Nun leh Rawngbâwlna Inzirna Lehkhabu Atâna Thu Lâk Chhuahnate
NOVEMBER 4-10
PATHIAN THU AṬANGA RO HLUTE | 1 JOHANA 1-5
“Khawvêl leh Khawvêla Thil Awmte Hmangaih Suh”
(1 Johana 2:15, 16) Khawvêl hi hmangaih suh ula, khawvêla thil awmte pawh hi hmangaih hek suh u. Mi tupawhin khawvêl hi a hmangaih chuan Pa a hmangaihna amahah a awm lo. 16 Khawvêla thil awm zawng zawng, tisa châkna te, mit châkna te, dam chhûng ropuina lem te hi Paa chhuak a ni lo va, khawvêla chhuak a ni zâwk si a.
Isua Tihhmuhna Chu Zui Tlat Rawh
13 Ṭhenkhat chuan he khawvêla thil zawng zawngte hi a sual vek lo tiin an ngaihtuah mai thei a. Chu chu a dik pawh ni tehrêng se, khawvêl leh a hîpnate hian awlsam takin Jehova kan biakna lak ata min lapêng thei a ni. Khawvêl pêk chhuah thil engmah hi Pathian min hnaihtîr tûra siam a ni lo bawk. Chuvângin, khawvêla thil awmte kan hmangaih chhoh chuan, amaha thil sual ni lote pawh hmangaih mah ila, kawng hlauhawm tak kan zawh a ni. (1 Timothea 6:9, 10) Chu bâkah, khawvêla thil tam tak hi a ṭha lo tak zet a, min tichhe thei a ni. Tharum thawhnate, hausak ûmnate, anih loh leh mipat hmeichhiat hman khaw lohnate târ lanna cinema emaw, television program-te emaw kan en chuan, chûngte chu pawmzam mai theih a lo ni ang a—a hnuah kan tân thlêmna a lo ni ang. Nunphung sâng emaw, sumdâwnna lampang emaw ringawt ngaihtuahtute kan kawm chuan, chûng thilte chu kan tân pawh thil pawimawh ber a lo ni ve thei a ni.—Matthaia 6:24; 1 Korinth 15:33.
(1 Johana 2:17) Khawvêl hi a châknate chawpin a boral mêk a ni, Pathian duh zâwng titu erawh chu kumkhuain a awm reng ang.
Mi Eng Ang Nge In Nih Tûr Ngaihtuah Rawh U
18 “Khawvêla thil awmte” do tûra min ṭanpui thei thil dang leh chu Johana ziak: “Khawvêl hi a châknate chawpin a boral mêk a ni, Pathian duhzâwng titu erawh chu kumkhuain a awm reng ang,” tih hriat reng hi a ni. (1 Joh. 2:17) Setana khawvêl chu awm hlen tûr leh tak viau angin a lang mai thei a. Mahse, tâwp nî a la nei ngei dâwn a ni. Setana khawvêlin a pêk theih thil engmah hian a daih rei dâwn lo. Chumi hriat rengna chuan Diabola hmanruate buma awm lo tûrin min ṭanpui ang.
Thlarau Lam Lunghlute Laih Chhuahna
(1 Johana 2:7, 8) Duh takte u, thupêk thar zawng in hnênah ka han ziak lo va; thupêk hlui, atîr ata in neih kha ka ziak zâwk a ni. Chu thupêk hlui chu in thu hriat tawh hnu kha a ni. 8 Nimahsela, thupêk thar ziak ka ni bawk ang chu, (chu chu amahah leh nangmahniah a lang a ni,) thim chu a bo mêk avâng leh êng tak tak chu tûnah a lo ên tâk avâng hian.
Jehova Thuhriattîr Chu A Rinawm
14 Kristian Grik Pathian Lehkha Thu hi inhmangaih tawn a pawimawhzia thuin a khat tlat a. Isua chuan thupêk zawng zawnga pawimawh ber dawttu chu ‘mahni inhmangaih anga vêngte hmangaih’ a ni tih a sawi. (Mt. 22:39) Chutiang bawkin, Isua unaupa Jakoba pawhin hmangaihna chu “lal dân” tiin a ko hial a ni. (Jak. 2:8) Tirhkoh Johana chuan: “Duh takte u, thupêk thar zawng in hnênah ka han ziak lo va; thupêk hlui, atîr ata in neih kha ka ziak zâwk a ni,” tiin a ziak bawk a ni. (1 Joh. 2:7, 8) Johana’n “thupêk hlui” a tih chu eng nge ni? Inhmangaih tawn tûra thupêk hi a ni a. A “hlui” a nih chhan chu kum sâwmbi engemaw zât kal ta, “a tîr ata” Isua’n a lo pêk tawh vâng a ni. Mahse, chu chu a “thar” a ni bawk a, zirtîrte’n dinhmun tharte an tawh hunah mahni hmasial lo hmangaihna an mamawh a ni. Krista zirtîrte kan nih angin, kan vêngte kan hmangaihna tidai thei he khawvêl mizia mahni hmasialna laka invêng tûra vaukhânna chu kan hlut hle a ni lâwm ni?
(1 Johana 5:16, 17) Tu pawhin a unau thihna khawp ni lo sual tiin hmu sela, a dîlsak ang a; tichuan Pathianin a dîltu hnênah chuan thihna khawp ni lo sual titute tân chuan nunna a pe ang. Thihna khawp sual a awm a; chutiang lamah chuan a dîlsak tûr ka ti a ni lo ve. 17 Fel lohna zawng zawng hi sual a ni; thihna khawp ni lo sual pawh a awm bawk a ni.
it-1-E 862 ¶5
Ngaihdamna
Mi dangte sual ngaidam tûra Pathian hnêna ṭawngṭai chu thil inâwm tak a ni a, kohhrana mi zawng zawngte sual ngaidam tûra ṭawngṭai pawh thil inâwm tak a ni. Mosia pawh Israel hnam pum tân a ṭawngṭai a, a hnam puma an sualna puangin, ngaihdamna a dîlsak a, Pathianin a ngaihthlâksak a ni. (Number 14:19, 20) Solomona pawh, biak in a hlan ṭumin Jehova chuan a mite an lo sual hunah leh an kawng sualte kalsana a lam an lo hawi leh huna lo ngaidam tûrin a ṭawngṭai bawk a ni. (1 Lalte 8:30, 33-40, 46-52) Ezra chuan Juda kîr lehte aiawhin vântlâng hmaah an sual a puang a. Tih tak zeta a ṭawngṭaina leh a fuihna avângin mite chuan Jehova ngaihdamna dawn nân hma an la a ni. (Ezra 9:13–10:4, 10-19, 44) Jakoba pawhin thlarau lama bawrhsâwmte chu an chunga ṭawngṭai tûra kohhran upa ko tûrin a fuih a, “thil a lo tihsual tawh chuan ngaihdamsak a ni ang,” a ti. (Jakoba 5:14-16) Mahse, “thihna khawp sual a awm a,” chu chu thlarau thianghlim chunga sual, ngaihdamna awm lo, duh rêng vânga sual tihna a ni. Chutiang zâwnga sual titute tân chuan Kristian tu mân an ṭawngṭaisak tûr a ni lo.—1 Johana 5:16; Matthaia 12:31; Hebrai 10:26, 27; SIN, I; SPIRIT en rawh.
Bible Chhiar
(1 Johana 1:1–2:6) Nunna Thu, a tîr ata awm kha, kan bengin kan hriat kha, kan mitin kan hmuh kha, kan en reng a, kan kuta kan dap kha, chu mi chanchin chu; 2 (chu mi Nunna chu a lo lang ta a, kan lo hmu a, kan hriattîr bawk a, chu chatuan Nunna, Pa hnêna awm kan hnêna lo lang chu kan hrilh che u a nih hi;) 3 chu mi kan hmuh leh kan hriata chu in hnênah kan hrilh ve che u a nih hi, nangni pawhin min pâwl ve theih nân; keini min pâwlna chu Pa leh a Fapa Isua Krista pâwlna a ni tawh reng si a. 4 Tichuan kan lâwm a famkim theih nân hêng thute hi kan ziak a nih hi. 5 Tin, thuchah a hnên ata kan hriata in hnêna kan hrilh chhâwn tûr che u chu hei hi a ni: Pathian chu êng a ni a, amahah chuan thim rêng rêng a awm lo. 6 Thima awm siin, “Amah ka pâwl,” kan tih chuan dâwt kan sawi a ni, thutak pawh chu kan zâwm lo; 7 amaherawhchu amah chu êngah a awm angin keini pawh ênga awm kan nih chuan kan inpâwl tlâng a, tin, a Fapa Isua thisenin kan sual zawng zawng min tlenfaisak ṭhîn a ni. 8 “Sual ka nei lo,” kan tih chuan mahni leh mahni kan inbum a, thutak chu keimahniah a awm lo a ni. 9 Kan sualte thupha kan chawi chuan kan sualte ngaidam tûr leh kan fel lohna zawng zawng tlêngfai tûrin amah chu a rinawmin a fel a ni. 10 “Thil ka tisual lo,” kan tih chuan amah chu dawtheiah kan siam a, a thu pawh keimahniah a awm lo a ni.
2 Ka naute u, thil in tihsual loh nân hêng thu hi in hnênah ka ziak a nih hi. Tin, tu pawhin thil a tihsual chuan, Pa hnêna min sawipuitu Isua Krista, mi fel chu kan nei e; 2 ani chu kan sualte thupha chawina a ni; keimahni sual chauh ni lovin, khawvêl zawng zawng sual thupa chawina pawh a ni. 3 Tin, a thupêkte pawm kan nih chuan, chumiah chuan amah kan hria tih kan inhria e. 4 A thupêkte pawm si lova, “Amah ka hria,” titu chu mi dawthei a ni, thutak amahah a awm lo. 5 Tu pawh a thu pawm erawh chu amahah chuan Pathian a hmangaihna a famkim tak zet tawh a ni. Amahah kan awm tih he miah hian kan inhria a ni. 6 “Amahah ka awm reng ṭhîn,” titu chu ama awm ang bawk khân a awm ve tûr a ni.
NOVEMBER 11-17
PATHIAN THU AṬANGA RO HLUTE | 2 JOHANA 1–JUDA
“Thutaka Awm Reng Tûrin Kan Bei Tûr A Ni”
(Juda 3) Duh takte u, kan chan tlân chhandamna thu in hnêna ziak ka tum hrâm hrâm laiin, mi thianghlimte hnêna rinna vawi khat kawltîr lamah chuan ṭhahnemngai taka beia fuih tûr che uin in hnênah lehkha ziak a ṭûl tih ka lo hria a.
‘Lalpaah Thiltihtheihna Neiin Lo Awm Rawh U’
8 Pathian Lehkha Thu chuan Setana chêt dân zeizia tlângpuite a târ lan avângin, a ngamthlêmnate chu kan hai lo. (2 Korinth 2:11) Mi fel Joba beih nân, Diabola chuan sum leh pai lama harsatnate, hmangaihte thihna te, chhûngkua aṭanga dodâlna te, taksa lama hrehawm tawrhna te, leh ṭhian suakte hnên aṭanga bulbâl nei lo sawi chhiatna te chu a hmang a ni. Joba chu lunghnualin, Pathianin a phatsanah a inngai hial a ni. (Joba 10:1, 2) Tûn laiah Setana chuan chûng buainate chu tlang takin kan chungah thlentîr lo mah se, chûng harsatnate chuan Kristian tam takte chu a tibuai a, Diabola chuan chûngte chu a hmang ṭangkai thei a ni.
9 Tûn hun hmâwrah hian thlarau lama thil hlauhawmte chu nasa takin a pung a. Hausak tumnain thlarau lam thiltumte a hmakhalhna khawvêlah kan awm a ni. Chanchin thehdarhtute lahin dân lo anga mipat hmeichhiatna hman chu lungngaihna thlentu ang ni lovin, hlimna hnâr angin an lantîr zâwk mah a. Mi tam zâwkte chu “Pathian hmangaih aia mahni lâwmna mai hmangaih zâwktu te” an lo ni. (2 Timothea 3:1-5) Hetiang ngaih dân hian ‘rinna atân ṭhahnemngai taka kan beih’ loh chuan, kan thlarau lam inbûk tâwkna chu a tiderthâwng thei a ni.—Juda 3.
Thlarau Lam Lunghlute Laih Chhuahna
(Juda 4) Mi tute emaw arûka lût an awm si a, hmân laia he thiam lohna chang tûra ruatate chu; chûng chu Pathian ngaihsak lo mite an ni a, kan Pathian khawngaihna chu hurnaah an chantîr a, kan Hotu leh kan Lalpa neih chhun, Isua Krista chu an âwih lo bawk a.
(Juda 12) Chûngte chuan in hnênah ruai an ṭhehin inhmangaihna ruaiṭhehnaah chuan lungpui tui chîm vekte chu an ni a, hlauh nachâng hre lo, berâm vêngtu mahni inchâwmte an ni; chhûm tui pai lo, thli chhêm lente an ni; favânga thing, rah lo, vawi hnih thi tawh, zung chawpa pawhchhuahte an ni;
it-2-E 279
Hmangaihnaa Ruaiṭheh
Bible-in chûng hmangaihnaa ruaiṭhehna chu eng nge a nih tih a sawi lang lo va, engtianga zinga hman nge a ni tih pawh a târ lang hek lo. (Juda 12) Chûng ruaiṭhehnate chu Lal Isua Krista leh a tirhkohte thupêk a nih loh avângin chûngte chu tih tûr emaw, thil awm reng tûr emaw anga thlîr tûr a ni lo tih a chiang a ni. Mi ṭhenkhat chuan chu chu tisa lama Kristian hausate’n an Kristian unau retheite sâwm a, ruai an ṭhehsakna a ni an ti a. Fahrah te, hmeithai te, mi hausa te, leh mi chanhaite chuan inunauna rilru neiin ei tûr hnianghnâr taka khat dawhkân chu an kîlho a ni.
it-2-E 816
Lungpui
Grik thu mal dang leh, spi·lasʹ chu tui hnuaia awm lungpui, a nih loh leh lung intlar sawina a ni a. Juda chuan chu chu mi tihchhiat duhna rilru neia Kristian kohhrana a rûka lo lûtte sawi nân a hmang a ni. Tui hnuaia awm lungpui chu lawng tâna a hlauhawm ang bawkin, chûng mite chu kohhran chhûnga mite tân mi hlauhawm tak an ni. Chutiang mite chungchângah Juda chuan: “Chûngte chuan in hnênah ruai an ṭhehin inhmangaihna ruaiṭhehnaah chuan lungpui tui chîm vekte chu an ni,” tiin a sawi.—Juda 12.
(Juda 14, 15) Tin, chu mite hnênah pawh chuan Enoka, Adama aṭanga pasarihna chuan a hril lâwk a, “Ngai teh u, mi zawng zawng chunga rorêl tûr leh Pathian ngaihsak lote zawng zawng Pathian ngaihsak lohna hna Pathian ngaihsak lo chunga an thawh zawng zawng kawngah leh Pathian ngaihsak lo mi sualten a chungah thu khauh tak an sawi zawng zawng kawnga thiam loh chantîr tûrin Lalpa chu a mi thianghlim sîngkhatte nên a lo kal a ni,” tiin.
“Pathian Lâwmzâwng Mi A Ni”
Enoka hrilh lâwkna chu eng nge ni? “Ngai teh u, mi zawng zawng chunga rorêl tûr leh Pathian ngaihsak lote zawng zawng Pathian ngaihsak lohna hna Pathian ngaihsak lo chunga an thawh zawng zawng kawngah leh Pathian ngaihsak lo mi sualten a chungah thu khauh tak an sawi zawng zawng kawnga thiam loh chantîr tûrin Lalpa chu a mi thianghlim sîngkhatte nên a lo kal a ni,” tih hi a ni. (Juda 14, 15) Hrilh lâwknaa thute chu Pathianin a thlentîr tawh anga sawiin, Enoka chuan thil kal tawh angin a sawi tih i lo hre ngei ang. A hnua târ lan hrilh lâwknate pawh hetianga ziah a ni ṭhîn. A tum ber chu: Zâwlnei hian thil thleng ngei ngei tûr a sawi a, chu chu thilthleng tawh angin a târ lang a ni!—Isaia 46:10.
“Pathian Lâwmzâwng Mi A Ni”
Kan chênna khawvêl hi Pathian thlîr anga kan thlîr dâwn leh dâwn loh inzâwt tûrin Enoka rinna chuan min chêttîr mai thei. Enoka’n huaisen taka a lo hrilh rorêlna chu a la nung reng a ni; a hun laia khawvêl tân a ni ang bawkin tûn lai khawvêl tân pawh a ni bawk. Enoka vaukhânna nêna inmilin Jehova chuan Nova hun laia Pathian ngaihsak lo khawvêl chungah Tuilêt a thlentîr a. Chu chhiatna râpthlâk tak chu nakina lo thleng tûr chhiatna nasa zâwk atâna entîrna a ni. (Matthaia 24:38, 39; 2 Petera 2:4-6) Hmânlai ang bawkin, tûn laiah pawh Pathian ngaihsak lohna khawvêla fel taka rorêl tûrin Pathian chu a mi thianghlim tam takte nên an inpeih reng a. Kan vai hian Enoka vaukhânna kan ngaih pawimawh a, mi dangte kan hriattîr a ngai a ni. Kan chhûngte leh ṭhiante chu rinna hrang nei an nih theih avângin, mal ngawih ngawih nia kan inngaih châng pawh a awm mai thei. Mahse, Jehova chuan Enoka a thlahthlam ngai lo ang bawkin, tûn laia a chhiahhlawh rinawmte chu engtikahmah a thlahthlam ngai lo vang!
Bible Chhiar
(2 Johana 1-13) Upa chuan, hmeichhe ṭha thlan leh a fate hnênah: Thutak, keimahnia awm reng, kumkhua pawha kan hnêna awm tûr avâng hian tih tak zetin ka hmangaih che u a ni; kei chang ka ni lo ve, thutak chu hria apiang pawhin a ni. 3 Pa, Pathian leh Pa Fapa Isua Krista hnên ata khawngaihna te, zahngaihna te, remna te chu, thutak leh hmangaihnain kan hnênah a awm ang. 4 Pa hnên ata thupêk kan hmuh ang khân i fa, tute emaw thutaka awmin ka hmuh avângin ka lâwm hle a ni. 5 Hmeichhe ṭha, i hnênah thupêk thar ziak ang ni lovin, a tîr ata kan neih ang kha ziak zâwkin, kan inhmangaih tawnna tûrin ka ngên chiam a che. 6 Tin, hei hi hmangaihna a ni, ama thupêk ang zêla kan awm hi. Thupêk, a tîr ata in hriat ang chu hei hi a ni, chumiah chuan in awm tûr chu. 7 Bumtu tam tak—Isua Krista chu tisain a lo kal tih ṭan lotute kha—khawvêlah hian an lo chhuak ta si a. Chutiang mi chu a ni, bumtu leh Krista dodâltu chu. 8 Kan thawh chhuah sate kha in hloh loh va, a man chu a kima in hmuh theih zâwk nân invêng ṭha rawh u. 9 Tu pawh Krista zirtîrna thua awm reng lova khûm chuan Pathian a nei lo ve. Chumi zirtîrna thua awm reng erawh chuan chu mi ngei chuan Pa leh Fapa a nei kawp a ni. 10 Tu pawh chumi zirtîrna thu chu rawn keng lovin, in hnênah lo kal sela, in inah thlentîr suh ula, ṭawngkam ṭha pawhin thlah suh u; 11 ṭawngkam ṭhaa thlahtu chu a thiltihsualah chuan a tel ve si a. 12 In hnênah thu tam tak sawi tûr ka neih avângin lehkha leh lehkhatuiin ziak ka duh lo ve; in lâwm a kim theih nân in hnêna lo kala inhmatawna inbiak ka beisei zâwk a ni. 13 I laizâwnnu thlana faten chibai an bûk a che.
NOVEMBER 18-24
PATHIAN THU AṬANGA RO HLUTE | THU PUAN 1-3
“I Thiltihte . . . Ka Hria”
(Thu Puan 1:20) Ka kut ding lama arsi pasarih awm i hmuhte leh rangkachak khâwnvâr dahna pasarihte thurûk chu. Arsi pasarih chu kohhran pasarihte tirhkoh an ni a; khâwnvâr pasarih chu kohhran pasarihte chu an ni a.
Eng Ang Rilru Put Hmang Nge I Lantîr?
8 Chutiang ang chi rilru put hmang pumpelh tûr chuan, Isua chu Bible-ah ‘a kut ding lama arsi pasarih keng’ anga sawi a ni tih kan hre reng tûr a ni. “Arsi” chuan hriak thih upate bâkah, kohhrana upa zawng zawngte a entîr thei a. Isua chuan chûng ‘arsite’ chu ṭûl leh âwm a tih ang zêlin a kaihruai thei a ni. (Thup. 1:16, 20) Chuvângin, Kristian kohhran Lû a nih angin, Isua chuan kohhrana upahote chu a thunun tlat a. Upate zînga thunun ngai tak tak an awm chuan ‘mitte meialh ang’ Neia chuan hun A tih takah a duh ang zâwng takin a rawn thunun mai dâwn a ni. (Thup. 1:14) Chutih chhûng chuan, thlarau thianghlimin hruaitu atâna a ruatte zahna dik tak chu kan lantîr tûr a ni, Paula chuan heti hian a ziak si a: “In hotute thu âwih ula, an thu thuin awm rawh u; chanchin sawi tûr an nih avângin, lungngai chunga sawi lova, hlim chunga an sawi theihna tûrin in thlarau an vênsak ṭhîn che u a ni; lungngai chunga sawi chu in tâna pawi tûr a ni si a,” tiin.—Heb. 13:17.
(Thu Puan 2:1, 2) “Ephesi khuaa kohhranho tirhkoh hnênah chuan heti hian ziak rawh: ‘A kut ding lama arsi pasarih kenga, rangkachak khâwnvâr dahna pasarih zînga vei veia khân hêng thu hi a sawi a ni; 2 I thiltih te, i thawh rimzia leh i chhelzia te, mi sualte i ngaihtheih lohzia te ka hria. Tirhkoh ni si lova tirhkoh intite chu i fiah bawk a, dawthei an ni tih i lo hre tawh a;
Jehova Chuan Chhandamna Hmu Tûrin Min Vêng
11 Thu Puan bung 2 leh bung 3-a chhinchhiah inlârnaah, chawimawia awm Isua Krista chuan Asia Minor-a kohhran pasarih chu a endik a. Krista chuan kohhran awm dân tlângpui mai ni lovin, an dinhmun engemaw bîk tak pawh a hmu tih inlârna chuan a târ lang. A ṭhenah phei chuan a mi mal leh thilthleng engemaw bîk thlenga sawi langin, a âwm tâwk fakna leh zilhna chu a pe a ni. Chu chuan eng nge a târ lan? Inlârna thlen famkimnaah, kohhran pasarih chuan kum 1914 hnu lama hriak thih Kristiante a entîr a; tin, kohhran pasarih hnêna pêk thununnaa lang thu bulte chu tûn laia khawvêl puma Pathian mite kohhran zawng zawng atân a hman theih a ni. Chuvângin, Jehova’n a mite chu a Fapa hmangin thatho takin a kaihruai kan ti thei a. A nih leh, engtin nge chu kaihhruaina chu kan hlâwkpui theih ang?
Jehova Inawpna Pâwl Nêna Pheikhai Rual Zêlin
20 Jehova inawpna pâwl nêna pheikhai rual zêl tûr chuan tûn laia “kohhranho lû” ni tûra Isua Krista chanvo, Pathian pêk chu kan pawm a ngai a ni. (Ephesi 5:22, 23) Isaia 55:4-a thu: “Ngai teh, ani chu mi tin tân hretuah ka ruat a, mi tin tân hruaitu leh hotuah ka ruat a ni,” tih pawh hi chhinchhiah tlâk tak a ni bawk. Isua chuan kaihhruai dân kawng a hre chiang a. Tin, a berâmte a hria a, an nungphung pawh a hre bawk a ni. Dik takin, Asia Minor-a kohhran pasarihte a enfiah khân, vawi nga lai chu ‘I thiltihte ka hria,’ tih ṭawngkauchheh a hmang a ni. (Thu Puan 2:2, 19; 3:1, 8, 15) Isua chuan, a Pa Jehova ang bawkin kan mamawhte a hre bawk. Ani chuan ṭawngṭai dân a zirtîr hmain heti hian a sawi a ni: “In dîl hmain in Pa chuan engte nge in mamawh tih a hre reng si a” tiin.—Matthaia 6:8.
Thlarau Lam Lunghlute Laih Chhuahna
(Thu Puan 1:7) Ngai teh u, ani chu chhûmte nên chuan a lo kal dâwn e; mit tinrêngin an hmu ang a, a chhuntute ngei pawh khân; khawvêla hnam zawng zawngin amah an ṭah bawk ang. A ni, Amen.
kr-E 226 ¶10
Pathian Ramin A Hmêlmate A Nuaibo
10 Rorêlna Thu Puanchhuahna. Pathian Lalram hmêlma zawng zawngte chu an thlaphânna tizualtu thilthleng chu matheilova hmuhtîr an la ni ang. Isua chuan: “Mihring Fapa hi thiltihtheihna nasa tak leh ropuina nasa tak nên chhûm zînga lo kal an hmu ang,” tiin a sawi a. (Marka 13:26) Chu thiltihtheihna ropui tak lo lanna chuan Isua chu rorêl tûrin a lo kal tih chhinchhiahna a pe ang. Hun hnuhnûng chungchânga he hrilh lâwkna sawina hmun dangah chuan, Isua chuan chutih huna thleng tûr rorêlna chungchâng chipchiar lehzualin a sawi a. Chumi thu chu berâm leh kêl tehkhinnaah kan hmu a ni. (Matthaia 25:31-33, 46 chhiar rawh.) Rinawm taka Pathian Lalram thlâwptute chu “berâm” anga ruat an ni ang a, an ‘tlanna tûr a hnai’ tih an hriat avângin, an “dâk chhuak” ang. (Luka 21:28) Mahse, Lalram dodâltute chu “kêl” anga ruat an ni ang a, “kumkhaw hremnaah” an kal dâwn tih hriain ‘an ṭap’ ang.—Mt. 24:30; Thup. 1:7.
(Thu Puan 2:7) Thlarauvin kohhranho hnêna thu a sawi hi beng nei chuan hre rawh se. A hnehtu apiang Pathian Paradis-a Nunna Thinga mi ka eitîr ang, a ti e,’ tiin.
Jehova Thu Chu A Nung
Thu Puan Bu Aṭanga Thu Pawimawh Hrilhfiahna—I
2:7—‘Pathian Paradis’ tih hi eng nge ni? Hêng thute hi hriak thih Kristiante hnêna sawi a nih avângin, heta paradis tih hian Pathian awmna vâna paradis ang dinhmun chu a kâwk ngei ang. Hriak thih mi rinawmte chu “Nunna Thinga mi” eitîr an ni ang a. Anni chuan thih theih lohna an chang ang.—1 Kor. 15:53.
Bible Chhiar
(Thu Puan 1:1-11) Isua Krista thu puan chhuah, Pathianin a bâwihte hriattîr atân a hnêna a pêk, thil lo awm lawk tûr thu chu; tin, chu chu a vântirhkoh hmangin a bâwih Johana a rawn hriattîr a; 2 chu Johana chuan Pathian thu leh Isua Krista hriattîrna thu, a thil hmuh zawng zawngte thu chu a hriattîr a. 3 He hrilh lâwkna bu thu chhiartu leh ngaithlaa a chhûnga thu ziak pawmtute chu an eng a thâwl e; a hun chu a hnai tawh si a. 4-5 Johana chuan Asia rama kohhran pasarihte hnênah chuan: Awm mêka leh awm tawha leh lo la awm tûra hnên aṭang te, a lalṭhutphah hmaa thlarau pasarih awmho hnên aṭang te, Isua Krista, thu hretu rinawm tak, mitthi zîng ata piang hmasa bera leh leia lalte rorêltute hnên aṭang te chuan, khawngaihna leh remna in hnênah awm rawh se. Min hmangaih a a thisenin kan sualte lak ata min tlan chhuak a, 6 khua leh tuiah leh a Pathian leh a Pa lama puithiama min siamtu hnênah, a ni, ama hnên ngeiah ropuina leh rorêlna chu chatuanin awm rawh se. Amen. 7 Ngai teh u, ani chu chhûmte nên chuan a lo kal dâwn e; mit tinrêngin an hmu ang a, a chhuntute ngei pawh khân; khawvêla hnam zawng zawngin amah an ṭah bawk ang. A ni, Amen. 8 “Kei Alpha leh Omega ka ni,” Lalpa Pathian, awm mêka leh awm tawha leh lo la awm tûra, Engkimtitheia chuan a ti a ni. 9 Kei Johana, in unaupa leh, Isuaa hrehawmna te, khua leh tui te, chhelnate ṭâwmpuitu che u hi, Pathian thu avâng leh Isua hriattîrna thu avângin Patmos thliarkâr an tihah chuan ka awm a, 10 Lalpa nîah chuan thlarauvin ka lo awm a, tin, ka hnung lamah tawtawrâwt ri ang, aw ring takin, 11 “I thil hmuh tûr chu lehkhabuah ziak la, kohhran pasarihte hnênah Ephesi khuaah te, Smurna khuaah te, Pergamos khuaah te, Thuatira khuaah te, Sardis khuaah te, Philadelphia khuaah te, Laodikei khuaah te chuan thawn rawh,” a tih ka hria a.
NOVEMBER 25–DECEMBER 1
PATHIAN THU AṬANGA RO HLUTE | THU PUAN 4-6
“Sakawr Chung Chuang Palite”
(Thu Puan 6:2) Tichuan, ka han en a; tin, ngai teh, sakawr vâr ka hmu a; a chunga chuang chuanin thal ngul a keng a; tin, a hnênah chuan lallukhum an pe a; tin, hneh chung leh hneh zêl tûrin a chhuak ta a.
Sakawr Chungchuang Palite—Tute Nge An Nih?
Sakawr vâr chunga chuang chu tu nge ni? A nihna hriatthiamna tûr chu Thu Puan bu vêkah kan hmu thei a, a hnuah he vâna sakawr chunga chuangtu hi “Pathian Thua” tiin a târ lang a ni. (Thu Puan 19:11-13) Thua tih he nihna hi Pathian aiawha thusawitu, Isua Krista sawina a ni a. (Johana 1:1, 14) Chu bâkah, “lalte Lal leh hotute Hotu” tia koh a ni a, “Rinawma leh Diktaka” tia koh a ni bawk. (Thu Puan 19:11, 16) Râl do thiam lal ni tûrin thuneihna a nei tih a chiang hle a, a thuneihna chu chhe tak leh râwng takin a hmang lo. Mahse, zawhna ṭhenkhat a lo chhuak a ni.
wp17.2 4 ¶5
Sakawr Chungchuang Palite—Tute Nge An Nih?
Sakawr chungchuangte chu eng hunah nge an chuan ṭan? Sakawr chungchuang hmasa ber Isua chu lallukhum khumtîr a nih khân a chuang ṭan tih chhinchhiah ang che. (Thu Puan 6:2) Eng hunah nge Isua chu vânah Lallukhum khumtîr a nih? A thih hnua vâna a lâwn khân a ni lo. Hun engemaw chen a nghâk tih Bible-in a sawi si a. (Hebrai 10:12, 13) Isua’n a hnungzuitute hnênah a nghah hun chhûng tâwpna leh vâna lal a nih ṭan hun an hriat thiamna tûrin chhinchhiahna a pe a. Ro a rêl ṭan hunah khawvêl dinhmunte chuan chhiat lam a pan thut ang tih a hrilh a ni. Indonate a awm ang a, ṭâmte a tlain, hrite a lêng ang. (Matthaia 24:3, 7; Luka 21:10, 11) Kum 1914-a Khawvêl Indopui I-na a thlen hnuah, mihringte chuan Bible-in “ni hnuhnûngahte,” tia a sawi hun khirh takte chu an hmachhawn ṭan tih a lo chiang ta thuai a ni.—2 Timothea 3:1-5.
(Thu Puan 6:4-6) Tichuan, sakawr dang, a sen mi, a lo chhuak leh a; tin, a chunga chuang hnênah chuan lei ata inremna lâksak theihna leh mi inthahtîr theihna an pe a; tin, a hnênah khandaih lianpui an pe bawk a. 5 Tin, chhinchhiahna pathumna chu a han phelh veleh thil nung pathumna chuan, “Lo kal rawh,” a tih ka hria a. Tichuan, ka han en a, tin, ngai teh, sakawr dum ka hmu a; a chunga chuang chuanin bûkna a keng a. 6 Tin, thil nung palite lai aṭang chuan aw ang reng hian, “Duliin buhpui tehkhâwng khat, duliin barli tehkhâwng thum; hriak leh uain erawh chu tichhe suh,” a tih ka hria.
Sakawr Chungchuang Palite—Tute Nge An Nih?
He sakawr chunga chuangtu hian indona a entîr a. Ram ṭhenkhat aṭang ni mai lovin, leilung pum pui ata remna a lâksak tih chhinchhiah ang che. Kum 1914-ah, mihring chanchina a hmasa ber atân khawvêl indopui a chhuak a. A hnu lawkah, chu aia nasa zâwk khawvêl indopui pahnihnain a zui a ni. Kum 1914 aṭangin indonate leh râlthuam hmanga inbeihnate avânga thi chu mi maktaduai 100 aia tam niin mi ṭhenkhat chuan an chhût a ni. Chu bâkah, mi dang tam takte chuan ramtuileilovin an awm phah bawk.
wp17.2 5 ¶4-5
Sakawr Chungchuang Palite—Tute Nge An Nih?
“Tichuan ka han en a, tin, ngai teh, sakawr dum ka hmu a; a chunga chuang chuanin bûkna a keng a. Tin, thil nung palite lai aṭang chuan aw ang reng hian, ‘Duliin buhpui tehkhâwng khat, duliin barli tehkhâwng thum; hriak leh uain erawh chu tichhe suh,’ a tih ka hria.”—Thu Puan 6:5, 6.
He sakawr chunga chuang hian ṭâm a entîr a. Ei tûr a vânzia chu buhpui tehkhâwng khat (0.7 kg) man chu duli a ni a, chu chu kum zabi khatnaah chuan ni khat hlawh lai a ni! (Matthaia 20:2) Duli vêkin, buh aia ṭha lo zâwka ngaih barli tehkhâwng thum (2.1 kg) a lei theih a. Chu chuan chhûngkaw hung tak chu engtin tak châwm thei ang maw? Chutah, mite chu chutih hun laia an mamawh bul ber olive hriak leh uainin a entîr, an nî tin mamawh châkkhaite thlenga inren tûra vaukhân an ni.
(Thu Puan 6:8) Tichuan, ka han en a, tin, ngai teh, sakawr dâng ka hmu a; a chunga chuang hming chu Thihnaa a ni; tin, Mitthi Khuaan a rawn zui a. Tin, khandaih te, ṭâm te, hri te, leia sakawlhtea tihlum tûrin chu mite hnênah chuan lei hmun lia ṭhena hmun khat chunga thuneihna an pe a ni.
wp17.2 5 ¶8-10
Sakawr Chungchuang Palite—Tute Nge An Nih?
Sakawr chungchuang palina hian hri leh thil dang vânga thihna a entîr a. Kum 1914 hnu lawkah, Spanish hripui avângin mi maktaduai sâwm têl an thi a. Chu hri chu chutih hun laia nungdama awm mi 3 zînga 1, mi maktaduai 500 vêlin an vei a nih hmêl!
Mahse, Spanish hripui hi a inṭanna mai a ni. Mi thiamte chuan kum zabi 20-na chhûngin mi maktaduai za têlte chu zâwnghri avângin an thi niin an chhût a. Nasa taka zir bingna neih a ni chung pawhin, AIDS te, TB te, leh malaria-te hian mi maktaduai tam takte nunna chu tûn thlengin a la la reng a ni.
Indona emaw, ṭâm emaw, hri emaw vâng pawh ni se, a rah chhuah chu a thuhmun reng a, chu chu thihna a ni. Thihna chuan mite hnênah beiseina pe lovin, a thla a la zâr zêl a ni.
Thlarau Lam Lunghlute Laih Chhuahna
(Thu Puan 4:4) Tin, lalṭhutphah vêlah chuan lalṭhutphah sawmhnih leh pali a awm a; tin, lalṭhutphahahte chuan upa sawmhnih leh pali puan vâr sina ṭhu ka hmu a; rangkachak lallukhumte an khum a.
(Thu Puan 4:6) tin, lalṭhutphah hmaah chuan dârthlalang tuifinriat ang, krustal lung ang mai a awm a; tin, lalṭhutphah laiah leh lalṭhutphah vêlah chuan thil nung pali, hma lam leh hnung lam mita khat an awm a.
re-E 76-77 ¶8
Jehova Vân Lalṭhutphah Ropuizia
8 Puithiamte chu hmân lai biak bûka rawngbâwl tûrin ruat an ni tih Johana chuan a hria a. Chuvângin, a hnua a târ lan hêng thil hi a hmuh lai chuan mak a ti mai thei a ni: “Tin, lalṭhutphah vêlah chuan lalṭhutphah sawmhnih leh pali a awm a; tin, lalṭhutphahahte chuan upa sawmhnih leh pali puan vâr sina ṭhu ka hmu a; rangkachak lallukhumte an khum a,” tih hi. (Thu Puan 4:4) Ni e, puithiamte aiah, lalte anga lallukhum khuma, lalṭhutthlênga ṭhu upa 24 te an awm a. Chûng upate chu tute nge an nih? Jehova’n an hnêna a tiam anga tholeh vâna lâwn tawh, Kristian kohhrana hriak thihte lo chu tu dang an ni lo. Engtin nge chu chu kan hriat?
re-E 80 ¶19
Jehova Vân Lalṭhuttphah Ropuizia
19 Hêng thil siamte hian eng nge an entîr? Zâwlnei dang, Ezekiela hmuh inlârnain a chhânna hre tûrin min ṭanpui a ni. Ezekiela chuan Johana târ lan ang hmêlhmang nei thil nungte hual vêla awm vân tawlailîr chunga chuang Jehova chu a hmu a. (Ezekiela 1:5-11, 22-28) A hnuah, Ezekiela chuan thil nungte hual vêla awm tawlailîr lalṭhutthlêng chu a hmu leh a. Mahse, tûn ṭumah chuan, chûng thil nungte chu cherubte an ni tiin a sawi. (Ezekiela 10:9-15) Johana hmuh chûng thil nung palite chuan Pathian vân lam pâwla dinhmun sâng tak chelhtu thlarau thil siam—cherub tam tak a entîr a ni ngei ang. Hmân lai biak bûk ruahmannaah, rangkachaka luan cherub pahnihte chu Jehova lalṭhutthlêng aiawhtu thuthlung bâwm chhîn chunga an awm avângin Johana’n chûng cherubte chu Jehova bul hnai taka a hmuh chuan mak a ti lo vang. Jehova chuan hnamte hnêna a thupêkte chu chûng cherub-te inkâr aṭangin awri chhuakin a rawn sawi a ni.—Exodus 25:22; Sâm 80:1.
(Thu Puan 5:5) Tin, upa zînga pakhat chuan ka hnênah “Ṭap suh; ngai teh, Sakeibaknei, Juda hnama mi, Davida bulpui khân lehkhabu chu hawng tûr leh a chhinchhiahna pasarih phelh tûrin a hneh ta,” a ti a.
cf-E 36 ¶5-6
“Ngai Teh, Sakeibaknei, Juda Hnama Mi”
5 Sakeibaknei chu huaisenna nên thlunzawm a ni ṭhîn a. Sakeibaknei puitling tawh i hmachhawn ngai tawh em? Hmachhawn ngai tawh a nih chuan, sa huana hung chhûnga awm a nih a rinawm. Chutiang a ni chung pawhin, a zâmawm hle thei tho a ni. Chu ramsa lian tak leh chak tak chu i han en a, ani’n a rawn en lêt lai che chuan, sakeibaknei chu hlauh neih avânga tlân chhe ṭhîn angin i ngaihtuah lo ngei ang. Bible chuan “sakeibaknei chu ram sa zîngah a chak ber a, engmahin a tilêt zo lo va,” tih a sawi. (Thufingte 30:30) Krista huaisenna chu chutiang chu a ni.
6 Isua’n sakeibaknei ang huaisenna a lantîr dân kawng thum i lo ngaihtuah ang u, chûngte chu: thutak tâna dinnghehnaah, rorêl dik kenkawhnaah, leh dodâlna a hmachhawnnaah a ni. Keini pawh mi huaisen kan ni emaw, ni lo emaw pawh ni se, huaisenna lantîrna kawngah Isua kan entawn thei a ni.
Bible Chhiar
(Thu Puan 4:1-11) Chûng thil hnuah chuan ka han en a, tin, ngaiteh, vânah kawngkhâr inhawng ka hmu a; tin, aw ka hriat hmasak, tawtawrâwt ri anga mi bia khân, “Hetah lo chho rawh, tichuan tûn hnua thil lo awm tûrte chu ka entîr ang che,” a ti a. 2 Tin, chawplehchilhin thlarauvin ka lo awm ta nghâl a; tin, ngai teh, vânah lalṭhutphah a lo inhûng a, chu ṭhutphahah chuan mi pakhat a lo ṭhu bawk a. 3 Tin, a chunga ṭhua chu jaspi leh sardion lung ang maiin a lang a; tin, lalṭhutphah vêlah chuan chhimbâl, ena smaragdin lung ang a zâm a. 4 Tin, lalṭhutphah vêlah chuan lalṭhutphah sawmhnih leh pali a awm a; tin, lalṭhutphahahte chuan upa sawmhnih leh pali puan vâr sina ṭhu ka hmu a; rangkachak lallukhumte an khum a. 5 Tin, lalṭhutphah aṭang chuan kâwlphe te, aw te, khawpui ri te a lo chhuak dur dur a. Tin, lalṭhutphah hmaah chuan meichher pasarih a alh a, chûng chu Pathian thlarau pasarih kha an ni a; 6 tin, lalṭhutphah hmaah chuan dârthlalang tuifinriat ang krustal lung ang mai a awm a; tin, lalṭhutphah laiah leh lalṭhutphah vêlah chuan thil nung pali, hma lam leh hnung lam mita khat an awm a. 7 Tin, thil nung pakhatna chu sakeibaknei ang a ni a. Thil nung pahnihna chu sebâwng no ang a ni a, thil nung pathumna chuan mihring hmêl a pu a, thil nung palina chu mupui thlâwk lai ang a ni a. 8 Tin, thil nung pali chu thla paruk ṭheuh nei, an vêl leh an chhûnga mita khat an ni. Tin, “Lalpa Pathian, Engkimtitheia, awm tawha leh awm mêka leh lo awm tûra chu, a thianghlim e, a thianghlim e, a thianghlim e,” tiin chhûn leh zân an châwl ngai lo. 9 Tin, thil nungte chuan lalṭhutphaha ṭhua, chatuana nung renga chu an tihropuia an chawimawia, lâwmthu an hrilh apiangin, 10-11 upa sawmhnih leh palite chu lalṭhutphaha ṭhua hmaah chuan an bawkkhup ang a, chatuana nung renga chu chibai an bûk ang a, “Nang, kan Lalpa leh kan Pathian, ropuina te, chawimawina te, thiltihtheihna te chu hmu tlâk i ni e; nangin engkim i siam a, i duh avânga awm leh siam an ni bawk si a,” tiin an lallukhumte chu lalṭhutphah hmaah chuan an dah ang.