Si̱kuindaa jotjío je tokoán

1. Jókʼuín je kjoajtíntse xi jngo nichxin sʼe̱jnaná nó 2013 kʼoa jmé xá kisationdani jmeni xi kjoaʼa.

¹ Nyaon nyaon tíchotʼayakao jotjío je tokoán. Kʼoa je kjoajtíntse xi jngo nichxin sʼe̱jnaná nó 2013 ikʼuín: “Si̱kuindaa jotjío je tokoán” (1 Tim. 1:19, NM). Kjoajtíntse jebi kʼiaa koaitsʼiani nga sa̱tío nga 1 sá septiembre. Jme xi kjoaʼa ya kjoajtíntse jebi kui xá kisʼendani nga koasenkaoná kʼianga si̱kjaʼaitsjenjiaan josʼin tinichjén je tokoán, je kjoatjao xi kitsjoaná Niná.

2. Jmé kjoachjonangi xi sa̱kóyaná kʼianga sʼe̱jna kjoajtíntse xi jngo nichxin.

² Kui jebi kjoachjonangi xi sa̱kóya. Kʼianga sʼe̱jna kjoajtíntse jebi, ñato kjoachjonangi sa̱tío xi kuitsoyaná josʼin si̱kuindaa je tokoán.

• Jmé xi koa̱n sikitsónjin jotjío je tokoán.

• Jméni xi koasenkaoná nga si̱chjinee je tokoán.

• Jméni xi sʼiaan nga tsín ñá tsao̱tʼaná je njínle chjota.

• Jmé xi bakoá kʼianga nikjaʼaitsjenjiaan kjoafaʼaitsjen xi faʼaitʼa Biblia kʼoa nga bʼaiʼndee nga kui bándiaaná jonʼia.

• Jósʼiaan nga tsínkui si̱kiʼoaan jotjío kon je xíngiaa.

• Jósʼin taja koatio je xi sʼa xti kʼianga chótʼayakao kjoamakjainle.

• Jmé kjoanda xi sʼe̱le je xi kuenta sʼin kon kʼianga jebe jotso Biblia.

3. Jmé xi sʼiaan nga nda katabasenkaoná kjoajtíntse xi jngo nichxin sʼe̱jna.

³ Je Na̱i nʼio básjaile josʼín tojoni nga sikitsón jotjío je tokoán, tonga je Jeobá basenkaoná nga kaná tojmeni xi síkaoná je Na̱i. Je Jeobá, Nʼainá xi tíjna ngʼajmi, kui Biblia kʼoa kao naxinandále síchjén nga tsoná: “Kui jebi je ndiaa. Ya titsomayao” (Is. 30:21). Jngo koya xi síchjén Jeobá kʼianga bándiaaná kui jmeni xi faʼa ya kjoajtíntsená xi jngo nichxin sʼejna. Tʼenelai yaoli nga tʼinkinóʼyai ngayeje xi kjoaʼa. Nda tasenñui kʼoa chótʼayajin jósʼin si̱chjáin jme xi kjoaʼa. Kʼoa chótʼayajin ijngokʼai kao yaniʼyali jmeni xi koa̱njinli. Kʼianga nitjosoán jotso kjoatéxomale Niná nda sʼe tokoán kʼoa likui kui kjoatsjoa xi tjín sonʼndele Na̱i kjenndóbʼakjáná (1 Ped. 3:16).