Xi sakʼoa Chjonangiaa

◼ Jósʼin koa̱n sikuinda xtiʼndíle je xi xijchá ma kʼianga tjíotsoyason

Je xi xijchá ma nʼio nda sʼín kʼianga fikao xtiʼndíle kʼianga fitsoyason kʼoa nga bakóyale josʼin kjoakaoni chjota je énnda chjotse xi tsʼe Kjoatéxomale Niná. Tonga tjínnele nga sikuinda xtiʼndíle, ninga ya ʼnde jñani tsín xkón chon maná ñá. Sa nkjín sa nkjín xtiʼndí xi totaon tjíoʼya kʼoa xi totjíonikao toma nichxin xi tiyoaa ndʼaibi. Ánni kʼoakjimasíni. Kuinga kjimankjín je chjota xi to xájndí tsjoake (2 Tim. 3:1-5). Machjénní nga sikjaʼaitsjen je xi xijchá ma jósʼin sikuinda xtiʼndíle tʼatsʼe je chjota xi chʼao kjoan. Jméni xi koa̱n sʼin.

Je Biblia kʼoatso nga si̱kuindaa yaoná kʼoa nga tongini kuisenxínlee ya jñani xkón chon (Pro. 22:3; Mat. 10:16). Ali tsa kjoatéxomajin tíbʼaile je xi xijchá ma, tonga tongisajin nda nga je koaikao xtiʼndíle nga fitsoyason kʼoa tsa jngoje̱ xi jejchínga. Kʼiatsa jao xti xi jemale síkuinda yaole ñatje̱n koaitsoyason kʼoati nda nga jngo xijchále skótsenle kʼoa tsa ʼyani xi jejchínga. Tonga kʼianga jemajchínga je xtiʼndí nga jemale toje síkuinda yaole, jé xijchá xi kuitsoni a tojo kʼoakji nʼio sikuinda (kʼoati chótʼajin Nuestro Ministerio del Reino xi tsʼe sá octubre nó 1992 ya jñani “La caja de preguntas” tso).

Kʼoati machjén nga nda sikuinda xtiʼndíle je xi xijchá ma kʼiatsa karrole fikao nga fitsoyason kʼoa ninga to ndso̱ko̱ fini. Kʼianga kuenta nʼia jebi alikui kjoaxkón sokóná kʼoa alikui kjoaba biyojiaan. Alikui tokjoatjao kjoa bichonné yaoná, jolani nga tao̱n feya tsa tjín xi kamiʼaon kʼoa nga kjoa sʼená ngixko̱n chjotaxá, nga̱ nichxin xi tiyoaa ndʼaibi nʼio sinle kjoa je chjota.

Nʼio nda sʼín je xtiʼndí nga kʼoasʼin bʼasjengʼa je jaʼaínle Jeobá (Sal. 148:12, 13). Kʼianga nda fikao yaole kʼoa nda tso én xi síchjén nga tsoyason, jé Jeobá bʼasjengʼa kʼoa tokʼoamale je chjota. Jon xi xijchá mao, nʼio tinyakao ʼndíxtino nga tosi tonda katatsoyason je énnda chjotse. Tonga kʼoati tikuindakaoño nga tsín jme xi katamale.