Engtin Nge Kan Lo Awm?

Lei leh vân lo awm ṭan dân chu Bible bu hmasa ber Genesis chuan ṭawngkam tlêmtêin heti hian a sawi a ni: “Atîrin Pathianin lei leh vân a siam a,” tiin. (Genesis 1:1) Pathianin thing leh nungchate a siam hnu chuan, mihring hmasa ber Adama leh Evi chu a siam a. Anni chuan zalên taka duh thlan theihna pawh tiamin Pathian neih ang miziate engemaw chena an neih avângin, nungchate ang mai an ni lo. Chuvângin, an thiltih chungah chuan mawh an phur a ni. Pathian kaihhruaina pêkte an zawm chuan leiah hian remna leh ṭhat famkimna neia chatuana nungin mihring zawng zawngte nu leh pa hmasa ber an ni ang a, Pathian thiltumah an tel ve thei dâwn a ni.

Amaherawhchu, thlarau thil siam vântirhkoh pakhat chuan mihringte chu hmasial taka invawrh lâr nân a hmang a. Chutiang chuan “Dodâltu” tih awmze nei Setana a lo ni ta a ni. Rûl hmanga thu sawiin, Setana chuan Evi chu a bum a, Pathian kaihhruaina tel lovin a inenkawl ṭha thei zâwk dâwn niin a sawi a ni. Adama leh Evi chuan anmahni Siamtu nêna an inzawmna tichatin Setana hnung chu an zui ta a. An duhthlanna ṭha lo tak avângin, kan nu leh pa hmasate chuan chatuana nun chu an hloh va, sualna te, ṭhat famkim lohna te, leh pumpelh theih loh thihnate chu min hlânchhawng ta a ni.

Amaherawhchu, Pathian chuan he dinhmun lungchhiatthlâk tak siam ṭha tûr leh Adama thlahte hnêna chatuana nunna neih theih dân kawng hawnsak a tum thu chu a puang chhuak nghâl a. Pathianin ‘thlah’—mi danglam bîk tak—chuan a tâwpah Setana a tiboral ang a, Setana te, Adama te, leh Evi te avânga lo awm hrehawm tawrhna zawng zawng a sût lêt dâwn tih a sawi lâwk a ni. (Genesis 3:15) Chu ‘thlah’ chu tunge ni ta ang? Hunin a rawn hril ang.

Chutih chhûng zawng chuan, Setana chuan Pathian thiltum ṭha tak chu bahlahtîr a tum reng a. Sual leh suahsualna a pung chak êm êm bawk a. Pathianin mi suaksualte chu tuilêta tihboral a tum nghet ta a ni. Mi fel Nova chu tui chunga lâng thei tûr thingrem lian tak pian hmang nei lawng tu tûrin a hrilh a, chu chu amah leh a chhûngte bâkah, lawng chhûnga hruai tûra tih nungchate nun chhanhim nân a ni.

Tuilet thlen hnu kum khatah chuan, Nova leh a chhûngte chu lawng ata lei thenfai tawhah chuan an chhuak ta a. Mahse, ‘thlah’ chu a lo la lang lo.

—Genesis bung 1-11; Juda 6, 14, 15; Thu Puan 12:9 a ṭanchhan a ni. (w13-E 10/01)