“Chʼa̱sjengʼai Jeobá kao tsojmichjí xi tjíoli”

SAʼNDA nichxin kjoatse, bʼaitʼale kjoatjao je Jeobá kʼianga ʼyaxkón. Je chjota israelita choo kitsjoatʼale Niná, kʼoa je kjoatjao xi tsjoá chjotale Cristo kuinga nchja̱ni tʼatsʼe Niná. Tonga tjínsa xi kjaʼaínile xi koa̱n kʼoee xi kʼoati sasénle Niná (Heb. 13:15, 16). ʼYani xi kui tsjoá, nʼio tsjoa satío kon kʼoa tsee kjoanichikontʼain sʼele, tojosʼin bakó choa̱ xi sʼa jchaa.

Je Ana, chjoón israelita koan. Tsín koan kisʼele xti ningalani nʼio koanmele nga jngo ʼndí sʼe̱le. Kʼianga tsakʼétsʼoale je Jeobá kʼoakitsole kʼiatsa jngo ʼndí sʼe̱le nga jé tsjoátʼale “jokjitse kʼoéjnakon” (1 Sam. 1:10, 11). Nga jeki nichxin, je Ana kisʼele ʼndí kʼoa Samuel kitsole. Kʼianga jetsín titsakakini, yaa kikao ya ndʼianajñole Jeobá nga ya katasíxále tojo kitso nga kitsjoa énle. Je Jeobá kisichikontʼain je Ana nga kitsjoa kjoatjao jebi. Je Ana ngi aonsa xti kisʼesale kʼoa je Samuel profeta koan kʼoa kʼoati kiski Biblia (1 Sam. 2:21).

To jokisʼin je Ana kao Samuel, ñá xi chjotale Cristo maa kʼoati koa̱n kʼoaitʼalee yaoná je Niná nga si̱xálee. Je Jesús kʼoakitso nga nʼio tse kjoanichikontʼain sʼe̱ná ningalani ñʼai koa̱n sakʼoaná nga si̱xálee Jeobá (Mar. 10:28-30).

Je Dorcas jngoo chjoón xi chjotale Cristo koan, xi kʼia tsakʼejna nga siglo 1. Nʼio tsaʼyale xi totʼatsʼe nga nda chjota koan kʼoa nga tsakakóle kjoamatokon xi kjaʼaí. Tonga kisokochʼinle kʼoa kʼieen kʼoa nʼio ba koanle je chjotale Cristo xi ngikʼa. Kʼianga kisʼejinle nga ya chrian tsoʼba je Pedro kʼoakitsole nga katafikonle. Tikjaʼaitsjenjinlai jokji tsjoa koanle nga kicho Pedro kʼoa nga kisikjaʼáyale je Dorcas. Tokʼiaa síkʼaxki̱ títjon Biblia nga jngo pastro kisikjaʼáyale jngo chjota (Hech. 9:36-41). Niná likui kisichajin je kjoatjao xi tsakakó Dorcas (Heb. 6:10). Yaa Biblia kisʼetʼa jmeni xi kisʼin kʼoa ndʼaibi, koaan chjénngiaa je choa̱le.

Je pastro Pablo kʼoati nda choa̱ tsakʼéjnaná nga kitjotʼa jme xi tjínle, kʼoa nga tsakasenkao xi kjaʼaí. Kʼoa itso xi kiskile je chjotale Cristo xi ya tsʼe Corinto: “Tonga kao kjoatsjoa sikjejian nganʼiona, kʼoa ndiaa kjoejin nganʼiona tʼatsʼe ni̱ma̱no” (2 Cor. 12:15). Je Pablo koanjinle nga binyakoaa xi kjaʼaí tsjoa sʼe tokoán kʼoa xi ngisa chjíle kuinga sʼená kjoanichikontʼainle Jeobá kʼoa nda biyoaa ngixko̱n (Hech. 20:24, 35).

Je Jeobá tsjoa sʼe kon nga kʼoasʼin nichjén je nganʼioná nga kʼoanʼia xále kʼoa nga binyakoaa je ndsʼee. Tonga jmésani xi koa̱n sʼiaan nga chʼa̱sjengʼaa je Jeobá. Kʼiaa nga kʼoainganʼioá kao tao̱nná. Je tao̱n xi bʼé kʼoasʼin kjimachjén nga tosi tonda tíʼmiyason je Énle Niná jngo tjíjtsa Sonʼnde. Tobʼelañá, kʼoati kʼoasʼin kjimachjén je tao̱n xi bʼé nga bʼainganʼiole je misionero kao xi to xále Niná tjíosʼín. Kʼoati ya kjimachjén nga tjíosatíonda kʼoa nga tjíofaʼatoya je xo̱n xi Énle Niná faʼaitʼa kʼoa kao video. Kʼoa nga bʼainganʼiole je ndsʼee xi kjoaxkón bichóne kʼoa nga tjíosʼenda je Ndʼia jña chotʼayá. Koaan kʼoéjngoaa tokoán nga je Jeobá sichikontʼainná kʼiatsa kʼoee jme xi tjínná kʼoa koaan chʼa̱sjengʼaa kao je tsojmichjí xi tjínná (Prov. 3:9; 22:9).

Josʼin tsjoánganʼio kʼa chjota nga tosi tonda katafison je énle Niná

Tojo koan nichxin nga tsakʼejna je pastro Pablo, ndʼaibi kʼoati nʼio nkjín xi batíotʼaxin choa tao̱nle kʼoa xijema, yaa batíoya ya kaxa̱ xi “Obra mundial” tso xi tjío ya Ndʼia jña chotʼayá (1 Cor. 16:2). Nga xki̱ sá, je jtín yaa síkasén je tao̱n xi maña ya sucursal xi tsʼe testigole Jeobá jñani nga nchja̱ni. Kʼiatsa meli nga kʼoainganʼio, kui tichjáin je jaʼaín xi síchjén je testigole Jeobá ya jñani tsi. Kʼianga jchai je jaʼaín xi síchjén je testigole Jeobá ya ngixko̱n kjoatéxoma tinókjoai ya sucursal xi tjíole. Yaa koa̱nsjaisali josʼin koa̱n si̱kasáin je tao̱n ya www.jw.org/mau. Xi faʼaitʼa ibi koasenkaoli josʼin koa̱n si̱kasáin je tao̱n kʼiatsa kʼoakoa̱nli.

NGA TONDIAA NIKASÉN JE TAO̱NNÁ

Kʼianga nikasén je tao̱n, maa ya tjen Internet nikasénñá kʼoa tsa kao tarjeta de crédito kʼoa tsa tarjeta de débito. Tjíokʼa je sucursal xi tikuini pájina xi tsʼe jw.org síchjén nga nikasénle je tao̱n kʼoa tsa kjaʼaísa pájina xi tjío ya Internet xi ma tjoʼndele.
Kʼianga ñaki tao̱n xi nikasén, tsakui la̱jao̱chjí xi tjíoná kʼoa tsa kjaʼaísanile tsojmichjí xi tjíoná. Kʼianga si̱kasén tsojmi jebi, koaan jngo karta kʼoéndaa xi kʼoatso nga tondiaa tibʼaijián.

KOAAN TJOÉNINÁ TAO̱NNÁ TSA KOA̱NCHJÉNNÁ

Je tao̱n xi si̱kasén koaan kʼoaininá tsa koa̱nchjénniná.
Kʼianga si̱kasén je tao̱n koaan jngo karta si̱kasén xi kʼoatso nga koa̱n tjoéniná kʼianga koa̱nchjénná.

KʼIÁNI MENÁ KʼOEE TAO̱N

Je xi fisani kui faʼaitʼa jósʼin koa̱n kʼoainganʼiosai nga tosi tonda katafison je Énle Niná. Kʼiatsa kui si̱chjáin je xi faʼaitʼa ibi, títjonkjoanla chjónangilai je sucursal xi kjinentsja ya ʼnde jña bakoyasuin tsa koa̱n kʼoasʼiain jebi. Nga bʼantjaiya kjoatéxoma xi tjín nga jngó jngó naxinandá, jngo licenciado xi kui xá sʼín katabasenkaoli ánni nga jchasíni josʼin nga ngisa skénndiaali nga kʼoainganʼiui.

Seguro xi tjínle chjota kʼoa nga ma jubilar: Koaan je sʼe̱tʼaxo̱n je jtín xi tsen tíjna xi síchjén je testigole Jeobá nga je katabʼaile je seguro xi tjínle je chjota kʼoa tsakui je tao̱n xi tsʼe nga ma jubilar.

Tao̱n xi sʼejna ya banco: Kʼiatsa kamʼe je chjota xi ya banco tíjnale tao̱nle, maa je bʼaile je jtín xi tsen tíjna xi síchjén je testigole Jeobá kʼoa kui fitjenngi jotso je kjoatéxoma xi tjínle je bancole naxinandá.

Je ʼndíle tao̱n xi ya banco satío: Tao̱n jebi koaan nga tondiaa jekʼoaile je jtín xi tsen tíjna xi síchjén je testigole Jeobá kʼoa tsa kuiyálani je chjota xi tsʼe tao̱n jebi koaan nga jngo xo̱n kʼoenda xi kʼoatso nga je katabʼaile jtín jebi.

Jmeni xi tjínle je chjota: Kʼiatsa jngo ʼnde kijnali xi koa̱n sa̱téna koaan jekʼoaile je jtín xi tsen tíjna xi síchjén je testigole Jeobá kʼoa koaan tojo ya kuijnai josaʼnda nga kuiyái.

Testamento xi síkájna jngo chjota: Koaan kʼoailee je jtín xi tsʼe testigole Jeobá xi kui xá tíjnani, tsa nangi kijnaná kʼoa tsa tao̱n tíjnaná kʼoa jngo testamento koajnaa xi kʼoatso nga je jtín jebi tjoéle. Kʼoati koa̱n sa̱sénnda jngo chjota xi sʼe̱jnale je testamento xi kasʼenda. Kʼianga kʼoasʼin sʼendajin ngisaa choa ñʼai ma nga machjíntjai.

Ya jñani “kʼiáni mená kʼoee tao̱n” tso, kʼoatso nga je xi tsjoá je tao̱n tjínnele nga tongini kʼoendajin. Kʼianga koa̱n kuisenkoaa je chjota xi mele tsjoánganʼiole je jtín xi tsʼe testigole Jeobá, jngo foyeto kisʼenda nga én kastía kʼoa nga én inglés xi kʼoaʼmi Donaciones planificadas para favorecer el servicio del Reino en todo el mundo. Foyeto jebi kui nchja̱ni josʼin kʼoainganʼioá kʼoa tsa jmesani xi koa̱n kʼoee. Tsakui nichxin likui koa̱nchjényejená jmeni xi tso foyeto jebi. Nga̱ je kjoatéxoma xi tjínle nga jngó jngó naxinandá bʼantjaiyaa. Nga nkjín koya tjín josʼin nga ma bʼé jmeni xi tjínná, nkjín chjota xi tjíotsjoánganʼio nga tíbitjoson je xá xi tjíosʼín je testigole Jeobá jngo tjíjtsa Sonʼnde. Nga kʼoakjima ndasʼin bichómani ngixko̱n kjoatéxoma. Kʼiatsa jekitjo foyeto jebi ya naxinandáli koaan si̱jé jngolai je xi secretario sʼin tíjnale ya jtín jña bʼakaoli.

Tsa mesali jchai tʼatsʼe jebi ya tisennelai jñani tso “Mena tsjoanganʼioa nga tosi tonda katafison je Énle Niná”. Titjásʼain ya jw.org kʼoa tsa maije̱ tinókjoai ya sucursal xi tsʼe testigole Jeobá.