuan mi dangte laka danglam tak nih chu harsa an ti hle thei a. Nu leh pate u, in fate chu school-ah huaisenna nei tûrin ṭanpui rawh u. In fate chuan flag chibai bûk loh emaw, hnam hmangaihna hun serh danga tel loh emaw chu an hrehin an hlau mai thei a. Chhûngkuaa Pathian biakna in neih hunah hêng chungchânga Pathian Jehova thlîr dân chu i zirpui thei a ni. An rinnate chu chiang tak leh zahthiam taka hrilhfiah dân zirtîr ang che. (Rom 1:16) A ṭûl a nih chuan, an zirtîrtute hnênah kan rinnate hrilhin in fate chu ṭanpui ang che u.
(Daniela 3:26-29) Tichuan, Nebukadnezzara chu rawhtuina meipui kawngkâah chuan a lo kal hnai a, “Sadrak, Mesak, Abednego, nangni Chungnungbera Pathian bâwihte u, lo chhuak ula, hetah lo kal rawh u,” tiin a han bia a. Tichuan, Sadraka te, Mesaka te, Abednegoa te chu mei zîng ata chu an lo chhuak ta a. 27 Tin, thuneitute, aiawhtute, awptute leh lal remruatpuitute rawn inkhâwm chuan, hêng mite taksa chungah hian meiin thiltihtheihna a nei lo va, an sam pawh a kâng kir hek lo, an kawrfualte a danglam hek lo va, mei rim rêng rêng pawh an nam hek lo, tih an hmu a. 28 Lal Nebukadnezzara chuan thu a sawi a, “Sadraka te, Mesaka te, Abednegoa te Pathian chu fakin awm rawh se; ani chuan a vântirhkoh a rawn tîr a, a chhiahhlawh amah ringtute chu a chhan chhuak a, chûng mite chuan an Pathian chauh lo chu pathian dang rêng rawng an bâwl lohva chibai an bûk loh nân lal thupêk tidanglamin an taksa an hlân ngam a. 29 Chuvângin mi tin, hnam tin, ṭawng tin, Sadrak te, Mesaka te, Abednegoa te Pathian chunga thu ṭha lo sawi apiang chu sah sawm an ni ang a, an inte chu hnâwmhnawka siam a ni mai ang tih thupêk ka siam e: hetiang taka chhan chhuak thei pathian dang rêng rêng an awm si lo,” a ti a.
Huai Takin Awm Rawh Jehova I Hnenah A Awm E!
13 B.C.E. kum zabi sarihnaah khân, Jehova chhiahhlawh Hebrai mi pathum hnênah Pathianin rinna leh huaisenna lâwmman a pe ṭhîn tih finfiahna chiang tak pêk an ni. Chutih lai chuan, Lal Nebukadnezzara chuan Babulon mi pawimawhte chu a kal khâwmtîr a, rangkachaka siam milim hrawlpui chu be tûrin thu a pe a ni. Chutianga ti lo apiang chu rawhtuina meipuia thlâk tûr an ni a. Hebrai mi pathumte chuan Nebukadnezzara hnênah zahthiam takin: “Kan Pathian, a rawng kan bâwl ṭhina chuan rawhtuina meipui ata min chhan chhuak thei si a, i kut ata pawh, aw lalber, min chhan chhuak mai ang. Chutilo pawh ni sela, aw lalber, i pathiante rawng chu kan bâwl dâwn lo va, i rangkachak milim din pawh chu chibai kan bûk hek lo vang, tih hi hria ang che,” tiin an hrilh a ni. (Dan. 3:16-18) Hebrai mi pathumte chhan chhuah an nih dân phûrawm tak chu Daniela 3:19-30-ah chiang taka târ lan a ni. Rawhtuina meia tihhlum tûra vau chu kan ni lo mai thei a; mahse, kan rinawmna fiahnate chu kan tawng ṭhîn a, rinna leh huaisenna kan neih avângin Pathianin mal min sâwm dâwn tih kan hre chiang thei a ni.
Thlarau Lam Lunghlute Laih Chhuahna
(Daniela 1:5) Tin, lal chuan lal chaw tuihmêl ata leh a uain in ṭhin ata chu an ni tin chan tûr a ruatsak a, chutianga kum thum châwma, chumi tâwpa lal hmâa an din theih nân.
(Daniela 1:8) Mahse Daniela chuan a rilruin lal chaw leh a uain in ṭhin te chuan intihbawlhhlawh loh a tum tlat a; chutichuan a intihbawlhhlawh loh nân tilrehte hotu chu a dîl a.
it-2-E 382
Mesaka
Lal chaw tui tak chu ‘intihbawlhhlawh’ theihna anga an ngaih mai theih chhan pathuam a awm a: (1) Babulon mite chuan Mosia Dânin thianghlim lova a ruat sate an ei; (2) anni chuan sate chu ṭha takin thisen an tichhuak lo pawh a ni thei, a ṭhen chu rehhlum pawh a ni thei; (3) mi lem biate chuan an sa ei tûr chu an pathiante hnênah an hlan hmasa ṭhîn a, chutiang sa ei chu chûng pathian tâna rawngbâwlna pakhat angah an ngai a ni.—Dan. 1:8; 1 Kor. 10:18-20, 28 khaikhin rawh.
(Daniela 2:44) Tin, chûng lalte nîah chuan vân Pathianin ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng ram zawng zawngte hi a tikeh sawmin a tiral zâwk ang a, kumkhuain a ding reng ang.
w12 6/1 19, bâwm
“HENG RAM ZAWNG ZAWNGTE” TIA SAWI HI ENG RAMTE NGE NI?
Daniela 2:44-a hrilh lâwk thu chuan Pathian Ramin “hêng ram zawng zawngte hi a tikeh sawmin, a tiral zâwk ang,” a ti a. Chu hrilh lâwk thu chuan milim pêng hrang hrangin a entîr lalramte chauh a kâwk a ni.
A nih chuan, mihring sawrkâr dang zawng zawngte chungchâng hi eng nge ni ta ang? Thu Puan bua a anpui hrilh lâwkna chuan hriat thiamna zau zâwk min pe a. Chu chuan “khawvêl zawng zawnga lalte” chu “Pathian Engkimtitheia ni ropuia” hruai khâwm an nih tûr thu a târ lang a ni. (Thup. 16:14; 19:19-21) Chuvângin, milim pêngin a entîr sawrkârte mai bâkah, mihring sawrkâr dang zawng zawngte pawh Armageddon-ah chuan tihboral vek an ni dâwn a ni.
Khawvêl Hlimawm Tak Neih Theih Dân
A chhânna chu Daniela 2:44-ah a awm: “Chûng lalte [thilte kalhmang tâwpna huna rorêltute] nîah chuan vân Pathianin ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng [mihring siam] ram zawng zawngte hi a tikeh sawmin a tiral zâwk ang a, kumkhuain a ding reng ang,” tiin. Engvângin nge Pathian Ramin lei lam inawpnate hi ‘a tihkeh sawm’ ang? A chhan chu, Setana’n Eden huana a lo siam, mahni thua ro inrêlna hmanga Pathian thu zawm lohna awm chhunzawmtîr reng an tum tlat vâng a ni. Chutiang duhna awm nghehtîr tumtute chuan mihringte ṭhatna tûr ber mai kalha thil an tih mai bâkah, anmahni ngei chu Siamtu dotu an innihtîr a ni. (Sâm 2:6-12; Thu Puan 16:14, 16) Chuvângin, ‘Pathian awpna hnuaia mi nge kan nih a, a dotu zâwk?’ tih kan inzawh a ngai a ni.
Bible Chhiar
(Daniela 2:31-43) Aw lalber, i han dâk chhuak a, ngai teh, milim ropui tak a lo awm a. Chu milim hrawlpui, tle êm êm mai chu, i hmâah a ding a; a lan dân pawh ṭihbaiawm tak a ni. 32 Chu milim chu a lu rangkachak thianghlim tak a ni a, a âwm leh a bânte chu tangkarua, a pum leh a malpuite dâr, 33 a kête thîr, a kephah chu a ṭhen thîr, a ṭhen bellei a ni a. 34 Nang chuan lung, kut lova laih chhuah i thlîr reng laiin milim chu a kephah thîr leh belleiah chuan a han delh a, a tikeh sawm ta vek a. 35 Tichuan, thîr te, bellei te, dâr te, tangkarua te, rangkachak te chu arualin an keh sawm ta vek a, nipui lai hrui zâwla buhsî ang mai an lo ni ta a: tin, thliin anmahni a lên bo va, an awmna hmun rêng hriat a ni ta lo va: tin, milim delhtu lung chu tlâng lian takah a lo chang a, lei pum hi a khat ta a. 36 Hei hi mumang chu a ni a; tin, a hrilhfiahna chu lal hmâah hian kan han sawi leh ang e. 37 Aw lalber, nang hi lalte lal, vân Pathianin ram te, thiltihtheihna te, chakna te, ropuina te a pêka chu i ni a; 38 chuvângin khawiah pawh mihring fate awmna apiangah ramsa te, chunglêng sava te, i kutah a pe a, an zaa chungah rorêl tûrin a siam chia: rangkachak lu chu nang hi i ni. 39 Tin, i hunah hian ram dang, nang aia tênau zâwk a lo ding ang; tin, dâr, ram thumna, lei chung zawng zawnga rorêl tûr chu a awm leh ang. 40 Tin, ram lina chu thîr anga khauh a ni ang: thîr chuan a tikeh sawmin thil zawng zawng a hneh ṭhîn ang hian: tin, thîrin thil zawng zawng a tikeh ang bawkin ani chuan a tikeh sawmin a râwt dip ang. 41 Tin, a kephah leh a zungṭangte chu, a ṭhen bêlvawtu hlum, a ṭhen thîr nia i hmuh ang ngei khân ram inṭhen a ni ang a, mahse amahah chuan thîr khauhna chu a awm tho vang, thîr leh hlum nêm inpawlh i hmuh ang ngei khân. 42 Tin, a ke zungṭang a ṭhen thîr, a ṭhen hlum a ni ang bawk khân ram chu a ṭhenah chuan a chak ang a, a ṭhenah chuan a chhe awl ang. 43 Tin, thîr leh hlum nêm inpawlh i hmuh ang ngei khân anni chu mihring chiin an inpawlh ang a; mahse thîr leh hlum a inpawlh tak tak thei lo ang bawkin an inzawm reng lo vang.
SEPTEMBER 25–OCTOBER 1
PATHIAN THU AṬANGA RO HLUTE | DANIELA 4-6
“Jehova Rawng I Bâwl Zêl Em?”
(Daniela 6:7-10) Ram hotute, aiawhtute leh thuneitute, remruattu leh awptute zawng zawng chu ni sawmthum chhûnga, aw lalber, nangma hnênah chauh lo chuan, pathian emaw mihring emaw hnêna dîlna nei apiang chu sakeibaknei pûka paih tûr, tiin lal hian dân siamin khap tlat sela, tih an remti tlâng a. 8 Tûnah hian, aw lalber, khapna chu tinghet la, Media leh Persia dân danglam ngai lo ang zêlin thu ziak hi danglam leh tawh hlek lo tûrin hming ziak hnan ang che,” tiin. 9 Chutichuan, lal Daria chuan thu ziak leh khapnaah chuan hming a ziak ta a. 10 Tin, Daniela chuan thu ziak chu hming ziak hnan a ni tih a hriat veleh a inah a lût a (a pindana a tukverhte chu Jerusalem lam hawia hawn a ni a), a hmâa a tih dân ang bawkin ni khatah vawi thum a ṭhingṭhi a, a ṭawngṭai a, a Pathian hnênah lâwm thu a hrilh a.
Ṭhalaite U—Pathian Thu Inkaihhruaitir Rawh U
16 Engvângin nge nangmah chauhva i awm hunah pawh Pathian Jehova thu âwih chu i duh ang? Hei hi hre reng rawh: Pathian Jehova rilru i tina theiin, i tilâwm thei bawk a ni, tih hi. (Gen. 6:5, 6; Thuf. 27:11) Pathian Jehova chuan “a ngaihsak ṭhin che” avângin, i thiltih hian amah a nghawng a. (1 Pet. 5:7) A hlâwkna i têl theih nâna amah i hnaih chu a duh a ni. (Is. 48:17, 18) Hmân laia Jehova chhiahhlawh Israel ṭhenkhatin a zilhna thu an ngaihthah khân, ani’n rilru nat nân a hman phah a ni. (Sâm 78:40, 41) Kawng lehlamah chuan, Pathian Jehova chuan zâwlnei Daniela chu a ngaina hle a, vântirhkoh chuan “mi duhawm tak” tiin a ko a ni. (Dan. 10:11) Engvângin nge? Daniela chu vântlâng hmaah mai ni lo, mahni chauhva a awm hun pawha Pathian laka a rinawm reng avângin.—Daniela 6:10 chhiar rawh.
Jehova Thil Thianghlimte Thlir Dan I Ṭawmpui Em?
12 Kristian kohhrana hriak thihte leh an ṭhiante nun kaihhnawihtu thil tam takte thil thianghlim anga ngaih chu thil mak a ni lo. Jehova nêna kan inlaichînna hi thil thianghlim a ni a. (1 Chronicles 28:9; Sâm 36:7) Kan tâna a hlut êm avângin, kan Pathian, Jehova leh kan inkâra thil engmah leh mihring tumah an rawn tlâk zeh chu kan phal lo. (2 Chronicles 15:2; Jakoba 4:7, 8) Ṭawngṭaina hian Jehova nêna kan inlaichînna hnai tak chhawmnunna kawngah hmun pawimawh tak a luah a. Zâwlnei Daniela tân ṭawngṭaina chu a thianghlim êm avângin, a nun thâp hial pawhin Jehova hnêna dân pângngai anga a ṭawngṭaina chu a thlahthlam lo. (Daniela 6:7-11) Hriak thih Kristiante, a nih loh leh “mi thianghlimte ṭawngṭaina” chu biak ina Pathian biak nâna hman rimtui nêna tehkhin a ni a. (Thu Puan 5:8; 8:3, 4; Leviticus 16:12, 13) He tehkhinna hian ṭawngṭaina thianghlimzia a sawi uar a ni. Lei leh vâna Lal Chungnungber biak pawh theih chu chanvo hlu a va ni tehlul êm! Ṭawngṭaina chu kan nuna thil thianghlim anga ngaih a ni pawh hi a mak lo ve!
(Daniela 6:16) Tichuan, lal chuan thu a pe ta a. Daniela chu an rawn hruai a, sakeibaknei pûkah chuan an paih ta a. Lal chuan Daniela hnênah, “I Pathian, a rawng i bâwl fo ṭhina khân a chhanhim ang che,” tiin a sawi a.
(Daniela 6:20) Tin, Daniela awmna pûk a rawn hnaih chuan ṭah awin a au va: lalber chuan Daniela hnênah, “Aw Daniel, Pathian nung chhiahhlawh, i Pathian, a rawng i bâwl fo ṭhina chuan sakeibaknei lak ata a chhan chhuak thei che em?” a ti a.
Engvângin Nge Bang Lovin Kan Ṭawngṭai Ang?
2 Engtin nge Jehova chuan Daniela chu a thlîr? A ṭawngṭainate zînga pakhat chhâng tûra vântirhkoh Gabriela a lo kal khân, zâwlnei chu mi “duhawm tak” a nih thu a sawi a ni. (Daniela 9:20-23) Ezekiela hrilh lâwknaah, Jehova chuan Daniela chu mi fel a nih thu a sawi bawk. (Ezekiela 14:14, 20) A dam chhûng zawngin Daniela ṭawngṭaina chuan a Pathian nêna inzawmna ṭha a neihtîr a, chu chu Daria ngei pawhin a pawm a ni.—Daniela 6:16.
(Daniela 6:22, 23) Ka Pathian chuan a vântirhkoh a rawn tîr a, sakeibaknei kâte a tichîp a, engmah mi tina lo ve; a mithmuhah chuan sawisêl bovin ka awm a; tin i chungah pawh aw lalber, pawi engmah ka khawih lo ve,” a ti a. 23 Tichuan, lal chu a lâwm ta êm êm a, Daniela chu pûk ata lâk chhuah tûr thu a pe ta a. Chutichuan, Daniela chu pûk ata an la chhuak a, na lai rêng rêng amahah a awm lo va, a Pathian a rin tlat avângin.
“Thlarau Leh Mo Chuan, ‘Lo Kal Rawh,’ An Ti”
15 Daniela chu sakeibaknei pûka zan khat a awm hnu chuan lal chu chutah chuan a va kal a: “Aw, Daniel, Pathian nung chhiahhlawh, i Pathian, a rawng i bâwl fo ṭhina chuan sakeibaknei lak ata a chhan chhuak thei che em?” tiin ṭah awin a au va. Daniela chuan: “Aw, lalber, kumkhuain dam ang che; ka Pathian chuan a vântirhkoh a rawn tîr a, sakeibaknei kâte a tichîp a, engmah mi tina lo ve; a mithmuhah chuan sawisêl bovin ka awm a; tin, i chungah pawh aw lalber, pawi engmah ka khawih lo ve,” tiin a lo chhâng thuai a ni. Pathian Jehova chuan Daniela chu a rawng a bâwl ‘fo ṭhin,’ a nih loh leh a bâwl ziah ṭhin avângin mal a sâwm a ni.—Dan. 6:19-22.
Thlarau Lam Lunghlute Laih Chhuahna
(Daniela 4:10, 11) Ka khum laizâwla ka lû-a inlârnate chu hetiang hi a ni: Ka han dâk chhuak a, ngai teh, lei lai takah thing a lo awm a, a sânzia chu a nasa khawp mai a. 11 Thing chu a ṭhang a, a ṭanṭha a, a sân lam chuan van a tawng a, kâwlkil aṭangin a lang thei vek a.
(Daniela 4:20-22) Thing i hmuh, lo ṭhanga, lo ṭanṭhaa, vân lo tawnga, kâwlkil aṭanga lang thei vek leh 21 a hnahte mawia, a rahte tama, nung zawng zawng tâna ei tûr awm leh a hnuaia ramsate chênga, a zârte chunglêng savate chênna lo ni chu, 22 aw lalber, nangmah i ni a; i ṭhang a, i chak a, i ropuina chu a ṭhang a, vân a tawng a, i rorêlnate chu kâwlkil thleng a ni si a.
Daniela Bu Aṭanga Thu Pawimawh Hrilhfiahna
4:10, 11, 20-22—Nebukadnezzara mumanga thing lian tak chuan eng nge a entîr? Thing chuan atîrah chuan khawvêla thuneitu ber Nebukadnezzara a entîr a. Amaherawhchu, a rorêlna chu “kâwlkil thleng” a nih avângin, thing chuan thil ropui zâwk fê a kâwk ngei ang. Daniela 4:17 chuan mumang chu mihringte chunga “Chungnungbera” rorêlna nên a thlunzawm a. Chutichuan, thing chuan a bîk takin lei lam pang chungchânga Jehova lalchungnunna chu a entîr a ni. Chuvângin, a mumang chuan thlen famkimna pahnih a nei a, chu chu Nebukadnezzara rorêlnaah leh Jehova lalchungnunnaah a ni.
(Daniela 5:17) Tin, Daniela chuan a chhâng a, lal hmâah chuan, “I thupêk chu nangma tân ni sela, i lâwmman chu mi dang hnênah pe ang che; mahse ziak hi lal ka chhiarsak ang a, a hrilhfiahna chu ka hriattîr ang e.
(Daniela 5:29) Tichuan, Belsazzara chuan thu a pe a, Daniela chu puan senduk an sintîr a, a nghâwng vêlin rangkachak khaidiat an awrhtîr a, a ramah chuan rorêltu pathumte zînga pakhat a ni tûr a ni, tiin an puang ta a.
w88-E 10/1 30 ¶3-5
Chhiartute Zawhna
A tâwpah, Hebrai hming pu Daniela tih hming pui Hebrai mi chu hruai chhuak tûra tih a nih khân, lal chuan, ani chu puan senduk sintîr a, rangkachak khaidiat a awrhtîr a, a rama rorêltu pathumte zînga pakhata ruat tûrin a sawi leh a ni. Zâwlnei chuan zah thiam takin: “I thupêk chu nangma tân ni sela, i lâwmman chu mi dang hnênah pe ang che; mahse ziak hi lal ka chhiarsak ang a, a hrilhfiahna chu ka hriattîr ang e,” tiin a chhâng a.—Daniela 5:17.
Daniela chu hrilhfiahna sawitîr tûrin thil pêk emaw, lâwmman emaw pêk a ngai lo. Lal chuan lâwmman chu a kawl thei a, a nih loh leh mi dang tuemaw hnênah a pe thei bawk. Daniela chuan lâwmman vâng ni lovin, Babulon chunga rorêlna thlentu Pathian dik, Jehova’n a ṭanpui avâng zâwkin a hrilhfiah thei a ni.
Daniela 5:29 kan chhiar chuan, Daniela’n titûra a lo sawi tawh angin, thu chu a chhiar a, a hrilhfiah hnu chuan, lalin Daniela chu lâwmman pe ngei tûrin thu a pe a ni. Daniela chuan amahin puan leh rangkachak chu a in bel lo va. Lalber Belsazzara thupêkna avâng zâwkin puan sintîr a, rangkachak awrhtîr a ni. Mahse, hei hi Daniela 5:17 nên a inkalh lo, chutah chuan zâwlneiin hmasialna a neih lohzia a sawi lang a ni.
dp-E 109 ¶22
Khawvêl Tidanglamtu Thu Mal Pali
22 Tichuan, thu khrih tak chu hriat a ni ta. Babulon chak tak chu Media leh Persia sipaite lakah a tlâwm tawh dâwn a ni. He chhiatna thu lungchhiatthlâk tak hi hmachhawn mah se, Belsazzara chuan a thu sawi angin a ti a. A chhiahhlawhte hnênah Daniela chu puan senduk sintîr a, rangkachak khaidiat awrhtîrin thu a pe a, a lal rama hotute pathum zînga pakhat nihtîrin a chawimawi a ni. (Daniela 5:29) Chûng chawimawinate chuan Jehova hnênah chawimawina a thlen tih Daniela’n a hriat avângin a hnâwl lo a ni. Belsazzara chuan Jehova zâwlnei a chawimawi avângin Jehova’n a rorêlna tinêp deuh tûrah a beisei pawh a ni mai thei. Chutianga a beisei a nih chuan, a tlai lutuk tawh a ni.
Bible Chhiar
(Daniela 4:29-37) Thla sâwm leh thla hnih tâwpah chuan Babulon lal in chungah lal chu a vei a vei a. 30 Lal chuan, “He Babulon ropui hi keima chakna ngeia lal chênna hmun atân leh ka ropuina mawina tûra ka siam chu a ni lo-vem ni?” tiin a sawi a. 31 Chu thu chu lal kâa a chhuah lai mêkin, vân aṭangin aw a lo chhuk a, “Aw lal Nebukadnezzar, i hnênah thu a lo thleng e: lalna ram chuan a hransan ta che a ni. 32 Mihring zîng ata hnawh chhuah i ni ang a, i chênna chu ramsate zîngah a ni ang: sebâwng anga hlobet eitîr i ni ang a, i chungah hun sarih a ral ang; Chungnungbera chuan mihringte lalna ram chungah thu a nei a, a duhsak apiang hnênah a pe ṭhîn a ni, tih i hriat hmâ loh chuan,” tiin. 33 Chumi lai la la chuan chu thil chu Nebukadnezzara chungah a lo thleng ta nghâl a; mihring zîng ata hnawh chhuahin a awm ta a, sebâwng angin hlobet a ei a, a taksa chu vân daia huhin a awm a, a samte mupui hmul anga a ṭhan leh a tinte sava tin ang mai a nih thlengin. 34 Tin, chûng ni tâwpah chuan kei, Nebukadnezzara chuan vân lamah ka mit ka lên chho va, ka hriatna chu ka hnênah a lo kîr leh ta a, Chungnungbera chu mal ka sâwm a, nung renga chu ka fak a, ka zah a, a rorêlna chu chatuan rorêlna a ni a, a ram chu chhuan awm chhûng zawng zawng a ni si a: 35 tin, leilung luahtu zawng zawngte hi engmah lova ngaih an ni a: vân sipai rualte zîngah leh leilung luahtute zîngah chuan a thu thuin a ti a, tumahin a kut chu an chawlhtîr thei lo va, a hnênah, “Nangin eng nge i tih?” pawh an ti thei hek lo. 36 Chutih lai vêk chuan ka hriatna chu ka hnênah a lo kîr leh ta a; tin, ka ram ropuina tûrin ka ropuina leh mawina chu ka hnênah a lo kîr leh a; tin, ka remruatpuitute leh ka mi ropuite chuan mi rawn pan leh a, ka ramah chuan tihnghehin ka awm a, ropuina nasa tak mai ka hnênah belhchhah a ni ta a. 37 Tichuan, kei Nebukadnezzara hian vân Lal chu ka fak a, ka chawisâng a, ka zah a; a thiltih zawng zawng chu a dikin a kawngte chu a fel si a: chapova lêngte chu a tihniam thei a ni.