Nga kinikatíondai je chjota israelita ya Egipto saʼnda nga kitjoejin xi títjon rey koan ya Israel

Je Moisés ya kikao ya nindo Sinaí je chjota israelita kʼianga je tsakationdai ya Egipto, je Niná yaa kitsjoale kjoatéxomale. Xijekoanni, je Moisés tejao chjota kisikasén xi kikotsenché ya ʼnde Canaán. Tonga te xi likui ndatso én yʼa nga jaʼai. Je xokisʼin nga kʼoasʼin koanmenile je chjota nga koaini ya Egipto. Kʼianga tsín kisʼele kjoamakjain je chjota israelita, ñachan nó nga ya kisikʼétsoma Niná ya ʼndekixí.

Xijekoanni, jé Josué kitjoejin nga jaʼasʼenkao je chjota israelita ya ʼnde Canaán. Nkjín choa̱ tsakatío Jeobá nga tsakasenkao je chjota israelita nga kitjoele je naxinandá jebi. Tsakʼéchjoale xongá Jordán nga tsínti jaʼani nandá, kisikixojen xjáo xi kjindai Jericó kʼoa jngo nichxin kisikʼéjnajyo je Tsʼuí. Jaon nó kitjoenile ʼndele chjota Canaán.

Kitsʼiakao kjoanni Josué, jan siento kao ñachan xjaʼaonjngo nó nga juez tsakatéxomale je naxinandá Israel. Nkjín mani xi jchaa ibi, joni tsa Barac, Gedeón, Jefté, Sansón kʼoa kao Samuel. Kʼoa kʼoati koakóyaná tʼatsʼe yánchjín xi Rahab, Débora, Jael, Rut, Noemí kʼoa Dalila tsakʼin. Jan siento kao ñokan kao xjaʼaonjngo nó bichóni XI MAJANNI.