Kjoaʼmiya 5

Je miyo le Niná ya koatio ʼnde Naxó

Je ʼNde naxó likui kʼoa koachon jo chon Soʼnde xi tiyoa ndʼai. Niná nikʼia jin koanme le nga i sikji kjoa sʼe le chjota Soʼnde kjoanikjaojin kjoaʼon kʼoa kao kjoachjaʼatokon. Kui nga, kʼoasʼin si ni Niná nga ʼnde naxó sikao i soʼnde. ¿Jósʼin ni le? Je Biblia kʼoatso jósʼin.

Xi nda chjota. Je ʼNde naxó ndʼia le koan je xi miyo le Niná. Kuinyakao ngañá xínkjín ngatsʼi. Kjoatéxoma kixi le Niná koatiokao (Proverbios 2:21).

Nʼió tse tsojmi xi ma chiné. Liʼya xi ti kjinrá kjoaʼa ni ya ʼNde naxó. Je Biblia kʼoatso: “Nʼió sʼe to ntje [xi ma chiné] i soʼnde” (Salmo 72:16, NM).

Ndʼia nda xi sʼe kʼoa xá xi tsjoa koaya tokoan. Kʼianga je ʼnde naxó koan i Soʼnde, nga jngo jngo niʼya chjota tsen sʼe le ndʼia kʼoa ngatsʼi sʼe le xá xi tsjoa koaya kon (Isaías 65:21-23).

Ngatsʼi chjota Soʼnde nyʼan koatio. Likʼia ti skán ni kʼoa ni kuiyájin jin kjoajchán chjota. Je Én le Niná kʼoatso: “[Niná] kʼoasʼin sikje kjoajchán” (Salmo 46:8, 9, NM).

Likui tisʼe ni chʼin. Je Biblia tongi ni kʼoa kitsó: “Nijngo jin xi ya kʼoejna [ʼNde naxó] kʼoa kuitso: «Timʼe ña»” (Isaías 33:24, NM). Likui tisʼe ni xi chjiʼngé, xi xka, xi jtaya ni xi tsín ma nchja (Isaías 35:5, 6).

Je kjoaba, kjoaʼaon kao kjoabiya kjoetʼa. Je Én le Niná kʼoatso: “Likui tisʼe ni kjoabiya. Likui tisʼe ni kjoaba, ni je jin xi kjiʼndiá, ni je jin xi aon ma le, nga je kjoa xi titjon je jaʼato” (Apocalipsis 21:4).

Likui tisʼe ni chjota tsʼen. Jeobá tongi ni kʼoa kitsó: “Tonga xi tsʼen, jé xi jtíson i soʼnde, kʼoa tjóneya xi tsín ñaki kjoan” (Proverbios 2:22, NM).

Tsjoakie koan kʼoa skuexkón ngañá xínkjín. Likui tisʼe ni kjoatéxoma xi tsín kixi, xi táon ʼya, ni xi toje me yeje le, ni kjoajticha. Nda koaikao xínkjín chjota kʼoa kao kjoatéxoma kixi xi tsʼe Niná koatio ni (Isaías 26:9).