Agosto

Kʼianga satíoná je kjoajtín kjitʼaa nikjaʼaitsjenjinná jmeni xi tjíosʼín je Jeobá kao je Jesús xi tʼatsaan. Ñá nʼio ʼyachjiá jmeni xi kisʼin je Jesús, kuinga je chjenngisínilee josʼin mangínkoaa yaoná nichxin nga nyaon (2 Cor. 5:14, 15). Kʼoa yaa ni̱ma̱ná nroajinni nga chʼasjengʼaa je Jeobá nga kitsjoa je ʼNdíle xi tʼatsaan. Jngo koya josʼin koa̱n chʼa̱sjengʼaa kʼianga kʼoee je énná ya jinjtín. Kʼianga kʼoanʼia jotsoná je Jeobá kao Jesús bakoñá nga nʼio tsjoachaa. Mangínñá je kjoajtínná ninga sakʼoa ñʼai maná. Tobʼelañá, tjínkʼa je ndsʼee xi kʼia satíole je kjoajtín xi sʼejna nga jinle xomana kʼianga maxon nga jebitjoni xále kʼoa tsakui nichxin jekijtale. Kʼoa xi ijngo kjoajtín kʼiaa sʼejnale kʼianga jetífe xomana, nga síkjáya chjota. Kuenta sʼín je Jeobá kʼianga mangián je kjoajtín ninga jekijtaná. Kʼoa tsa tosi tonda kʼoasʼiaan, ngisaa skoe̱chjí je Jeobá jokji tsjoachaa (Mar. 12:41-44). w19.01 29 párr. 12, 13

Je Jesús kʼoati kui kjoa jaʼatojin jme kjoa xi kisʼele je chjota. Tobʼelañá, tochajinle ma̱ kisijchá yaole je familiale. Nga ya kisixákao je José, xi nʼaijonle koanni, aijin xá xi kisʼin (Mat. 13:55; Mar. 6:3). Kʼoajinti tsabe joma kʼianga jngo xíngiaa nichaa, nga̱ kʼiajin kʼien je José nga kjesa bʼétsʼiakaojin nga kitsoyason je Jesús. Kʼoati tsín tongatsʼi je xínkjín xi kui kjoamakjain kisʼele joni je (Juan 7:5). Kuinga koanjinnile jme kjoa xi kisʼele je chjota kʼoa jokisatio kon. Nga koanjinle je Jesús jokisatio kon je chjota yaa tsakakó nga tsakatío je kjoaxkón. Ali tokuijin nga tjínnele kʼoasʼin nga kisindayani je chjota, kuinga koanmake nga kjoañʼai tjíofaʼá (Mat. 20:29-34; Mar. 1:40-42). Je Jesús kisijinle yaole jokisatio kon je chjota kʼoa tsakasenkao (Mar. 7:32-35; Luc. 7:12-15). w19.03 16 párr. 10, 11

Nitje̱n nga tojeme kuindoa̱ Jesús, tsejin kjoanikjáojin kisʼele. Tosi̱kjaʼaitsjenla jokji tísíkjaójin nga kui nitje̱n. Tsa kixi koaitʼale Niná saʼnda nga kuiyá jmi millón chjota kuitjontjai (Rom. 5:18, 19). Kʼoa xi ngisasa kisikjaʼaitsjen kui jósʼin kʼoaxki̱ je Nʼaile (Job 2:4). Kʼianga tjíokjen, je pastrole kui tsakjáotiyani ʼyáni “xi koa̱senjna títjon”. Jekjoan nkjín kʼa tsakatekjáyale Jesús tʼatsʼe kjoa jebi, kʼoa nga tiʼakʼiani kʼoati tokʼoa jetsakatekjáyangánile. Kʼoa ninga tikʼoakitsongáni je pastro, je Jesús alikui kisijtile yaole. Ngasin nganda kisikixiyanda, kʼoa ijngokʼá kʼoakitsole jme xi tjínnele sʼin. Xijekoan, kʼoakitsole nga nda tjíosʼín nga kixi tjíofitʼale (Luc. 22:24-28; Juan 13:1-5, 12-15). Koaan chjénngilee je Jesús kʼoa tsín yaoná si̱jtilee ninga tse kjoanikjáojin tjínná. Si̱kjaʼaitsjeen nga kʼoati bixoán kʼoa kʼoati nʼia jmeni xi tsín sasénle xi ngikʼa (Prov. 12:18; Sant. 3:2, 5). Kʼoati machjén nga kʼoakʼuínlee xi ngikʼa jmeni xi nda tjíosʼín (Efes. 4:29). w19.02 11, 12 párr. 16, 17

Je Kjoatéxomale Moisés kʼoatso kʼiatsa ʼyani xi tokjoatjao nga jée kisʼene nga tjínle ʼnde nga skoe̱ ʼyáni xi kui jée tsakáne (Deut. 19:16-19; 25:1). Xi ijngosani, kʼianga koan kisʼene jée jngo chjota tjínnele nga jao testigo koanchjén xi tsabe jotjínni je kjoa (Deut. 17:6; 19:15). Tonga jókoan tsa tojngo koanni je testigo xi tsabe nga jée tsakajngi jngo chjota. Je chjota xi jée tsakajngi alikui tokichatʼale, nga̱ je Jeobá tsabee jmeni xi koan. Nʼio nda choa̱ bʼéjnaná je Jeobá, nga̱ ñaki kui xi kixi tíjna kʼoasʼín ngantsjai. Síchikontʼain je xi kixi fitʼale kʼoa xi sítjoson je kjoatéxomale, tonga kjoañʼai tsjoále je xi tsín kixi tíjna jmeni xi sʼín (2 Sam. 22:21-23; Ezeq. 9:9, 10). Tsakui nichxin kʼoasʼin matsen sakʼoa nga tsín jme kjoañʼai bʼaile je xi chʼao sʼín, tonga je Jeobá be kʼiani sijéle kuenta (Prov. 28:13). Kʼoa tsa tsín kʼoamanile jéele, kʼiaani be joma kʼianga ya kayaa “ntsja Niná xi tíjnakon” (Heb. 10:30, 31). w19.02 24 párr. 20, 21

Alikui jao tjínná nga kʼoasʼin kitjenngi Moisés josʼin tsakándiaale je Jeobá. Je Moisés tosi tonda kʼoakisʼin josʼin mele Niná, “joni tsa xi tíkotsenle xi tsín matsen” (Heb. 11:24-27). Kʼianga tosʼa tsʼato jngo sá tjínle nga kitjo je chjota israelita ya Egipto kʼoa nga kjesa bichójin ya nindo Sinaí, kjoa kisʼele. Je naxinandá tsakjayojéetʼale je Moisés nga tsín nandá. Kʼoa nga kʼoakisʼin, jé Jeobá tsakʼétsʼoale Moisés kʼoa kʼoakitsole nga tsín tibeni josikao je naxinandá. Saʼnda kʼoakitso nga tsakui nichxin saʼnda sikʼien kʼiatsa tsín sitjosonle (Éx. 17:4). Je Jeobá kʼoakitsole Moisés nga kui yá xi yʼatonntsja katabále je na̱xi̱ xi tíjna ya Horeb, kʼoa nga kʼoasikao je na̱xi̱ nandá kuitjo. Je Moisés kʼoakisʼin. Kʼoa je chjota israelita tsakʼi nandá (Éx. 17:5, 6). w18.07 13 párr. 4, 5

Je Jeobá kʼoati kui je jtín síchjén nga tsjoánganʼioná. Kʼianga tsjoachaa je ndsʼee tibakoñá nga tsjoachaa je Niná. Binyakaoñá je ndsʼee nga katabe nga tsjoake je Jeobá kʼoa nga nʼio bechjí (1 Juan 4:19-21). Je pastro Pablo i kitsole je chjotatjenngile Cristo: “Ngaʼi̱ ngaján tijetakon xíngio tʼaisalao nganʼio xíngio, josʼin timanʼiao” (1 Tes. 5:11). Ali tsa tojejin xi chjotajchínga sʼin tjío xi koa̱nle sinʼio kon kʼoa tsjoánganʼiole je ndsʼee, kʼoati koa̱n kʼoasʼiaan tsanda ñá tojo sʼín je Jeobá kao Jesús (Rom. 15:1, 2). Tjínkʼa ndsʼee xi nʼio táo je depresión xi tjínle kʼoa machjén nga chjinexki koaikonle kʼoa xki kʼoaile (Luc. 5:31). Je xi chjotajchínga sʼin tjío kʼoa kao xi ngikʼa ndsʼee majinle nga tsín chjinexki ma, tonga je nganʼio xi tsjoá nʼio chjíle. Kʼoa be nga tjínnele sitjoson én jebi: “Tinʼiokon xi choa tjíokon, tinyakao xi tsínle nganʼiojin, tikjaínlao ngatsʼi” (1 Tes. 5:14). w18.09 14, 15 párr. 10, 11

Kʼianga ngisa nda jchaa je Jeobá, ngisaa si̱nʼiotʼaa. Kʼoa tokʼiaa jchaa xi tʼatsʼe kʼianga kʼoéxkiaa je Biblia kʼoa si̱kjaʼaitsjenjiaan jmeni xi bʼexkiaa. Je Biblia bʼéyanajmí josʼin kisikuinda Jeobá je naxinandále nichxin kjoatse, kʼoa kui xi bakóyaná nga kʼoatisʼin sikuindaná ndʼaibi. Si̱kjaʼaitsjenjinla je sén xi síchjén je Isaías xi basenkaoná nga majinná josʼin síkuindaná je Niná. Je Isaías kui síngósonkao josʼín jngo chjota xi barré koʼnda. Itso: “Kao xjale kʼoexkóni je barréʼndí; kʼoa kʼoangʼa” (Is. 40:11). Kʼianga ʼyaa nga kʼoasʼin tísíkuindaná je Jeobá, alikui jme xi nokjonlee. Kʼoa kʼianga tsín kuinókjoaan ninga tse kjoa kuitjátojiaan, si̱kjaʼaitsjenjiaan texto xi kamaxkia ndʼaibi. Tsa kʼoasʼiaan, tsjoánganʼioná kʼianga kjoa kuitjátojiaan. w19.01 7 párr. 17, 18

A meli nga ngisasa nda si̱xálai je Niná. Tsakui nichxin tibʼenelai yaoli nga nyaon nyaon bʼexkiai je Biblia, nga bʼai énli ya jinjtín kʼoa nga ʼmiyasuin. Jósʼe tokuin nga nda bichótsjoá jme xi niʼai kʼoa kʼianga kʼoaʼmili nga nda tinʼiai. Nʼiojin tsjoa sʼe tokuin. Nga̱ kui tinikʼéjna títjuin je xále Niná tikʼoajinni tojmeni, tojo kisʼin Jesús (Prov. 27:11). Tsa kʼoénelai yaoli nga tsesa si̱xálai je Niná, nʼio tsjoa sʼe̱ tokuin kʼoa jchani nga nda tinichjain kjoabijnachonli. Je pastro Pablo i kitso: “Kixi tiyo. Ali nikʼantjaiyajion. Ngisa tse tixásalao Nainá ngantsjai, nga̱ ʼyanío nga je xáno nga tiyokao Nainá ali tokjoatjaojin” (1 Cor. 15:58). Je chjota kui fitjenngi jmeni xi tjín sonʼnde, jolani nga tse tao̱n sʼe̱le kʼoa nga nʼio kataʼyale. Kʼoa kʼianga jebichótjenngi jebi alikuini ñaki tsjoa satío kon (Luc. 9:25). w18.12 22 párr. 12, 13

Je David kui kinchja̱ni nichxin kʼianga sitjoson je kjoatéxomale Niná je chjotasonʼnde (2 Ped. 3:13). Ya Isaías 65:22 itso: “Nga̱ jokji tse male jngo yá kʼoakji tse koa̱nle naxinandána”. Jebi kui xi tsonile nga koatio ngantsjai nichxin je chjota. Ya Apocalipsis 21:1-4 kʼoatso nga likui tisʼe̱ni je kjoabiya kʼianga jekjoaʼaí sonʼnde chjotse, nga kʼia je Niná tsee kjoanichikontʼain tsjoále je choʼndale. Je ʼNdenaxó xi títjon kisʼejna ali tondiaa kichajin. Je Niná kʼoakitso nga sichikontʼain je chjotasonʼnde. Kʼoa tongini kʼoakitsole je David nga je chjota xi kixi tsʼee koa̱n i̱ Sonʼnde kʼoa koatio ngantsjai nichxin (Sal. 37:11). Xi ijngosani, je én xi tongini kinchja̱ je Isaías basenkaoná nga kao kjoatsjoa choyalee kʼianga kuitjoson jmeni xi kitsole Jesús je chjotaché (Is. 11:6-9; 35:5-10; 65:21-23; Luc. 23:43). Kʼoa koaan ya kuiyoaa ya ʼNdenaxó kʼianga kjoaʼaí nichxin jebi. w18.12 7 párr. 22, 23

Alikui kʼoakoa̱nná nga ñaki tʼaxin kuiyolee je kjoafaʼaitsjen xi tjín sonʼnde nga̱ i tiyoaa (1 Cor. 5:9, 10). Kʼianga ʼmiyasoán sakʼoaa noʼyalee je kjoafaʼaitsjen ndiso xi tjín. Ningalani tsín koa̱n nga xin kuiyolee je kjoafaʼaitsjen jebi, tonga xi koa̱n sʼiaan kuinga tsín tosi tonda kui si̱kjaʼaitsjeen. Joni je Jesús, tjínnele kjitʼanangi chʼa̱sjengiaa jmeni xi mele Na̱i nga si̱kjaʼaitsjeen. Kʼoati koa̱n chósonnilee josʼiaan nga tsínkui nʼio sikiʼaonná je kjoafaʼaitsjen xi tjín sonʼnde. Tobʼelañá, tjínnele chósonnilee ʼyáni je xi si̱miyoaa. Je Biblia kʼoatso nga tsín ndasʼin kuichomani tsa je si̱miyoaa xi tsín choʼndale Jeobá mani, tsa je si̱miyoaa chanjin kʼoatisʼin si̱kjaʼaitsjeen joni je (Prov. 13:20; 1 Cor. 15:12, 32, 33). Kʼianga chʼasjengiaa je xi kui nchja̱ni tʼatsʼe evolución, je kjoatsʼen kʼoa tsa xi tʼatsʼe kjoachajngi, bʼechjoalee yaoná nga kui faʼasʼenjin kjoafaʼaitsjenná xi kontra tíjnale je “kjoachjinele Niná” (2 Cor. 10:5). w18.11 21, 22 párr. 16, 17

Jméni xi sʼiaan nga tosi tonda kʼoasʼin kjuinkoaa yaoná jotjínni je xi kixi. Jngo koya kʼiaa nga kʼoénelee yaoná nga koakoyalee xi kjaʼaí jmeni xi tso je Biblia. Joni je sondado nga koanle josʼin kisichjén je espada, machjén nga kʼoati koa̱nná nʼio nda si̱chjén je Énle Niná (Efes. 6:17). Machjén nga kʼoénelee yaoná ngatsʼiaa nga ngisasa nda si̱chjén je Énle Niná nga koakoyaa (2 Tim. 2:15). Kʼianga kui Biblia nichjén nga ʼmiyalee je chjota, basenkaoná nga ngisa ʼyaa jmeni xi tso kʼoa ngisaa tsjoacha maa je xi kixi. Tsa kʼoasʼiaan, ngisaa koanmená nga tosi tonda kʼoasʼin kjuinkoaa yaoná jotjínni je xi kixi. Je xi kixi jngoo kjoatjao xi nʼio chjíle xi títsjoáná je Jeobá kʼoa kui xi basenkaoná nga nimiyoaa. Jenʼio tse jmeni xi títsoyaná je Niná, tonga kʼoatso nga tosi tonda kuitsoyaná ngantsjai nichxin. Nʼio chjí jchatokoán je xi kixi joni jngo perla xi nʼio chjíle. Tosi tonda katasʼená je kjoankjíntokon xi tsʼe Biblia kʼoa tsínkʼia si̱kʼéjnaa (Prov. 23:23). w18.11 8 párr. 2; 12 párr. 15-17

Kʼianga kitsoyason je Noé, kui tsakájinkon je chjota nga jngo Jtsínʼio kjoaʼaí. Je Jesús i kitso: “Jo koanchon je nichxinbe tongini je jtsínʼio, nga tjíokjen, tjíoʼbi, tjíobixan, kʼoa tjíosíkixan, saʼnda nga je nichxin nga Noé jaʼasʼen je chitsoyʼai. Chjota likui tsabe [likui kinrʼoé] saʼnda nga jaʼai je jtsínʼiobe xi kikao ngatsʼi. Kʼoatisʼin koa̱nchon kʼia nga kjoaʼaí je ʼndíle chjota” (Mat. 24:38, 39). Ningalani tsín kinrʼoé je chjota, je Noé kitsoyasonle jmeni xi kitsole Jeobá. Nichxin xi tiyoaa ndʼaibi, kui tʼatsʼe Chjotaxále Niná ʼmiyasoán kʼianga katabe je chjota jmeni xi tjínndajinle Niná tʼatsʼe chjotasonʼnde. Joni je Jeobá, kʼoati kui xi mená nga katanrʼoé je chjota ánni nga tosi tonda koatiokonni (Ezeq. 18:23). Kʼianga ʼmiyasoán nga xki̱ niʼya kʼoa kao jñani nkjín chjota tjín, ngisaa nkjín chjota fajinkoaan nga je Chjotaxále Niná jeme kjoaʼaxin ngayeje xi chʼaotjín i̱ Sonʼnde (Ezeq. 3:18, 19; Dan. 2:44; Apoc. 14:6, 7). w18.05 19 párr. 8, 9

Jméni xi sʼiaan tsa kʼoechjoaná je chjotaxá nga xále Niná sʼiaan kʼoa tsakui skónanginá xi tʼatsʼe ndsʼee. A tjínnele kʼoéyanajmílee jmeni xi ʼyaa tʼatsʼe ndsʼee. Si̱kjaʼaitsjenjinla jmeni xi kisʼin je Jesús kʼianga kiskonangiʼa je chjotaxá romano. Kui kitjenngi je kjoafaʼaitsjen xi kʼoatso nga tjín “nichxin nga jyó biyoaa kʼoa [tjín] nichxin nga nokjoaa”. Kʼoa je Jesús sakʼoaa tsín jme xi kitso kʼianga kichjonangiʼa (Ecl. 3:1, 7; Mat. 27:11-14). Kʼianga kʼoasʼin chjónangiʼaná, chósonnilee josʼiaan ánni nga tsín xkón si̱katíoñá je ndsʼee (Prov. 10:19; 11:12). Jósʼiaan kʼiatsa ʼyaa nga ai jée kabajngi jngo xi miyoná mani kʼoa tsa xíngiaa mani. Tjínnele kʼoakuixoán. Machjén nga kʼoéyanajmílee je xi chjotajchínga sʼin tjío jokjoantjínni ngayeje je kjoa, kʼoa tsín jme xi kʼoéʼmaa. Je xi chjotajchínga sʼin tjío tjínnele nga skoe̱ jokjoantjínni kjoa, ánni nga koa̱n kuinyakaoni je xi kabajngijée nga nda kʼoéjna ijngokʼani ngixko̱n Jeobá (Sant. 5:14, 15). w18.10 10 párr. 17, 18

Jméni xi sʼiaan nga kʼoainganʼiolee xíngiaa. Nda kuinóʼyá (Sant. 1:19). Kʼianga maná noʼyá bakoñá nga tjínná kjoatsjoacha. Jósʼin kʼoainganʼiolee je xi tjíonroajen kon. Si̱jinlee yaoná jotjío kon, kui si̱kjaʼaitsjeen jósʼe̱ tokoán tsa ñálani xi kui kjoa tibitjatojiaan. Kʼoa chósonnilee jmeni xi chjónangilee ánni nga koa̱njinniná jotjío kon. Jofaa nkjaan yaa bakó tsa mandosin kjoaixiná xíngiaa. Kʼiatsa mele je ndsʼee nga kʼoeyanajmíná jme kjoa xi tífaʼatojin, tsejta katamaa kʼoa tsín ñá kuinókjoajiaan nga tínchja̱. Tsa nda kuinóʼyalee ngisaa nda koa̱njinná jotjín kon. Kʼoa je ndsʼee sinʼiotʼaná kʼoa kjuinrʼoé jmeni xi kʼuínlee. Kʼianga bakolee xíngiaa nga mandosin kjoaixiná, nʼio tsjoánganʼiole. w18.09 14 párr. 10; 15 párr. 13

Nichxin machjén kʼianga noʼyá je Énle Niná, nga bʼexkiaa je Biblia kʼoa kao xo̱n xi Énle Niná yʼangini, nga chotʼayá nga toñá, nga biyondalee je kjoajtínná kʼoa nga mangián. Jebi kui xi tsonile nga tsín nʼio si̱kʼayalee je nichxinná jmeni xi tsín nʼio tjínle kjoandosin (Efes. 5:15, 16). Jókji tse nichxin machjén nga koa̱njinná jmeni xi tsoya Biblia. Kui xi kuitsoni josʼin chótʼayá nga jngó jngoá. Nga̱ tsínkʼia kjoetʼa nga chótʼayajiaan tʼatsʼe kjoachjinele Jeobá, jokjoan kʼoa kao jmeni xi kisinda (Rom. 11:33). Kʼianga kitjo títjon revista jebi nga én inglés, “jngoo naxó” kisingósonkao je Énle Niná, kʼoa i kitso: “Ali tobʼejngojin tokuin tsa jekasokóli jngo naxó, xi tsonile, je kjoankjíntokon xi tsʼe Niná. Tsa tojngolani koya xi machjén alikuijin kʼoasikji kjoankjíntokon títsjoáná Niná, tosi tonda tʼexkuí, tosi tonda tjasjai”. Ninga kʼianga jekuiyoaa ngantsjai nichxin, tosi tonda koa̱nsaná xi tʼatsʼe Jeobá. Nichxin xi tiyoaa ndʼaibi nʼio chjíle nga nda si̱chjén je nichxinná nga kuindá je kjoakixi. w18.11 5 párr. 7

Je xi tjínnele koatio je choa̱ ya yaniʼyale nga koako kjoanda jé xi xʼin ma. Je Biblia kʼoatso nga je xi xʼin tjínnele koakole kjoanda kʼoa sijinle yaole josʼe kon je chjoónle (1 Ped. 3:7). Kʼianga koakolee kjoanda jngo chjota, machjén nga títjonkjoanla katamajinná jotjín kon. Je xʼin xi majinle jotjín kon je chjoónle be nga nʼio chjíle je chjoónle kʼoa nga nkjín koya jñani tsín koa̱nngóson nga jngó jngó, tonga alikui xi tsonile tsa ngisa nangi tíjna je chjoónle (Gén. 2:18). Kuinga je xi xʼin ma, ngisaa kui tsjoále kjoandosin josʼe kon je chjoónle kʼoa bakóle kjoanda kao kjoaxkóntokon. Je xʼin xi majinle jotjín kon je chjoónle kuenta sʼín josʼin síkjaʼaitsjen, tsín kjaʼaí yánchjín si síkao kʼoa tsín kjaʼaí yánchjín síndosin. Kʼoa tsín kʼoasʼín ninga ya redes sociales kʼoa tsa ya Internet (Job 31:1). Ali tsa tokuijin nga tsjoake je chjoónle nga kixi manile, kʼoati kuinga tsjoake je Niná kʼoa nga jtike je xi chʼaotjín (Sal. 19:14; 97:10). w18.09 29 párr. 3, 4

Ánni ñʼai maniná nga nitjosoán jmeni xi tso je Énle Niná. Jngo koya anni kuinga kjoanangitokon machjénná nga koa̱n si̱tjosoán. Tonga nga jenichxin fetʼa tiyoaa, alikui choa ñʼai maná nga nangitokon maa, nga̱ je chjota “toyaole tsjoake”, tao̱n nʼio símekon, ngʼakon, kʼoa tsín kjoéxkó yaole (2 Tim. 3:1-3). Ñá xi choʼndale Niná maa ʼyañá nga tsín kixi tíjna tsa kʼoasʼiaan, tonga sakʼoaa kʼoasʼin nikjaʼaitsjeen nga ngisa nda batio je chjota xi kʼoasʼín (Sal. 37:1; 73:3). Tsakui nichxin i̱ kuixoán: “A machjén nga kui títjon sikʼéjna jmeni xi mandosinle xi kjaʼaí. Kʼiatsa nangitokon koa̱n, a tojo koakona kjoaxkóntokon je chjota”. Kʼiatsa to yaoná kjuinñá, tsínjin tinda kuiyoñá kao ndsʼee kʼoa likuijinni kui kʼoatinʼia jmeni xi tjínnele sʼin jngo chjotale Cristo. Kuinga nʼio koasenkaoniná nga chótʼayajiaan jokisʼin je choʼndale Niná xi síkʼaxki̱ je Biblia. w18.09 3 párr. 1

Tojé Jeobá tíjna ngasʼa kʼianga kjesa síndajin jmeni xi tjín. Kʼoa koanmele kitsjoale kjoabijnachon je xi tjío ya ngʼajmi kao xi tjío i̱ Sonʼnde. Je Jeobá, jngoo “Niná xi tsjoa tjínle” kʼoa kao kjoatsjoa tsjoá xi ndatjín (1 Tim. 1:11, TNM; Sant. 1:17). Nga mele nga kʼoati tsjoa sa̱tío tokoán, bakóyaná jósʼiaan nga kʼoati tjótʼaa jmeni xi tjínná (Rom. 1:20). Je Niná kʼoasʼin kisindaná jokjoan je (Gen. 1:27). Tsa mená nga tsjoa sa̱tío tokoán, machjén nga chjénngilee jokjoan, jolani, nga koa̱nndosinná je xíngiaa kʼoa nga tjótʼaa jmeni xi tjínná (Filip. 2:3, 4; Sant. 1:5). Ánni nga tjínnenile kʼoasʼiaan. Kuinga toxá kʼoasʼin kisindaniná je Jeobá. Ningalani chjotajée maa, koaan chjénngilee jokjoan, nga̱ nʼio tjotʼa. Je Jeobá kui xi mele nga kui choa̱le kjuintjenngiaa, kuinga tsjoa sʼeni kon kʼianga tjotʼaa jmeni xi tjínná (Efes. 5:1). w18.08 18 párr. 1, 2; 19 párr. 4

Kʼianga noʼyalee je Jesús ali tokuijin nga kuenta nʼia jmeni xi tso, kui xi tsonile nga kʼoati nitjosonlee. Kʼoa alikui kui nʼio nikjáojiaan je kjoa xi tjínná (Luc. 21:34). Kui títjon nitjosoán je kjoatéxomale Jesús, ninga tse kjoa bitjatojiaan. Nkjín ndsʼee xi kjoañʼai tjíofaʼá tonga kixi tjíofitʼale Jeobá ninga tojme kjoa tjíofaʼatojin. Ijngo koya josʼin bakoá kʼianga noʼyalee je Jesús kʼiaa nga tojngo nixá kao je ndsʼee xi bándiaale naxinandále Niná (Heb. 13:7, 17). Nichxin xi tiyoaa ndʼaibi, nkjín koya xi tíbʼantjaiya josʼin tísíxá je naxinandále Niná. Tobʼelañá, tíbʼantjaiyaa josʼin tiʼmiyasoán kʼoa jmeni xi nichjén nga ʼmiyasoán. Kʼoati tíbʼantjaiya josʼin satío je kjoajtín xi sʼená nga jinle xomana, josʼin tísʼenda Ndʼia jña chotʼayá, josʼin sʼendaya, kʼoa josʼin makuinda. Tsjoa sʼe tokoán kʼianga ndasʼin tíbándiaaná je naxinandále Niná. Síchikontʼainná je Jeobá kʼianga bʼenelee yaoná nga nitjosoán jmeni xi tsoná. w19.03 10, 11 párr. 11, 12

Sakʼoaa tsínni kʼoatjín jmeni xi tonoʼyá kʼianga tsín sʼejinyejená jotjínni kjoa. Kataʼyala jmeni xi koan nichxin kjoatse ya naxinandá Israel kʼianga tsakʼejna Josué (Jos. 22:9-34). Je chjota israelita xi tsakatio ya xingoatʼale xo̱ngá Jordán, kisʼejinle nga jngo sonxta tsakʼénda je ntje̱le Rubén, Gad kʼoa xi basen ntje̱le Manasés. Tonga tsín kisʼejinyejele jotjínni kjoa. Kʼoa kʼoakitso nga je chjota israelita xi sonxta tsakʼénda nga yátsʼi̱n tsakinyále Jeobá (Jos. 22:9-12). Nga kjesa fikjánjin, kisikasén chjota xi tsakásjaiya jokjoantjínni kjoa kʼoa kʼiaani kisʼejinle nga je ndsʼe̱ tsínkui xá tsakʼéndani sonxta nga cho̱ tsjoátʼa. Nga kui xá kisindani xjáo jebi nga skoe̱ je xtile xi koatio nga koa̱nskanni nga kʼoati choʼndale Jeobá ma. Nga kʼoasʼin tsakásjaiya jokjoantjínni kjoa, ndajin kisatio kon nga tsínni kiskan kao je ndsʼe̱. w18.08 5 párr. 9, 10

Tojo kitso je Pablo, saʼnda je chjota xi Niná bexkón koaanle kui kʼoasʼin xi chʼaotjín tsa tsín sikuinda yaole. Je xi kʼoasʼín tsakui nichxin kʼoasʼin síkjaʼaitsjen nga tojo nda tjío ngixko̱n Jeobá. Tsa ʼyani xi kʼoakuitso nga miyole Niná ma kʼoa nga kixi tífitʼale, alikui xi tsonile nga ñaki ndasʼin tíjna kjoaixi ngixko̱n Niná. Xi kʼoati kuenta sʼiaan kui jósʼin síkjaʼaitsjen Niná xi tʼatsaan (1 Cor. 10:1-5). Tojosʼin tiʼyaa, je chjota israelita chaan koansile nga tsín ndi̱to̱n jaʼaijenni ya nindo Sinaí je Moisés. Tikʼoasʼinni tsanda ñá, tsakui nichxin kʼoati chan koa̱nsiná nga kʼoasʼin si̱kjaʼaitsjeen nga tsín ndi̱to̱n tífaʼai je nichxinle Jeobá kao sonʼnde chjotse. Tsakui nichxin kʼoasʼin si̱kjaʼaitsjeen nga sʼasa tse cha nga kuitjoson jmeni xi tso je Niná kʼoa tsa tsín koa̱nkjainnáje̱ nga kuitjoson kjoaixi. Tsa tsín si̱kuindaa yaoná, likuijin tikui xi tʼatsʼe Jeobá títjon si̱kʼéjnañá. Nga jekoa̱nni, chanjin kui kʼoasʼiaan jmeni xi tsín kixi tíjna. w18.07 20, 21 párr. 17, 18

Kʼianga nda bexkonná je Jeobá nʼio tse kjoanichikontʼain sokóná. Tonga jmé xi tjínnele sʼiaan nga miyole Niná koaan. Machjén nga tsjoacha koaan kʼoa kʼoaitʼalee yaoná (1 Cor. 8:3). Machjén nga si̱kuindaa je kjoamiyo xi tjínná kao Nʼainá xi tíjna ngʼajmi. Tojo kitsole Pablo je chjotale Cristo, tjínnele si̱kuindaa yaoná nga tsín choʼndale koaan jmeni xi tjín sonʼnde, xi tsín jme chjíle, jolani tsa nʼio ngʼa kʼoasjená je chjota (Gál. 4:9). Je chjotale Cristo xi kiskile Pablo ndasʼin tsakatio ngixko̱n Niná. Tonga kʼoakitsole nga kui tsakásjai ijngokʼa tsojmi xi tsín jme chjíle, joxi ini kitsole: “Kʼianga jenda tinixálao Niná tsakai, ánni nga kui kʼoatinʼia ijngokʼaño jmeni xi tsín jme chjíle xi jekinikatío”. w18.07 8 párr. 5, 6

Alikui machjén nga kjoa kuitjátojiaan kʼianga koa̱njinná nga tsín ndasʼin bichómani kʼianga tsín nitjosonlee Niná. Kʼianga kʼoéxkiaa je Biblia jchañá jñani tsín nda kisʼin kʼa je chjota xi faʼaitʼa kʼoa koaan si̱kjaʼaitsjenjiaan nga tsín kʼoati kui kjoa katatsaojiaan tsanda ñá. Tʼatsʼe Niná nroani kjoafaʼaitsjen jebi kʼoa nʼio ndasʼin basenkaoná. Tobʼelañá, je David nʼio tse kjoa tsakʼejnajin nga tsín kisitjosonle Niná kʼoa nga kisichajngi kao Bat-seba (2 Sam. 12:7-14). Kʼianga chótʼayajiaan xi tʼatsʼe David, koaan si̱kjaʼaitsjenjiaan kjoachjonangi jebi: “Jméni xi tjínnele kisʼin tsakai je David nga tsínkui kjoa jaʼatojin. Jméni xi sʼian tsa kʼoati kui kjoa kjoaʼatojian. A je choa̱le José kjuítjenngia axo je choa̱le David kjuítjenngia” (Gén. 39:11-15). Tsa si̱kjaʼaitsjenjiaan josʼin kuichomani jmeni xi sʼiaan, ngisajin jticha koaan xi chʼaotjín (Amós 5:15). w18.06 17 párr. 5, 7

Kʼianga tsín kixi jme xi matʼain chjota ngisaa tsjonjin yaole kjoa política. Kʼianga nichxinle Jesús, nga tao̱nbasen tsakʼéchjí chjota kui xokisikao nga partido kitsjoanganʼionile. Je chjota kinrʼoéle Jesús, xi je naxinandá Roma tsakánentsja, nkjín koya xi tsakʼéchjíntjai. Tsakʼéchjíntjai tsojmi xi tjínle, nangile kʼoa kao niʼyale. Kʼoa nga nʼio kisichéson je chjota xi tao̱nbasen tsakʼéxkó nʼio ai koanle je naxinandá. Je chjota xi tao̱nbasen tsakʼéxkó, tsakʼéchjíle je chjotale gobierno nga katabʼaile xá jebi kʼoa nga jekitjoéle xá kui kisinyináni yaole. Tobʼelañá, je Zaqueo xi tsakasentítjonle chjota xi tao̱nbasen bʼéxkó ya Jericó, nʼio nyiná koan nga tsakʼanachale chjota (Luc. 19:2, 8). Kʼoa tsínjin tsa toje xi kʼoakisʼin. Je chjota kontrale Jesús tsakásjaile jokisʼin tojoni nga katafajin je Jesús kjoa xi tsʼe tao̱nbasen. Kui kiskonangile tʼatsʼe “tao̱nsá”, jngo tao̱n denario xi tjínnele kʼoechjí ngatsʼi chjota xi ya tjío jña kjinentsja naxinandá Roma (Mat. 22:16-18). Nga tsakʼéchjí tao̱nbasen jebi je chjota judío kui xi ngisasa kisijtile nga̱ kʼoasʼin kitsoyanile nga naxinandá Roma kjinentsja. w18.06 5, 6 párr. 8-10

Jokoan je Adán kui bakóyaná nga tsa je Na̱i kjuintʼalee alikʼia ndasʼin kuichomani (Job 21:7-17; Gál. 6:8). Jósʼin basenkaoná nga ʼyaa nga je Na̱i fajin jmeni xi chon sonʼnde. Basenkaoná nga chosonnilee josʼin ʼyatokoán je chjotaxá kʼoa kao je xá xi nʼia nga ʼmiyasoán. ʼYañá nga kui xi mele je Jeobá nga koakolee kjoaxkóntokon je chjotaxá (1 Ped. 2:17). Kui xi mele nga si̱tjosoán je kjoatéxoma xi tsjoá, xi tsín kontra tjíole je kjoatéxomale Niná (Rom. 13:1-4). Tonga kʼoati ʼyaa nga tsín koa̱n kjoa política kuinójiaan yaoná kʼoa nga tsín koa̱n jngo partido kʼoainganʼiolee (Juan 17:15, 16; 18:36). Xi ijngosani, nga ʼyaa nga je Na̱i fajin jmeni xi chon sonʼnde kui xosíkaoná nga tosi tonda ʼmiyasonñá. Kui xi mele nga chʼaosʼin sikʼéjna je jaʼaínle Jeobá, kuinga meniná kʼuínyalee je chjota jokjoantjínni xi tʼatsʼe Niná. Nʼio tsjoa tjío tokoán nga nichjén je jaʼaínle Niná kʼoa nga kui jaʼaín kichʼá. ʼYañá nga ngisa tse kjoanda sokóná nga je Niná tsjoacha maa tikʼoajinni tsakui tsjoacha koaan je tao̱n kao tsojmi xi tjín sonʼnde (Is. 43:10; 1 Tim. 6:6-10). w18.05 24 párr. 8, 9

A koan kuinyatʼaxinle xínkjín xi jekabixan kʼiatsa kjoa sʼe̱le. Je Biblia alikui kʼoatso jmé kjoa xi tjínnele sʼe̱ nga koa̱n kuinyatʼaxinle xínkjín. Je Pablo i kitso: “Je chjoón xi tjínle xʼin xi tsín tsa makjainle, kʼoa tsa je xʼin mamekon nga bʼejnakao, kʼoati li tsjiónjin” (1 Cor. 7:12, 13). Tojo machjén kjoafaʼaitsjen jebi ndʼaibi. Sakʼoaa kʼoasʼin matsen nga je xʼin xi tsín choʼndale Niná mani tsín timenile nga tosi tonda kʼoéjnakao je chjoónle. Tsakui nichxin bʼéle je chjoónle, kʼoa tsa kʼoasʼin sikjaʼaitsjen je chjoón nga nʼio tínikiʼaon, kʼoa tsa jexkón sʼin tíbʼejna. Tsa tsín mele nga koa̱njngíʼa je chjoónle kʼoa kao ʼndíxtile kʼoa tsa tsín titsjoáʼndenile je chjoónle nga Niná sixále. Nga kui kjoa jebi faʼatojin je tichjaa, tjínkʼa xi kʼoatso nga ngisa nda nga koasentʼaxinle je xʼinle. Tonga kʼoati tjínkʼa xi tsín kʼoasʼín. Tjíokale kʼoa bʼénele yaole nga nda batio. w18.12 13 párr. 14; 14 párr. 16, 17

Kʼianga kui choa̱ tsakʼéjna je Jesús jmeni xi tso ya Lucas 8:5-8, 11-15 kui kinchja̱ni tʼatsʼe jngo chjota xi na̱xi̱n kjojndí, kʼoakitso nga je na̱xi̱n kui tsoyanile je Énle Niná. Je nangi kui tsoyanile je ni̱ma̱le chjota. Je na̱xi̱n xi ya kitsao jña nda nangi chiso kʼoa tsakinngʼa. Kʼoa tojo ma jngo na̱xi̱nle trigo kʼianga sʼentje, je xi mankjínya kui je trigo, ali tsakuijin je xka̱le xi mankjínya. Tikʼoasʼinni, ali tsakuijin tínchja̱ni nga nʼio nkjín xi chjotale Cristo si̱koaa. Je xi ninkjínyaa kui je na̱xi̱n xi tsʼe Chjotaxále Niná, xi tsonile, nga ʼmiyasoán. Kʼianga tʼatsʼe Énle Niná nokjoakaoñá je chjota kui xi tsonile nga tichjonjndía je na̱xi̱n xi kisʼentjejin ya jinni̱ma̱ná (Luc. 6:45; 8:1). Je choa̱ jebi, kui tsoyaná nga ya mangósoán jngo xka̱ trigo xi bale to kʼianga tosi tonda ʼmiyasoán je Énle Niná. w18.05 14 párr. 10, 11

Je Pablo ali tsa tokuijin xi kisʼin nga kisinʼio kon je ndsʼe̱, i kitsosa: “Kao kjoatsjoa sikjejian nganʼiona [xi tʼatsaon]” (2 Cor. 12:15). Kʼoatisʼinni je xi chjotajchínga sʼin tjío, kʼianga sinʼio kon je ndsʼe̱, machjén nga koako nga mandosin kjoaixile (1 Cor. 14:3). Nga kui xi mele je xi chjotajchínga sʼin tjío nga nda koatio je ndsʼe̱, sakʼoajin koa̱nchjén nga tsjoále kjoafaʼaitsjen nga sikixiyanda. Xi koasenkao kuinga sikjaʼaitsjenjin jmeni xi tso je Biblia. Kʼianga jejaʼáyanile je Jesús, nʼio nda choa̱ tsakʼéjna josʼin tsakatekjáyale je jtín xi kisatio ya Asia Menor. Kʼoa nga kjesa síkixiyandajin je jtín xi kisatio ya Éfeso, Pérgamo kao Tiatira títjonkjoanla kui kʼoakitsole jñani nda kisʼin (Apoc. 2:1-5, 12, 13, 18, 19). Nda sʼín je xi chjotajchínga sʼin tjío nga fitjenngi je choa̱le Cristo kʼianga tsjoá kjoafaʼaitsjen. w18.04 22 párr. 8, 9

Jon xi xijchá mao, nʼiojin bʼenelao yaono nga nda nikuindao je ʼndíxtino nga tsín chʼin katatsaotʼale. Tobʼelañá, tsjejin nichon je ndʼiano kʼoa chjaʼaxinjion jmeni xi tsjoáchʼinle. Tikʼoasʼinni, tjínnele si̱kuindao je ʼndíxtino nga tsínkui katakotsenle je película, programa xi faʼa ya televisión, videojuego kʼoa kao página xi tjío ya Internet ánni nga tsínkui kjoafaʼaitsjenle Na̱i kjoaʼasʼenjinni je ni̱ma̱le. Je Jeobá kui xá títsjoáno nga kjoándiaalao je ʼndíxtino nga miyole Jeobá katama (Prov. 1:8). Kuinga ndatjínsíni nga kuichákjáyalao je ʼndíxtino tojo tso je Biblia. Kʼoatʼinlao jmeni xi koa̱n skótsenle kʼoa jmeni xi mai, kʼoa tʼinyalao ánni nga tsín koa̱n tjóʼndenile kʼoasʼin tsa jmeni (Mat. 5:37). Kʼianga jekjimajchínga, takoyalao nga katamajinle jmeni xi ndatjín kʼoa jmeni xi chʼaotjín tojo tso je kjoatéxomale Niná (Heb. 5:14). Kʼoa tikjaʼaitsjaon nga je xi kuenta sʼin ʼndíxtino kui jmeni xi nʼiao (Deut. 6:6, 7; Rom. 2:21). w19.01 16 párr. 8

Je xi sʼa xti koaan kjoakaonajmí je ndsʼee xi jekoanjchínga, koaan skónangile tʼatsʼe josʼin tjíosíxále Niná. Jebi nʼio kuinyakao je xti kʼoa kao je ndsʼee nga tosi tonda Niná sixále. Xi ijngosani, ngatsʼiaa koaan chjoéyaa je xi faʼai je kjoajtínná. Je xi bándiaa nga satíoná je kjoajtín nga bitjokʼinyasoán, koaan kuinyakao je ndsʼee xi jekoanjchínga nga tosi tonda katabakóyason. Koaan koasjaile ʼnde jñani koakoyason kʼoa tsa kʼoasʼin kʼoendajin nga jngo xi sʼa xti katabitjokao je ndsʼee ánni nga koa̱n tsjoánganʼionile. Kʼoati tjínnele kuenta sʼin je xi tsín tinanda kʼoamanile nga tsoyason nga chʼin bʼetʼale kʼoa tsa jmesa nganʼio machjénle. Tsa kʼoasʼin, kuinyakao nga kao kjoatsjoa kuitsoyason ngatsʼi, xi sʼa xti, xi jechjotajchínga, xi sʼa tjíobʼétsʼiakao nga tjíotsoyason kʼoa xi jekjoatsele nga tsoyason (Lev. 19:32). w18.06 23 párr. 10-12

Tsín koa̱n tokʼoéjngoaa tokoán nga ndái kisikatíoná Jeobá xi tʼatsʼe jée kao kjoabiya. Nga tsakʼéchjíntjainá koaan nda sʼe̱ tokoán nga si̱xálee (Sal. 40:8). Nga kʼoailee kjoanda Niná nga kitsjoaná kjoandái chósonnilee nga tsín chʼaosʼin ni̱chjén je kjoandáiná. Je pastro Pedro kʼoakitso nga tsín koa̱n kʼoasʼin si̱chjén je kjoandái xi tjínná nga tokui kʼoasʼiaan jmeni xi nʼio nimetokoán. Jebi kui síkjaʼaitsjenjinná jmeni xi kisʼin chjota israelita nga tsakʼetsoma ya ʼndekixí. Kʼoa ndʼaibi, ngisaa nʼio machjén nga si̱kuindaa yaoná nga̱ je Na̱i kao sonʼndele kui tsjoátʼaná jmeni xi nʼio nimetokoán, jolani tsa najño, tsojmi xi ma chine, xi ʼyoá, kjoasʼetsaojin kʼoa xi kjaʼaísanile, kʼoa je síchjén chjota xi nʼio ʼyale tojoni nga kui kuindá jmeni xi tsínni machjénná. Nʼio choa ñʼai tíjna nga ska̱yaa che̱n jebi kʼoa nga chʼaosʼin si̱chjén je kjoandáiná. w18.04 9, 10 párr. 7, 8