Nun leh Rawngbâwlna Inzirna Lehkhabu Atâna Thu Lâk Chhuahnate
APRIL 2-8
PATHIAN THU AṬANGA RO HLUTE | MATTHAIA 26
“Kalhlên Kût leh Hriatrengna—A Inanna leh Danglamnate”
(Matthaia 26:17-20) Tin, chhang dawidim telh loh nî, ni hmasa berah chuan zirtîrte chu Isua hnênah an lo kal a, “Kalhlên Kût chaw eina tûrin khawiah nge buatsaihsak che ila i duh?” an ti a. 18 Tin, ani chuan, “Khawpuiah tuemaw hnênah kal ula, a hnênah, ‘Zirtîrtu chuan, Ka hun a hnai ta a; ka zirtîrte nên Kalhlên Kût i inah kan kût ang e, a ti e,’ va ti ang che u,” a ti a. 19 Tin, Isuan an hnêna a tih angin zirtîrte chuan an ti a; Kalhlên Kût chaw chu an buatsaih ta a. 20 Tin, khua a lo tlai lam chuan zirtîr sâwm leh pahnihte nên chaw an kîl a.
nwtsty media
Kalhlên Kût Chaw
Kalhlên kût chawa tel thilte chu: berâm no rawh hmin (a ruh pakhat mah tihtliah tûr a ni lo) (1); chhang dawidim telh loh (2); hnim khâ (3). (Ex. 12:5, 8; Num. 9:11) Mishnah lehkhabu sawi dân chuan, chûng hnim khâte chu lettuce (anṭam hel ei chi), chicory (anṭam bulbâl nei), pepperwort, endive, leh dandelionte a ni thei a, chu chuan Israel mite chu Aigupta sal nia hrehawm taka an awm laite chu a hriat chhuahtîr ngei ang. Isua chuan chhang dawidim telh loh chu a mihring taksa ṭha famkim entîrna atân a hmang a. (Mt. 26:26) Tirhkoh Paula chuan Isua chu “Kan Kalhlên Kûtna tûr pawh an talh tawh si a” tiin a sawi a ni. (1 Kor. 5:7) Kum zabi khatnaah chuan, uain (4) chu Kalhlên Kût chaw kilnaah an hlui tel bawk. Isua chuan uain chu inthawina atâna chhuak tûr a thisen entîr nân a hmang a ni.—Mt. 26:27, 28.
(Matthaia 26:26) Tin, an ei laiin Isuan chhang a la a, mal a sâwmsak a, a phel a; tin, zirtîrte hnênah chuan a pe a, “La ula, ei rawh u; hei hi ka taksa a ni [“aiawhtu,” NW],” a ti a.
Mt. 26:26 ṭanchhan nwtsty study note
aiawh: Heta Grik thu mal e·stinʹ tih hian “a kâwk; a entîr,a hril” tih awmzia a nei a. Chutih lai chuan Isua taksa ṭha famkim leh an ei mai tawh tûr chhang dawidim telh loh chu an hmaa a awm avângin Isua sawi awmzia chu tirhkohte’n an hre thiam a ni. Chuvângin, chhang chu a taksa tak tak a ni thei lo. Chu Grik thu mal vêk chu Mt. 12:7-ah hman a ni a, Bible lehlin tam takah “awmzia” tia lehlin a ni chu chhinchhiah tlâk tak a ni.
(Matthaia 26:27, 28) Tin, no a la a, lâwm thu a sawi a, an hnênah a pe a, “In zain in rawh u; 28 hei hi ka thisen, sualte ngaihdam nâna mi tam tak tâna chhuak tûr, thuthlunna chu a ni.
Mt. 26:28 ṭanchhan nwtsty study note
thuthlunna thisen: Jehova leh Kristian hriak thihte inkâra thuthlung thar chu Isua inthawina hmanga nemngheh a ni a. (Heb. 8:10) He Isua ṭawngkam hman hi Mosia’n palai nia Sinai Tlânga Israelte nêna Dân thuthlung an thlun laia a ṭawngkam hman a ni. (Ex. 24:8; Heb. 9:19-21) Pathian leh Israel hnam inkâra Dân thuthlung chu bawngpa leh kêl thisena nemngheh a nih ang bâwkin, Jehova’n thalrau lam Israelte nêna a thlun tûr thuthlung thar chu Isua thisena nemngheh a ni. Chu thuthlung chu C.E. 33 Pentecost nî khân hman ṭan a ni.—Heb. 9:14, 15.
Thlarau Lam Lunghlute Laih Chhuahna
(Matthaia 26:17) Tin, chhang dawidim telh loh nî, ni hmasa berah chuan zirtîrte chu Isua hnênah an lo kal a, “Kalhlên Kût chaw eina tûrin khawiah nge buatsaihsak che ila i duh?” an ti a.
Mt. 26:17 ṭanchhan nwtsty study note
chhang dawidim telh loh nî, ni hmasa berah: Chhang dawidim telh loh Kût chu Kalhlên Kût (Nisan 14) zawh chiah, Nisan 15-ah a inṭan a, nî sarih chhûng hman a ni. (App. B15 en rawh.) Amaherawhchu, Isua hun lai chuan, Kalhlên Kût chu he kût nên a inzawm tlat avângin Nisan 14 pawh tiamin, nî riat chhûng chu, “Chhang dawidim telh loh kût” tia sawi châng a awm a. (Lk. 22:1) He Bible chânga “ni hmasa berah” tih thu hlawm hi “chumi hma nîah” tia lehlin theih a ni bawk. (Joh. 1:15, 30 nên khaikhin rawh, chutah chuan Grik thu mal “hmasa ber” [proʹtos] chu “hmaa” tia lehlin theih a ni, entîr nân, “ka hmaa [proʹtos] awm sa reng a ni.”) Chuvângin, atîra Grik ziakah leh Judate hnam dânah chuan, zirtîrte’n Isua an zawh kha Nisan 13-a thilthleng nia pawm theih a ni. Nisan 13 chhûngin, zirtîrte chuan Kalhlên Kût atân thilte an buatsaih a, a hnuah, chu Kalhlên Kût chu, Nisan 14 inṭan hun “khua a lo tlai lam chuan” an hmang a ni.—Mr. 14:16, 17.
(Matthaia 26:39) Tin, tlêmin hma lamah a va kal hlek a, a bawkkhup a, “Aw ka Pa, a theih chuan he no hian mi pêl lul rawh se; nimahsela keima thu ni lovin, nangma thu thu ni zâwk rawh se,” tiin a ṭawngṭai a.
Mt. 26:39 ṭanchhan nwtsty study note
he no hian mi pêl lul rawh se: Bible-ah, “no” tih chu mi pakhat tâna Pathian duhzâwng, a nih loh leh “chanpual dawn,” sawi nâna entîr neia hman a ni fo va. (Mt. 20:22 ṭanchhan study note en rawh.) Isua chuan Pathian sawichhetu ang leh sawrkâr pawisawitu anga a thihnain Pathian hming a tihchhiat dân tûr chu a vei hle a, chu chuan he “no” hian amah pêl tûra ṭawngṭai tûrin a chêttîr a ni.
Bible Chhiar
(Matthaia 26:1-19) Tin, heti hi a ni a, Isuan chûng thu zawng zawng chu a sawi zawhin a zirtîrte hnênah, 2 “Ni hnih achinah Kalhlên Kût a lo awm dâwn tih in hria a, Mihring Fapa hi khenbeh tûrin an mantîr dâwn a ni,” a ti a. 3 Chu mi lai chuan Puithiam Lalber Kaiapha an tiha in hual chhûng kawtlaiah chuan puithiam lalte leh vântlâng upate chu an inkhâwm a; 4 Isua chu ngamthlêma man a, an tihhlum theihna tûrin an inrâwn a. 5 Nimahsela, “Kût chhûng chuan ni suh se, chutilochuan vântlâng zîngah buaina a lo awm dah ang e,” an ti a. 6 Tin, Isua Bethani khuaah, phâr Simona inah chuan a awm laiin, 7 hmeichhe pakhat alabasta bâwma hriak rimtui to tak kengin, a hnênah a lo kal a, a chaw kîl laiin a luah a leih a. 8 Nimahsela, zirtîrte chuan chu chu an hmuhin an thinur a, “Eng atân nge hetia a tihboral mai mai ni? 9 He hriak hi man tam taka hralh a, mi retheite hnênah pêk theih a ni si a,” an ti a. 10 Isua erawh chuan chu chu a hriatin an hnênah, “Hmeichhia hi engah nge in tihbuai ni? ka chungah hian thil ṭha tak a ti a ni. 11 Mi retheite chu kumkhuaa in hnêna awm an ni alâwm, kei erawh chu kumkhuaa in hnêna awm tûr ka ni lo. 12 He hriak rimtui ka taksaa a leih hi, phûm tûra mi buatsaih tûrin a ti a nih hi. 13 Tih tak meuhvin ka hrilh a che u, khawvêl zawng zawngah khawiah pawh he Chanchin Ṭha hi an hrilna apiangah he hmeichhe thiltih pawh hi amah hriat rengna tûrin an sawi ve zêl ang,” a ti a. 14 Chu mi hnuah chuan sâwm leh pahnihte zînga mi pakhat, Juda Isakariota an tiha chu, puithiam lalte hnênah a kal a. 15 “Amah chu ka mantîr ang che u a, engnge min pêk ang?” a ti a. Tin, tangka sawmthum an bûksak ta a. 16 Chu mi chinah chuan mantîrna remchâng a zawng ta a. 17 Tin, chhang dawidim telh loh nî, ni hmasa berah chuan zirtîrte chu Isua hnênah an lo kal a, “Kalhlên Kût chaw eina tûrin khawiah nge buatsaihsak che ila i duh?” an ti a. 18 Tin, ani chuan, “Khawpuiah tuemaw hnênah kal ula, a hnênah, ‘Zirtîrtu chuan, Ka hun a hnai ta a; ka zirtîrte nên Kalhlên Kût i inah kan kût ang e, a ti e,’ va ti ang che u,” a ti a. 19 Tin, Isuan an hnêna a tih angin zirtîrte chuan an ti a; Kalhlên Kût chaw chu an buatsaih ta a.
APRIL 9-15
PATHIAN THU AṬANGA RO HLUTE | MATTHAIA 27-28
“Kal La, Zirtîrte Siam Rawh—Engvângin, Khawiah, leh Engtin Nge?”
(Matthaia 28:18) Tichuan, Isua chu an hnênah a lo kal a, anniho chu a bia a, “Lei leh vâna thuneihna zawng zawng ka hnênah pêk a ni tawh.
‘Kal Ula, Zirtirte Siam Rawh U’
4 Isua chuan a kohhran chungah thuneihna a nei a; tin, kum 1914 aṭangin, Pathian Lalram din thar chungah thu a nei bawk a ni. (Kolossa 1:13; Thu Puan 11:15) Ani chu vântirhkoh chungnung ber a ni a, chuvângin vântirhkoh tlûklehdingâwn tam takte chungah thu a nei a ni. (1 Thessalonika 4:16; 1 Petera 3:22; Thu Puan 19:14-16) Ani chu thu bul felte dodâltu “rorêlna zawng zawngte leh, thuneihna leh thiltihtheihna zawng zawngte” tibo vek tûrin, a Pain thuneihna a pe a ni. (1 Korinth 15:24-26; Ephesi 1:19-23) Isua thuneihna chu mi nungdamte chungah chauh a ni lo. ‘Mitthite leh mi nungte chunga rorêltu’ pawh a ni a; thihnaa muhîl tate kaihthawh theihna Pathian pêk pawh a nei a. (Tirhkohte 10:42; Johana 5:26-28) Chiang takin, chutiang khawpa thuneihna sâng Neitu thupêk chu thil pawimawh berah kan ngai tûr a ni. Chuvângin, ‘kal a, zirtîrte siam’ tûra Krista thupêk chu zah tak leh duh tak chungin kan zâwm a ni.
(Matthaia 28:19) Chutichuan kal ula, hnam tina mi zirtîrahte siam ula, Pa leh Fapa leh thlarau thianghlim hmingah chuan baptis ula,
Mt. 28:19 ṭanchhan nwtsty study note
zirtîrahte siam ula: Thiltih sawina Grik thu mal ma·the·teuʹo chu zirlaite, a nih loh leh zirtîrte siam tuma “zirtîr” tia lehlin theih a ni. (“zirtira awm” tia lehlin Mt. 13:52-a ṭawngkam hman nên khaikhin rawh.) Thiltih sawina “baptis” leh “zirtîr” tih hian “zirtîrahte siam” tûra thupêka telte chu a târ lang a ni.
hnam tina mi: A ngial a ngana lehlin chuan “hnam tin,” tihna a ni a; mahse, a chhehvêla thu awmte’n a târ lan angin, he ṭawngkam hian hnam tin zînga mi tinte a kâwk a ni, a chhan chu, Grik ṭawnga hming aiawh sawina “anmahni” tih hi mipa lam sawina a ni a, chu chuan Grik ṭawnga hmeichhe lam leh mipa lam sawina ni lo “hnamte” ni lovin, mite a kawh vâng a ni. “Hnam tina mi” hnêna thleng tûra thupêk chu thupêk thar a ni a. Bible chuan Isua rawngbâwl hun hmain, Jentailte’n Jehova rawng an bâwl chuan Israel mite anga lawm hlawh an ni ang tih a sawi. (1 Lalte 8:41-43) Mahse, zirtîrte siam tûra thu a pêk khân, Isua chuan a zirtîrte chu Juda mite hnênah chauh ni lovin, hnam dang mite hnênah pawh thu hril tûrin a ti a, chu chuan Kristiante’n khawvêl pum huapah zirtîr siamna hna an thawk dâwn tih a târ lang a ni.—Mt. 10:1, 5-7; Thup. 7:9; Mt. 24:14 study note en rawh.
(Matthaia 28:20) thu ka pêk zawng zawng che u pawm tûrin zirtîr rawh u. Tin, ngai teh u, kei kumkhuain, khawvêl tâwp thleng pawhin, in hnênah ka awm zêl ang,” a ti a.
Mt. 28:20 ṭanchhan nwtsty study note
zirtîr rawh u: “Zirtîr tûrin” tia lehlin Grik thu malah hian kaihhruaina, hrilhfiahna, hnialna hmanga thil dik tihlanna, leh finfiahna hmuhtîrnate a tel a ni. (Mt. 3:1; 4:23 ṭanchhan study note en rawh.) Isua thupêk zawng zawng pawm tûra zirtîrna chu chhunzawm zêl tûr a ni a, chutah chuan a thu zirtîrte zirtîrna, a thu zirtîrte nunpuina, leh a entawn tûr siamte zuina a tel a ni.—Joh. 13:17; Eph. 4:21; 1 Pe. 2:21.
Thlarau Lam Lunghlute Laih Chhuahna
(Matthaia 27:51) Tin, ngai teh, Pathian biak in puanzâr chu a chung lam aṭangin a hnuai lam thlengin a lo thlêr chhuak ta a; tin, lîrte a lo nghîng a, lungpuite a lo khi chat a;
Mt. 27:51 ṭanchhan nwtsty study note
puanzâr: Mawi taka siam he puan hi biak in Hmun Thianglim leh Hmun Thianghlim ber daidanna a ni a. Judate thurochhiaha târ lan dân chuan he puanzâr rit tak hi 18 m (60 ft) vêla sâng, 9 m (30 ft) vêla hlai, leh 7.4 cm (2.9 in.) vêla chhah a ni. Puanzâr tihthlêr a nihna chuan, Jehova chu a Fapa tihlumtute chungah a thinrim tih a târ lan mai bâkah, tûnah chuan vâna lâwn theihna kawng a inhawng ta tih pawh a târ lang bawk.—Heb. 10:19, 20; Thu Har Hrilhfiahna en rawh.
biak in: Heta Grik thu mal na·osʹ hian hmun Thianghlim leh hmun Thianghlim ber awmna in lian tak a kâwk a ni.
(Matthaia 28:7) Tin, kal thuai ula, a zirtîrte hnênah, ‘Mitthi zîng ata a tho leh ta a ni; ngai teh u, Galili ramah in hmaah a kal e; chutah chuan amah chu in hmu ang,’ tiin hrilh rawh u. Ngai teh u, ka hrilh tawh che u hi,” a ti a.
Mt. 28:7 ṭanchhan nwtsty study note
a zirtîrte hnênah . . . a tho leh ta . . . tiin hrilh rawh u: Hêng hmeichhiate hi Isua thawhlehna thu hrilh hmasak an nih bâkah, zirtîr dangte hnêna hrilh chhâwng tûra tihte an ni bawk. (Mt. 28:2, 5, 7) Pathian thu nêna inkalh Juda hnam dânah chuan, dân anga rorêlnaah hmeichhe thusawi chu phal a ni lo. Chu mi nêna inkalh takin, Jehova vântirhkoh chuan he chanvo hlimawm tak hi hmeichhiate chu pein a chawimawi a ni.
Bible Chhiar
(Matthaia 27:38-54) Tin, ama rual chuan suamhmang pahnih an khêngbet ve a, a ding lamah pakhat, a vei lamah pakhat. 39-40 Tin, mi vei apiangte chuan an lu thingin, “Nang Pathian biak in ṭhiata ni thuma sa lehtu, intidam rawh; Pathian Fapa i nih chuan kraws ata kha lo chhuk ta che,” tiin an tiel a. 41 Chutiang bawkin puithiam lalte chuan lehkhaziaktute nên tielin, 42 “Mi dang mah a tidam ṭhîn a, mahni a intidam thei si lo. Israel lal a ni alâwm tûnah hian kraws ata chu lo chhuk ang hmiang, tichuan amah chu kan ring ang. 43 Pathian a ring alâwm, amah hi a duh chuan tûnah hian chhandam rawh se; ‘Pathian Fapa ka ni,’ a ti si a,” an ti a. 44 Suamhmang an khenbeh vete pawh chuan chutiang bawkin an tiel a. 45 Tin, chawfâk hun achin behliang mun hun thlengin khawvêl a lo thim ta vek a. 46 Tin, behliang mun hun lai vêl chuan Isua chu aw ring takin, “Eloi, Eloi, lama sabakthani?” tiin a au chhuak a. (chu chu “Ka Pathian, ka Pathian, engah nge mi kalsan?” tihna a ni.) 47 Tin, a kianga ding ṭhenkhatte chuan chu chu an hriatin, “He mi hian Elija a ko a ni,” an ti a. 48 Tin, an zînga mi pakhat a tlân ta nghâl a, spanj a la a, uain thûrin a chiah khat a, tiangah a târ a, a han intîr a. 49 Tin, mi dangte chuan, “Awm rawh se; amah la thla tûrin Elija a lo kal emaw i en ang u,” an ti a. 50 Tin, Isua chu aw ring takin a au leh a, a thlarau a thlah ta a. 51 Tin, ngai teh, Pathian biak in puanzâr chu a chung lam aṭangin a hnuai lam thlengin a lo thlêr chhuak ta a; tin, lîrte a lo nghîng a, lungpuite a lo khi chat a; 52 thlânte a lo inhawng a; mi thianghlim muhîl tawhte taksa tam tak pawh kaihthawhin an awm ta a; 53 chûngte chu a thawhleh hnuah chuan thlân ata lo chhuakin khaw thianghlimah chuan an lût a, mi tam tak hnênah an inlâr ta a. 54 Tin, sipai za hotu leh a hnêna Isua vênga awm vete chuan lîrnghîng leh thil awmziate chu an hmuhin an hlau ta êm êm a, “He mi hi Pathian Fapa a ni ngei mai,” an ti a.
APRIL 16-22
PATHIAN THU AṬANGA RO HLUTE | MARKA 1-2
“I Sualte Ngaihdam A Ni Tawh E”
(Marka 2:3-5) Tin, zeng pakhat, mi paliina zâwn, a hnênah an rawn hruai a. 4 Tin, mipui avânga a kiang hnaia an lo kal theih loh avângin a awmna in chung chu an ṭhiat ta a; tin, an reh pawh zawhin a âwngphah chu a chunga mi zeng mu chawp chuan an zuk thlâk a. 5 Tichuan Isuan an rinzia chu a lo hmuhin zeng hnênah chuan, “Ka fa, i sualte ngaihdam a ni tawh e,” a ti a.
jy-E 67 ¶3-5
“I Sualte Ngaihdam A Ni Tawh E”
Isua’n mi tam tak awmkhâwmna ina a zirtîr laiin, mi paliin zeng pakhat chu âwngphah chawpin an rawn zâwn a. An ṭhianpa chu Isua tihdamtîr an duh a. Mahse, mipui avângin, ‘a kiang hnaiah an lo kal thei lo.’ (Marka 2:4) A beidawnthlâk dân tûr chu han mitthla teh! In chung zâwlah an lâwn a, in chung chu ṭhiatin an rek pawp a. Tichuan, a âwngphah chawp chuan zeng chu an zuk thlâk ta a ni.
An tihbuai avângin Isua chu a thinrim em? Rim lo ve! An rinna chuan a rilru a khawih hle avângin zeng hnênah: “I sualte ngaihdam a ni tawh,” tiin a hrilh a ni. (Matthaia 9:2) A nih leh, Isua chuan sualte a ngaidam thei tak tak em? Lehkha ziaktute leh Pharisaite chuan, chu chu la vungin: “Engati nge hetiang thu a sawi ni? Pathian a sawichhia a nih hi; mi pakhat, Pathian chauh lo chuan, tuin nge sualte ngaidam thei ni?” tiin an ngaihtuah a.—Marka 2:7.
Isua’n an ngaihtuahna a hriat avângin an hnênah: “Chûng thu chu engati nge in thinlunga in ngaihtuah ni? Zeng hnênah hian, ‘I sualte ngaihdam a ni tawh,’ tih leh, ‘I âwngphah la la, kein kal tawh rawh,’ tih hi a engnge sawi awl zâwk?” tiin a zâwt a. (Marka 2:8, 9) Ni e, Isua chuan nakina a hlan tûr inthawina ṭanchhanin, chu pa sualnate chu a ngaidam thei a ni.
(Marka 2:6-12) Tin, lehkhaziaktu ṭhenkhatte chu chutah chuan an ṭhu a, 7 “He mi hian engati nge hetiang thu a sawi ni? Pathian a sawichhia a nih hi; mi pakhat, Pathian chauh lo chuan, tuin nge sualte ngaidam thei ni?” tiin an thinlungin an ngaihtuah a. 8 Tin, Isuan an rilruin chutiangin an ngaihtuah tih a rilruin a lo hre ta nghâl a, an hnênah, “Chûng thu chu engati nge in thinlunga in ngaihtuah ni? 9 Zeng hnênah hian, ‘I sualte ngaihdam a ni tawh,’ tih leh, ‘I âwngphah la la, kein kal tawh rawh,’ tih hi a engnge sawi awl zâwk? 10 Engpawh ni sela, khawvêlah Mihring Fapain sual ngaihdam theihna a nei tih in hriat nân,’ (zeng hnênah chuan) 11 “Tho la, i âwngphah la la, i inah kal rawh, ka ti a che,” a ti a. 12 Tichuan ani chu a tho va, a âwngphah chu a la ta nghâl a, an zaa mithmuhin a kal chhuak ta a; chutichuan an zain mak an ti hle a, “Hetiang rêng rêng hi kan la hmu ngai lo,” tiin Pathian an fak ta a.
Mk. 2:9 ṭanchhan nwtsty study note
a engnge sawi awl zâwk: Miin sualte a ngaidam thei tia a sawi chu a awlsam ngei ang, chu chu a dik ngei tih nemnghehtu tûr finfiahna a awm loh avângin. Mahse, Tho la . . . kal rawh tia sawi tûr chuan Isua’n sualte ngaihdam theihna a nei tih mi zawng zawngin chiang taka an hriat theih nân thilmak a tih a ngai a ni. He Bible châng leh Is. 33:24-na chuan natna chu kan sualnate nên a thlunzawm a ni.
Thlarau Lam Lunghlute Laih Chhuahna
(Marka 1:11) Tin, “Nang ka Fapa duh tak i ni a, i chungah ka lâwm êm êm a ni,” tiin vân aṭangin aw a lo chhuak a.
Mk. 1:11 ṭanchhan nwtsty study note
vân aṭangin aw a lo chhuak a: Hei hi Jehova ngeiin mihringte a bia tia chhinchhiahna, Chanchin Ṭha ziaka vawi thum sawi lannaa a hmasa ber a ni.—Mr. 9:7; Joh. 12:28 ṭanchhan study note en rawh.
Nang ka Fapa duh tak i ni: Isua chu thlarau thilsiam niin Pathian Fapa a ni a. (Joh. 3:16) Ṭha famkim Adam ang bawkin, mihring anga a rawn pian aṭangin Isua chu “Pathian fa” a ni. (Lk. 1:35; 3:38) Mahse, heta târ lan Pathian thuah hian Isua hriat hran theihna sawi lanna aia tam a tel tia ngaih chu inâwm tak a ni. He thu puanchhuah a nih ruala thlarau thianghlim leih a nihna chuan Pathianin Isua chu thlarau lam A Fapa niin a hring a, vân nunna nei leh tûra beiseina neiin a ‘piang thar a,’ Pathian ruat Lal leh Puithiam Lalber ni tûrin thlarauva hriak thih a ni tih chiang takin a târ lang a ni.—Joh. 3:3-6; 6:51; Lk. 1:31-33; Heb. 2:17; 5:1, 4-10; 7:1-3 khaikhin.
i chungah ka lâwm êm êm a ni: He ṭawngkam vêk hi Mt. 12:17-18-ah hman a ni a, chu chu thutiam Messia, a nih loh leh Krista chungchâng sawina Is. 42:1-na aṭanga lâk chhâwn a ni a. Thlarau thianghlim leih a nihna leh Pathianin a Fapa tia a puanchhuahna chuan Isua chu thutiam Messia a ni tih chiang takin a târ lang a ni.—Mt. 3:17; 12:18 ṭanchhan study note chu en rawh.
(Marka 2:27, 28) Tin, amah vêkin an hnênah chuan, “Chawlhni hi mihring tâna siam a ni a, mihring hi Chawlhni tâna siam a ni lo; 28 Chutichuan Mihring Fapa hi Chawlhni chungah lam pawh hian Lal a ni,” a ti a.
Mk. 2:28 ṭanchhan nwtsty study note
Chawlhni . . . Lal: Isua chuan he ṭawngkam hi amah insawi nân a hmang a (Mt. 12:8; Lk. 6:5), chu chuan a Pa vâna mi thupêk anga hnathawh nân Chawlhni chu a duh duhin a hmang thei tih a târ lang a ni. (Joh. 5:19; 10:37, 38 khaikhin rawh.) Chawlhniah, Isua’n a thilmak tih lângsar ber berte zînga ṭhenkhat chu a ti a, chutah chuan dam lo tihdam pawh a tel a ni. (Lk. 13:10-13; Joh. 5:5-9; 9:1-14) Hei hian Lalram rorêlna hnuaia hahdamna a thlen tûr, chawlhnia chawlh hahdamna ang chu a entîr lâwk a ni.—Heb. 10:1.
Bible Chhiar
(Marka 1:1-15) Pathian Fapa Isua Krista Chanchin Ṭha thlen ṭantirhna chu. 2 Zâwlnei Isaia lehkhabuah, “Ngai teh, ka tirhkoh i hmaah ka tîr a, ani chuan i kawng a siam ang” 3 Thlalêra mi au râwl chuan, ‘Lalpa lamlian sial ula, a kawngte tingîl rawh u,’ a ti,” tia, ziak ang khân, 4 Johana, thlalêra baptistu kha, thiltihsual ngaihdam nân simna baptisma thu hrilin a lo chhuak a. 5 Tin, Judai rama mi zawng zawng leh Jerusalem khuaa mi zawng zawngte an chhuak a, a hnên lamah an kal a, an sualte thupha chawiin Jordan luiah chuan a hnênah baptisma an chang ta hlawm a. 6 Tin, Johana chu sanghâwngsei hmul puanin a inthuam a, a kâwng savun kâwnghrênin a hrêng a, a chaw chu khaukhuap leh ram khawizu a ni. 7 Tin, “Ka hnungah keimah aia ropui zâwk a lo kal mêk a ni; kûna a pheikhawk hrui phelh tlâk pawh ka ni lo ve. 8 Kei zawngin tuiin ka baptis ṭhîn che u a; ani erawh chuan thlarau thianghlimin a baptis ang che u,” tiin a hril a. 9 Tin, chûng niah chuan heti hi a lo ni a, Isua chu Galili rama Nazaret khua aṭangin a lo kal a, Jordan luiah chuan Johana hnênah baptisma a chang ta a. 10 Chu veleh tui ata a chhuahin, vân inhawnga thlarau ṭhuro anga a chunga lo chhuk a hmu a. 11 Tin, “Nang ka Fapa duh tak i ni a, i chungah ka lâwm êm êm a ni,” tiin vân aṭangin aw a lo chhuak a. 12 Tin, thlarau chuan ani chu thlalêrah a tîr chhuak ta nghâl a. 13 Tichuan Setana thlêm chungin thlalêrah chuan ni sawmli a awm a, ram sa zîngahte a awm a; vântirhkohte chuan a rawng an bâwlsak a. 14 Tin, Johana an man hnuin, Isua, Pathian Chanchin Ṭha hrilin, Galili ramah a lo kal a, 15 “Hun chu a lo thleng ta a, Pathian ram pawh a lo hnai ta; sim ula Chanchin Ṭha hi ring rawh u,” a ti zêl a.
APRIL 23-29
PATHIAN THU AṬANGA RO HLUTE | MARKA 3-4
“Chhawlhnia Tihdamna”
(Marka 3:1, 2) Tin, inkhâwmna inah chuan a lût leh a: chutah chuan mi pakhat kut zeng a lo awm a. 2 Tin, amah an hêk theih nân Chawlhniin a tihdam dâwn leh dâwn loh an mitmei a.
jy-E 78 ¶1-2
Chawlhniah Eng Tih Nge Thiang?
Chawlhni dang lehah, Isua chuan Galili rama inkhâwmna in a tlawh a. Chutah chuan mi pakhat kut ding lam zeng a hmu a. (Luka 6:6) Lehkhaziaktute leh Pharisiate chuan Isua chu ngun takin an enthla a. Engvângin nge? “Chawlhniin tihdam a thiang em?” tia an zawhna aṭangin an rilru put hmang dik tak an târ lang a ni.—Matthaia 12:10.
Juda sakhaw hruaitute chuan nunna tâna hlauthâwnawm khawp dinhmun a nih chauhvin Chawlhniah tihdam a thiang niin an ngai a. Entîr nân, nunna atâna hluhawm lo, ruh pelh siam ṭhat emaw, tuamsak emawte chu Chawlhnia tih phal a ni lo. Lehkhaziaktute leh Pharisaite chuan chu pa hrehawm tawrh chu an khawngaih êm vânga Isua zâwt an ni lo tih a chiang a ni. Anni chuan Isua thiam loh an chantîr theih nân chhuanlam tûr an zawng a ni.
(Marka 3:3, 4) Tin, anin kut zeng hnênah chuan, “Lo ding chhuak rawh,” a ti a. 4 Tin, an hnênah chuan, “Chawlhniah hian tihṭhat nge thiang, tihchhiat? chhandam nge thiang, tihhlum?” tiin a zâwt a. Nimahsela an ngawi ta reng a.
jy-E 78 ¶3
Chawlhniah Eng Tih Nge Thiang?
Isua chuan an ngaihtuahna ṭha lo tak chu a hria a. Chawlhni serh tûra thupêk chungchângah Bible thute nên inmil lovin, a lutuka thlîr dân an nei tih a hria a ni. (Exodus 20:8-10) A hna ṭha thawhte sawisêlna ang chi chu a lo tawng tawh ṭhîn a. Tûnah, Isua’n kut zeng hnênah: “lo ding chhuak rawh,” tia hrilhin anni chu tlang takin a hmachhawn a ni.—Marka 3:3.
(Marka 3:5) Tin, an thinlung sakzia chu pawi tihsak êm êmin, thinur chunga anmahni a en vêl hnuin, chu mi hnênah chuan, “I kut phar rawh,” a ti a. Tin, a han phar chhuak a, a kut chu a dam ta a.
Mk. 3:5 ṭanchhan nwtsty study note
pawi tihsak êm êmin, thinur chunga: Hemi ṭuma sakhaw hruaitute thinlung sakzia a hmuh huna Isua chhân lêt dân chu Marka chauhvin a ziak a. (Mt. 12:13; Lk. 6:10) Marka chuan he Isua rilru veizâwng târ lanna chiang tak hi, rilrua thil vei hma tak ve bawk Petera hnên aṭanga a hriat a nih ngei a rinawm.—“Marka Bu Hmêlhriattîrna” tih chu en rawh.
Thlarau Lam Lunghlute Laih Chhuahna
(Marka 3:29) Tupawh thlarau thianghlim meuh sawichhia erawh chuan engtikah mah ngaihdamna a hmu lo vang a, chatuan sualna kawngah chuan thiam lohvin a lo awm zâwk ang,” a ti a.
Mk. 3:29 ṭanchhan nwtsty study note
thlarau thianghlim meuh sawichhia: Sawichhiatna tih chuan hming tihliau thei, chhiatna thlen thei, a nih loh leh Pathian emaw, thil thianghlim emaw sawichhiatna ṭawngkam a kâwk a. Thlarau thianghlim chu Pathian hnên aṭanga lo chhuak a nih avângin, duhrêng vânga chumi hnathawh dodâl emaw, hnâwl emaw chu Pathian sawichhiatna a ni. Mt. 12:24, 28 leh Mr. 3:22-a târ lan a nih angin, Juda sakhaw hruaitute chuan Pathian thalrau ṭanpuinaa Isua thilmak tihte an hmu a; mahse, chu thiltihtheihna chu Diabol-Setana thiltihah an puh a ni.
chatuan sualna: Chatuanna nghawng nei thei duh rêng vânga thilsual tih sawina a ni thei a; chutiang sual khuh bo thei inthâwina a awm lo.—He Bible chânga thlarau thianghlim meuh sawichhia tih study note leh chanchin thuhmun ziakna Mt. 12:31 ṭanchhan study note chu en rawh.
(Marka 4:26-29) Tin, amah vêkin, “Pathian ram chu hetiang hi a ni: miin leiah hian chi theh sela, 27 zânah muhîlin chhûnah tho ṭhîn sela, chi chu, a zia a hriat lohvin, lo ṭiakin lo ṭhang sela; chutiang chu a ni. 28 Lei hian amahin rah a rawn chhuah ṭhîn; a tîr berah a kûng, chu mi hnuah chuan a vui; tin, chu mi hnu lehah a vuiah chuan buh fang pum chu. 29 Nimahsela, rah chu a lo hmin hunin, buh lâk a lo hun tâk avângin, favah chu a phawrh nghâl ṭhîn,” a ti a.
‘A Awmzia I Hre Thiam’ Em?
6 He tehkhin thu aṭang hian eng nge kan zir theih? A hmasa berin, Bible zir lai thlarau lama hma sâwn dân tûr chu kan thunun thei lo tih kan pawm a ngai a ni. Mahni tlin tâwk hriatna chuan Bible zirlaite chu baptisma chang tûra nawr emaw, tur emaw tûra thlêmna pumpelh tûrin min ṭanpui ang. Mi chu theih tâwp chhuaha ṭanpuiin kan thlâwp thei a; mahse, inpumpêk tûra thu tlûkna chu ama siam tûr a ni tih inngaitlâwm takin kan pawm a ni. Inpumpêkna chu thinlung taka Pathian hmangaihna aṭanga lo chhuak a ni tûr a ni a. Chutiang a nih loh chuan Jehova’n a pawm lo vang.—Sâm 51:12; 54:6; 110:3.
7 A pahnihnaah chuan, he tehkhin thuin a zirtîr hriat thiamna chuan kan rawngbâwlnain rah a chhuah nghâl lo a nih pawhin lunghnual mai lo tûrin min ṭanpui a. Dawhtheihna kan neih a ngai a ni. (Jak. 5:7, 8) Zirlai chu theih tâwp chhuaha kan ṭanpui phawt chuan, buh chiin rah a chhuah loh pawhin, chu chu kan rinawm loh vâng a ni lo tih kan hria a. Jehova chuan thutak chi chu inthlâkthleng duhna nei rilru inngaitlâwmte thinlunga a ṭhan chhoh a phal a ni. (Mt. 13:23) Chuvângin, kan rawngbâwlna hlawhtlinna chu a rah chhuah aṭangin kan teh tûr a ni lo. Jehova mithmuhah chuan, kan rawngbâwlna hlawhtlinna chu kan zirtîrte chhân lêt dânah a innghat lo. Chu aimah chuan, kan rawngbâwlna rah chhuah chu eng pawh ni se, ani chuan theih tâwp kan chhuahna chu a ngai hlu a ni.—Luka 10:17-20; 1 Korinth 3:8 chhiar rawh.
8 A pathumnaah chuan, miin inthlâkthleng tûra hma a lâk dân chu kan hmu ṭhîn lo va. Entîr nân, nupa tuak khat chuan anmahni Bible zirpuitu missionary hnênah chuan baptisma la chang lo thuchhuahtu nih an duh thu an hrilh a. Ani chuan thuchhuahtu ni thei tûrin an meizial zûk an bânsan a ngaih thu a hrilh a. Anni chuan thla tam tak kalta aṭang tawha zialzûk an bânsan tawh thu an han hrilh chuan mak a ti hle a ni. Engvângin nge an bânsan? Jehova chuan an meizial zûk chu a hmu theiin, vervêkna chu a hua tih an hriat vâng a ni. Chuvângin, an thinlung chuan missionary hmaa zial zu law law tûr emaw, zialzûk bânsan hulhual tûr emawa thu tlûkna siam tûrin anni chu a chêttîr ta a. Thu tlûkna dik siam tûrin tûn hnaia an neih Jehova hmangaihna chuan anni chu a ṭanpui a ni. Missionary chuan an inthlâkthleng ang tih ngaihna hre lo mah se, anni chu thlarau lamah an ṭhang chho a ni.
Bible Chhiar
(Marka 3:1-19a) Tin, inkhâwmna inah chuan a lût leh a: chutah chuan mi pakhat kut zeng a lo awm a. 2 Tin, amah an hêk theih nân Chawlhniin a tihdam dâwn leh dâwn loh an mitmei a. 3 Tin, anin kut zeng hnênah chuan, “Lo ding chhuak rawh,” a ti a. 4 Tin, an hnênah chuan, “Chawlhniah hian tihṭhat nge thiang, tihchhiat? chhandam nge thiang, tihhlum?” tiin a zâwt a. Nimahsela an ngawi ta reng a. 5 Tin, an thinlung sakzia chu pawi tihsak êm êmin, thinur chunga anmahni a en vêl hnuin, chu mi hnênah chuan, “I kut phar rawh,” a ti a. Tin, a han phar chhuak a, a kut chu a dam ta a. 6 Tin, Pharisaite chu an chhuak a, amah an tihhlum theihnazia tûr ngaihtuahin Heroda pâwla mite nên chuan an inrâwn ta nghâl a. 7 Tin, Isua chu a zirtîrte nên dîl lamah chuan an kal bo va; tin, Galili ram aṭangin mipui tam takin an zui ta a. 8 Tin, a thiltih ropuizia chu an hriatin Judai ram aṭang te, Jerusalem khua aṭang te, Idumai ram aṭang te, Jordan râl aṭang te, Tura leh Sidon khaw vêl aṭang tein mipui tam tak a hnênah an lo kal ve a. 9 Tin, mipui avâng chuan a tân lawnglêng lo ruatsak tûrin a zirtîrte a hrilh a, “Chutilochuan mi nêk huai huai dah ang e,” a ti a. 10 Mi tam tak a tidam tawh si a; chutichuan na nei apiangin amah an deh theihna tûrin an bawh huai huai a. 11 Ramhuai bawlhhlawhte pawhin amah chu an hmuh apiangin a hmaah bawkkhupin, “Nang Pathian Fapa chu i ni,” tiin an au ṭhîn a. 12 Tin, ani chuan a chanchin chu puan loh tûr an hnênah a ti tlat zêl a. 13 Tin, tlângah chuan a han kal a, amahin a duhzâwng apiangte chu a ko va; tin, anni chu a hnênah an han kal a. 14-15 Tin, a hnêna an awm theih nân leh thu hril tûr leh ramhuaite hnawh chhuahna thu nei tûra a tirh chhuah theih nân, sâwm leh pahnih a ruat a. 16 Chûngte chu Simona, Petera a vuah te, 17 Zebedaia fapa Jakoba leh Jakoba unau Johana te, (chu mite chu ‘Boanergea’ a vuah a, chu chu ‘Khawpuiri Fate’ tihna a ni.) 18 Andria te, Philipa te, Bartholomaia te, Mathaia te, Thoma te, Alphaia fapa Jakoba te, Thaddaia te, Kanana mi Simona te, 19 a mantîrtu Juda Iskariota te an ni.
APRIL 30–MAY 6
PATHIAN THU AṬANGA RO HLUTE | MARKA 5-6
“Isua’n Kan Hmangaih Thi Tawhte Kaitho Tûrin Thiltihtheihna A Nei”
(Marka 5:38) Tin, inkhâwmna in hotu in chu an va thleng a, Isua chuan an lo buai mur mur leh an lo ṭap tuar tuar a, an lo chiau vak vak chu a hmu a.
(Marka 5:39-41) Tin, a va luh chuan an hnênah, “Engati nge in bengchhena in ṭah ni? naupang chu a thi lo ve, a muhîl a ni zâwk,” a ti a. 40 Tin, anni chuan an nuihsan ta mai a. Ani erawh chuan an zain a hnawt chhuak a, naupang nu leh pa leh a hnêna awmte chu a hruai a, naupang awmnaah chuan a va lût a. 41 Tin, naupang kut chu a chelh a, a hnênah chuan, “Talitha Kumi! a ti a, (chu chu “Chêmtê, tho rawh, ka ti a che,” tihna a ni.)
Mk. 5:39 ṭanchhan nwtsty study note
a thi lo ve, a muhîl a ni zâwk: Bible-ah chuan, thihna chu muhîl nên a khaikhin fo a. (Sâm 13:3; Joh. 11:11-14; Tirh. 7:60; 1 Kor. 7:39; 15:51; 1 Thes. 4:13) Isua chuan hmeichhe naupang chu a kaitho leh dâwn a, tui taka muhîlte chu kaithawh leh theih an nih ang bawkin, thihna ata pawh kaithawh leh theih an nih dâwn avângin he thu hi a sawi a nih a rinawm. Hmeichhia naupang kaitho thei tûra Isua thiltihtheihna chu “mitthite tinungtu leh, thil awm lote awm anga sawitu” a Pa hnên aṭanga a hmuh a ni.”—Rom 4:17.
(Marka 5:42) Tin, hmeichhe naupang chu a lo tho va, a kal thei ta nghâl a; amah chu kum sâwm leh kum hnih mi a ni tawh rêng a. Tin, anni chuan mak tih namênin mak an ti lo va.
jy-E 118 ¶6
Hmeichhe Naupang Chu A Nung Let Ta!
Tûn hmaa a tih ṭhin angin, Isua chuan a tihdamte chu an tâna a thiltihte tlâng hriattîr lo tûrin thu a pe a, he hmeichhe nu le pa hnênah pawh a hrilh leh a ni. Mahse, lâwmnaa khat nu leh pa leh mi dangte sawi chhuahna avângin chanchin chu “ram zawng zawngah” a thang ta a. (Matthaia 9:26) I hmangaih tak kaihthawha a awm i hmuh chuan, chu mi chungchâng chu phûr takin i sawi lo vang maw? Hei hi Isua’n mitthi a kaihthawh pahnihna a ni.
Thlarau Lam Lunghlute Laih Chhuahna
(Marka 5:19, 20) Nimahsela Isuan a phal lo va, a hnênah, “I inah i ṭhiante hnênah haw la, Lalpan i tân thil a tihsak che hi a ropuizia leh a khawngaihzia che hi va hrilh rawh,” a ti ta zâwk a. 20 Tichuan a kal a, Dekapoli khuaahte chuan Isuan a tân thil a tihsak ropuizia chu a tlângaupui ta a; tin, mi zawng zawng chuan mak an ti hle a.
Mk. 5:19 ṭanchhan nwtsty study note
va hrilh rawh: A thilmak tih tlâng hriata sawi lo tûra Isua’n kaihhruaina a pêk ṭhin nêna inkalh takin (Mr. 1:44; 3:12; 7:36), chu pa hnênah chuan thilthlengte chu a chhûngte va hrilh tûrin a ti a. Isua chu, chumi hmun ata chhuak tûra tih a ni a, amah ngeiin an hnênah a hrilh dâwn loh vâng a ni thei a; chu chuan vawk bo chungchâng chanchin duhawm lo tak darh zau tûr pawh a tihnêp phah ngei ang.
(Marka 6:11) Tin, khawi khua pawhin an lawm loh che u a, in thu an ngaihthlâk lohna apiangah, chuta ṭanga in chhuah hun chuan anmahni hriattîrna tûrin in kephah hnuaia vaivut kai chu thing thla ang che u,” a ti a.
Mk. 6:11 ṭanchhan nwtsty study note
in kephah hnuaia vaivut kai chu thing thla ang che u: He thiltih hian an chunga Pathian rorêlna a lo thlen hunah zirtîrte’n mawh an phur lo tih a târ lang a ni. Chutiang ṭawngkam chu Mt. 10:14; Lk. 9:5-ah a chuang a. Marka leh Luka chuan anmahni hriattîrna tûrin tih ṭawngkam an belh a ni. Paula leh Barnaba chuan he kaihhruaina hi Pisidia Antiokei khuaah an zâwm a ni (Tirh. 13:51), Paula’n Korinth khuaa a awm laiin chutiang deuh chuan a ti a, a puan thingin: “In thihna mawh chu nangmahniin phur ang che u; kei zawng ka hul a ni e,” tiin a sawi a ni. (Tirh. 18:6) Chutiang tih dânte chu zirtîrte chuan an hre ngai tawh ngei ang; Jentailte khua kal tlanga khual zin ṭhîn sakhaw ngaihsak Judate chuan Juda mite bial an luh leh hmain an pheikhawka thil bal an hmuhte chu an thing thla ṭhîn a ni. Mahse, Isua chuan a zirtîrte hnêna a kaihhruaina a pêk laiin, a rilruah awmze danglam tak a nei a ni ngei ang.
Bible Chhiar
(Marka 6:1-13) Tin, chuta ta chu a chhuak a, a awmna khaw lam chu a thleng ta a; a zirtîrte chuan an zui zêl a. 2 Tin, chawlhni a lo ni a, inkhâwmna inah a zirtîr ta a; tin, mi tam tak a thu hriate chuan, “He mi hian hêng thute hi khawi ata nge a hriat ni? He mi hnêna finna pêk hi eng finna nge ni? A kutin heti kauva thilmak a tih hi engtizia nge ni? 3 He mi hi Mari fapa, Jakoba te, Josea te, Juda te, Simona te unaupa, thingrem siamtu kha a ni lo vem ni?” A farnute pawh hetah kan hnêna awm an ni lo vem ni?” an ti a, mak an ti hle a. Tichuan a chungah an lungni ta lo va. 4 Tin, Isuan an hnênah, “Zâwlnei chu ama khaw lamah te, ama laichîn zîngah te, ama inah te chauh lo chuan chawimawi lohvin a awm ngai lo,” a ti a. 5 Tin, mi damlo tlêmte chunga kut nghata a tihdam chauh lo chu, chutah chuan thil mak rêng a ti thei lo va. 6 An rin loh avângin mak a ti hle a. Tin, zirtîr chung zêlin khuate chu a fang vêl a. 7 Tin, sâwm leh pahnihte chu a ko va, pahnih zêlin a tîr chhuak ta a; ramhuai bawlhhlawhte chunga thuneihna a pe bawk a. 8 Tin, an zinna atân tiang chauh lo chu engmah—chhang pawh, ipte pawh, an kâwnghrêna tangka pawh—ken loh tûr a ti tlat a; 9 pheikhawk erawh chu bun tûr a ti a; “Kawr pahnih ha suh u,” a ti bawk a. 10 Tin, amah vêkin an hnênah, “Khawiah pawh in thlenna inah chuan, chuta ta in chhuah hma loh chu thleng reng ang che u. 11 Tin, khawii khua pawhin an lawm loh che u a, in thu an ngaihthlâk lohna apiangah, chuta ṭanga in chhuah hun chuan anmahni hriattîrna tûrin in kephah hnuaia vaivut kai chu thing thla ang che u,” a ti a. 12 Tichuan an kal chhuak a, simna tûr thu an hrilh a; 13 ramhuai tam tak pawh an hnawt chhuak a, dam lo tam tak pawh hriak an hnawih a, an tidam bawk a.