Kʼuínyasonjndá je énle Niná

1. Jmé choa̱ xi tsakʼéjnaná je pastro Pablo josʼin kitsoyason.

¹ Je pastro Pablo ñaki tjínjngo kon kʼianga i̱ kitsole je Timoteo: “Tinókjoayai tʼatsʼe Niná, tijngui xáli” (2 Tim. 4:5). Je Pablo jan kʼa nga kjin kikakóyason tje̱n nó 47 saʼnda nó 56. Kʼoa je libro xi tsʼe Hechos kjitʼa kʼoatso nga kitsoyason tojñani je énle Niná (Hech. 23:11; 28:23). Jósʼin chjénngilee ñá ndʼaibi.

2. Kʼianga xki̱ niʼya ʼmiyasoán, jméni xi koa̱n sʼiaan kʼianga nkjínsa chjota jtsaojiaan.

² Kʼianga xki̱ niʼya ʼmiyasoán. Kʼianga jtsaojiaan chjota xi nisañandiajinla ʼmiyale je énnda chjotse koaan kjaʼaí kjaʼaí ora koanngínnrʼoé ya niʼyale. Kʼoa tochale jtsaojiaan je xi nʼai ma kʼianga jemaxon kʼoa tsakʼiaje̱ nga xoto nga taingo. Machjénní nga chja̱koaa ninga tojngo chjota nga jngó jngó niʼya kʼoa nga nkjín kʼa kjuinkjasjee je chjota xi tsín tsaojiaan. Jméni xi koa̱n sʼiaan tsa ñaki tsín tsaojiaan je chjota. Koaan tsa jngo xo̱n si̱kasénlee kʼoa tsa teléfono kuinókjoalee.

3. Jñáni nga koa̱n kʼuínyasuin je énle Niná.

³ Kʼuínyasoán tojñani nga bitsomaa. Je choʼndale Jeobá bakóyale toʼya chjotani xi mele kjuinrʼoé “je xi ñaki kjoachjine ʼmi”. Sakʼoa ya tsoyale “ya yandiaa” kʼoa tsa yaje̱ “jña tjín ndi̱tsi̱n” (Prov. 1:20, 21). Kuinga si̱kjaʼaitsjensíñá jónʼia nga nyaon nyaon, a kuenta nʼia nga tjínnele chja̱koaa chjota je énle Niná tojñani nga titsomaa. A kʼoatinʼia jokisʼin Pablo nga “ñaki tsakʼénele yaole nga kinchja̱ya je énle Niná” (Hech. 18:5). Kʼiatsa jaon, kuijin xi tsonile nga tinitjosoán je xá xi kjinená nga kʼuínyasoán ngakjijnda je énle Niná (Hech. 10:42; 17:17; 20:20, 21, 24).

4. Jósʼin sínʼiojinná nga ʼmiyasoán kʼianga bʼetsoaa kʼoa nga nikjaʼaitsjenjiaan jmeni xi chotʼayá.

⁴ Tonga sakʼoa likui tso tokoán nga ʼmiyasoán, nga̱ ʼyañá jñani ñʼai maná kʼoa tsamaije̱ je kjoajkon síkinjená. Je Jeobá bení jokji tje̱n bichó nganʼioná (Sal. 103:14). Kʼianga kʼoamaná koaan kʼoétsʼoalee nga katatsjoáná je kjoanʼiojin xi machjénná (Hech. 4:29, 31). Kʼoa kʼianga chótʼayá nga toñá je Énle Niná koaan si̱kjaʼaitsjenjiaan jósʼin koasenkaoná je xi tichotʼayá nga ngisasa nʼio chjí jchatokoán je énnda chjotse (Filip. 3:8). Tsa kʼoasʼiaan ngisasa sʼe̱ná kjoanʼiojin nga kʼuínyasoán.

5. Jósʼin kʼoainganʼioá nga jngó jngoá nga katabitjoson je én xi tongini kitso je profeta Joel.

⁵ Je profeta Joel tongini kʼoakitso nga je nichxin nga kjesa faʼaijin kjoaxkónle Jeobá, je choʼndale tosi tonda kuitsoyason kʼoa likui tsjoáʼnde nga jme xi koatechjoale (Joel 2:2, 7-9). Kʼoasʼin kʼoénelee yaoná jokji tje̱n kuicho nganʼioná nga kʼuínyasoán, nga̱ kuichoka nichxin nga kjoetʼa xá jebi.