XI NGISA TÍNCHJA̱NI REBISTA JEBI

Tosakʼoa bitjoson jmeni xi tongini tso je chjota

A meli jchai jmeni xi koa̱n nichxin xi sʼa nroa. Nʼio nkjín chjota xi mele skoe̱. Kuinga nʼio nkjín masíni xi kui xá sʼín nga kʼoatso jmeni xi koa̱n, sakʼoa kʼoatjín jmeni xi tso kʼoa sakʼoa mai. Tobʼelañá:

JE CHJOTA CIENTÍFICO nʼio tse tao̱n síkjeyale kʼoa kui síchjén je ki̱cha̱ xi síxkón kjoan kʼianga kʼoatso jokji tísíkiʼaon Sonʼnde je contaminación, nga tongini kʼoatso tsa jtsí kʼoa̱ kʼoa tsa jmesani xi koa̱n.

JE CHJOTA XI KʼOATSO JOSʼIN KUICHOTSJOÁ TSA JMENI kui tsoya josʼin kuichotsjoá tsa negosio kʼoa tsa kjoa polítika. Je chjota xi Warren Buffett ʼmi, jngo chjota xi nʼiosa nyiná, nʼio nda male nga tongini kʼoatso josʼin kuichotsjoá tsa jme negosioni kʼoa Oráculo tsole chjota. Kʼoa je chjota xi Nate Silver ʼmi, nʼio nkjín koya jmeni xi tongini tso, jolani ʼyá chjota polítikoni xi kuinje̱le kʼoa jmé pelíkulani xi kuinje̱le premio.

JE XO̱NJCHÁ XI KJOATSE KJIO nʼio bexkón je chjota kʼoa kʼoatso nga bitjoson jmeni xi tso. Tobʼelañá, nʼio nkjín chjota xi kʼoasʼin makjainle nga sʼa tíbitjoson ndʼaibi je xo̱n xi kiski je xi Michel de Notredame (Nostradamus) ʼmi kʼianga siglo XVI. Kʼoa kʼianga jetʼa je nichxinle calendario maya, nga 21 sá diciembre nó 2012, nʼio nkjín chjota xi kʼoakitso nga kjoaxkón koa̱n.

NʼIO NKJÍN CHJOTATÍTJONLE RELIJIÓN xi tongini kʼoatsole chjota nga kjoaxkón koa̱n kʼoa kuinga kʼoatsoni nga nkjín chjota katafitʼale. Je profeta xi Harold Camping tsakʼin kʼoa kao chjotale kʼoakitso ngakjijnda nga kʼia nó 2011 kjoe je Sonʼnde, tonga alikuini kʼoakoan.

XI PSÍQUICO ʼMI kʼoatso nga be jmeni xi koa̱n nichxin xi sʼa nroa. Jmeni xi kitso je xi Edgar Cayce kʼoa kao xi Jeane Dixon tsakʼin xi koa̱n kʼianga siglo XX kitjoson kʼa, tonga nʼio nkjín koya xi tsín kitjoson. Tobʼelañá, je Jeane Dixon kʼoakitso nga kʼia nó 1958 koaitsʼia je Kjoajchántse xi majanni. Kʼoa je Edgar Cayce kʼoakitso nga ya ndáchikon ska̱sʼe̱njin naxinandá Nueva York kʼianga nó setenta.

A koaan jchaa jmekjoanni xi koa̱n nichxin xi sʼa nroa. Tsa ʼyalañá jmeni xi koa̱n, jchajián jmeni xi sʼiaan.